Faaiteraa hapa i te mau atua hape
“Te parau maira Iehova, O outou to ˈu ite; e tau tavini, i maitihia e au ra.”—ISAIA 43:10.
1. O vai te Atua mau ra, e i roto i teihea tuhaa e o oia te Atua teitei aˈe i te mau atua e haamorihia i teie nei mahana?
O VAI te Atua mau ra? I teie nei mahana, tei mua te huitaata atoa i taua uiraa faufaa mau ra. Noa ˈtu e te haamori nei te mau taata e rave rahi atua, Hoê anaˈe râ o te nehenehe e horoa mai na tatou i te ora e e pûpû mai i te hoê oraraa oaoa no a muri aˈe. Na roto noa i taua taata Otahi roa e nehenehe ai e parau e: “No ˈna hoi to tatou ora, e i hahaere ai.” (Ohipa 17:28) Oia mau, e tia e ia haamorihia i te hoê noa Atua. Mai ta te himene no nia i te raˈi i papaihia i roto i te buka Apokalupo e parau ra e: “E au te hanahana ia oe, e [Iehova], e te tura, e te mana, na oe hoi i hamani i te mau mea atoa nei, e no to oe hinaaro i mau ai, e i hamanihia ˈi ratou.”—Apokalupo 4:11.
2, 3. (a) Mea nafea to Satani patoiraa ma te haavare i te tiaraa Atua o Iehova? (b) Eaha te faahopearaa o te hara a Eva no ˈna iho e no ta ˈna ra mau tamarii, e eaha te faahopearaa no Satani?
2 I roto i te ô i Edene, ua patoi Satani ma te haavare i te tiaraa Atua o Iehova. Ma te faaohipa i te hoê ophi, ua parau aˈera oia ia Eva e ahiri e e patoi o ˈna i te ture a Iehova e e amu o ˈna i te maa o te raau ra ta Iehova i opani, e riro mau â o ˈna iho mai te Atua ra te huru. Teie ta ˈna mau parau: “Ua ite hoi te Atua e, e ua amu anaˈe orua i to reira, e araara ïa to orua mata, e e riro orua mai te atua ra te huru, i te ite i te maitai e te ino.” (Genese 3:5) Ua tiaturi o Eva i te ophi e ua amu atura i te maa i opanihia.
3 Papu maitai, ua haavare o Satani. (Ioane 8:44) Ua riro noa Eva “mai te atua ra te huru” i to ˈna hararaa mea na roto ïa i te amoraa i te hopoia ia faaoti i te mea maitai e te mea ino, ohipa te tia e ia vaiihohia e na Iehova e faaoti. E noa ˈtu te haavare a Satani, ua pohe iho â oia. No reira te taata hoê roa tei fanaˈo i te hara a Eva o Satani ïa. Oia mau, te tapao a Satani tei ore i faahitihia na roto i te faaheporaa ia Eva ia hara no te mea te hinaaro ra o ˈna iho e riro ei atua. I to Eva hararaa, o ˈna ta ˈna pǐpǐ matamua, e i muri iho ua haere atoa mai o Adamu. Aita te taatoaraa o ta raua mau tamarii i fanau-noa-hia ‘i roto i te hara’ tei raro aˈe atoa râ i te mana o Satani, e i roto i te hoê taime poto noa, ua fa mai te hoê ao taatoa tei atea ê i te Atua mau ra.—Genese 6:5; Salamo 51:5.
4. (a) O vai te atua o teie nei ao? (b) Eaha te titauraa ru e vai nei?
4 Ua haamouhia taua ao ra i roto i te Diluvi. (Petero 2, 3:6) I muri aˈe te Diluvi, ua fa faahou mai te tahi atu ao tei atea ê ia Iehova, e ua tamau â i te ora. No taua ao ra te Bibilia i parau ai e: “Te vai noa nei to te ao atoa i raro aˈe i taua varua ino ra.” (Ioane 1, 5:19) Na roto i ta ˈna ohipa no te patoi i te tumu e te auraa mau o te ture a Iehova, te tavini nei teie nei ao i te mau opuaraa a Satani. O o ˈna to ratou atua. (Korinetia 2, 4:4) Teie nei râ, ua riro oia ei atua puai ore. Aita oia e nehenehe e rave e ia oaoa te taata aore ra e horoa na ratou i te ora; o Iehova anaˈe te nehenehe e faatupu i te reira. No reira, e tia i te mau taata o te hinaaro ra i te hoê oraraa e auraa to ˈna e te maitai ia haapii na mua e o Iehova te Atua mau e i muri iho e haapii atu ai ia rave i to ˈna hinaaro. (Salamo 37:18, 27, 28; Koheleta 12:13) Ua riro mau â ei hinaaro puai mau no te mau tane e mau vahine o te faatupu ra i te faaroo, ia horoa i te faaiteraa aore ra ia faaite i te parau mau no nia ia Iehova.
5. Eaha te “nahoa rahi ite” ta Paulo i faahiti? A faahiti mai na te tahi o ta ˈna i tabula.
5 Mai te omuaraa mai â o te aamu taata nei, ua vai noa mai taua mau huru taata haapao maitai i roto i te ao nei. Te horoa nei te aposetolo Paulo i roto i te Hebera pene 11 i te hoê tabula roa mau no nia ia ratou e te pii nei ia ratou “taua nahoa rahi i ite nei.” (Hebera 12:1) O Abela te piti o te tamaiti a Adamu raua o Eva te taata matamua i nia i te tabula a Paulo. Te faahiti-atoa-hia ra te iˈoa o Enoha e o Noa no te tau i muri aˈe i te Diluvi. (Hebera 11:4, 5, 7) O Aberahama te taata e haamanaˈo-maitai-hia, te tupuna o te nunaa ati Iuda. Ua piihia o Aberahama te “Taua no te Atua,” ua riro mai ei tupuna no Iesu, “te ite mau e te parau mau ra.”—Iakobo 2:23; Apokalupo 3:14.
Te faaiteraa a Aberahama no te turu i te parau mau
6, 7. I roto i teihea auraa ua riro te oraraa e te mau ohipa o Aberahama ei faaiteraa e o Iehova te Atua mau?
6 Mea nafea to Aberahama taviniraa ei ite? Na roto i to ˈna faaroo aueue ore e te auraroraa ia Iehova ma te haapao maitai. I to ˈna aniraahia ia faarue i te oire no Ura e ia ora i te toea o to ˈna oraraa i roto i te hoê oire atea, ua auraro o Aberahama. (Genese 15:7; Ohipa 7:2-4) E faarue pinepine te mau taata ratere i to ratou oraraa hahaere e e maiti ratou i te hoê oraraa hau i roto i te hoê oire. I teie nei râ, i to Aberahama faarueraa i to ˈna oire no te faaea i roto i te mau fare ie, ua haapapu oia i to ˈna tiaturi i roto i te Atua ra o Iehova. Ua riro to ˈna auraroraa ei faafaaiteraa no te feia e hiˈo ra i to ˈna haerea. Ua haamaitai-rahi-hia o Aberahama e Iehova no to ˈna faaroo. Noa ˈtu e ua ora oia i roto i te mau fare ie, ua maitai o Aberahama i te pae faufaa. A hopoihia ˈi o Lota e to ˈna utuafare ei tîtî, ua horoa o Iehova i te manuïaraa ia Aberahama i roto i to ˈna tapaparaa, ua nehenehe aˈera oia e faahoˈi mai ia ratou. Ua fanau te vahine a Aberahama i te hoê tamaroa i to ˈna ruhiruhiaraa, e i reira to Iehova haapapuraa i te parau tǎpǔ ia Aberahama e e riro oia ei metua no te hoê huaai. Na roto ia Aberahama, e ite te mau taata e Atua ora o Iehova e o te faatupu i ta ˈna mau parau tǎpǔ.—Genese 12:1-3; 14:14-16; 21:1-7.
7 I to ˈna hoˈiraa mai mai i te faaoraraa mai ia Lota, ua farerei o Aberahama ia Melehisedeka, arii no Salema (i piihia i muri iho Ierusalema), o tei haamaitai ia Aberahama ma te parau e: “Aberama e te Atua teitei.” Ua farerei atoa te arii no Sodoma ia ˈna e ua hinaaro e horoa na ˈna i te tahi mau ô. Ua patoi atu râ o Aberahama. No te aha? Aita oia i hinaaro e ia feaa noa ˈˈe oia no nia i te Pu o ta ˈna mau haamaitairaa. Ua parau oia e: “Ua tǎpǔ vau i te Atua teitei ra ia Iehova, i te Fatu o te raˈi e te fenua nei, e e ore au e rave noa ˈtu i te hoê mea iti i te mau taoˈa atoa na oe na, e tae noa ˈtu i te hoê taura iti tamaa ra, oi parau hoi oe, E taoˈa rahi ta Aberama ia ˈu.” (Genese 14:17-24) Auê hoi faafaaiteraa maitai mau ta Aberahama i horoa!
Te hoê nunaa o te mau ite
8. Mea nafea to Mose faaiteraa i te faaroo puai mau i roto ia Iehova?
8 Tei roto atoa o Mose, te hoê huaai a Aberahama i te tabula a Paulo no te mau ite. Ua faarue o Mose i te taoˈa rahi no Aiphiti e i muri iho, ua haere roa ˈtu oia i mua i te faatere o teie puai rahi o te ao nei no te titau e ia faatiamâhia te mau tamarii Iseraela. Ihea roa to ˈna iteraa i te itoito? Na roto i to ˈna faaroo. Ua parau o Paulo e: “Itoito maite atura [o Mose] i te hiˈoraa ˈtu i te Atua, i tei ore e itea ia hiˈo ra.” (Hebera 11:27) E itehia e e nehenehe e tapeahia te mau atua no Aiphiti. Oia atoa i teie nei mahana, te faahiahia nei te mau taata i ta ratou mau atua. Ua riro râ o Iehova, noa ˈtu e mea itea-ore-hia oia e te mata taata nei, ei Atua mau no Mose ia faaauhia i te taatoaraa o te mau atua hape atoa. Aita o Mose i feaa noa ˈˈe e te ora ra o Iehova e e haamaitai oia i Ta ˈna mau tavini. (Hebera 11:6) Ua riro atura o Mose ei ite faahiahia mau.
9. Mea nafea to te nunaa o Iseraela taviniraa ia Iehova?
9 I muri aˈe i to ˈna aratairaa i te mau ati Iseraela i te tiamâraa, ua riro atura o Mose ei arai no te faufaa i rotopu ia Iehova e te mau huaai a Aberahama na roto ia Iakoba. Ei faahopearaa, ua itehia te nunaa o Iseraela ei nunaa taa ê no Iehova. (Exodo 19:5, 6) No te taime matamua, ua horoahia te hoê faaiteraa i mua i te nunaa. E tano roa hoi te parau a Iehova tei faahitihia na roto ia Isaia, a 800 matahiti i muri aˈe, mai te haamataraa te nunaa i te faraa mai: “O outou to ˈu ite,” te faahitiraa a Iehova, “e tau tavini, i maitihia e au ra: ia ite hoi outou, e ia faaroo mai ia ˈu, ia ite e, o vau te Atua mau.” (Isaia 43:10) Nafea taua nunaa apî i te riroraa ei mau Ite no Iehova? Na roto i to ratou faaroo e to ratou auraro e na roto i te ohipa a Iehova no ratou.
10. Na roto i teihea ravea te mau ohipa puai a Iehova no Iseraela i te horoaraa i te hoê faaiteraa, e eaha te faahopearaa?
10 Tau 40 matahiti i muri aˈe i to ˈna faraa mai, ua fatata roa o Iseraela i te fatu mai i te Fenua tǎpǔ. Ua haere te mau taata hiˈopoa e hiˈo i te oire no Ieriko, e ua paruru o Rahaba, te hoê vahine e faaea ra i Ieriko ia ratou. No te aha? Ua parau oia e: “Ua faaroo na hoi matou e, ua haamǎrôhia e Iehova te miti uteute no outou, ia outou i haere mai mai Aiphiti ra; e ta outou hoi ravea i na arii toopiti o te ati Amora i te hoê pae Ioridana ra, ia Sihona, e ia Oga, o tei pau roa ïa ia outou ra. Tei to matou iteraa i taua parau ra, tarapape noa ihora to matou aau, a ore roa e itoito i toe i roto i te taata atoa ra ia outou: o to outou Atua ra hoi o Iehova, o te Atua ïa no te raˈi i nia ra, e no raro atoa nei no te fenua.” (Iosua 2:10, 11) Ua turai te faatiaraa no nia i te mau ohipa puai o Iehova ia Rahaba e to ˈna utuafare ia faarue ia Ieriko e ta ˈna mau atua hape e ia haamori ia Iehova na muri ia Iseraela. Ma te maramarama, ua horoa o Iehova i te hoê faaiteraa puai mau na roto ia Iseraela.—Iosua 6:25.
11. Eaha te hopoia o te mau metua no Iseraela atoa no nia i te faaiteraa?
11 A vai ai o Iseraela i Aiphiti, ua tono aˈera o Iehova ia Mose i mua ia Pharao e ua parau atu e: “A haere i roto ia Pharao ra, ua faaiita hoi au i to ˈna aau, e te aau o to ˈna ra mau tavini, ia faaite atu vau i taua mau tapao na ˈu nei, i mua i tana aro: e ia faaite atoa hoi oe i to tamaiti, e to mootua, i te huru o ta ˈu rave i to Aiphiti; e te mau tapao ta ˈu i rave i rotopu ia ratou. Ite aˈera outou e, o vau o Iehova.” (Exodo 10:1, 2) Ua tia i te mau ati Iseraela faaroo ia haapii i ta ratou mau tamarii i te mau ohipa puai mau a Iehova. E tia râ i te mau tamarii ia faaite i ta ratou mau tamarii e e na reira ratou mai tera ui e tae atu i tera ui. No reira, e faahaamanaˈohia i te mau ohipa puai a Iehova. Hoê â atoa i teie nei mahana, tei te mau metua te hopoia e horoa i te faaiteraa i ta ratou mau tamarii.—Deuteronomi 6:4-7; Maseli 22:6.
12. Mea nafea te haamaitairaa a Iehova no nia ia Solomona e ia Iseraela i te riroraa ei faaiteraa?
12 Ua riro te mau haamaitairaa rahi ta Iehova i tuu atu i nia ia Iseraela ei faaiteraa i mua i te mau nunaa e haaati ra. Mai ta Mose i parau i muri aˈe i to ˈna faahaamanaˈoraa i te mau haamaitairaa i tǎpǔhia e Iehova e: “E ite to te ao atoa nei e ua mairihia oe i te iˈoa a Iehova; e e mǎtaˈu ratou ia oe.” (Deuteronomi 28:10) Ua horoahia na Solomona i te paari e te taoˈa rahi no to ˈna faaroo. I raro aˈe i ta ˈna faatereraa, ua ruperupe te nunaa e ua fanaˈo ratou i te hoê tau te vai ra te hau roa mau. No nia i taua tau ra te taio nei tatou e: “Ua haere mai hoi te taata atoa e faaroo i te parau a Solomona, no ǒ i te hui arii atoa o te fenua nei, o tei faaroo i te parau paari no ˈna ra.” (Te mau arii 1, 4:25, 29, 30, 34) Te taata mataitai teitei mau i rotopu i te mau taata i haere mai e hiˈo ia Solomona o te arii vahine ra no Seba. I muri aˈe i to ˈna ite-roa-raa i te haamaitairaa a Iehova i nia i te nunaa e ta ˈna arii, ua parau oia e: “Ia haamaitaihia to Atua o Iehova o tei au atu ia oe, e ua faanoho ia oe i nia i tana terono ei arii na to Atua na Iehova. No te mea, ua aroha to Atua ia Iseraela.”—Paraleipomeno 2, 9:8.
13. Eaha na râ te faaiteraa rahi roa ˈˈe a Iseraela, e nafea tatou ia fanaˈo i te reira?
13 Ua faahiti te aposetolo Paulo i te parau paha o tei riro ei faaiteraa rahi roa ˈˈe no Iseraela. I to ˈna faahitiraa i te parau no nia i te Iseraela i te pae tino e te amuiraa kerisetiano i Roma, ua parau oia e: “O te parau ra a te Atua i tuuhia mai ia ratou ra.” (Roma 3:1, 2) Ma te haamata na roto ia Mose, ua faauruahia vetahi mau ati Iseraela haapao maitai ia papai i te mau faaauraa i rotopu ia Iehova e o Iseraela, e oia atoa ta ˈna aˈoraa, ta ˈna mau ture, e ta ˈna mau parau tohu. Na roto i taua mau papai ra, ua fa mai na roto i taua mau taata papai tahito ra i te hoê faaiteraa no te mau ui atoa o te haere mai—e tae noa ˈtu i to tatou i teie nei mahana—e te vai ra i te hoê noa Atua, e to ˈna iˈoa ra o Iehova.—Daniela 12:9; Petero 1, 1:10-12.
14. No te aha ua hamani-ino-hia vetahi o tei horoa i te faaiteraa no Iehova?
14 Ma te peapea hoi, ua ere pinepine o Iseraela i te faaroo, e ua tono aˈera o Iehova i te mau ite i to ˈna iho nunaa. Ua hamani-ino-hia e rave rahi i rotopu ia ratou. Ua parau o Paulo e “e ati rahi to te tahi pae i te tâhitohito, e te papai; e te ruuruu, e te tapea i roto i te fare.” (Hebera 11:36) E mau ite haapao maitai mau hoi! Auê hoi i te peapea e mea pinepine no ǒ mai ta ratou mau hamani-ino-raa i te mau melo iho o te nunaa i maitihia e Iehova! (Mataio 23:31, 37) Oia mau, ua rahi roa mai te hara o te nunaa ra, e i te matahiti 607 hou to tatou nei tau, ua arato o Iehova i to Babulonia ia haamou ia Ierusalema e to ˈna hiero e ua aratai i te feia rahi roa o tei ora mai i te faatîtîraa. (Ieremia 20:4; 21:10) Ua hope anei te faaiteraa a te hoê nunaa i te iˈoa o Iehova? Aita.
Te hoê atua toru tahi
15. Nafea te hoê faaiteraa i te horoa-atoa-hia noa ˈtu e ua afai-tîtî-hia i Babulonia?
15 Tae noa ˈtu i te faatîtîraa i Babulonia, aita te mau melo haapao maitai i roto i te nunaa i haamarirau i te faaiteraa no nia i te tiaraa Atua e te puai o Iehova. Ei hiˈoraa, ua faaite roa o Daniela ma te maramarama i te moemoeâ o Nebukanesa, ma te faataa i te mau papai i nia i te papai no Belesazara, e ua patoi oia i te taiva i mua ia Dariu no nia i te tumu parau o te pure. Ua horoa atoa na ati Hebera tootoru ra i te hoê faaiteraa faahiahia mau i mua ia Nebukanesa i to ratou patoiraa i te tuturi i mua i te hoê tii rahi.—Daniela 3:13-18; 5:13-29; 6:4-27.
16. Mea nafea to Iehova tohuraa i te hoˈiraa o Iseraela i to ratou fenua, e eaha te tumu o taua faahoˈiraa ra?
16 Teie nei râ, ua hinaaro â o Iehova e ia fa faahou mai te hoê nunaa ite i nia i te fenua o Iseraela. Ua papai o Ezekiela, o tei faaite i te parau tohu no nia i te feia i afai-tîtî-hia i Babulonia i te opuaraa a Iehova no nia i te fenua i haamouhia: “E na ˈu e faarahi i te taata ia outou, i te utuafare atoa o Iseraela, e hope roa ˈˈe: e taatahia te mau oire, e te mau vahi pau, e patuhia ïa.” (Ezekiela 36:10) No te aha o Iehova i na reira ˈi? A tahi no te faaite i to ˈna iho iˈoa. Na roto ia Ezekiela ua parau oia e: “E ere no outou i na reira ˈi au, e te utuafare o Iseraela, no to ˈu nei ra iˈoa moˈa, i tei haaviiviihia e outou i te mau fenua i haerehia e outou na.”—Ezekiela 36:22; Ieremia 50:28.
17. Eaha te auraa o te mau parau i roto i te Isaia 43:10?
17 I te taime i tohuhia ˈi te hoˈiraa o Iseraela mai Babulonia mai to te peropheta ra o Isaia i faauruahia ia papai i te mau parau i roto i te Isaia 43:10, ma te parau e o Iseraela te Ite o Iehova, ta ˈna ra tavini. I roto i te Isaia 43 e te 44, Ua faataahia o Iehova ei Poiete no Iseraela, te Matamua, tei Moˈa, te Faaora, te Hamani. (Isaia 43:3, 14, 15; 44:2) Ua faatiahia e ia afai-tîtî-hia o Iseraela no te mea e aita te nunaa i faahanahana tamau ia ˈna ia au i to ˈna tiaraa. Teie nei râ, o ratou noâ to ˈna tavini. Ua parau o Iehova ia ratou e: “Eiaha e mǎtaˈu, ua faaorahia oe e au; na ˈu i mairi i to iˈoa na; no ˈu oe.” (Isaia 43:1) E hope te faatîtîraa o Iseraela i Babulonia.
18. Mea nafea te faatiamâraa o Iseraela mai Babulonia mai i te haapapuraa e o Iehova noa te Atua mau ra?
18 Oia mau, ua faaora o Iehova ia Iseraela i te faatîtîraa i Babulonia na roto i te haavaraa i te mau atua. Ua horoa oia i te hoê tautooraa i te mau atua hape o te mau nunaa ia faatupu i ta ratou mau ite, e ua maiti oia ia Iseraela ei ite no ˈna. (Isaia 43:9, 12) I to ˈna faatiamâraa ia Iseraela i te faatîtîraa, ua haapapu oia e ere roa ˈtu te mau atua no Babulonia i te atua mau e o O ˈna anaˈe te Atua mau. (Isaia 43:14, 15) I to ˈna maitiraa ia Kuro no Peresia, a 200 matahiti na mua ˈˈe i te faaoraraa, ei tavini no ˈna no te faatiamâ i te mau ati Iuda, e rave rahi mau tapao ta ˈna i horoa no te haapapu i to ˈna tiaraa Atua. (Isaia 44:28) E faatiamâhia o Iseraela. No te aha? Te faataa ra o Iehova e: “Na ratou [Iseraela] e haamaitai mai ia ˈu.” (Isaia 43:21) Ua horoahia i te tahi atu â ravea no te hoê faaiteraa.
19. Eaha te faaiteraa i horoahia e Kuro na roto i te titauraa i te mau ati Iseraela ia hoˈi i Ierusalema e na roto i te mau ohipa o te mau ati Iuda haapao maitai i muri aˈe i to ratou hoˈiraa?
19 A tae mai ai te taime, ua aro o Kuro no Peresia ia Babulonia mai tei tohuhia. Ua faaite o Kuro, e etene hoi, i te tiaraa Atua o Iehova i to ˈna faahitiraa i te hoê parau i te mau ati Iuda i Babulonia e: “O vai to ˈna taata i toe i roto ia outou na? Ia ite mau hoi to ˈna Atua ia ˈna, e haere oia i Ierusalema, i Iuda ra, a faatia ˈi i te hiero no te Atua o Iseraela no Iehova: o te Atua mau ïa, ei Ierusalema oia e haamorihia ˈi.” (Ezera 1:3) E rave rahi ati Iuda tei pahono. Ua faatupu ratou i te tereraa roa no te hoˈi i te Fenua i tǎpǔhia e ua hamani i te hoê fata i te vahi i patuhia ˈi i te hiero tahito. Noa ˈtu te paruparu e te patoiraa rahi, ua nehenehe atura ratou i te pae hopea e patu faahou i te hiero e te oire o Ierusalema. Ua tupu te mau mea atoa, mai ta Iehova iho i parau, “eiaha i te puai taata, e te mana taata, na [to ˈna] varua râ.” (Zekaria 4:6) Na teie mau ohipa i tupu i horoa i te haapapuraa puai mau e o Iehova te Atua mau.
20. Noa ˈtu te mau hapa a Iseraela, eaha te nehenehe e parauhia no nia i ta ratou horoaraa i te faaiteraa no nia i te iˈoa o Iehova i roto i te ao i tahito ra?
20 No reira, ua tamau â o Iehova i te faaohipa ia Iseraela, noa ˈtu e nunaa tia ore e i te tahi taime orure hau te mau taata, ei ite no ˈna. I te tau na mua ˈˈe i te tau kerisetiano, ua riro taua nunaa ra, e to ˈna hiero e faanahoraa tahuˈa, ei pu na te ao nei no te haamoriraa mau. Te taata e taio i roto i te mau Papai Hebera i te mau ohipa a Iehova i nia ia Iseraela, e papu ia ˈna i te mea e hoê noa Atua mau, e o Iehova to ˈna iˈoa. (Deuteronomi 6:4; Zekaria 14:9) Teie nei râ, e tia e ia horoahia i te hoê faaiteraa rahi mau no nia i te iˈoa o Iehova, e e tuatapapa tatou i te reira i roto i te tumu parau i mua nei.
Te haamanaˈo ra anei outou?
◻ Mea nafea to Aberahama horoaraa i te hoê faaiteraa e o Iehova te Atua mau ra?
◻ Eaha te mau huru maitai faahiahia mai i faatia ia Mose ia riro ei ite haapao maitai?
◻ I roto i teihea auraa to Iseraela horoaraa i te hoê faaiteraa i rotopu i te mau nunaa no nia ia Iehova?
◻ Mea nafea te faatiamâraahia o Iseraela mai Babulonia mai i te riroraa ei faaiteraa e o Iehova anaˈe te Atua mau?
[Hohoˈa i te api 10]
Na roto i to ˈna faaroo e to ˈna auraro, ua horoa o Aberahama i te hoê faaiteraa faahiahia mau no nia i te tiaraa mana arii o Iehova