Te tairururaa “Te feia e arue i te Atua ma te oaoa”—E tae mai anei outou?

OAOA! Aita anei te taˈi o teie taˈo i te huru matau-ore-hia, i te taa ê atoa, i roto i teie nei tau arepurepu mau? Ma te papu maitai aita te mau vea e horoa ra e rave rahi tumu o te faaoaoa ia tatou. Te tamaˈi i rotopu i te pǔpǔ taata iri ê, te pohe poia e parare ra, te ereraa i te ohipa, te haaviiviiraa ino, te papu-ore-raa i te pae politita, te taparahiraa taata—aita teie mau ohipa e faaoaoa ra i te mafatu, e ere anei?

Te pee vave nei te rahiraa o te mau taata i teie nei mahana i te mau peu navenave atoa o ta ratou e nehenehe e farerei i roto i te oraraa. Tera râ, te oaoa ra anei ratou? Ua faataahia te oaoa mai te hoê “huru popou; umere.” Aita te rahiraa e oaoa mau nei, e ia faatupu anaˈe ratou i te reira, mea pinepine ïa e no te hoê taime poto noa.

Teie nei râ, no nia i to tatou nei tau, ua tohu te Bibilia e: ‘Te na ô maira te Fatu ra o Iehova: “Inaha, e oaoa to ˈu ra mau tavini. Inaha, e himene hua to ˈu ra mau tavini i te oaoa aau ra.”’ (Isaia 65:13, 14) Nafea ïa?

No te ite i te pahonoraa, te titau manihini nei matou ia outou ia apiti atu i te hoê o te mau tairururaa mataeinaa a te mau Ite no Iehova o te horoahia i te matahiti 1995. Te upoo parau o te mau tairururaa teie ïa “Te feia e arue i te Atua ma te oaoa,” e aita e titauraa moni. E vauvauhia ˈtu ïa i roto i te porotarama o na toru mahana tairururaa te mau oreroraa parau niuhia i nia i te Bibilia, te mau faaiteraa, te mau tauaparauraa, e vetahi atu â. I roto i te porotarama taatoa, e haamatarahia te tumu parau o te oaoa.

E haamata te mau tairururaa i te mau Hau Amui no Marite i te avaˈe tiunu e e ravehia te reira i roto i te mau oire na te ao nei tae roa ˈtu i te haamataraa o te matahiti 1996. Oia atoa, e tupu te hoê tairururaa i pihai iho i to outou vahi. No te aha eita outou e ani atu i te mau Ite no Iehova o to outou vahi? Te titau manihini nei matou ia outou ia tae mai.