E parau apî maitai to mua!
TE OTO nei tatou paatoa ia faaroo tatou i te hoê parau apî peapea o te haamauiui ia tatou. I te tahi aˈe pae, te oaoa nei tatou ia tae anaˈe mai te parau apî maitai—te mau parau apî oaoa no tatou iho aore ra no tei herehia e tatou. Ia haamauiui râ te parau apî peapea ia vetahi ê eiaha râ ia tatou, mea hiˈopoa roa te mau taata; mea au atoa na vetahi pae e ite no nia i te ati o vetahi ê. Te faataa rii ra te reira e no te aha te hoo-maitai-hia ra te mau parau apî peapea!
I roto i te omuaraa o te Piti o te Tamaˈi Rahi, te vai ra te hiˈoraa papu o te anaanatae tano ore i te ati tei roohia e vetahi mau taata. O te pahi tamaˈi e 10 000 tane, te Graf Spee, te teoteo o te nuu manua no Helemani i te matahiti 1939. Tau hebedoma noa, ua vavahi teie pahi tamaˈi i te mau pahi tapihoo a te mau Hau patoi ia Helemani i te mau moana no Ataranitita Apatoa e no Inidia. I te pae hopea, ua tapapa e ua aro e toru pahi beretane i te Graf Spee, ma te haapohe e rave rahi taata e ua tia i te pahi ia hoˈi i te uahu no Uruguay i Montevideo no te tataˈi. Ua faaue te hau no Uruguay i te pahi tamaˈi ia hoˈi oioi atu i tua, aita anaˈe e haruhia oia. E au ra e e tupu iho â te hoê aroraa, e ua papu e o te fenua no Beretane te upootia.
I to ratou faarooraa i te reira, ua tarahu te hoê pǔpǔ taata tapihoo ona no te mau Hau Amui no Marite, i te hoê manureva, fatata e 2 500 dala i te taata hoê, no te tere atu i Uruguay e no te mataitai i te aroraa faatahe toto. Ua inoino ratou, inaha aita te aroraa i tupu. Ua faaue o Adolf Hitler e ia faatomohia te Graf Spee. Ua ite e ua faaroo tau tausani feia mataitai o tei haaputuputu atu i te pae uahu ma te tiaturi e e mataitai ratou i te hoê aroraa taehae i nia i te moana, i te hoê paainaraa haruru o tei faatomo i te Graf Spee, faatupuhia e to ˈna iho mau ihitai. Ua haapohe te tapena ia ˈna iho ma te pupuhi i to ˈna upoo.
Noa ˈtu e te vai ra te tahi mau taata mea au na ratou te mau tupuraa rii riaria, e farii te rahiraa e mea au aˈe na ratou te mau parau apî maitatai i te parau apî peapea. E ere anei i to outou manaˈo? No te aha ïa mea rahi roa te parau apî peapea i roto i te aamu e mea iti roa te parau apî maitai? E nehenehe anei te huru tupuraa e tauihia?
Te mau tumu o te parau apî peapea atoa
Te faahiti ra te Bibilia i te hoê tau i reira e faaroo-noa-hia te mau parau apî maitai. Eita te mau parau apî peapea e matauhia e e faaroohia. I to te Atua ra o Iehova otiraa i te hamani i ta ˈna mau ohipa, ua ineine te fenua ia fanaˈo te taata e te animala. Te na ô maira te faatiaraa a te Genese e: “Hiˈo aˈera te Atua i te mau mea atoa ta ˈna i hamani, e inaha, e mea maitai roa.”—Genese 1:31.
Aita i maoro roa, ua fa aˈera te parau apî peapea i muri aˈe i te poieteraahia te taata. Hou a fanau ai o Adamu e o Eva i te tahi huaai, ua faaroohia i nia i te raˈi te parau apî peapea no te orureraa hau i te Atua e i ta ˈna faanahonahoraa maitai no te ao atoa nei. Ua taiva ihora te hoê tamaiti varua tiaraa teitei i to ˈna tiaraa e ua manuïa oia i te turai i nau taata faaipoipo matamua ia apiti atu i roto i to ˈna haerea orure hau e te taiva.—Genese 3:1-6.
Ua haamata te rahiraa o te mau parau apî peapea i itehia e te huitaata i taua taime ra. Eita e maerehia e ua ite-uˈana-hia te mau ravea huna, te inoino, te haavare, te parau hape, te parau mau faahuru-ê-hia i roto i te mau parau apî peapea o tei faaî i te ao nei mai te tau mai â. Ua faahapa tahaa roa ˈtu o Iesu Mesia i te Diabolo ra o Satani ei tumu o te mau parau apî peapea, ma te parau atu i te mau aratai faaroo o To ˈna ra tau e: “O te diabolo to outou na metua, i faatia ˈi â outou i te hinaaro o to outou metua ra: e taparahi taata oia mai te matamua mai â: aore oia i haapao i te parau mau, no te mea aore e parau mau i roto ia ˈna. Ia parau oia i te parau haavare ra, ua parau ïa i te parau au ia ˈna ihora, e haavare oia, e e metua hoi no te haavare.”—Ioane 8:44.
A maraa noa ˈi te huiraatira taata nei, ua maraa atoa te mau parau apî peapea. Papu maitai, e ere te auraa e aita e taime oaoaraa e umereraa, no te mea e rave rahi mau mea i roto i te oraraa o tei riro ei tumu no te oaoaraa. Ua ite-maitai-hia râ te arepurepu e te peapea i roto i te mau ui atoa o te huitaata i haerehia mai e tae roa mai i teie mahana.
Te vai ra te tahi atu tumu no teie tupuraa ino mau. O to tatou ïa hinaaro mai te fanauraahia mai e rave i te hara e te ino. Te faataa ra o Iehova iho i teie tumu e ore e nehenehe e apehia o te parau apî peapea i te na ôraa e: “Ino noâ te manaˈo o to te taata aau mai to ˈna tamariiriiraa mai â.”—Genese 8:21.
No te aha te parau apî peapea i maraa ˈi?
Te vai nei râ te hoê tumu o te maraaraa te parau apî peapea i teie senekele 20. Ua faataa-maitai-hia taua tumu ra i roto i te Bibilia, o tei tohu e e tomo te huitaata i te senekele 20 i roto i te hoê tau otahi piihia te “anotau hopea” aore ra “te tau hopea.” (Timoteo 2, 3:1; Daniela 12:4) Te faataa ra te parau tohu bibilia e te tuatapaparaa i te tau bibilia i teie “tau hopea,” e ua haamata oia i te matahiti 1914. No te tahi atu â mau haapapuraa a te mau Papai no nia i te reira, a hiˈo i te pene 11 o te buka Te ite o te aratai i te ora mure ore, neneihia e te Watchtower Bible and Tract Society of New York, Inc.
E haamata te mau mahana hopea e te hoê tupuraa o te haamaraa ohie i te parau apî peapea i nia i te fenua nei. Eaha ïa? O te huriraahia ïa te Diabolo ra o Satani e ta ˈna mau nuu demoni mai te raˈi mai. E nehenehe outou e taio i teie faataaraa riaria no nia i te maraaraa e ore e apehia o te parau apî peapea i roto i te Apokalupo 12:9, 12: “Hurihia ˈtura hoi te teni rahi i rapae, o taua ophi tahito ra ïa, o tei parauhia o te diabolo ra, e o Satani hoi, o tei haavare i to te ao atoa nei; i hurihia oia i rapae i nia iho i te fenua nei, e ta ˈna mau melahi atoa ua huri-atoa-hia i rapae. . . . E ati râ hoi to te fenua e to te tai, tei raro atu na hoi te diabolo ia outou na; e riri rahi hoi to ˈna, no te mea ua ite oia e maa taime poto to ˈna e toe nei.”
No reira, noa ˈtu ehia taime e toe ra e tae roa ˈtu i te hoperaa o te mau mahana hopea, e nehenehe tatou e tiaturi e e tamau noâ te parau apî peapea e e maraa atoa.
Eita e tupu noa mai te reira
Auaa no te mau taata e parahi ra i nia i te fenua nei, eita te huru tupuraa ino mau faatupuhia e te parau apî peapea e parare ra i teie mahana e tupu noa. Inaha, e nehenehe tatou e parau ma te tiaturi e ua taiohia te pue mahana o te parau apî peapea tamau. Te vai mau ra te ravea i te huru tupuraa, noa ˈtu eaha te ohipa o te tupu. Te piri roa ra te hopea o te mau parau apî peapea atoa e e tupu mau iho â i te tau faataahia e te Atua.
E nehenehe tatou e tiaturi papu i te reira no te mea ua tohuhia e e tapae te mau mahana hopea i to ˈna faito rahi aore ra e faaoti oia e te haamouraa a te Atua e te faaore-roa-raa i te mau tumu atoa o te parau apî peapea. E haamou oia i te mau taata iino faahuehue o te ore e hinaaro e taui e e faarue i to ratou haerea ino. E naea te reira i to ˈna faito rahi i te tamaˈi o te mahana rahi o te Atua Mana hope, tei piihia te tamaˈi o Aramagedo. (Apokalupo 16:16) I muri noa ˈˈe i te reira, eita te Diabolo ra o Satani e ta ˈna mau nuu demoni e ohipa faahou. Te faataa ra te Apokalupo 20:1-3 i te ruuruuraahia o Satani, te tumu o te parau apî peapea atoa: “Ite atura vau i te hoê melahi i te pouraa mai mai te raˈi mai, e tei ia ˈna te taviri o te abuso ra, e e fifi rahi auri tei tana rima. Ua haru ihora oia i te teni ra, i taua ophi tahito ra, oia hoi te diabolo ra, o Satani, ua ruuruu ihora ia ˈna e ia hoê tausani i te matahiti. Ua huri atura ia ˈna i raro i te abuso ra, ua opani atura i te opani ia ˈna, tuu ihora oia i te tapao i nia ihora, ia ore oia ia haavare faahou i te mau fenua.”
I muri aˈe i taua mau ohipa peapea ra, e tupu te hoê tau parau apî maitai aita i itehia aˈenei no te fenua nei e no to ˈna mau taata. Teie mau taata, o te mau mirioni taata ïa o te ora mai i te tamaˈi hopea o Aramagedo e te mau miria o te faatiahia mai i to ratou taotoraa i roto i te pohe i roto i te mau menema. Te faataahia ra teie parau apî maitai roa ˈˈe i roto i te buka hopea o te Bibilia: “Inaha tei ǒ te taata ra te sekene o te Atua, e e parahi oia i roto ia ratou ra, e ei taata ratou no ˈna, e ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:3, 4.
E nehenehe anei outou e feruri i taua taime oaoa ra? E oraraa no a muri aˈe hanahana mau aita faahou e parau apî peapea. Oia, e mou te mau parau apî peapea atoa e eita e faaroo-faahou-hia. E vai mai ïa te parau apî maitai, e e rahi noa oia e a muri noa ˈtu.