Te faatia ra te feia poro i te Basileia

Te haamaitairaa o te hoê tiaraa aueue ore i te fare haapiiraa

TE FAAITE ra te Bibilia e: “E te mau tamarii atoa na oe ra, e haapiihia ïa e Iehova, e e hau rahi to te mau tamarii na oe ra.” (Isaia 54:13) I roto i te hoê faito rahi, e tano te parau ra “te mau tamarii atoa na oe ra” no te pǔpǔ taatoa o te mau tavini a te Atua i nia i te fenua nei, te mau ui apî roa atoa. I teie mahana, te haapao maitai nei te mau metua kerisetiano e ia “haapiihia” ta ratou mau tamarii “e Iehova” i te fare e i te mau putuputuraa kerisetiano.

Tera râ, ia haere ratou i te fare haapiiraa, te faaruru nei te mau Kerisetiano apî i te mau tautooraa fifi. E pinepine ratou i te ite e e tia ia ratou ia rave i te hoê tiaraa aueue ore tei niuhia i nia i te mea o ta ratou i haapii i roto i te Bibilia. Ia na reira ratou, e faufaahia te mau tamarii haere haapiiraa e te mau orometua haapii atoa i te mau faahopearaa, mai ta te aamu i muri nei tei tupu i Micronésie e faaite ra.

I nia i te motu iti no Tol i te pae tooa o te râ no Patitifa i te mau motu Chuuk, ua faaue te mau orometua haapii o te fare haapiiraa no reira, i te mau tamarii atoa ia faaineine e ia apiti atu i roto i te hoê oroa Halloween a te fare haapiiraa. Ua ite te mau tamarii haere haapiiraa Ite e i roto i te oroa, e ravehia na te mau faaunaunaraa e e oomohia na te mau ahu tupapau, varua ino, e te mau tahuˈa—ua taaihia teie mau mea atoa i te mau peu hiˈohiˈo. Eita ta teie mau tamarii e nehenehe e apiti atu no to ratou haava manaˈo.a

Na roto i ta ratou faaineineraa tei niuhia i nia i te Bibilia, i te fare e i roto i te amuiraa kerisetiano, ua ite ratou e aita te Atua e au ra i teie mau huru ohipa, noa ˈtu e e rave-noa-hia te reira ei faaanaanataeraa. No te neheneheraa e faataa maramarama ˈtu â i to ratou tiaraa, ua ani te mau tamarii ia Barak, te hoê o te mau Ite mitionare o te motu, ia paraparau atu i ta ratou mau orometua haapii.

I muri aˈe i to ratou faarooraa i te faataaraa, ua faanaho te mau orometua haapii i te tahi atu putuputuraa, i reira ïa o Barak e paraparau ai i mua i te mau rave ohipa atoa a te fare haapiiraa. I taua putuputuraa ra, ua faaite o Barak i te mau mea no te faataa i te huru mau o te Halloween. No roto mai ta ˈna mau haamaramaramaraa e rave rau buka a te Taiete Watch Tower e te tahi atu â mau pu atoa. Ua maere te mau orometua haapii e te mau faatere i te mau mea o ta ratou i haapii no nia i te tumu, te aamu, e te huru o te oroa i te pae faaroo. Ua opua ihora ratou e faatupu i te hoê putuputuraa e te mau rave ohipa no te faaoti e nafea ia faatitiaifaro i te huru tupuraa.

Tau mahana i muri iho, ua faaitehia te hoê faaotiraa manaˈo-ore-hia. Ua faaorehia te mau faaineineraa atoa o te Halloween. Eita roa ˈtu te fare haapiiraa e faatupu te Halloween i taua matahiti ra. Auê ïa faahopearaa faahiahia o te opuaraa a teie mau Ite apî e rave i te mea tia i te fare haapiiraa! Eiaha roa ˈtu te mau ui apî e mǎtaˈu aore ra e haama i te rave i te hoê tiaraa aueue ore no te parau mau a te Bibilia.

Ati aˈe te ao nei, te haapii ra te mau Ite no Iehova i ta ratou mau tamarii ia rohi i te fare haapiiraa. Te faaineine-atoa-hia ra te mau Ite apî ia ora ia au i te mau faaueraa tumu a te Bibilia e ia tufa i to ratou tiairaa e ta ratou mau tiaturiraa na te tahi atu mau tamarii haere haapiiraa ia nehenehe ta ratou. Noa ˈtu e e ere te mau faahopearaa i te mea faahiahia aore ra i te mea oioi mai tei tupu i roto i teie hiˈoraa, e nehenehe te mau ui apî e fanaˈo i te tiaturi e te mauruuru no roto mai i te raveraa i te mea tia. E te mea faufaa atu â, e nehenehe ratou e tiaturi e te au maira to ratou Metua no te raˈi e e haamaitai mai oia ia ratou no to ratou auraro haapao maitai.

[Nota i raro i te api]