Mau uiraa a te feia taio

Ua parau o Iesu e: “Ta outou i faaore i ta ratou hara ra, ua faaorehia ïa; e ta outou hoi i vaiiho i ta ratou hara ra, ua vaiihohia ïa.” Te auraa ra anei e e nehenehe te mau kerisetiano e faaore i te mau hara?

Aita e niu i roto i te mau Papai no te faaoti e e mana no ǒ mai i te Atua ra to te rahiraa o te mau kerisetiano, aore ra to te mau matahiapo nominohia i roto i te mau amuiraa, no te faaore i te mau hara. Tera râ, te faataa ra te parau a Iesu i ta ˈna mau pǐpǐ i roto i te Ioane 20:23, faahitihia i nia nei, e ua tufa te Atua i te tahi mau mana taa ê no nia i te reira i te mau aposetolo ra. E te tuea ra paha teie faataaraa a Iesu i ta ˈna parau i roto i te Mataio 18:18 no nia i te mau faaotiraa no nia i te raˈi ra.

E nehenehe te mau kerisetiano e faaore i te tahi mau hara, ia au i te aˈoraa a te aposetolo Paulo i roto i te Ephesia 4:32: “Ia hamani maitai outou ia outou iho, ma te aau mǎrû aroha noa, ma te faaore hoi i te hara te tahi e te tahi, mai ta te Atua i faaore mai i ta outou i te Mesia ra.” Te faahiti ra o Paulo i ǒ nei i te mau fifi e tupu ra i rotopu i te mau kerisetiano iho, mai te paraparauraa tano ore. E tia ia ratou ia tutava no te faatitiaifaro i teie mau ohipa, ma te faaore i te hara i te tahi e te tahi. A haamanaˈo i te mau parau a Iesu: “E teie nei ia hopoi oe i ta oe taoˈa horoa noa i te fata ra, e ua manaˈo ihora oe i reira, e e hara ta to taeae ia oe na; e vaiiho atu i to taoˈa i mua i te fata ra, e mata na i te haere e faaite i to taeae, a haere a hopoi ai i ta oe taoˈa.”—Mataio 5:23, 24; Petero 1, 4:8.

Teie râ, te haamatara ra te mau irava tapiri i te Ioane 20:23 e te faahiti ra Iesu i te mau hara ino roa ˈˈe, mai tei faataahia e te tahi atu mea o ta ˈna i parau i muri iho i teie feia taa ê i faaroo ia ˈna. E hiˈo anaˈe na no te aha.

I te mahana o to ˈna faatia-faahou-raahia, ua fa o Iesu i mua i te mau pǐpǐ i roto i te hoê piha ponaohia i Ierusalema. Te na ô ra te faatiaraa e: “Ua parau faahou maira Iesu ia ratou, Ia ora na outou. Mai tau Metua hoi i tono mai ia ˈu nei ra, e tono atoa hoi au ia outou na. I na reira maira oia, e ua haapuai maira i te aho i nia ia ratou ra, e ua parau maira, A farii i te [varua moˈa, MN]. Ta outou i faaore i ta ratou hara ra, ua faaorehia ïa; e ta outou hoi i vaiiho i ta ratou hara ra, ua vaiihohia ïa.”—Ioane 20:21-23.

Eita e ore, te mau pǐpǐ i faahitihia, o ratou mau â te mau aposetolo haapao maitai. (A faaau e te irava 24.) Na roto i te haapuairaa i to ˈna aho e te parauraa ia ratou e, “A- farii i te [varua moˈa],” ua faaara Iesu ia ratou ma te parau taipe e e fatata roa te varua moˈa i te niniihia i nia ia ratou. Ua parau atura o Iesu e e mana to ratou no nia i te faaoreraa i te mau hara. Ma te feruri maite, te tuati ra ta ˈna na faataaraa e piti, te aratai ra te tahi i to muri iho.

E pae ahuru mahana i muri aˈe i to ˈna tia-faahou-raa, i te mahana o te Penetekose, ua ninii o Iesu i te varua moˈa. Eaha ta te reira i faatupu? A tahi, ua fanau-faahou-hia te feia o tei fanaˈo i te varua ei mau tamaiti pae varua na te Atua ma te tiaturiraa e faatere e te Mesia i nia i te raˈi. (Ioane 3:3-5; Roma 8:15-17; Korinetia 2, 1:22) Ua ohipa hau atu â râ te niniiraahia te varua. Ua fanaˈo vetahi pae i te mau mana semeio. Na roto i teie ravea, ua nehenehe vetahi e paraparau na roto i te mau reo ěê o ta ratou i ore i ite. Ua nehenehe te tahi atu e tohu. Ua nehenehe atoa vetahi e faaora i te maˈi aore ra e faatia mai i tei pohe ra.—Korinetia 1, 12:4-11.

I te mea e te haapapu ra te mau parau a Iesu i roto i te Ioane 20:22 i teie niniiraahia te varua moˈa i nia i te mau pǐpǐ, e au ra e te auraa o ta ˈna mau parau tuati no nia i te faaoreraa i te mau hara oia hoi na te Atua i tufa i te mau aposetolo na roto i te ohiparaa o te varua i te hoê mana otahi e faaore i te mau hara aore ra eita.—A hiˈo i Te Pare Tiairaa, 1 no mati 1949, api 78 (beretane).

Aita te Bibilia e horoa maira i te rahiraa taime taatoa ta te mau aposetolo i faaohipa i teie mana, aita atoa râ e faataa ra i te mau tupuraa atoa i to ratou faaohiparaa i te ô semeio e paraparau na roto i te mau reo ěê, e tohu, aore ra e faaora.—Korinetia 2, 12:12; Galatia 3:5; Hebera 2:4.

Hoê tupuraa i faaohipahia ˈi te mana a te aposetolo no te faaore i te mau hara aore ra no te ore e faaore, to Anania ïa raua o Saphira, o tei haavare i te varua. Ua faaite tahaa roa o Petero, i to Iesu faahitiraa i te mau parau i roto i te Ioane 20:22, 23, i te hapa a ia Anania e o Saphira. Ua parau o Petero na mua roa i nia ia Anania, o tei pohe i taua iho taime ra. I to Saphira haereraa mai i muri iho e te tamau-noa-raa i te haavare, ua faaite aˈera o Petero i ta ˈna haavaraa. Aita o Petero i faaore i ta ˈna hara, ua parau râ oia: “Inaha, tei te uputa mai nei te avae o te feia i tanu i to tane na, e na ratou atoa oe e hopoi i rapae au.” Ua pohe atoa o ˈna i taua iho taime ra.—Ohipa 5:1-11.

I roto i teie hiˈoraa, ua faaohipa te aposetolo Petero i te tahi mana taa ê no te ore e faaore i te hara, hoê ite semeio e eita te Atua e faaore i te hara a Anania e a Saphira. Ua faaite atoa te mau aposetolo e e huru hiˈoraa tei hau aˈe i te taata nei to ratou i roto i te mau tupuraa e papu ai ratou e ua faaorehia te mau hara i nia i te niu o te tusia a te Mesia. No reira, ua nehenehe teie mau aposetolo tei horoahia te mana o te varua e faaite i te faaoreraa hara aore ra eita.a

E ere te auraa e ua fanaˈo te mau matahiapo atoa i faatavaihia e te varua i taua tau ra i taua huru mana semeio ra. E nehenehe tatou e ite i te reira i roto i te parau a te aposetolo Paulo no nia i te taata o tei tiavaruhia i te amuiraa no Korinetia. Aita o Paulo i parau e, ‘E faaore au i te mau hara o taua taata ra’ aore ra, ‘Ua ite au e ua faaorehia te hara o taua taata ra i nia i te raˈi, a farii ïa ia ˈna ia hoˈi mai.’ Ua faaitoito râ o Paulo i te amuiraa atoa ia faaore i te hara o taua kerisetiano ra tei faahoˈihia mai e ia faaite atu i te here. Ua na ô faahou o Paulo e: “O ta outou e faaore i te hara ra, e faaore atoa hoi au.”—Korinetia 2, 2:5-11.

I te faahoˈiraahia mai taua taata ra i roto i te amuiraa, ua nehenehe te mau taeae e te mau tuahine kerisetiano atoa e faaore i ta ˈna hara, te auraa ra e eiaha e inoino ia ˈna no te ohipa o ta ˈna i rave. Na mua roa râ, e tatarahapa oia e e faahoˈihia mai oia. Mea nafea ïa?

Te vai ra te mau hara ino mau te tia i te mau matahiapo o te amuiraa ia faatitiaifaro, mai te eiâ, te haavare, aore ra te peu tia ore i te pae morare. E tamata ratou i te faatitiaifaro e i te aˈo i taua feia rave hara ra, ma te faaitoito ia ratou ia tatarahapa. Ia rave râ te hoê taata i te hara ino mau ma te ore e tatarahapa, e faaohipa teie mau matahiapo i te faaueraa a te Atua e tiavaru i te taata rave hara. (Korinetia 1, 5:1-5, 11-13) Aita te parau a Iesu i roto i te Ioane 20:23 e tano ra i roto i teie mau huru tupuraa. Aita to teie mau matahiapo e ô semeio o te varua, mai te aravihi ia faaora i tei maˈihia ra i te pae tino aore ra ia faatia i tei pohe ra; ua naeahia i taua mau ô ra i ta ratou fa i te senekele matamua e ua oti aˈera. (Korinetia 1, 13:8-10) Hau atu, aita to te mau matahiapo i teie mahana e mana no ǒ mai i te Atua ra no te faaore i te hara ino mau oia hoi te faaiteraa e mea mâ te hoê taata rave hara ino mau i mua i te aro o Iehova. Ua niuhia teie huru faaoreraa hara i nia i te tusia hoo, e o Iehova anaˈe te nehenehe e faaore i te hara i nia i taua niu ra.—Salamo 32:5; Mataio 6:9, 12; Ioane 1, 1:9.

Mai te tupuraa o taua taata ra i Korinetia tahito ra, ia ore te hoê taata rave hara ino mau e tatarahapa, e tiavaruhia oia. Ia tatarahapa oia i muri iho e ia faatupu oia i te mau ohipa e au i te tatarahaparaa, e nehenehe te faaoreraa hara no ǒ mai i te Atua ra e ravehia. (Ohipa 26:20) I roto i teie huru tupuraa, te horoa ra te mau Papai i te tumu e tiaturi ai te mau matahiapo e ua faaore mau Iehova i te hara o te taata haerea ino. I muri iho, ia faahoˈihia mai taua taata ra, e nehenehe te mau matahiapo e tauturu ia ˈna i te pae varua ia paari oia i roto i te faaroo. E nehenehe vetahi pae i roto i te amuiraa e faaore i te hara ma te hoê â huru e to te mau kerisetiano no Korinetia o tei faaore i te hara o te taata i tiavaruhia e o tei faahoˈihia mai i muri iho.

Ia faatitiaifarohia te mau mea mai teie te huru, eita te mau matahiapo e haamau i ta ratou iho mau faaueraa no te haavaraa. E faaohipa ratou i te mau faaueraa tumu a te Bibilia e e pee maite ratou i te mau faanahoraa a te mau Papai o ta Iehova i haamau. No reira, e tano te faaoreraa te mau matahiapo i te hara aore ra eita i te mau parau a Iesu i roto i te Mataio 18:18: “Oia mau ta ˈu e parau atu ia outou nei, O ta outou i haamau i raro nei, e haamau-atoa-hia ïa i te ao; e ta outou e tuu i raro nei, e tuu-atoa-hia ïa i te ao.” E faaite noa ta ratou mau ohipa i te huru hiˈoraa o Iehova i te mau tupuraa mai tei faataahia i roto i te Bibilia.

Ei faahopearaa, aita te parau a Iesu, mai tei faahitihia i roto i te Ioane 20:23, e patoi ra i te toea o te mau Papai, te faataa nei râ e e mana taa ê to te mau aposetolo no nia i te faaoreraa hara, ia au i ta ratou tuhaa taa ê i roto i te haamataraa mai te amuiraa kerisetiano.

[Nota i raro i te api]