Eaha to outou manaˈo no nia i te hara?

“AITA e hara i roto ia outou, aita e mauiui i roto ia outou; o outou te pu rahi o te mana puai hope.” Ua faahiti te philosopho Hindu tuiroo ra o Vivekananda i teie nei mau parau, i to ˈna faataaraa i te hoê irava o te hoê buka moˈa Hindu, te Bhagavad Gita. Na roto i te faahitiraa i te papai moˈa ra Vedânta, teie ta ˈna e parau ra: “Te hape rahi roa ˈˈe, o te parauraa ïa e mea paruparu outou, e taata hara outou.”a

Teie râ, e parau mau anei e aita e hara i roto i te taata? Inaha, eaha ta te hoê taata i noaa mai i to ˈna fanauraahia mai? “No ǒ mai [anaˈe] te huru pae tino i te mau tupuna,” o ta te hoê orometua faaroo Hindu ra o Nikhilananda ïa e parau ra. Na “te mau ohipa [ta te hoê taata i rave] i roto i to ˈna mau oraraa na mua ˈtu” e faataa i te tahi atu mau huru. Ia au i te parau a Vivekananda, “na outou iho e hamani i to outou oraraa faataahia.” Aita te faaroo Hindu e haapii ra e ua taeahia te taata i te hara.

Aita atoa te manaˈo e ua taeahia te taata i te hara e vai ra i roto i te mau faaroo a Zoroastre, Shinto, a Confucius, e a Buddha. I roto atoa i te mau faaroo ati Iuda kerisetiano, o tei haapii na hoi ei peu tutuu e ua taeahia te taata i te hara, te taui ra te huru feruriraa o te taata no nia i te hara. I teie mahana, te rahi noa ˈtura te taata o te ore e manaˈo ra e e feia hara ratou.

“Aita te haava manaˈo no teie tau e faaitoito ra i te faahaparaa i te pae morare; aita iho â râ oia e faaitoito ra i te faahaparaa ia ˈna iho,” o ta te taata tuatapapa i te faaroo ra o Cornelius Plantinga Jr ïa e parau ra. E tia ia faahapa, i te hoê pae, i te mau ekalesia a te Amuiraa faaroo kerisetiano no to ratou haafaufaa-ore-raa i te parau no te hara. “Eiaha e haere i te fare pure mai te peu e e hinaaro outou e faaroo i te parau no te hara,” o ta te hoê perepitero no te Fare haapiiraa tuatoru Duke ïa e parau ra. E ia au i te parau a Plantinga, i te pae rahi, te faahiti nei te tahi mau ekalesia i te parau o te hara no nia noa i te mau fifi i te pae totiale.

Parau mau roa, ua rahi te mau ati i te pae totiale i teie nei tau. Te tupu rahi nei te haavîraa uˈana, te taparahiraa taata, te tamaˈi, te aroraa nunaa, te raau taero, te haerea tia ore, te faaheporaa, e te haavîraa i te mau tamarii. Inaha, ua piihia te senekele 20, te hoê o te mau senekele haamanii toto rahi roa ˈˈe, o ta te huitaata i ite aˈenei. Te vai atoa ra te oto e te mauiui no roto mai i te maˈi, te ruauraa, e te pohe. O vai ïa taata e ore e hinaaro e tiamâ mai i te mau fifi rahi e vai ra i roto i te ao nei i teie mahana?

No reira, eaha to outou manaˈo no nia i te hara? Ua taeahia anei te taata i te hara? Eita anei tatou e tiamâ mai i te oto e te mauiui? Na te tumu parau i muri nei e tuatapapa i teie mau uiraa.

[Nota i raro i te api]