“Eiaha outou ia amui-au-ore-hia i te feia faaroo ore ra”
E PUAI rahi mau â to teie na puaatoro e piti tei patahia i ǒ nei, o te nehenehe hoi e huti ma te ohie i te mau ohipa teimaha mau. Ahiri e e monohia te hoê o na puaatoro e piti i te hoê asini. I te mea e mea nainai aˈe e mea paruparu aˈe te hoê asini i te hoê puaatoro, e faaite mai o ˈna i to ˈna mauruuru ore na roto i te paturaa i nia i te mau raau e tapea ra ia ˈna i raro aˈe i teie zugo tuea ore. Ma te tano mau, ua faataa te ture a te Atua ia Iseraela e: “Eiaha oe e apiti i te puaatoro e te asini ia arote ra.”—Deuteronomi 22:10.
Ua papai te aposetolo Paulo i te hoê â parau no nia i te mau taata. Ua parau oia e: “Eiaha outou ia amui-au-ore-hia i te feia faaroo ore ra.” (Korinetia 2, 6:14) E tia mau iho â ia haapao i te reira ia maiti anaˈe tatou i te hoê hoa faaipoipo. Ua riro te faaipoiporaa ei taatiraa tamau, i te mea e ua parau o Iesu Mesia e: “E ta te Atua i taati ra, eiaha te taata e faataa ê atu.” (Mataio 19:6) E tupu te peapea rahi ia ore anaˈe na hoa faaipoipo e piti e tufa i te hoê â mau tiaturiraa, mau faaueraa tumu, e mau tapao. Mea tia mau â ia pee i te aˈoraa a te Bibilia oia hoi ia faaipoipo “ia au râ i te Fatu.” (Korinetia 1, 7:39) E faatupu te faaipoiporaa ˈtu i te hoê taata o te ore e tufa i te hoê â faaroo e to outou i te hoê fifi rahi aˈe i te apitiraa i te hoê puaatoro e te hoê asini.
Ua riro te taa-ê-raa o te tiaturiraa i te pae faaroo ei tumu no te faaite i te amui-au-ore-raa o na hoa faaipoipo e piti. Mea maitai ia aniani te mau hoa e opua ra e faaipoipo—noa ˈtu e hoê â to raua tiaturiraa—e, ‘Hoê â anei tapao ta mâua? Ihea roa mâua e faaea ˈi? Na vai e haapao i te faufaa moni? E rave anei mâua toopiti i te ohipa? E fanau anei mâua i te tamarii? Na te hamani maitai e te faatura anei e faatere i to mâua taairaa?’
I te tahi faito, e nehenehe te huru tuatapaparaa i teie mau uiraa e faaite e mai te peu e e amuiraa au maitai anei aore ra mea tuea ore. Papu maitai, eita e piti taata e tuea roa. I nia râ i te taatoaraa, mai te peu e e nehenehe nau hoa e piti o te haamatau ra e faaruru e e faatitiaifaro amui i te mau fifi e mai te peu e e nehenehe raua e faatupu noa i te taairaa mahora, eita ïa raua e riro ei zugo tuea ore.