Epaphera—“E tavini haapao maitai na te Mesia”
NA VAI i haamau i te mau amuiraa kerisetiano no Korinetia, no Ephesia, e no Philipi? E pahono oioi mai paha outou e: ‘Na Paulo, “te aposetolo a te Etene.”’ (Roma 11:13) Mea tano.
Teie nei râ, na vai i haamau i te mau amuiraa no Kolosa, no Hierapoli, e no Laodikea? Noa ˈtu e aita tatou i papu, e mea ra e na te hoê taata o Epaphera te iˈoa. Noa ˈtu râ, e hinaaro paha outou e ite hau atu â no nia i teie nei taata poro evanelia, i te mea hoi e ua piihia oia “e tavini haapao maitai na te Mesia.”—Kolosa 1:7, MN.
E taata poro evanelia no te Peho o Lycus
Epaphera, e iˈoa haapotohia teie no Epapherodito. Eiaha râ e anoi ia Epaphera e te Epapherodito no Philipi. No Kolosa o Epaphera, te hoê o na pu e toru o te mau amuiraa kerisetiano i te Peho o Lycus, i Asia Iti. Tau 18 kilometera te atea mai Laodikea i Kolosa e, 19 kilometera mai Hierapoli, i te tuhaa fenua no tahito ra o Pherugia.
Aita te Bibilia e faaite roa ra e mea nafea te parau apî maitai o te Basileia i te taeraa i Pherugia. Teie râ, tei Ierusalema atoa to Pherugia i te mahana o te Penetekose 33 o to tatou tau, peneiaˈe no Kolosa mai vetahi o ratou. (Ohipa 2:1, 5, 10) I roto i te taviniraa a Paulo i Ephesia (i te area matahiti 52-55 o to tatou tau), ua porohia na taua vahi ra ma te itoito e te aravihi roa, “ite aˈera” eiaha to Ephesia anaˈe “to Asia atoa [râ] te ati Iuda e te Heleni i te parau a te Fatu ra.” (Ohipa 19:10) E au e aita o Paulo i poro i te parau apî maitai ati aˈe te Peho o Lycus, i te mea e aita te feia e rave rahi o tei riro mai ei mau Kerisetiano i taua vahi ra, i ite aˈenei ia ˈna.—Kolosa 2:1.
Ia au i ta Paulo i parau, na Epaphera i haapii atu i to Kolosa i “te aroha mau o te Atua.” I to Paulo piiraa i teie hoa rave ohipa e “e tavini haapao maitai na te Mesia ia tatou na,” te faaite ra ïa te reira e e taata poro evanelia itoito o Epaphera i taua tuhaa fenua ra.—Kolosa 1:6, 7.
Ua tapitapi rahi te aposetolo Paulo e te taata poro evanelia atoa o Epaphera i te maitairaa pae varua o to raua mau hoa faaroo i te Peho o Lycus. Ei “aposetolo a te Etene,” ua oaoa mau â paha o Paulo i te faarooraa i te parau apî e ua haere ratou i mua. Oia mau, mea na roto ia Epaphera to Paulo faarooraa i te huru pae varua o to Kolosa.—Kolosa 1:4, 8.
Te faatiaraa a Epaphera
No te mau fifi ino roa ta to Kolosa i faaruru, ua tere roa mai o Epaphera i Roma, ma te opuaraa taa ê e tauaparau no nia i teie mau fifi e o Paulo. Papu maitai, na roto i te faatiaraa huˈahuˈa a Epaphera, ua turaihia o Paulo ia papai e piti rata na taua mau taeae ra, o ta ˈna hoi i ore i matau. Na to Kolosa ïa te hoê rata. Ua haponohia te piti o te rata, e au e aita i faahereherehia, na to Laodikea. (Kolosa 4:16) E mea tano ia manaˈo e te mau parau i roto i taua nau rata ra, ua papaihia ïa no te pahono atu i te mau hinaaro o taua mau Kerisetiano ra, i itehia e Epaphera. Eaha te mau hinaaro ta ˈna i ite? E eaha ta te reira e faaite maira ia tatou no nia i to ˈna huru?
E au ra e te faaite ra te rata i to Kolosa e ua haapeapea o Epaphera ia fifihia taua mau Kerisetiano i Kolosa ra e te mau haapiiraa philosopho etene, mai te haapaeraa i te mau mea oaoa o te oraraa, te peu hiˈohiˈo, e te peu haavare idolo. Hau atu â, ua mana paha te haapiiraa ati Iuda e haapae i te maa, e e haapao i te tahi mau mahana, i nia i vetahi mau melo o te amuiraa.—Kolosa 2:4, 8, 16, 20-23.
I to Paulo papairaa i teie mau tumu parau, te faaite maira ïa te reira e ua vai ara e ua haapao o Epaphera i te mau hinaaro o to ˈna mau hoa kerisetiano. Ua tapitapi oia ma te here no to ratou maitai pae varua, ma te ite i te mau atâtaraa o te huru tupuraa e haaati ra ia ratou. Ua ani o Epaphera i te mau aˈoraa ia Paulo, e tapao faaite ïa e taata haehaa oia. Ua hinaaro paha oia i te mau aˈoraa a te hoê taata aravihi aˈe. Noa ˈtu râ, ua ohipa o Epaphera ma te paari.—Maseli 15:22.
E taata o tei haafaufaa i te pure
Teie ta Paulo e parau ra i te pae hopea o te rata ta ˈna i hapono na te mau Kerisetiano no Kolosa: “O Epaphera, e tavini no te Mesia, no ǒ na ia outou, te aroha ˈtu nei ia outou, e te tautoo-maite-raa i te pure ia outou aita e faaea, ia mau maite â outou ma te nehenehe, e te î i te mau hinaaro atoa o te Atua ra. Ei ite hoi au no ˈna, e itoito rahi to ˈna ia outou, e to Laodikea, e to Hierapoli.”—Kolosa 4:12, 13.
Oia, a riro ai oia ei “hoa tapea-atoa-hia” no Paulo i Roma, ua manaˈonaˈo noa o Epaphera i to ˈna mau taeae here no Kolosa, no Laodikea, e no Hierapoli, e ua pure oia no ratou. (Philemona 23) Oia mau, ua “ati” aore ra ua aro oia no ratou i roto i te pure. Ia au i te taata ite ra o D. Edmond Hiebert, te faaite ra te taˈo Heleni i faaohipahia i ǒ nei i “te hoê ohipa itoito e te faatusia,” te hoê mea mai te “mauiui oto” i te pae feruriraa ta Iesu Mesia i faaruru a pure noa ˈi oia i roto i te ô i Getesemane ra. (Luka 22:44) Ua hiaai uˈana o Epaphera e ia mau maite to ˈna mau taeae e mau tuahine pae varua, e ia noaa ia ratou te tiaraa paari kerisetiano tia. Auê ïa haamaitairaa no te amuiraa teie huru taeae, e feruriraa pae varua to ˈna!
I te mea hoi e te piihia ra o Epaphera te hoê “taetaeae tavini here,” papu maitai e ua riro oia ei taata herehia e te mau hoa kerisetiano. (Kolosa 1:7) Ia nehenehe anaˈe, e tia i te mau melo atoa o te amuiraa ia faaite rahi i te mahanahana e te here. Ei hiˈoraa, e nehenehe e haapao ia vetahi ê na roto i te tautururaa i te feia maˈi, te mau ruhiruhia, aore ra i vetahi ê e hinaaro taa ê to ratou. Te vai ra paha te mau hopoia taa ê e rave i roto i te amuiraa, aore ra e nehenehe paha e turu i te mau paturaa teotaratia e opuahia ra.
Ua riro te pureraa no vetahi ê, mai ia Epaphera, ei hoê huru taviniraa moˈa ta te taatoaraa e nehenehe e rave. E nehenehe e faahiti i roto i taua mau huru pure ra i te tapitapi no te feia haamori ia Iehova, e faaruru ra i te mau atâtaraa aore ra te mau fifi huru rau, i te pae varua anei aore ra i te pae tino. Na roto i te tautoo-maite-raa ma te itoito mai teie te huru, e nehenehe tatou e riro mai ia Epaphera. E nehenehe tatou tataitahi e fanaˈo i te haamaitairaa taa ê e te oaoa e riro ei “taetaeae tavini here” i roto i te fetii o te mau tavini haapao maitai a Iehova.