Ua itea mai ia ratou te hau i roto i te hoê ao arepurepu

TE FAAITE ra te api matamua o teie vea i te hoê aroraa uˈana i Bosnie-Herzégovine. E nehenehe anei te hau e itehia i taua vahi ra? Ma te maere hoi, e nehenehe. A aro ai te mau huiraatira faaroo katolika roma, orthodoxe no Hitia o te râ, e Mahometa o taua fenua atihia ra, no te mau tuhaa fenua, e rave rahi mau taata o te hiaai nei i te hau, e ua iteahia mai ia vetahi.

E ora na te utuafare Djorem i Sarajevo, e e Ite no Iehova ratou. I rotopu i te arepurepuraa atoa o taua oire ra, e peu matauhia e ratou ia haere e farerei i to ratou feia tapiri no te tufa ˈtu i te parau apî maitai o te Basileia o te Atua. (Mataio 24:14) No te aha? No te mea e ua ite te utuafare Djorem e e Basileia mau teie, e ua haamau-aˈena-hia i nia i te raˈi, e tera te tiaturiraa hoê roa e te maitai roa ˈˈe ia fanaˈo te huitaata nei i te hau. Te tiaturi taatoa nei te mau Ite no Iehova i ta te aposetolo Paulo i pii “te parau maitai ra o te hau.” (Ephesia 2:17) Auaa te mau taata mai ia Bozo e o Hena Djorem, e rave rahi o te ite nei i te hau i Bosnie-Herzégovine.

Te hau mau i mua nei

Mea rahi atu â te parau no nia i te utuafare Djorem. Na mua râ, e faataa ˈtu matou no nia i te tahi atu nau feia o tei noaa i te tiaturiraa i roto i te Basileia o te Atua. O Artur e o Arina to raua iˈoa. E ora na raua e ta raua e toru tamaroa apî i roto i te hoê repubilita o te tuhaa fenua a te Hau Rusia tahito. I te haamataraa te tamaˈi tivila, ua aro o Artur i roto i te hoê o na pae. I muri aˈe râ, ua aniani o Artur e, ‘No te aha vau e aro ai i teie mau taata, e feia tapiri hoi matou i mutaa ihora?’ Ua faarue oia i taua fenua ra e, i muri aˈe e rave rahi mau haafifiraa, ua tapae atura oia e to ˈna utuafare iti i Estonia.

Ia ˈna i haere i te oire no Saint-Pétersbourg, ua farerei atura o Artur i te mau Ite no Iehova e ua maere roa oia i te mea o ta ˈna i haapii no nia i te Basileia o te Atua. Te hinaaro o Iehova oia hoi, fatata roa, o te Basileia o te Atua anaˈe o te faatere mai i te huitaata nei. (Daniela 2:44) I reira te fenua e riro mai ai ei vahi hau, aita faahou e tamaˈi tivila aore ra e aroraa i rotopu i te mau nunaa. Teie ta Isaia i tohu no nia i taua tau ra: “E ore ratou e hauti, e ore e rave ino, i to ˈu atoa nei mouˈa moˈa, te na reira maira Iehova; e î hoi te fenua i te ite ia Iehova, mai te vairaa miti e î i te miti ra.”—Isaia 11:9.

I to ˈna iteraa i te hohoˈa penihia o teie fenua hau mau no a muri aˈe i roto i te hoê buka haapiiraa bibilia o ta te hoê Ite i faaite mai ia ˈna, ua tapao aˈera o Artur e ua ora oia i te hoê vahi mai teie te huru na mua ˈˈera. I teie nei râ, ua vavahi-roa-hia e te tamaˈi tivila. Ua hoˈi atu o Artur i Estonia, e te haapii nei o ˈna e to ˈna utuafare hau atu â no nia i te Basileia o te Atua na roto i te hoê haapiiraa bibilia e te mau Ite no Iehova.

Te hau i rotopu i te arepurepuraa

Te na ô ra te Salamo 37:37 e: “A haapao na i te hapa ore, a hiˈo hoi i te piˈo ore; e hau hoi te hopea o te reira taata.” Inaha, eita te hau o te taata hapa ore e te piˈo ore i mua i te aro o te Atua e taotia-noa-hia i to ˈna oraraa no a muri aˈe. Te fanaˈo nei oia i te hau i teie nei iho. Mea nafea? A hiˈo na i te aamu o te hoê taata o Paul to ˈna iˈoa.

Te ora nei o Paul i roto i te hoê aua atea na te feia i horo i to ratou fenua i Etiopia apatoa tooa o te râ, noa ˈtu e no ǒ mai oia i te hoê fenua tapiri. I to ˈna iho fenua, ua farerei oia i te hoê Ite no Iehova o tei rave na i te ohipa no te hoê taiete mori arahu, e ua horoa mai teie taata na ˈna i te hoê buka haapiiraa bibilia, Te parau mau e aratai i te ora mure ore ra.a Aita o Paul i farerei faahou i taua Ite ra, tera râ, ua haapii maite oia i te buka. Ua aratai aˈera te tamaˈi tivila ia ˈna i roto i te hoê aua na te feia i horo i to ratou fenua i Etiopia, e i reira, ua paraparau atura oia ia vetahi ê no nia i te mea o ta ˈna i haapii. Ua farii ihora te hoê pǔpǔ iti i te reira ei parau mau. Ia au i ta ratou i haapii, ua haamata ˈtura ratou i te poro atu ia vetahi ê i roto i te aua.

Ua papai ihora o Paul i te pu rahi a te Taiete Watch Tower no te ani i te tauturu. Ua maere roa te hoê tavini o tei tonohia mai Addis-Abéba mai i to ˈna iteraa e 35 taata e tiai ra ia ˈna, e ua ineine hoi i te haapii hau atu â no nia i te Basileia o te Atua. Ua ravehia ˈtura te mau faanahoraa ia tauturu-tamau-hia ratou.

Nafea e parauhia ˈi e ua fanaˈo te mau taata mai ia Paul i te hau? E ere to ratou oraraa i te mea ohie, tera râ, te vai ra to ratou faaroo i roto i te Atua. Ia roohia ratou i te arepurepuraa o teie nei ao, te faaohipa nei ratou i teie aˈoraa a te Bibilia: “Eiaha outou e ahoaho noa ˈtu i te mau mea atoa nei; e faaite hua râ i to outou hinaaro i te mau mea atoa nei i te Atua, i te pure, i te aniraa ˈtu ma te haamaitai.” Ei faahopearaa, te fanaˈo nei ratou i te hoê oaoaraa o tei varavara roa i teie mahana. E tano te mau parau a te aposetolo Paulo i te amuiraa no Philipi no ratou: “Na te hau a te Atua, o tei hau aˈe atu i te ite taata nei, e faaitoito mai i to outou aau, e to outou manaˈo i te Mesia nei ia Iesu.” Oia mau, te ite nei ratou i te hoê taairaa piri roa e o Iehova, “te Atua hau.”—Philipi 4:6, 7, 9.

Te hau i teie nei iho

O Iesu Mesia te Arii faateronohia o te Basileia o te Atua, e ua piihia oia i roto i te Bibilia te “Arii no te hau.” (Isaia 9:6) Teie ta te hoê peropheta no tahito ra i parau no nia ia ˈna: “E na ˈna e parau i te mau [nunaa] i te parau hau: e riro to ˈna hau mai te miti mai e tae noa ˈtu i te tahi miti, e mai te pape mai e tae noa ˈtu i te mau hopea o te fenua ra.” (Zekaria 9:10) Ua ohipa hohonu te mau parau faauruahia mai teie te huru i nia i te oraraa o te hoê taata o José to ˈna iˈoa.

Ua mau o José i te fare auri i te hoê taime. E taata totova hoi oia e ua tapeahia oia i te taime a faaineine ai oia i te topita i te tahi mau fare mutoi. Ua manaˈo oia e, o te haavîraa uˈana anaˈe o te nehenehe e faahepo i te hau faatere ia haamaitai i te mau ohipa i roto i to ˈna fenua. A mau ai oia i te fare auri, ua haamata aˈera te mau Ite no Iehova i te haapii i te Bibilia e ta ˈna vahine.

I to José matararaa mai, ua haapii atoa ˈtura oia i te Bibilia, e inaha, ua haamata ˈtura te mau parau a te Salamo 85:8 i te tano no ˈna: “E faaroo na vau i ta te Atua ra ta Iehova e parau mai. Te faaite maira oia i te maitai [hau, MN] no to ˈna ra taata, to ˈna ra feia moˈa.” Te hope nei râ teie irava na roto i te hoê faaararaa: “Eiaha râ ratou ia fariu faahou i te ino ra.” No reira, e ore te taata o te imi ra i te hau a Iehova e tamata i te ohipa na nia i to ˈna iho manaˈo aore ra ma te patoi atu i To ˈna hinaaro.

I teie mahana, ua riro mai o José e ta ˈna vahine ei mau tavini kerisetiano. Te faaite nei raua ia vetahi ê e o te Basileia o Iehova te ravea no te arai i te mau fifi o ta José i tamata na i mutaa ihora i te faatitiaifaro na roto i te mau topita o ta ˈna iho i hamani. Te hinaaro mau nei raua e tiaturi i te Bibilia, e na ô ra e: “Na Iehova hoi e horoa mai i te mea maitai.” (Salamo 85:12) Inaha, aita i maoro aˈenei, ua haere atu o José i te mau fare o ta ˈna i opua na e topita. No te aha? No te paraparau atu i te mau utuafare e faaea ra i reira no nia i te Basileia o te Atua.

E mau taata hau

Te na ô ra te Bibilia i roto i te Salamo 37:10, 11 e: “No parahirahi aˈe te paieti ore, e aita ra; oia â ïa, e hiˈo â oe i to ˈna vahi, e aita nei. Area te feia mǎrû ra, e parahi ïa i te fenua, e oaoa ratou i te rahi o te hau ra.” Auê ïa hiˈoraa faahiahia no a muri aˈe e!

A tapao na râ e, o “te feia mǎrû” anaˈe o te fanaˈo i te hau a Iehova. E tia paha i te feia e imi ra i te hau ia haapii i te riro ei feia hau. O te ohipa ïa i tupu i nia ia Keith, e ora ra i Niu Zelani. Ua parauhia e “e mea puai [o Keith] i te pae tino e i to ˈna iho huru taata, e taata riri haere noa, e te imi peapea.” E melo oia no te hoê pǔpǔ parauhia gang, e te faaea ra oia i roto i te hoê fare o tei paruru-maitai-hia, e toru urî tiai o te hahaere na roto i te mau aua no te aˈuaˈu i te feia e tomo mai. Ua taa ta ˈna vahine, te metua vahine o ta ˈna e ono tamarii, ia ˈna.

I to Keith farereiraa i te mau Ite no Iehova, ua haaputapû roa te parau apî maitai ia ˈna. Aita i maoro, ua haere atura o ˈna e ta ˈna mau tamarii i te mau putuputuraa e te mau Ite. Ua tâpû oia i to ˈna rouru o tei tae roa mai i raro i to ˈna tua e ua haamata ˈtura oia i te paraparau no nia i te Basileia o te Atua i to ˈna mau hoa tahito. Ua haamata atoa ˈtura vetahi i te haapii i te Bibilia.

Mai te mau mirioni taata aau maitai na te ao nei, ua haamata o Keith i te faaohipa i te mau parau a te aposetolo Petero: “O te hinaaro hoi i te ora ra, e ia maitai to ˈna ra pue mahana, . . . e haapae oia i te ino, e rave i te maitai; e imi oia i te hau, e aruaru [tapapa, MN] atu i te reira.” (Petero 1, 3:10, 11) Ua farii te vahine tahito a Keith e ia faaipoipo faahou raua, e te haapii nei oia i teie nei i te ‘imi i te hau e i te tapapa i te reira.’

Ua riro te hau a Iehova ei ravea faaoraraa no e rave rahi mau taata, e oia atoa no te hoê taata tuaro i fanauhia i Rusia tahito. Ua noaa i teie taata te mau fetia i te Heiva tuaro a te mau Nunaa, tera râ, ua tupu mai te manaˈo tiaturi ore e ua fariu aˈera oia i nia i te raau taero e te ava. I muri aˈe e 19 matahiti huehue, inaha ua faautuahia oia e toru matahiti i roto i te hoê aua raveraa ohipa i Siberia, ua tere atu oia i Kanada na nia i te pahi ei horopatete tapuni, e e piti taime ua fatata roa oia i te pohe no to ˈna raveraa i te raau taero, ua pure ihora oia i te Atua ia tauturu mai ia ˈna ia ite i te hoê tiaturiraa mau i roto i te oraraa. Ua tauturu te hoê haapiiraa bibilia e te mau Ite no Iehova reo rusia ia ˈna ia ite i te pahonoraa i ta ˈna mau uiraa. I teie mahana, ua itea mai i teie taata, mai te mau mirioni taata ê atu, te hau e te Atua e te hau e o ˈna iho.

Te tiaturiraa o te tia-faahou-raa

Ei faaotiraa, e faahiti faahou matou ia Bozo e o Hena Djorem no Sarajevo. E tamahine ta raua e pae matahiti, o Magdalena. I te avaˈe tiurai i mairi aˈenei, te faaineine ra ratou tootoru atoa i te faarue i te fare no te haamata i ta ratou ohipa pororaa a haapohe ai te ofai pupuhi ia ratou pauroa. Eaha ˈtura ïa no te hau o ta ratou i poro na ia vetahi ê? Ua faaite anei teie ofai pupuhi o tei haapohe ia ratou e e ere te reira i te hau mau?

Aita roa ˈtu! I roto i teie faanahoraa o te mau mea, e tupu iho â te mau ati. Te haapohe nei te mau topita aore ra te mau ofai pupuhi i te taata. Te pohe nei vetahi i te maˈi aore ra i roto i te mau ati. E rave rahi o te pohe nei no to ratou paari. Aita te feia e fanaˈo nei i te hau a te Atua i paruruhia, tera râ, aita te tupuraa o teie mau ohipa e vaiiho ra ia ratou ma te tiaturi ore.

Ua tǎpǔ atu o Iesu i to ˈna hoa ra o Mareta e: “Tei ia ˈu te tia-faahou-raa e te ora, o te faaroo mai ia ˈu ra, pohe noâ oia e ora â ïa.” (Ioane 11:25) Ua tiaturi te utuafare Djorem i te reira, mai te taatoaraa o te mau Ite no Iehova. E ua tiaturi te utuafare Djorem e noa ˈtu e e pohe ratou, e faatiahia mai ratou i nia i te hoê fenua o te riro mau ei vahi hau. “E na te Atua [ra o Iehova] e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:4.

Na mua iti noa ˈˈe oia e pohe ai, ua parau atu o Iesu i ta ˈna mau pǐpǐ e: “O to ˈu nei hau ta ˈu e ho atu no outou; . . . Eiaha e taiâ to outou aau.” (Ioane 14:27) Te oaoa nei tatou e te utuafare Djorem o tei noaa i tera hau e o te fanaˈo atu â i te reira ma te papu maitai na roto i te tia-faahou-raa. Te oaoa nei tatou no te feia atoa o te haamori nei ia Iehova, te Atua hau. Ua noaa i teie mau taata i te hau o te feruriraa. Te fanaˈo nei ratou i te hau e te Atua. Te atuatu nei ratou i te hau e o vetahi ê. E te tiaturi nei ratou i te hoê oraraa hau no a muri aˈe. Oia mau, ua itea mai ia ratou te hau, noa ˈtu e te ora nei ratou i roto i te hoê ao arepurepu. Papu maitai, te fanaˈo nei te feia atoa e haamori nei i te Atua ma te varua e te parau mau i te hau. Ia itea atoa ia outou teie hau, e tia ˈi.

[Nota i raro i te api]

[Hohoˈa i te api 7]

Ua itea mai ia ratou te hau noa ˈtu e te ora nei ratou i roto i te hoê ao arepurepu