Te haamanaˈo ra anei outou?
Ua faufaahia anei outou i te mau vea hopea nei o Te Pare Tiairaa? A tamata ïa i to outou mehara na roto i te mau uiraa i muri nei:
◻ Eaha te haapiiraa ta tatou e huti mai no nia i te toparaa te mau ati Amona? (Zephania 2:9, 10) Te tâuˈa ra Iehova i te mea e te faahoˈihia ra to ˈna hamani maitai na roto i te feii, e i to ˈna taime tano, e ohipa faahou mai o ˈna, mai ta ˈna i ohipa i te mau tau tahito ra. (A faaau e te Salamo 2:6-12.)—15/12, api 10.
◻ Eaha na ravea matamua e piti e fanaˈo ai te mau kerisetiano i te hau? A tahi, “e hau to [ratou] i te Atua ra, i to [ratou] Fatu ia Iesu Mesia ra.” (Roma 5:1) A piti, e hau to ratou iho na roto i te atuaturaa i “te paari no nia maira,” ‘e mea tura hoi, e te hau.’ (Iakobo 3:17)—1/1, api 11.
◻ Ua faaauhia te Parau a te Atua i teihea mau mea, e nafea te reira ia tauturu ia tatou? Ua faaauhia te Parau a te Atua i te û faaamu, te maa paari, te pape tamǎrû e o te tamâ, te hiˈo, e te ˈoˈe ǒˈi maitai. E tauturu te taa-maitai-raa i te auraa o teie mau parau i te hoê tavini ia faaohipa i te Bibilia ma te aravihi.—1/1, api 29.
◻ Eaha ta te hoê haapiiraa aifaito e tauturu ia tatou ia rave? Ia taio maitai, ia papai maitai, ia paari i te pae feruriraa e i te pae morare, e ia fanaˈo i te faaineineraa e hinaarohia i roto i te oraraa i te mau mahana atoa e no te hoê taviniraa moˈa aravihi.—1/2, api 10.
◻ Eaha te manaˈo faufaa ta Iesu i horoa mai no nia i te haapiiraa? E tia ia faaohipahia te haapiiraa, eiaha no te faahanahana ia tatou iho, no te arue râ i te Orometua rahi roa ˈˈe, te Atua ra Iehova. (Ioane 7:18)—1/2, api 9.
◻ Eaha te Basileia o te Atua? Te Basileia, o te hoê ïa faatereraa ta te Atua i haamau i nia i te raˈi, o te faatupu i te hinaaro o te Atua ia faaore roa i te mau faahopearaa o te hara e te pohe, e ia haamau faahou i te mau huru tupuraa parau-tia i nia i te fenua nei. (Daniela 2:44; Apokalupo 11:15; 12:10)—1/2, api 16.
◻ Nafea te Bibilia ia horoa i te haapiiraa hinaarohia no te faaore roa i te haavîraa uˈana? Na roto i ta ˈna Parau, te Bibilia, te haapii nei Iehova i te mau taata ia riro ei feia here i te hau e te parau-tia. (Isaia 48:17, 18) E mana to te Parau a te Atua no te naea e no te haaputapû i te mafatu o te taata, e no te taui i to ˈna huru manaˈo e to ˈna haerea. (Hebera 4:12)—15/2, api 6.
◻ Mea nafea te parau tohu a Isaia pene 35 e ite ai e toru tupuraa? Ua ite te parau tohu a Isaia i te tupuraa matamua i te hoˈiraa te mau ati Iuda mai te faatîtîraa a Babulonia i te matahiti 537 hou to tatou tau. Te itehia ra te hoê tupuraa i te pae varua i teie mahana mai te taime a faatiamâhia mai ai i te Iseraela i te pae varua mai te faatîtîraa a Babulonia Rahi. E ua taaihia te toru o te tupuraa i te haapapuraa a te Bibilia no te hoê paradaiso mau i nia i te fenua nei. (Salamo 37:10, 11; Apokalupo 21:4, 5)—15/2, api 17.
◻ Nafea to te mau semeio i faatupuhia e ta ˈna Tamaiti ra o Iesu, faaiteraa e te anaanatae maira te Atua i te mau taata? I te mea e “eita e tia [ia Iesu] ia rave oia anaˈe ihora, maori râ o ta ˈna i ite i te Metua i te raveraa ra,” te faataa ra to ˈna aroha i te hoê hohoˈa putapû mau o te tapitapiraa o Iehova no ta ˈna mau tavini tataitahi. (Ioane 5:19)—1/3, api 5.
◻ Eaha te manaˈo e matara ra i roto i te parau a Iesu “mau menema haamanaˈoraa” i faahitihia i roto i te Ioane 5:28, 29, MN? Te faataa ra te taˈo heleni ra mne·meiʹon (menema haamanaˈoraa) i ǒ nei e, te haamanaˈo ra Iehova i te oraraa o te taata o tei pohe, e tae noa ˈtu i to ˈna mau huru mai to ˈna fanauraahia mai â e to ˈna mehara taatoa. Te haapapu rahi nei te reira e te haapao ra te Atua i te taata tataitahi!—1/3, api 6.
◻ Eaha te poroi faaara i roto i te parau tohu a Zephania e nehenehe e tauturu ia tatou? I teie mahana, e ere te taime no te vaiiho i te manaˈo feaa ia aa i roto i to tatou mafatu e no te faanuu i te haerea mai te mahana o Iehova i roto i to tatou feruriraa. E tia atoa ia tatou ia ara ia ore te tâuˈa ore o te taata ia haaparuparu ia tatou. (Zephania 1:12, 13; 3:8)—1/3, api 17.
◻ No te aha e ua riro te oreraa e taiva i te Atua ei tamataraa? Te mea e haafifi ra i te taiva-ore-raa, o te mau hinaaro miimii ïa no ǒ mai i to tatou mau metua ra. (Genese 8:21; Roma 7:19) Hau atu â, ua tahoê o Satani e ta ˈna mau demoni no te turai ia tatou ia taiva i te Atua. (Ephesia 6:12; Petero 1, 5:8)—15/3, api 10.
◻ I roto i teihea na tuhaa e maha, e tia ia tatou ia upootia i te tamataraa o te taiva-ore-raa, e na te aha e tauturu ia tatou? Na tuhaa e maha oia hoi, te taiva-ore-raa ia Iehova, i ta ˈna faanahonahoraa, i te amuiraa, e i to tatou hoa faaipoipo. Te hoê tauturu no te upootia i teie mau tamataraa, o te taaraa ïa e ua taai-piri-hia te upootiaraa i te tamataraa o te taiva-ore-raa, i te faatiaraa i te mana arii o Iehova.—15/3, api 20.
◻ Eaha te haapiiraa ta tatou e nehenehe e huti mai i to Davida tamataraa i te afai te araka o te faufaa i Ierusalema? (Samuela 2, 6:2-7) Aita o Davida i tâuˈa i te mau faaueraa ta Iehova i horoa no nia i te amoraa i te Araka, e ua faatupu te reira i te ati. Te haapiiraa oia hoi, eiaha roa ˈtu tatou e faahapa ia Iehova no to tatou mau fifi no te mea aita tatou i haapao i ta ˈna mau faaueraa papu. (Maseli 19:3)—1/4, mau api 28, 29.