Te patoiraa i te mau pariraa haavare i Farani

NO FAARURU iho nei te mau Ite no Iehova i Farani, i te mau pariraa haavare e rave rahi. Ua faaohipa te ravea haapurororaa parau i te mau ohipa riaria i tupu i roto i te mau pǔpǔ faaroo amaha i Europa e i Tapone, no te haaparare i te mau parau i faahuru-ê-hia no nia i te mau Ite. Ua faariro-hape-hia ratou mai te hoê o te mau pǔpǔ faaroo amaha rahi roa ˈˈe e te atâta roa ˈˈe.

No te faaafaro i te fifi, ua nenei te mau Ite no Iehova i te hoê api parau iti o tei pahono i teie mau huru uiraa e: O vai ma te mau Ite no Iehova? E mau Kerisetiano anei ratou? Te farii ra anei ratou e ia rapaauhia ratou? No te aha ratou e haere ai na te mau fare? Nafea ta ratou ohipa i te tururaahia i te pae moni? Nafea te mau Ite no Iehova ia hamani maitai i te totaiete?

Teie te upoo parau o te api parau iti haamaramaramaraa na roto i te reo Farani, Te mau Ite no Iehova—Te mea te tia ia outou ia ite. No te pûpû i te api parau iti na te mau taata e rave rahi, ua faanahohia te hoê ohipa opereraa. Mai te 13 no Me e tae atu i te 9 no Tiunu 1996, hau atu i te iva mirioni api parau iti tei operehia.

Ua haaputapû teie api parau iti e rave rahi taata, e tae noa ˈtu i te mau tia mana. “Te riri nei au i te faainoraahia te mau Ite no Iehova,” o ta te hoê ïa melo no te Apooraa no te pae fenua i papai, i muri aˈe i te taioraa i te api parau iti. “E rave rahi taime to ˈu faahiahiaraa i te huru hamani maitai e te miimii ore o ta outou ohipa.” No te pahono i te api parau iti, teie ta te hoê melo no te Apooraa iriti ture no Europa i papai: “Ua ite maitai te rahiraa o te mau taata e nafea ia faataa i te pǔpǔ kerisetiano, e e melo hoi outou no te reira, e te mau pǔpǔ faaroo amaha.”

I Bretagne, ua pûpû te hoê Ite i te api parau iti na te hoê perepitero, o tei farii oioi. “Te haapopou nei au ia outou, no ta outou ohipa e rave ra,” o ta te perepitero ïa i parau. Ua na ô faahou oia e: “Te faaitoito nei au i te mau melo o ta ˈu paroita ia farii ia outou i to ratou fare e ia horoa mai i te tahi taofe na outou. E nehenehe atoa outou e parau i te feia ta outou e farerei e ua haere mai outou i to ˈu nei fare. Te hinaaro atoa nei au e parau ia outou e mea au na ˈu e taio i ta outou mau papai.”

I muri aˈe i te noaaraa mai ia ˈna te api parau iti, ua papai te hoê tane Porotetani no Alsace, i te Taiete Watch Tower no te ani i te hoê haapiiraa Bibilia. “Ua ere roa vau i te tiaturiraa i roto i ta ˈu haapaoraa,” o ta ˈna ïa i papai, “te hiaai nei au i te hoê haamataraa apî i te pae varua.” Noa ˈtu eaha te mau pariraa haavare tei faataehia i te tahi mau taime i nia ia ratou, te tamau noa ra te mau Ite no Iehova i Farani—oia mau, na te ao atoa nei—i te tauturu i te mau taata, ia noaa ia ratou te ite papu no nia i te mau opuaraa a te Atua, mai te faaitehia ra i roto i te Bibilia.—Timoteo 2, 3:16, 17.