‘O te Atua ta ˈu e tiaturi’

I TEIE tau “ati rahi,” te rahi noa ˈtura te mau tamataraa e te mau faateimaharaa. Ei hiˈoraa, e tamatahia paha to tatou haerea tia i te vahi raveraa ohipa. E tamatahia paha to tatou haerea viivii ore e te mau hoa haapiiraa. E te tamata-pinepine-hia ra to tatou taiva ore e te hoê ao viivii i te pae morare.—Timoteo 2, 3:1-5.

Ua ora atoa na te taata papai Bibilia ra o Asapha i te hoê tau e mea rahi te ino. Ua faaahaaha atoa vetahi mau taata o to ˈna ra tau i to ratou haerea paieti ore. “I haaatihia ˈi ratou i te teoteo mai te fifi ra,” o ta Asapha ïa i papai. “E ua vehîhia ratou e te hamani ino ra mai te ahu ra. Te tâhitohito ra ratou ma te parau iino; te teoteo ra ratou i te parau hamani ino ra.” (Salamo 73:6, 8) E haerea matauhia anei teie?

No te feia e hinaaro ra e rave i te maitai, e mea hepohepo roa, e mea haaparuparu atoa teie huru haerea. “E ati hoi to ˈu e rui noa ˈtu te mahana,” o ta Asapha ïa i autâ. “E mea huru noaa ore ïa ia ˈu.” (Salamo 73:14, 16) Teie atoa paha to outou manaˈo, eiaha râ e haaparuparu! Ua nehenehe o Asapha e faaruru i te ino i to ˈna ra tau, e e nehenehe atoa ïa outou. Nafea râ?

Ua taa ia Asapha e eita te parau-tia mau e itea mai i raro aˈe i te faatereraa tia ore a te taata. (Salamo 146:3, 4; Maseli 17:23) No reira, maoti i te haamâuˈa i to ˈna taime faufaa roa, to ˈna puai, e ta ˈna mau faufaa, ma te tamata i te haapae i te mau mea iino atoa ati aˈe ia ˈna, ua tiatonu oia i nia i to ˈna mau taairaa e te Atua. Teie ta Asapha i parau: “E mea maitai râ ia ˈu ia haafatata ˈtu i te Atua: ua tiaturi au i te Fatu ra ia Iehova.”—Salamo 73:28.

I teie mahana, te fanaˈo pinepine nei te feia e rave ra i te mau ohipa tapihoo tia ore, i te mau faufaa materia. E rave rahi paha teie e faaahaaha nei i to ratou haafaufaa-ore-raa i te mau ture morare a te Atua. Eita râ ratou e manuïa noa e a muri noa ˈtu. Teie ta Asapha i faaite: “Ua tuuhia ratou e oe i te vahi paia; ua taora-taue-hia ratou e oe ia pohe roa ˈtu.”—Salamo 73:18.

Oia, i te taime faataahia e te Atua, e faaore-roa-hia te ohipa haavarevare, te haavîraa uˈana, e te ohipa taviri, e te tahi atu â mau ohipa paieti ore o ta te mau Kerisetiano mau e tia ia haapae. Te tǎpǔ nei te Bibilia e: “E riro hoi te feia hamani ino ra i te tâpû-ê-hia, o te feia râ i tiaturi ia Iehova ra, no ratou ïa te fenua.” (Salamo 37:9) A tiai noa ˈtu ai, ia haavevo ïa tatou i te mau parau a te papai salamo: “O Iehova tau pǎpǎ, e tau pare, e tau ora, tau Atua, tau mato, ta ˈu e tiaturi nei.”—Salamo 18:2.