‘Te pee nei ratou i te haapiiraa a ta ratou haapaoraa’

UA HAPONO te hoê vahine no Miami, i Florida, Hau Amui no Marite, i te rata i muri nei i te hoê vea no taua vahi ra: “I te 10 no Titema ra, ua eiâhia te pute moni a ta ˈu tamaiti i roto i to ˈna pute ahu i te hoê matete hoo-pate-raa. Tei roto ta ˈna parau faatia no te faahoro i te pereoo, ta ˈna tareta turuutaa, e vetahi atu â, e e 260 atoa dala Marite.

“I muri aˈe i to ˈna faaararaa ˈtu i te taata haapao matete e ua eiâhia ta ˈna pute moni, ua hoˈi maira o ˈna i te fare. I te ahiahi, ua taniuniu mai te hoê vahine Paniora ia ˈna, e na roto i te taata pahono [niuniu] o tei tia mai ei auvaha, ua faaite mai oia e ua itea mai ia ˈna ta ˈna pute moni.

“Ua faaite mai oia i to ˈna vahi faaearaa. . . . Ua horoa mai o ˈna i te pute moni, aita i hauti-noa ˈˈe-hia, tei roto atoa te 260 dala Marite.

“Ua ite o ˈna i te taata eiâ i te eiâraa i ta ˈna pute moni e ua tuô atura oia. Ua faarue aˈera te taata eiâ i te pute moni e ua horo atura. I tera taime, ua moe na ta ˈu tamaiti, no reira ua hoˈi atura oia i ǒ na e te pute moni e ua taniuniu mai.

“E mau Ite no Iehova o ˈna e to ˈna utuafare. Te pee mau nei ratou i te haapiiraa a ta ratou haapaoraa.”

Aita te mau Ite no Iehova e faaite nei i te haerea tia ia haapopouhia mai ratou e te taata. (Ephesia 6:7) Teie râ, te hinaaro mau nei ratou e arue i to ratou Metua i te raˈi ra o Iehova. (Korinetia 1, 10:31) Na to ratou here i te Atua e i to ratou taata-tupu e turai nei ia ratou ia faaite i “te evanelia” o te Basileia o te Atua. (Mataio 24:14) Na roto i te ravea o te Basileia, ua tǎpǔ te Atua e faariro i te fenua nei ei paradaiso nehenehe mau. I reira ïa te fenua nei e riro ai ei vahi nehenehe mau, ei vahi atoa râ i reira te haerea morare maitai e te haerea tia e vai ai e a muri noa ˈtu.—Hebera 13:18; Petero 2, 3:13.