Te pohe o Iesu — Eaha to ˈna auraa no outou?
“TE MAU nuu atoa tei ore i tono-aˈenei-hia, te mau pahi atoa tei ore i hamani-aˈenei-hia, te mau faatereraa atoa tei ore i mana aˈenei e te mau arii atoa tei ore i faatere aˈenei, aita ratou paatoa i ohipa mai i roto i te oraraa o te mau taata mai teie taata anaˈe, e aita ˈtu taata mai te reira te huru.” Mai te reira to te hoê taata papai, o James Francis, faahitiraa i te parau no nia ia Iesu.
Noa ˈtu e e rave rahi huru hiˈoraa no nia ia Iesu i roto i te ao nei, area te Bibilia, te faaite maira ia ˈna mai te Tamaiti a te Atua e te faataa ra ia ˈna mai te hoê taata o tei faaite i te hoê here tei tapae roa i te faatusiaraa ia ˈna iho. Ua faaite Iesu mea nafea to ˈna faaite-mau-raa i to ˈna here, a parau ai oia no ˈna iho e: “Aita atoa hoi te Tamaiti a te taata nei i haere mai ia tavinihia to ˈna, ei tavini râ, e ia horoa i to ˈna ora ei hoo no te taata e rave rahi.” — Mataio 20:28.
Eaha mau na taua hoo ra? No te aha e mea faufaa? O vai tei hoohia mai? I te pae hopea, eaha mau na te auraa o te pohe o Iesu no outou?
Eaha te hoo?
Te hoê hoo, o te hoê ïa mea o te faatiamâ. Horoa i te hoê hoo no te hoê taata, aore ra hoo faahou mai ia ˈna, oia hoi te auraa te faaoraraa ia ˈna mai te vai-tîtî-raa aore ra te raveraa e ia ore oia e roohia i te hoê utua ma te aufau i te hoê tino moni. I te pae varua, te auraa o te parau ra “hoo”, oia hoi te faaoraraa i te hara e i te utua ta ˈna e horoa mai. Ua pohe o Iesu no te hoo faahou mai ia tatou. Ua papai te aposetolo Paulo e: “E utua te pohe no te hara, area te ora mure ore ra, e mea horoa-noa-hia mai ïa e te Atua i roto i to tatou ra Fatu ia Iesu Mesia.” — Roma 6:23.
Te faatuati nei te mau Papai i te aufauraa i te hoê tino moni no te hoo faahou mai, i te aufauraa i te hoê hoo. Te taiohia ra i roto i te Salamo 49:6-9 e: “Na te feia i tiaturi i ta ratou ra taoˈa o tei faaahaaha i te rahiraa o ta ratou ra taoˈa; e ore roa e tia i te taata ia faaora i tana taeae, e aita a ˈna hoo ia hopoi i te Atua e noaa mai ai oia ra: (i te rahi hoi o te hoo ia ˈna e ora ˈi, e ore roa ˈtu ïa e taea:) ia ora noa mai â oia e a muri noa ˈtu, e eiaha roa ia tae i te tahuti.” Ua riro te hoo ei faaoraraa ravehia e te Atua e aita râ na te hoê noa ˈˈe taata tia ore.
No te aha e mea faufaa te hoo
Mea faufaa roa te hoo no te mea ua hara to tatou metua matamua ra o Adamu. I te hoê â taime, ua erehia e ana i te ora mure ore e te tia, ua faautuahia oia i te pohe, o tei tuea hoi i te parau-tia, e ua pohe roa oia (Genese 2:15-17; 3:1-7, 17-19; 5:5). No te mea e o tatou te huaai, ua roo-atoa-hia ïa tatou i te hara e te pohe. “E teie nei, no te taata hoê ra, i ô mai ai te ino i te ao nei, e no te ino hoi te pohe; e ua taea-atoa-hia te taata atoa e te pohe i te mea ua hara paatoa.” (Roma 5:12). Oia mau, ‘e hope te taata i te pohe ia Adamu’. (Korinetia 1, 15:22.) Mea tano atura ïa to te papai salamo ra o Davida parauraa e: “Inaha, i fanau mai au ma te hara! e i tôhia vau e tau metua vahine ma te ino.” — Salamo 51:5.
E tia ia faaorahia te taatoaraa o te huaai a Adamu i te utua o te hara e o te pohe, ia nehenehe ratou e ora e a muri noa ˈtu. Eita te mau taata tia ore e nehenehe e horoa i te hoo hinaaro-mau-hia, ua horoa râ o Iehova i te reira ma te here na roto i te arai o Iesu Mesia. Teie nei râ, eaha ïa tei hoohia mai? A hara ˈi o Adamu, ua erehia e ana i te oraraa mure ore e te tia, e te mau tiaraa e te mau tiaturiraa atoa e tuati ra i te reira. Mai te reira te huru te mea i hoohia maoti te tusia taraehara a Iesu.
Eaha te nehenehe e ravehia maoti te hoo
I te mea e te tairi nei te pohe, utua o te hara, i te mau taata, ua tano ïa te reira i te parau-tia. Ua riro ïa te hoo ei faaiteraa i te aroha e te maitai rahi o te Atua. I to ˈna poheraa, ua faarue o Iesu i to ˈna ora taata tia, e te mau tiaraa e tiaturiraa atoa o tei tuati i taua ora ra, e aita oia i rave faahou i te reira, no te mea e aita oia i faatia-faahou-hia ei taata iˈo e te toto, ei poieteraa pohe ore râ i te pae varua (Korinetia 1, 15:50; Petero 1, 3:18). Ua vai noa mai ïa te mana taraehara o te ora taata ta Iesu i faatusia, to ˈna atoa faufaa ei hoo.
Tei roto Iesu, taata aita e hara, i te hoê â huru tupuraa e to Adamu i te omuaraa, a vai taata tia noa ˈi oia. I te mea e ua auraro noa oia i te Atua e tae noa ˈtu i te pohe, ua faatoroahia oia ei Tahuˈa Rahi, e ua pûpû oia i roto i te raˈi te faufaa o ta ˈna tusia taata tia (Hebera 9:24-26). I te mea e ua farii te Atua i taua hoo taraehara ra, ua nehenehe atura ïa Iesu e hoo faahou mai i te huaai faaroo a Adamu i te hara e i te pohe ma te faaohipa i te faufaa o ta ˈna tusia no ratou (Korinetia 1, 6:20; 7:23; Ioane 1, 2:1, 2). E no reira, ua “riro atura oia [Iesu] ei tumu no te ora mure ore no te feia atoa e faaroo ia ˈna ra”. (Hebera 5:8, 9.) E nehenehe atura ïa taua mau taata ra e fariihia ei mau taata tia na te Atua maoti ta ˈna Tamaiti.
O vai tei hoohia mai?
I teie nei, o vai teie e faufaa nei i te hoo? Te mau taata e tiaturi ra i taua faanahonahoraa ra e o te vaiiho nei e ia arataihia ratou e te Atua. Mai te peu e e tavini ratou ia ˈna ma te haapao maitai, e nehenehe ratou e faaorahia mai i te hara e ta ˈna utua, te pohe, e e roaa i te ora mure ore. — Ioane 17:3.
Ua maiti te taata matamua i te faaroo ore, e tiamâraa hoi to ˈna no te auraro i te Atua aore ra eita. ‘E ere hoi o Adamu tei vare na’, ua vai noa mai râ oia ei taata o te hinaaro mau e rave i te hara e tae noa ˈtu i to ˈna pohe (Timoteo 1, 2:14). Eaha ˈtura ïa te roohia mai i nia i to ˈna huaai? E nehenehe atura ïa ratou e maiti i te tavini i te Atua i te maitai aˈe o ta ratou mau tutavaraa tia ore, aore ra i te faaroo ore atu i to ratou Poiete. — Iosua 24:15.
Ua haere mai Iesu no te “horoa i to ˈna ora ei hoo no te taata e rave rahi”. (Mareko 10:45.) O vai ïa te feia tei faaitehia na roto i te parau ra “taata e rave rahi”? Aita ïa o Adamu i rotopu ia ratou, no te mea ua maiti taua taata tia ra, ma te ore e faahepohia, i te faaroo ore i te Atua e ua riro mai oia ei taata o tei hinaaro mau e rave i te hara e o tei ore i tatarahapa tae noa ˈtu i to ˈna poheraa. Eaha ˈtura ïa te nehenehe e parauhia no to ˈna utuafare rahi o te tahi tau miria taata? Na roto i te hoê hoo tuea, te faaore nei Iesu Mesia i te utua, no ǒ mai i te metua ra, tei topa i nia i te utuafare a Adamu (hiˈo Timoteo 1, 2:5, 6). Te faaohipa nei Iesu i te faufaa o te hoo taraehara ta ˈna i aufau, no te “taata e rave rahi”, oia hoi te feia faaroo.
I rotopu i te feia tei hoohia mai, te vai ra te mau ati Iuda e te Etene, oia hoi te mau taata no te mau nunaa. Te parau nei o Paulo e: “E teie nei, mai te taata atoa i taea i te utua faahapa i te hara a te taata hoê ra, ua taea-atoa-hia te taata atoa i te tia ia ora, i te parau-tia a te taata hoê ra.” (Roma 5:18). Ma te pohe i nia i te hoê pou, ‘ua faaora mai te mau ati Iuda e te Mesia i te faaino a te ture oia i faarirohia ei faaino no tatou; ua oti hoi i te papaihia e, O tei rîhia i nia i te raau ra, ua faaino-anaˈe-hia ïa.’ (Galatia 3:13; Deuteronomi 21:23). Area no te mau Etene, te parauhia ra ïa no ratou i roto i te Roma 4:11, i reira e taiohia ˈi e, a vai peritome ore noâ ˈi oia, ua riro mai o Aberahama, tupuna no te mau ati Iuda, ei “metua no te peritome ore atoa i faaroo ra”. E fanaˈo te feia faaroo ati iuda e te feia faaroo etene i te tusia taraehara a Iesu.
E faaite te haerea o te taata tataitahi mai te peu e te fanao ra anei oia i te tusia o Iesu aore ra aita. Mai ia Adamu, eita e horoahia te faufaa o te hoo aore ra te ora mure ore no te feia e hinaaro mau ra e rave i te ino. Ua parau te Mesia e: “O tei faaroo i te Tamaiti ra e ora mure ore to ˈna; e o tei ore i faaroo i te Tamaiti ra, e ore oia e ite i te ora; te vai ra ïa te riri o te Atua i nia iho ia ˈna.” (Ioane 3:36). E nehenehe atoa, maoti te hoo, e faatia faahou te feia pohe ta te Atua e haamanaˈo ra (Ioane 5:28, 29). Mai te peu e e faaite ratou i te auraro e te mauruuru, e riro ïa te faaohiparaa i te faufaa o te hoo ei ora mure ore no ratou. Area te feia e ora nei i to tatou nei tau, i te “anotau hopea”, e nehenehe e roaa ia ratou te ora mure ore ma te ore roa e pohe. — Timoteo 2, 3:1-5; Mataio 24:3-14, 21, 34; Ioane 11:25, 26.
Mau tumu no te mauruuru
E tia i te feia atoa e hinaaro nei e fanaˈo i te hoo, ia faaite i te mauruuru no taua faanahonahoraa ra. Mea tano iho â ïa e ia turai te reira i te mauruuru. Aita anei te Atua e te Mesia i faaite i te hoê here rahi no te horoa i te reira?
Oia mau, ua faaite te Atua ra o Iehova i te hoê here rahi ma te horoa i te hoo na roto i te arai o te pohe o ta ˈna Tamaiti. Ua parau Iesu e: “I aroha mai te Atua i to te ao [o te mau taata], e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore. Aore hoi te Atua i tono mai i ta ˈna Tamaiti i te ao nei e faahapa mai i to te ao, ia ora râ to te ao ia ˈna.” (Ioane 3:16, 17). Eita anei e tia ia outou ia faaite i to outou mauruuru no taua faaiteraa ra o te here o te Atua?
A feruri na i te hohonuraa o te here ta Iehova i faaite i to ˈna horoaraa mai i te hoo. Na mua ˈˈe oia i tonohia ˈi i nia i te fenua nei no te ora e no te pohe i roto i to ˈna tiaraa taata tia, ua vai aˈena te Tamaiti a te Atua. O o ˈna “tei fanau na i te mau mea atoa i hamanihia ra”, e na roto i to ˈna arai “i hamani[hia ˈi] i te mau mea atoa nei, o to te raˈi, e to te fenua nei, o tei itea ia hiˈo ra e tei ore i itea”. (Kolosa 1:13-16.) Ua here Iehova i ta ˈna Tamaiti ma te hohonu. Teie râ, aita te Atua i afai noa mai i nia i te fenua nei hoê o te mau mirioni melahi tia. Aita, no te rahi o to ˈna here no te mau taata, ua tono mai oia i ta ˈna Tamaiti fanau tahi.
A feruri atoa na i te here hohonu ta Iesu i faaite ia au i te hoo. A vai noa mai ai oia ei poieteraa i te pae varua i nia i te raˈi, ua riro oia ei ‘taata rave ohipa maitai’ a te Atua. Oia mau, ‘tei te mau tamarii a te taata ra to te Tamaiti a te Atua oaoaraa’. (Maseli 8:22-31.) Teie nei râ, e ere i te mea ohie na ˈna ia faarue atu i te raˈi, i reira o ˈna i ora ˈi i roto i te mau huru tupuraa maitai e to ˈna Metua e te tahi tau muriadi melahi tia. Mai to ˈna tiaraa faahiahia mau i nia i te raˈi, ua nehenehe te Tamaiti a te Atua e hiˈo i te huru tupuraa peapea mau e vai nei i nia i te fenua nei e te mau faainoraa ta te hara e te pohe e rave ra i rotopu i te mau taata. Ua ite atoa o ˈna e e tia ia ˈna ia pohe no te horoa i te hoo. Noa ˈtu â, ua “rave atura i to te tavini ra huru, i te fanauraa mai ma te huru o te taata nei. E (...) ua faahaehaa oia ia ˈna iho, i te haapao-maite-raa e tae noa ˈtura i te pohe”. No to ˈna haapao maitai, ua faatia-faahou-hia Iesu no te oraraa hanahana i nia i te raˈi (Philiphi 2:5-11). Auê hoi here ta ˈna i faaite ma te horoa i te hoo! Te mauruuru anei ra outou no te mea ta ˈna i rave?
Eaha ïa ta outou e rave?
I te hoê mahana, ua faaite te hoê ekalesiatiko beretane ra o Richard de Chichester (i te area matahiti 1198-1253) i to ˈna hinaaro e ia nehenehe te mau taata e te mau vahine ia “ite maitai aˈe e o vai o Iesu Mesia, ia here hau atu â ia ˈna e ia apee maite atu ia ˈna”. Ma te papu maitai, ua riro te tusia taraehara a Iesu ei tumu maitai no te ite ia ˈna, no te here ia ˈna e no te apee ia ˈna.
Ahiri e aita te hoo, e pohe noa ïa te mau taata hara mai ia tatou nei e aita e tiaturiraa, no te mea “to te pohe nei tara, o te hara ïa”. (Korinetia 1, 15:56.) Eaha te tia ia outou ia rave no te ape i te pohe e tiai maira ia outou, outou tei patiahia e te hara? E tia ia outou ia haapii i te mea ta te Atua i faanaho no te ora na roto i te arai o Iesu Mesia, e i muri iho, ia faaite e e tiaturi outou i te hoo. Na roto i teihea ravea? Ma te faaite i te hoê mauruuru ma te aau rotahi, ma te pûpû ia outou no te Atua e ma te paraparau i te tahi atu mau taata no nia i taua faanahoraa faahiahia o te nehenehe e horoa mai i te ora.
Mai te peu e e na reira outou, e nehenehe outou e itehia i roto i te “feia rahi roa” o te mau taata e “haere mai mai roto mai i te ati rahi ra, e ua horoi i to ratou ahu, e ua teatea, i te toto o te Arenio ra”, oia hoi o Iesu Mesia (Apokalupo 7:9, 14). Te atuatu nei taua mau taata ra i te tiaturiraa e ora e a muri noa ˈtu i nia i te hoê fenua tei faarirohia ei paradaiso (Luka 23:43). Oia, e nehenehe outou e ô i roto i taua rahiraa taata oaoa ra mai te peu e mea faufaa mau te pohe o Iesu no outou.
[Hohoˈa i te api 4]
Tei roto Iesu, taata aita e hara, i te hoê â huru tupuraa e to Adamu i te omuaraa, a vai taata tia noa ˈi oia.
[Hohoˈa i te api 6]
Te pohe o Iesu — Te ite mau ra anei outou i to ˈna auraa?