Te mau animala paiuma aravihi o te mau mato

UA VAI na na te hiti tooa o te râ o te Miti Pohe, te oire no tahito ra e te medebara e haaati ra ia ˈna piihia Ene-gedi. Ua riro te mau eˈa mato i taua vahi ra e te mau vahi topa tarere ei vahi nohoraa maitai roa no te puaaniho matô o te Fenua Tǎpǔhia, mai teie mau puaaniho e itehia ra i ǒ nei.

Tei rotopu teie animala avae etaeta maitai i te mau ohipa maere o te poieteraa o te animala. E iriti anaˈe na i ta tatou Bibilia e e tuatapapa anaˈe i teie animala faahiahia roa.

“Te mau mouˈa teitei ra, no te puaaniho oviri ïa”

O ta te papai salamo ïa i himene. (Salamo 104:18) Ua ineine maitai te mau puaaniho matô no te ora i te mau vahi teitei! Mea aravihi roa ratou, e nehenehe ratou e ouˈauˈa na nia i te mau vahi taratara ma te papu e te vitiviti rahi. I te tahi pae, maoti ïa te huru hamaniraa o to ratou mau maiuu. E nehenehe te area i rotopu i te mau maiuu e amaha ˈtu â i raro aˈe i te teiaha o te puaaniho, mea na reira ïa taua animala ra e mau papu ai ia tia oia aore ra ia haere oia na nia i te mau mato ôaôa titapou.

E animala aifaito maere roa te mau puaaniho matô. E nehenehe ratou e ouˈa atea e e tau atu ai i nia i te hoê mato e ere i te mea aano roa e ô noa to ratou e maha avae. I te hoê taime, ua hiˈopoa te taote ihiora ra o Douglas Chadwick i te tahi atu huru puaaniho matô, o tei faaohipa i to ˈna aifaito ia ore oia ia mau noa i nia i te hoê mato ôaôa roa no te hoˈi i muri. Te na ô ra oia e: “I muri aˈe i to ˈna hiˈoraa ˈtu i te tahi atu mato tau 120 metera i raro mai, ua haapapu maitai atura te puaaniho i to ˈna nau avae no mua, taahi atura to ˈna nau avae no muri na te aoao o te mato, ia haere roa to ˈna ohure na nia ˈˈe i to ˈna afii, mai te huru ra e te faaohu ra o ˈna ia ˈna. A tapea noa ˈi au i to ˈu aho, ua tamau noa te puaaniho e tae noa ˈtu i te taime a tuu ai oia i to ˈna nau avae no muri i raro, ia nehenehe oia e hiˈo i te eˈa e mea na reira oia i te haereraa mai.” (National Geographic) Eita ïa e maerehia i piihia ˈi te mau puaaniho matô “te mau animala paiuma aravihi o te mau mato”!

‘Ua ite anei oe e afea te puaaniho matô e fanau ai?’

E animala mamahu roa te puaaniho matô. Mea au aˈe na ratou e faaatea ê ia ratou i te taata. Oia mau, mea fifi no te taata ia tapiri atu no te hiˈopoa ia ratou i roto i to ratou huru oviri. No reira te Fatu o “te mau puaa atoa e ua tausani i nia i te mau mouˈa ra” e nehenehe ai e ani ma te tano i te taata ra o Ioba e: “Ua ite [anei] oe i te fanauraa o te puaaniho matô ra?”—Salamo 50:10; Ioba 39:1.

Na roto i te ite faataa-ê-na-hia no ǒ mai i te Atua ra, e ite te puaaniho matô ufa e afea oia e fanau ai. E imi haere oia i te hoê vahi paruruhia e e fanau mai oia hoê aore ra e piti fanauˈa, mea pinepine i te hopea avaˈe Me aore ra Tiunu. E etaeta maitai te avae o teie mau fanauˈa apî i roto tau mahana noa.

‘Mai te aili te hinaaro e mai te iale te nehenehe’

Ua faaitoito te Arii paari ra o Solomona i te mau tane e: “Ia oaoa oe i te vahine o te apîraa ra. Ia riro oia mai te aili te hinaaro! e mai te iale te nehenehe!” (Maseli 5:18, 19) E ere te auraa e te haafaufaa-ore-hia ra te mau vahine. E au ra e te parau ra o Solomona no nia i te haviti, te ieie, e te tahi atu mau huru faahiahia o teie mau animala.

To rotopu te puaaniho matô i “te mau [“nephe,” MN] ora” o te haapapu rahi ra i te paari o te Poiete. (Genese 1:24, 25) Aita anei tatou e oaoa ra e ua tuu mai te Atua i te mau animala faahiahia e rave rahi roa ati aˈe ia tatou nei?

[Faaiteraa i te fatu o te hohoˈa i te api 24]

Courtesy of Athens University