Hoê oraraa maitai aˈe—Fatata roa!

A FERURI noa na outou i te hoê taata mito meteo o tei tohu i te mau parau o tei tupu i te taatoaraa o te taime. Ahiri e e faaite o ˈna i roto i te mau parau apî i te po e e ûahia ananahi, eita oe e haamoe i te rave i ta oe fare amarara ia faarue anaˈe oe i te fare i te poipoi aˈe. Ua tiaturi roa oe i ta ˈna faaiteraa hopea. E ohipa oe ia au i ta ˈna parau.

I teie nei, e nehenehe anei e tiaturi i te parau tǎpǔ a Iehova no nia i te hoê oraraa maitai aˈe i nia i te fenua o te riro ei paradaiso? Inaha, eaha ta ta ˈna faaiteraa tahito e faataa ra? Te haapapu maitai ra te tupuraa o te mau parau tohu bibilia i te faaiteraa a Iehova. E Atua oia no te parau tano hape ore e te parau mau. (Iosua 23:14; Isaia 55:11) No te mea e e nehenehe e tiaturi i te mau parau tǎpǔ a te Atua ra o Iehova, i te tahi taime te faahiti ra o ˈna i te tahi mau ohipa i tǎpǔhia mai no te tau a muri aˈe mai te huru ra e ua tupu aˈena te reira. Ei hiˈoraa, i muri aˈe i ta ˈna parau tǎpǔ no nia i te hoê ao apî i reira te pohe e te oto e mou roa ˈi, te taio ra tatou e: “Ua oti [te mau haamaitairaa i tǎpǔhia mai].” Aore ra, “E tupuraa mau te reira!”—Apokalupo 21:5, 6, tatararaa beretane, nota i raro i te api.

E, te horoa ra te tupuraa o te mau parau tǎpǔ tahito a Iehova i te tiaturiraa ia tatou i roto i te tupuraa o ta ˈna parau tǎpǔ no nia i te hoê oraraa maitai aˈe no te huitaata nei. Afea râ taua oraraa maitai aˈe e tupu ai?

Hoê oraraa maitai aˈe—Afea?

Te fatata maira te hoê oraraa maitai aˈe! E nehenehe tatou e tiaturi i te reira no te mea te parau ra te Bibilia e e tupu e rave rahi mau ohipa iino i nia i te fenua nei hou a haamau ai te Paradaiso i te hoê oraraa maitai aˈe. Te tupu ra taua mau ohipa iino ra i teie nei mahana.

Ei hiˈoraa, ua tohu o Iesu Mesia e e tupu te mau tamaˈi rarahi. Ua parau o ˈna e: “E tia mai hoi te tahi fenua e aro mai i te tahi fenua, e te tahi basileia e aro mai i te tahi basileia.” (Mataio 24:7) Ua tupu iho â taua parau tohu ra. Mai te matahiti 1914 e tae atu i te matahiti 1945, ua tupu e piti tamaˈi rahi, e i muri iho ua tupu e rave rahi atu â mau tamaˈi i reira te mau nunaa i te aroraa te tahi e te tahi. “I nia i te hoê faito au noa faataahia i te mau matahiti atoa, ua tataipiti hau atu te numera o te feia pohepohe i te tamaˈi i roto i taua tau ra [mai te Piti o te Tamaˈi Rahi mai â] ia faaauhia i te feia pohepohe i te senekele 19 e ua tataihitu hau atu ia faaauhia i te senekele 18 ra.”—World Military and Social Expenditures 1993.

Ua riro te parareraa o te maˈi ei haapapuraa faahou o te piri-roa-raa o te hoê oraraa maitai aˈe i roto i te Paradaiso. Ua tohu o Iesu e e tupu ‘te maˈi rahi i tera vahi e tera vahi.’ (Luka 21:11) Ua tupu mau anei taua parau tohu ra? E. I muri aˈe i te tamaˈi rahi matamua, ua haapohe te fiva paniora hau atu i te 20 mirioni taata. Mai reira mai â, ua haapohe te mariri ai taata, te maˈi mafatu, te malaria, te SIDA, e vetahi atu â mau maˈi i tau mirioni taata. I roto i te mau fenua ravai ore, te haapohe nei te mau maˈi no te pape viivii (e tae noa ˈtu i te hî e te mau maˈi toe i roto i te aau) i tau mirioni taata i te mau matahiti atoa.

Ua parau atoa o Iesu e: “E oˈe hoi.” (Mataio 24:7) Mai tei tapaohia i roto i te tumu parau na mua ˈtu, aita i ravai te maa na te feia veve. Ua riro atoa te reira ei haapapuraa e te fatata maira te hoê oraraa maitai aˈe i roto i te Paradaiso.

“E te aueue rahi i te fenua,” ta Iesu i parau. (Luka 21:11) Ua tupu mau atoa te reira i to tatou nei tau. Mai te matahiti 1914 mai â ua haapohe te haamouraa na roto i te vavahiraa a te mau aueueraa fenua i tau hanere tausani taata.

Te parau faahou ra te Bibilia e e tapaohia ‘te mau mahana hopea’ e te hoê tauiraa o te mau taata. E itehia te feia “miimii” e te “nounou moni,” e “e faaroo ore [te mau tamarii] i te metua.” E riro te rahiraa o te mau taata i “te hinaaro i te mau mea e navenave ai ra aore hinaaro i te Atua.” (Timoteo 2, 3:1-5) Eita anei oe e farii e mai teie faataaraa te huru o te rahiraa?

A maraa noa ˈi te mau taata o te rave nei i te mau ohipa iino, ua rahi roa te vahavaharaa i te ture. Ua tohu-atoa-hia te reira. Ia au i te Mataio 24:12, ua faahiti o Iesu i te hoê ‘maraaraa i te vahavaharaa i te ture.’ E farii atoa oe e mea ino roa ˈtu â te ohipa ino i teie nei mahana i to te mau matahiti tahito ra. Te mǎtaˈu nei te mau taata no te mau vahi atoa e e eiâhia, e haavarehia, aore ra e hamani-ino-hia ratou na roto i te tahi huru.

Te mau tamaˈi, te parareraa o te maˈi, te mau oˈe, te mau aueueraa fenua, te maraaraa o te ohipa ino, e te ino-roa-raa o te mau auraa o te taata nei—te tupu mau ra te reira i teie nei mahana, mai ta te Bibilia i tohu na. ‘Aita anei râ teie mau ohipa i tupu i roto i te aamu taatoa o te taata nei?’ ta oe paha e ani mai. ‘Eaha te mea taa ê i to tatou nei tau?’

Te vai ra vetahi mau tuhaa faufaa rahi no nia i te ohipa e tupu ra i teie nei mahana. Aita te Bibilia e parau ra e e riro te tahi tuhaa, mai te oˈe, ei haapapuraa ia ˈna anaˈe e tei roto tatou i te tau hopea e te fatata maira te hoê oraraa maitai aˈe. E tia ia faatupuhia te mau parau tohu bibilia no nia i te tau hopea i nia i te hoê ui aore e atua.—Mataio 24:34-39; Luka 17:26, 27.

Hau atu, mea varavara e ia tupu mau iho â vetahi mau tuhaa o te parau a Iesu—no nia iho â râ i te oˈe e te maˈi e parare ra—i teie nei mahana. No te aha? No te mea aita te mau faaotiraa a te mau aivanaa i rahi aˈenei. Aita te ite i te pae rapaauraa e te mau huru rapaauraa i haere rahi aˈenei i mua aore ra i parare rahi aˈenei. O te Atua anaˈe o tei nehenehe e tohu i roto i ta ˈna Parau, te Bibilia, e i taua huru tau ra, e haere roa ˈtu â te maˈi e te oˈe i te inoraa, eita e maitai mai.

I te mea e ua tupu mau iho â te mau parau tohu atoa o te Bibilia no nia i te tau hopea, aore ra ‘te mau mahana hopea,’ eaha ta tatou e nehenehe e faaoti? Ua piri roa te hoê oraraa maitai aˈe! Nafea râ te reira i te tupu?

Hoê oraraa maitai aˈe—Nafea?

Te manaˈo ra anei oe e e nehenehe te mau taata e haamau i te hoê Paradaiso? I roto i te aamu taatoa e tae roa mai i teie nei, ua haamauhia e rave rahi mau huru faatereraa taata. Ua tamata uˈana vetahi i te haamâha i te mau hinaaro o te nunaa. Ua haere noa ˈtura râ te rahiraa o te mau fifi i te inoraa. I roto i te mau fenua ona e te veve, te aro nei te mau faatereraa i te rave-hua-raa i te raau taero, te faaearaa veve, te veve, te taparahiraa taata, te ereraa i te ohipa, e te tamaˈi.

Noa ˈtu e e nehenehe te mau faatereraa e faatitiaifaro i te tahi tuhaa o teie mau fifi, eita ratou e nehenehe e faaore roa i te maˈi; eita atoa ratou e nehenehe e faaore roa i te ruhiruhia e te pohe. Papu maitai, eita roa ˈtu te mau taata e faatupu i te Paradaiso i nia i teie nei fenua.

Te parau ra te Bibilia e: “Eiaha e tiaturi i te hui arii, e te taata atoa, aita hoi o ˈna e ora.” I roto ia vai ïa tatou e horoa ˈi i to tatou tiaturiraa? Te pahono ra te Bibilia e: “E ao to ˈna tei te Atua o Iakoba te tauturu ia ˈna; e tei to ˈna Atua, tei ia Iehova to ˈna tiaturiraa!” (Salamo 146:3, 5) Mai te peu e e tuu tatou i to tatou tiaturiraa i roto i te Atua ra o Iehova, eita roa ˈtu tatou e inoino.

Ma te papu maitai e nehenehe atoa Tei ia ˈna ra te paari e te puai no te hamani i te fenua, te mahana, e te mau fetia e faariro i te fenua ei paradaiso. E nehenehe oia e faafanaˈo i te mau taata i te hoê oraraa maitai aˈe. Noa ˈtu eaha te mau mea ta te Atua ra o Iehova i parau e e faatupu oia, e nehenehe oia e e faatupu oia. Te parau ra ta ˈna Parau e: “Aore roa hoi e mea e ore te tia i te Atua.” (Luka 1:37) Nafea râ te Atua i te hopoi mai i te hoê oraraa maitai aˈe?

E horoa Iehova i te huitaata nei i te hoê oraraa maitai aˈe na roto i ta ˈna Basileia. E eaha te Basileia o te Atua? O te hoê ïa faatereraa mau e te hoê Faatere maitihia e te Atua, o Iesu Mesia. Tei roto te Basileia o te Atua i te raˈi, fatata roa râ oia i te afai mai i te mau haamaitairaa faahiahia mau e te hoê oraraa maitai aˈe i te feia e parahi i roto i te Paradaiso i nia i te fenua nei.—Isaia 9:6, 7.

Ua matau ê na paha ia oe i te hohoˈa pure a Iesu, tei itehia i roto i te Bibilia i roto i te Mataio 6:9-13. Te parau ra te hoê tuhaa o taua pure ra i te Atua e: “Ia tae to oe ra hau. Ia haapaohia to oe hinaaro i te fenua nei, mai tei te ao atoa na.” Ia au maite i taua pure ra, e “tae” mai te Basileia o te Atua no te faatupu i te opuaraa a te Atua ra o Iehova no te fenua nei. E tera hoi ta ˈna opuaraa, ia riro te fenua ei paradaiso.

Te vai ra te hoê uiraa hopea: Eaha te tia ia oe ia rave no te fanaˈo i te hoê oraraa maitai aˈe i roto i te Paradaiso e fatata maira?

Te mea e tia ia oe ia rave

Te pûpû ra te Atua ra o Iehova i te tiaturiraa o te hoê oraraa maitai aˈe i roto i te Paradaiso i te feia atoa o te rave i to ˈna hinaaro. Te parau ra te Bibilia ia tatou e: “E parahi te feia parau-tia i nia i te fenua, e parahi tamau â ratou i reira.” (Salamo 37:29) Eaha râ te mea e faataata parau-tia i te hoê taata i mua i te Atua?

No te faaoaoa ia Iehova e tia ia tatou ia haapii hau atu â no nia i te ohipa o ta ˈna e hinaaro ra e ia rave tatou. Mai te peu e e noaa ia tatou i te ite no nia i te Atua e e faaohipa tatou i te reira i roto i to tatou oraraa, e nehenehe tatou e ora e a muri noa ˈtu. I roto i te hoê pure a te Atua, ua parau o Iesu e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.”—Ioane 17:3.

Te buka o te faaite mai ia tatou no nia i te Atua ra o Iehova e o Iesu Mesia, o te Parau ïa a te Atua, te Bibilia. Ua riro te reira ei ô faufaa rahi roa ˈˈe no ǒ mai ia Iehova ra. E au te Bibilia i te hoê rata a te hoê metua tane here o te faatae atu i ta ˈna mau tamarii. Te haamaramarama ra te reira ia tatou no nia i te parau tǎpǔ a te Atua e horoa i te hoê oraraa maitai aˈe i te huitaata nei e te faaite maira te reira e nafea tatou e nehenehe ai e fanaˈo i te reira. Te haapapu ra te Bibilia ia tatou e eaha ta te Atua i rave i te tau tahito ra e eaha ta ˈna e rave i te tau no a muri aˈe. Te horoa atoa maira oia i te aˈoraa aravihi no nia i te faatitiaifaroraa ma te manuïa i to tatou mau fifi i teie nei â. Oia mau, te haapii ra te Parau a te Atua ia tatou e nafea tatou ia oaoa atoa i roto i teie ao arepurepu.—Timoteo 2, 3:16, 17.

E oaoa te mau Ite no Iehova i te faanaho i te hoê haapiiraa bibilia tamoni ore i to oe fare. A haapii e nafea oe e nehenehe ai e fanaˈo i te hoê oraraa oaoa aˈe i teie nei, e te tiaturiraa o te hoê oraraa maitai roa ˈˈe i te tau no a muri aˈe.

[Hohoˈa i te api 5]

Te faaite ra te mau parau tohu bibilia e te fatata maira te hoê oraraa maitai aˈe

[Hohoˈa i te api 7]

E haamau te Basileia o te Atua i te hoê oraraa maitai aˈe no te huitaata nei