Ua rave ratou i te hinaaro o Iehova
Te poro ra Petero i te Penetekose
UA TUPU teie ohipa i te hoê poipoi haumǎrû i te tau uaaraa tiare i te matahiti 33 o to tatou nei tau. E taime oaoa mau â teie! Ua pue noa te nahoa ati Iuda e te mau peroseluto i roto i te mau aroâ o Ierusalema. Ua haere mai ratou mai Elama, Mesopotamia, Kapadokia, Aiphiti, e Roma mai. Auê i te faahiahia e i te iteraa ˈtu ia ratou i roto i to ratou ahu tumu e te faarooraa e rave rau reo! Ua haere mai vetahi fatata e piti tausani kilometera te atea no teie taime taa ê. Eaha ïa taua taime ra? Te Penetekose—hoê oroa ati Iuda oaoa e tapao ra i te hopea o te ootiraa kerite.—Levitiko 23:15-21.
Te maraa ra te au auahi o te tusia i nia i te fata o te hiero, e te himene ra te mau ati Levi i te Arueraa (Salamo 113 tae atu i te 118). Na mua noa ˈˈe i te hora 9 i te poipoi, ua tupu ihora te hoê ohipa maere. Mai te raˈi mai, ua “haruru maira . . . mai te mataˈi rahi uˈana ra.” Ua î roa te fare to reira tau 120 pǐpǐ a Iesu Mesia i te putuputuraa. Te na ô ra te faatiaraa a te mau Papai e: “Ua fa maira te arero maa ia ratou ra mai te ahi ra te huru, e faaea ihora i nia iho ia ratou atoa ra, e î aˈera ratou atoa i te [v]arua [moˈa], e ua parau ihora i te parau ěê, i ta te [v]arua i horoa mai i te parau ia ratou ra.”—Ohipa 2:1-4.
Te faaroo ra te taata taitahi i to ˈna iho reo
Aita i maoro, ua haere maira e rave rahi pǐpǐ i rapaeau i te fare. Ma te maere, ua nehenehe ratou e paraparau e rave rau reo o te nahoa! A feruri na i te maere i to te hoê ratere no Peresia mai e to te hoê taata tumu no Aiphiti faarooraa i te feia no Galilea e paraparau i to ratou reo. Papu maitai, ua maere roa te nahoa. “Eaha râ teie?” o ta ratou ïa i ani. Ua haamata vetahi i te tâhitohito i te mau pǐpǐ, ma te parau e: “Ua î teie nei mau taata i te uaina momona.”—Ohipa 2:12, 13.
Tia mai nei te aposetolo Petero i muri iho e ua paraparau atura i te nahoa. Ua faataa atura oia e ua riro teie ô semeio o te mau reo ei haapapuraa e te tupu ra te tǎpǔ a te Atua na roto i te peropheta ra o Ioela: “E ninii atu ai au i tau varua i nia i te taata atoa.” (Ohipa 2:14-21; Ioela 2:28-32) E, no ninii noa maira te Atua i to ˈna varua moˈa i nia i te mau pǐpǐ a Iesu. E haapapu maramarama maitai teie e ua faatiahia mai Iesu mai te pohe mai e tei te raˈi o ˈna i teie nei i te pae atau o te Atua. Ua na ô Petero e: “E teie nei, ia ite atoa te fetii o Iseraela e, ua faariro-mau-hia oia e te Atua ei Fatu e ei Mesia, o Iesu mau nei â ta outou i [patiti i nia i te pou, MN] nei.”—Ohipa 2:22-36.
Eaha te huru o te feia e faaroo ra? Te na ô ra te faatiaraa e: “Putapû atura to ratou aau, e ua na ô maira ia Petero e te mau aposetolo atoa ra, E te mau taeae nei, eaha matou nei?” Pahono atura Petero e: “E tatarahapa, e ia bapetizohia outou atoa.” Tau 3 000 tei na reira! I muri iho, “mau papu maite atura ratou i ta te mau aposetolo i haapii ra.”—Ohipa 2:37-42.
Na roto i te paraparauraa i teie taime maere mau, ua faaohipa Petero i te taviri matamua o “te mau taviri o te basileia o te ao ra” ta Iesu i tǎpǔ e horoa ia ˈna ra. (Mataio 16:19) Ua iriti teie mau taviri i te mau haamaitairaa taa ê no te mau pǔpǔ taata taa ê. Ua faaohipahia te taviri matamua no te mau ati Iuda ia riro mai ratou ei Kerisetiano faatavaihia e te varua. I muri iho, te piti e te toru o te taviri no to Samaria e te mau Etene ïa.—Ohipa 8:14-17; 10:44-48.
Te mau haapiiraa na tatou
Noa ˈtu e ua apiti atoa teie nahoa ati Iuda e te mau peroseluto i roto i te haapoheraa o te Tamaiti a te Atua, ua paraparau atu Petero ia ratou ma te faatura, ma te pii ia ratou e “mau taeae.” (Ohipa 2:29) Ta ˈna tapao, o te turairaa ïa ia ratou ia tatarahapa, eiaha râ te faahaparaa ia ratou. E mea maitai ïa ta ˈna huru paraparauraa. Ua vauvau o ˈna i te mau mea e ua haapapu i to ˈna mau manaˈo e te mau irava a te mau Papai.
E mea maitai ia pee te feia e poro ra i te parau apî maitai i teie mahana i te hiˈoraa o Petero. E tia ia ratou ia tamata i te faatano i te aparauraa e te feia e faaroo maira ia ratou e ia haaferuri ia ratou ma te aravihi maoti te mau Papai. Ia faaitehia te parau mau Bibilia ma te hoê raveraa maitai, e farii mai te taata mafatu tia.—Ohipa 13:48.
Ua ite-maitai-hia te taa-ê-raa i rotopu i te itoito e te mǎtaˈu ore o Petero i taua mahana o te Penetekose ra e to ˈna hunaraa i te Mesia tau hitu hebedoma na mua ˈˈe. I taua taime ra, ua mǎtaˈu roa Petero i te taata. (Mataio 26:69-75) Ua taparu râ Iesu no Petero. (Luka 22:31, 32) Ma te feaa ore, ua puaihia te aposetolo Petero i to Iesu faraa ˈtu ia ˈna ra i muri aˈe i to ˈna tia-faahou-raa. (Korinetia 1, 15:5) Ei faahopearaa, aita te faaroo o Petero i fati. I roto maa taime poto noa, ua poro oia ma te mǎtaˈu ore. No reira, ua poro oia eiaha i te Penetekose noa, i te toea atoa râ o to ˈna oraraa.
Eaha ïa mai te peu e ua hara tatou, mai ia Petero atoa? E tatarahapa anaˈe ïa, e pure anaˈe ia faaorehia mai ta tatou hara, e ia ohipa no te ani i te tauturu i te pae varua. (Iakobo 5:14-16) E nehenehe ïa tatou e haere i mua ma te tiaturi e e fariihia ta tatou taviniraa moˈa e to tatou Metua aroha i nia i te raˈi ra o Iehova.—Exodo 34:6.