Mau uiraa a te feia taio

I roto i te Philipi 2:9, ua parau o Paulo no nia ia Iesu e: “I faateitei roa ˈtu ai te Atua ia ˈna, e ua horoa hoi i te iˈoa i hau ê roa i te mau iˈoa atoa nei no ˈna.” Eaha taua iˈoa apî ra? E mai te peu e mea haihai aˈe o Iesu ia Iehova, nafea ïa te iˈoa o Iesu e hau ê roa ˈi i te mau iˈoa atoa?

Te na ô ra te Philipi 2:8, 9 e: “E no te mea oia [Iesu] i itea mai te taata nei i te huru, ua faahaehaa oia ia ˈna iho, i te haapao-maite-raa e tae noa ˈtura i te pohe i [nia i te pou haamauiuiraa] ra. I faateitei roa ˈtu ai te Atua ia ˈna, e ua horoa hoi i te iˈoa i hau ê roa i te mau iˈoa atoa nei no ˈna.”

Aita teie papai e faataa ra e i te mea e to Iehova anaˈe te iˈoa tei hau ê roa i te mau iˈoa atoa, hoê â faito to Iesu e to Iehova. Mai ta te faahitiraa parau i roto i te Philipi pene 2 e faaite ra, ua fanaˈo o Iesu i to ˈna iˈoa faateiteihia i muri aˈe i to ˈna tia-faahou-raa. Na mua ˈˈe i te reira, aita ïa. I te tahi aˈe pae, e tiaraa teitei noa iho â to Iehova, e aita te reira i taui noa ˈˈe. Te haapapu ra te mea e ua fanaˈo o Iesu i te hoê iˈoa hau ê roa hou ta ˈna taviniraa i nia i te fenua nei e aita oia i tuea ia Iehova. I to Paulo parauraa e ua horoahia te hoê iˈoa hau ê roa i te mau iˈoa atoa no Iesu, ua hinaaro o ˈna e parau e te fanaˈo ra o Iesu i teie nei i te iˈoa teitei roa ˈˈe o te mau mea ora atoa a te Atua.

Eaha te iˈoa teitei o Iesu? Te horoa maira te Isaia 9:6 i te pahonoraa. A tohu ai no nia i te haerea mai o te Mesia, o Iesu, te parau ra taua irava ra e: “Ei nia i to ˈna ra tapono te hau vai ai: e mairihia to ˈna iˈoa, ia Hau ê, e Aˈo, te Atua puai, te Metua no te ui a muri atu, te Arii no te hau.” I ǒ nei e taairaa to te “iˈoa” o Iesu e to ˈna tiaraa e to ˈna mana faatere teitei, e e taa ˈi tatou i “te iˈoa i hau ê roa i te mau iˈoa atoa nei” faahitihia i roto i te Philipi 2:9. Te turaihia ra te mau turi atoa ia tuturi i mua ia Iesu no te faˈi i te tiaraa teitei o te mana faatere ta Iehova i horoa no ˈna—hoê tiaraa o te mana faatere teitei aˈe i tei horoahia aˈenei i te mau mea ora atoa. Aita te taˈo ra “atoa” i roto i teie tatararaa i faahiti-roa-hia i roto i te papai heleni matamua, e matara mai râ te reira na roto i te auraa o te irava. Aita te “iˈoa” o Iesu i hau ê roa i to ˈna iho iˈoa, ua hau ê roa râ i te mau iˈoa atoa o te mau mea ora.

Auê te oaoa e ia apiti atu i te mau melahi e te mau taata haapao maitai atoa na roto i te tuturiraa no te faˈi i te iˈoa o Iesu! E na reira tatou no te auraro atu ia Iesu i roto i te tiaraa faateiteihia e te puai o tei horoahia no ˈna e Iehova—“e hanahana ˈtu te Atua Metua ra.”—Philipi 2:11; Mataio 28:18.