Ihea e iteahia mai ai te oaoaraa mau?

TE MANAˈO ra e rave rahi e, e nehenehe te oaoaraa e iteahia mai na roto i te noaaraa mai i te mau faufaa materia. E o outou? Noa ˈtu e e nehenehe mau â ta te mau taoˈa materia e faaoaoa ia tatou, eita ratou e haapapu i te reira; eita atoa te mau tamahanahanaraa i te pae tino e patu i te faaroo aore ra e haamâha i te mau hinaaro i te pae varua.

I roto i ta ˈna Aˈoraa i nia i te Mouˈa, teie ta Iesu i parau: “E ao to tei ite i to ratou mau hinaaro i te pae varua, no ratou hoi te basileia o te mau raˈi ra.” (Mataio 5:3, MN) Ua na ô atoa o Iesu e: “E ara ia outou i te nounou taoˈa, rahi noa hoi to te taata nei taoˈa, e ere hoi tei taua taoˈa na ˈna ra to ˈna ora.”—Luka 12:15.

Te imi ra te rahiraa i te oaoaraa na roto i te mau taatiraa tia ore i te pae tino e te tahi atu mau “ohipa o te tino.” (Galatia 5:19-21, MN) Teie râ, eita te raveraa i te mau faanavenaveraa i te pae tino e hopoi mai i te oaoaraa mau e te tamau. Inaha, eita hoi te feia e rave ra i teie mau peu e parahi i te Basileia o te Atua.—Korinetia 1, 6:9, 10.

E huri te tahi pae i nia ia ratou iho i roto i ta ratou imiraa i te oaoaraa ma te tamata i te haamau i to ratou iho tiaraa tura. Ua î roa te mau fare vairaa buka e te mau fare hooraa buka i te mau buka tauturu, aita râ teie mau papai i hopoi mai na te mau taata i te oaoaraa tamau. No reira, ihea roa e itea mai ia tatou te oaoaraa mau?

Ia riro ei taata oaoa mau, e tia ia tatou ia farii i to tatou iho mau hinaaro i te pae varua. Te na ô ra o Iesu e: “E ao to tei ite i to ratou mau hinaaro i te pae varua.” Oia mau, eaha te faufaa na tatou ia ite noa i teie hinaaro e i muri iho, ia moe i te haamâha ˈtu. Ei hiˈoraa: Eaha te tupu i nia i te hoê taata horo atea o tei moe ia ˈna i muri aˈe i te hororaa, i te haamâha i te poihâ o to ˈna tino? Eita anei to ˈna tino e fatata e pau i te pape e i te faaruru i te tahi atu mau faahopearaa atâta? Oia atoa, mai te peu e e moe ia tatou i te haamâha i to tatou hinaaro i te maa pae varua, e nehenehe tatou e ino i te pae varua. E aratai te reira i te ereraa i te oaoaraa.

Ua taa maitai ia Iesu i to ˈna mau hinaaro i te pae varua, ma te tuatapapa maite e ma te feruri hohonu i nia i te Parau a te Atua. Ua nehenehe ta ˈna e ite e e taio ma te ohie i te mau tuhaa o te mau Papai Moˈa, e ua haapii atu oia ia vetahi ê ia rave mai te reira. (Luka 4:16-21; a faaau e te Ephesia 4:20, 21.) Ua faariro atoa o Iesu i te raveraa i te hinaaro o to ˈna Metua i te raˈi ra, ei maa. Ua hopoi mai te raveraa i te hinaaro o te Atua no ˈna, i te oaoaraa rahi.—Ioane 4:34.

Oia, eita e noaahia te oaoaraa mau na roto i te haaputuraa mai i te mau taoˈa materia, eita atoa te oaoaraa e noaa mai na roto i te haamâharaa i te tino hara nei. Te oaoaraa mau, o te hoê ïa huru o te mafatu, niuhia i nia i te faaroo mau e te hoê taairaa maitai e o te Atua ra o Iehova. Ma te tano roa hoi, ua himene te taata papai salamo ra o Davida e: “E ao to te feia, o Iehova to ratou Atua.”—Salamo 144:15b.

[Hohoˈa i te api 23]

E hopoi mai te faaroo e te taairaa maitai e o te Atua na outou, i te oaoaraa mau