Te tuatapapa ra te hoê raatira i to ˈna oraraa no a muri aˈe
E RIRO na te raatira no Afirika Tooa o te râ ei aratai here-rahi-hia e te faatura-rahi-hia i roto i to ˈna ra pǔpǔ taata. I te 78raa o to ˈna oroa mahana fanauraa, ua haaputuputu mai to ˈna mau hoa, to ˈna utuafare fetii, e vetahi atu mau taata maitai no te haapopou ia ˈna. I roto i te hoê oreroraa parau, e maiti na te raatira i te hoê tumu parau taa ê no taua oroa ra. Ua faahiti oia i to ˈna mau manaˈo no nia i te ora i muri aˈe i te pohe.
Ua parau oia e i muri aˈe i teie nei ao “te vai ra te hoê ao apî aore e haavare, e hinaaro e e nounou.” Ua faataa oia i te reira mai te hoê ao “puohuhia e te miterio,” hoê ao parahi-noa-hia e te feia parau-tia, o tei taaihia e te Atua.
E mea matau-roa-hia taua mau tiaturiraa ra i rotopu i te mau taata na Afirika ma atoa. Ia au i te haapaoraa tutuu afirika, e ere te pohe i te hopea o te ora, o te hoê noa râ tauiraa, hoê aveia no te ora i roto i te aorai varua. I te poheraa e parauhia e e na roto atu te hoê taata i te ao ite-mata-hia e tapae atu ai i roto i te ao ite-ore-hia e te mata. Mai te hoê varua, e faaô atu te taata i reira ra i roto i te hoê ao faaeahia e to ˈna mau tupuna.
Te tiaturi ra e rave rahi feia no Afirika Tooa o te râ e te haamaitai ra te mau tupuna, aore ra te mau varua tupuna, i te oraora-maitai-raa o to ratou mau utuafare fetii i nia i te fenua nei. Te faataa ra te buka ra West African Traditional Religion e: “Aita e taa-ê-raa etaeta to te mana i rotopu i te mau melo o te hoê pǔpǔ taata e vai noâ i nia i te fenua nei, e te feia e vai ra i roto i te hoê ao ê atu. I to ratou parahiraa i nia i te fenua, e mau matahiapo na [te mau tupuna] no to ratou mau utuafare fetii. I teie nei hoi e eita tatou e nehenehe e ite ia ratou, e mau matahiapo noâ ratou i roto i te ao o te mau varua. Aita ratou e faaea ra i te tapitapi i te maitai taatoa no to ratou mau utuafare fetii.”
Ei faahopearaa, ua faahiti te raatira ruhiruhia i te omuaraa i to ˈna tiairaa no te apiti atu i to ˈna mau tupuna e no te ohipa e o ratou i roto i te aorai varua. Ua parau oia e: “Te tiaturi papu nei au e e ora to muri aˈe i te pohe e e nehenehe au e tamau noa i te tavini—i muri aˈe atoa i te pohe.”
Teie nei râ, no te parau ta te raatira i faahiti i muri iho, ua faataa te vea Sunday Times e “e au ra e aita o ˈna i tiaturi papu roa” i te ora i muri aˈe i teie nei ao. Ua parau oia i te nahoa o tei haaputuputu mai e ua faarooroo o ˈna i te parau o te hoê buka o te tuatapapa ra no nia i te ora i muri aˈe i te pohe. Ua maimi noa te raatira i te buka e pae matahiti te maoro. No to ˈna hinaaro rahi e taio i te reira ua pûpû atura o ˈna i te hoê tino moni e tuea i te faito 1 500 dala marite i te taata e hopoi noa ˈtu na ˈna te hoê buka.
Ua nehenehe hoi te raatira e ape i taua fifi ra no te maimiraa na roto i te hiˈopoaraa i te hoê buka e ere i te mea fifi ia itehia mai. O te hoê ïa buka vai ineine noa pûpûhia mai eiaha na te hoê taata, na te Poiete râ o te mau taata atoa. (Tesalonia 1, 2:13) O te Bibilia ïa taua buka ra. Eaha ta te reira e parau ra no nia i te ora i muri aˈe i te pohe?