Hoê oraraa maitai aˈe i tǎpǔhia mai

TE HINAARO ra anei oe e tiamâ mai i te mau fifi e haapeapea nei i te oraraa? Te hinaaro ra anei oe e ora i roto i te hoê ao i reira te oraraa oaoa mai tei faaitehia i nia i te hohoˈa i mua e i muri mai i te mau api o teie vea? A hiˈo maitai na i teie hohoˈa. E rave rahi te maa a te mau taata. E oaoa mau ratou i teie mau maa monamona mau. Mea oaoa te taatoaraa. Te faatupu ra te mau taata no te mau iri atoa i te hau i rotopu ia ratou. Te vai atoa ra te hau i rotopu i te mau animala! Aita te hoê noa ˈˈe taata e aro ra. Aita e taata veve. Aita e taata maˈi. Te vai ra te mau vahi haviti, te mau tumu raau nehenehe, e te pape viivii ore, e te mâ. Auê ïa huru tupuraa faahiahia e!

E vai noa anei teie fenua mai te reira? E, e riro oia ei paradaiso. (Luka 23:43) Ua opua te Atua, o tei poiete i te fenua, e e fanaˈo te mau taata i te hoê oraraa maitai aˈe i nia i te hoê fenua o te riro ei paradaiso. E e nehenehe atoa oe e fanaˈo i te reira!

Eaha te huru oraraa o ta oe e au roa ˈˈe?

Nafea te Paradaiso no te tau no a muri aˈe i nia i te fenua nei e taa ê ai i te ao o ta tatou e ora nei i teie nei mahana? I teie nei, ua hau atu i te hoê miria taata o te pohe nei i te poia i te mau mahana atoa. I roto râ i te Paradaiso ta te Atua i opua no te fenua nei, e rahi te maa na te taata tataitahi. Te tǎpǔ ra te Bibilia e: “Ei reira Iehova sabaota ra e rave ai, na te taata atoa . . . i te oroa amuraa maa maitatai, i te oroa uaina tahito.” (Isaia 25:6) Eita oia e erehia i te maa, i te mea e te parau ra te Bibilia e: “E riro hoi e maa sitona tei te fenua i nia i te tupuai o te mau mouˈa ra.”—Salamo 72:16.

I teie nei mahana, e rave rahi o te ora nei i roto i te veve mau, aore ra te rohi nei ratou no te aufau i ta ratou tarahu. Aita to vetahi e fare e te taoto nei ratou i roto i te mau aroâ. Ia au i te Faanahonahoraa o te Oraora-maitai-raa na te Ao nei, e 100 mirioni tamarii o te ao nei aita to ratou e faaearaa. I roto râ i te Paradaiso e fatata maira, e fanaˈo te mau taata atoa i te hoê fare no ratou iho. Te na ô ra te Parau a te Atua e: “E patu ratou i te fare, e na ratou iho e parahi; e na ratou e tanu i te ô vine, a amu ai i te maa i reira.”—Isaia 65:21.

E rave rahi o te rave nei i te ohipa o ta ratou e au ore ra. Mea pinepine te rave puai nei ratou i te ohipa e rave rahi hora i te mahana taitahi, mea haihai roa râ ta ratou moni e noaa mai. Te ora nei fatata 1 i nia i te 5 taata na te ao nei e te hoê moni ohipa iti aˈe i te 500 dala i te mahana hoê. I roto râ i te Paradaiso e fatata maira, e oaoa te mau taata i ta ratou ohipa e e fanaˈo ratou i te mau faahopearaa maitatai. Te tǎpǔ ra te Atua e: “E vai taiata te aho o to ˈu ra feia i maitihia i to te mau mea ta ratou i hamani. E ore hoi ratou e ohipa faufaa ore noa.”—Isaia 65:22, 23.

I teie nei ua parare haere te maˈi. E rave rahi tei matapohia. E tariˈa turi to vetahi pae. Eita vetahi e nehenehe e haere. I roto râ i te Paradaiso, e faaora-roa-hia te mau taata i te maˈi. Te parau ra o Iehova e: “E ore hoi to reira e parau e, Ua paruparu vau i te maˈi.” (Isaia 33:24) No te feia atoa tei paruparu-aˈena-hia, teie te parau tǎpǔ putapû mau: “Ei reira e faaaraarahia ˈi te mata o te matapo ra, e amaha hoi te tariˈa o te feia tariˈa turi ra: ei reira te pirioi e ouˈauˈa noa ˈi mai te aili, e himene mai hoi te vaha o te taata vava ra.”—Isaia 35:5, 6.

I teie nei mahana, te vai ra te mauiui e te oto, te mihi e te pohe. I roto râ i te Paradaiso i nia i te fenua nei, eita e ite-faahou-hia teie mau mea atoa. Oia, e mou atoa te pohe! Te parau ra te Bibilia e: “Ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te me ua mou te mau mea tahito ra.”—Apokalupo 21:3, 4.

Ma te papu maitai, te Paradaiso i nia i te fenua i tǎpǔhia mai e Iehova ra, e riro mau â te reira ei oraraa maitai aˈe no te huitaata nei. Nafea râ tatou ia tiaturi papu e e tupu mau iho â te reira? Afea te reira e tupu ai, e nafea? Eaha te tia ia oe ia rave no te parahi i reira?