Ta vai mau parau tǎpǔ ta outou e nehenehe e tiaturi?
I TE matahiti 1893 ra, ua putuputu te hoê pǔpǔ e 74 taata aravihi i te pae totiale i te Faaiteiteraa Rahi i Chicago no te tauaparau no nia i te tau a muri aˈe. (Te itehia ra taua vahi ra i nia nei.) Ma te hiˈo 100 matahiti i mua, oia hoi te matahiti 1993, ua faahiti ratou i te tahi mau tohu i muri nei: “E rave rahi taata o te ora 150 matahiti.” “E iti mai te mau fare auri e eita e titauhia ia faataa.” “E faaohie-roa-hia te faanahoraa o te faatereraa, no te mea e aratai tia ˈtu te tiaraa teitei mau i te ohieraa.”
I te matahiti 1967 ra, ua tohu atoa te hoê buka Te matahiti 2000 (Beretane) e: “I te matahiti 2000, e riro paha te mau matini roro uira i te faatuea, i te pee, aore ra i te na nia ˈtu i te tahi mau aravihi i te pae feruriraa o te taata, e peneiaˈe atoa i te tahi o to ˈna mau aravihi no te faanehenehe e no te hamani.” “Te hamaniraa i te mau matini, e mea tano noa te hoo, o te rave hoi i te rahiraa o te mau ohipa i te fare . . . e au ra e o te opuaraa au roa ˈˈe ïa no te matahiti 2000.”
Te taa ê roa ra te oreraa te taata e nehenehe e faaite atea i te mau ohipa e tupu a muri aˈe, i te aravihi o te Atua. Ei hiˈoraa, a faaau na i te mau tohu i faahitihia mai nei e i te mea o ta te Bibilia i tohu fatata e 20 senekele i teie nei no nia i to tatou tau: “E riro te taata nei ei miimii, e nounou moni, e faaahaaha, e teoteo, e faaino, e faaroo ore i te metua, e mauruuru ore, e te viivii, e aroha ore, e tahemo parau au, e pari haavare noa, e haapao ore, e iria, e te au ore i te taata maitatai ra, e haavare, e mârô, e faateitei, e te hinaaro i te mau mea e navenave ai ra aore hinaaro i te Atua, e hohoˈa paieti hoi to ratou, o te puai râ o te reira ra, ua hunahia ïa ia ratou.”—Timoteo 2, 3:1-5.
Teie parau tohu a te Bibilia no nia i te “anotau hopea,” o te hoê noa ïa o te mau parau tohu e rave rahi tei tupu i to tatou nei tau. Ua tohu te Parau a te Atua e i roto i “te tapao” o te vairaa mai o Iesu, e tupu atoa te tamaˈi na te ao nei, te oˈe, te maˈi, te aueueraa fenua, e te pororaa na te ao nei o te parau apî maitai o te Basileia o te Atua.—Mataio 24:3-14; Luka 21:11.
No te papu hapa ore o te mau parau tǎpǔ a te Atua, ua turaihia te hoê taata papai i te Bibilia ia parau tau senekele i teie nei e: “Aore roa te hoê o te mau mea maitatai ta to outou Atua ta Iehova i parau ai ia outou ra i ore i te tia; ua hope roa i te tupu ia outou, aore roa te hoê i toe.”—Iosua 23:14.
Oia, e nehenehe tatou e tiaturi e fatata te mau parau tǎpǔ atoa a te Atua i te tupu. E faaore te Basileia o te Atua i te maˈi, te ohipa ino, te raau taero, te poia, e te tamaˈi—e riro te fenua taatoa ei paradaiso. (Salamo 37:10, 11, 29; Apokalupo 21:3, 4) E nehenehe outou e tiaturi e e tupu teie parau tohu! No ǒ mai hoi i to tatou Poiete ra, o “te ore e tia ia haavare.”—Tito 1:2; a faaau e te Hebera 6:13-19.
[Faaiteraa i te fatu o te hohoˈa i te api 32]
Cleveland State University Archive