Te taata faahinaaro
HOÊ anaˈe aa i roto i te reo Hebera no te parau ra “pohehae.” Ia faahitihia oia no te mau taata hara, e nehenehe te parau Hebera e hurihia na roto i te mau parau “faahinaaro” aore ra “feii.” (Genese 26:14; Koheleta 4:4) Tera râ, e rave rahi mau parau no te taˈo ra “pohehae” i roto i te reo Heleni. Te parau ra zeʹlos, e te parau e tuea i te reira na roto i te reo Hebera, e tano ïa no te pohehae tia e te pohehae ino. Te tahi atu parau heleni, phthoʹnos, e tano noa ïa no te pohehae ino.
Mea nafea te parau ra phthoʹnos i te faaohiparaahia na roto i te reo Heleni tahito? Te faataa ra The Anchor Bible Dictionary e: “Taa ê atu i te taata nounou, eita te taata e faatupu ra i te phthonos e faahinaaro noa i te mau maitai ta vetahi pae e fanaˈo ra; aita noa o ˈna e hinaaro ra e ia fanaˈo vetahi pae i te reira. Mea taa ê o ˈna i te taata tataˈu oia hoi ta ˈna opuaraa, taa ê atu i ta te taata tataˈu, e ere ïa i te upootiaraa, o te haafifiraa râ ia vetahi ê ia upootia mai.”
Mea pinepine aita te taata faahinaaro e haapao ra e o to ˈna iho haerea te tumu matamua o to ˈna mau fifi. “Hoê o te mau tapao o te phthonos,” ta taua noâ ra titionare e faataa ra, “o to ˈna ïa haapao-ore-raa ia ˈna iho. E parau noa te taata phthoneros, ia titauhia o ˈna ia faataa i to ˈna haerea, ia ˈna iho e ia vetahi ê e ua tano o ˈna i te na reiraraa i te feia ta ˈna i aro atu e na te parau-tia ore o te huru tupuraa i turai ia ˈna ia vahavaha. Ia anihia o ˈna e mea nafea oia i nehenehe ai e paraparau mai ta ˈna i rave no nia i te hoê hoa, e parau o ˈna e no te maitai iho o to ˈna hoa ta ˈna mau haavahavaharaa.”
Ua faaohipa te mau taata papai evanelia ra o Mataio e o Mareko i te parau ra phthoʹnos no te faataa i te manaˈo turai o te feia i haapohe ia Iesu. (Mataio 27:18; Mareko 15:10) E, ua turaihia ratou e te faahinaaroraa. Ua faariro taua manaˈo ino ra i te mau apotata ei feia riri uˈana i to ratou mau taeae tahito. (Timoteo 1, 6:3-5) Eita e maerehia e ua opanihia te feia faahinaaro ia tomo i roto i te Basileia o te Atua! Ua faaue te Atua ra o Iehova e te mau taata atoa e tamau noa i te “îî i te feii,” “e au ia ratou te pohe.”—Roma 1:29, 32; Galatia 5:21.
[Hohoˈa i te api 7]
Eiaha e vaiiho i te faahinaaroraa ia faaino i to outou oraraa