Te haamanaˈo ra anei outou?
Ua haafaufaa anei outou i te mau vea hopea o Te Pare Tiairaa? A hiˈo na mai te peu e e nehenehe outou e pahono i te mau uiraa i muri nei:
▫ No te aha aita te mau kerisetiano matamua i faatupu i te oroa mahana fanauraa o Iesu? Ia au i te buka The World Book Encyclopedia, “aita te mau kerisetiano matamua i faatupu i te oroa mahana fanauraa [o Iesu] no te mea ua faariro ratou i te faatupuraa i te oroa mahana fanauraa ei peu tumu etene.”—15/12, api 4.
▫ E tia anei ia pure ia Iesu? Eita, no te mea e huru haamoriraa te pure e faatae-noa-hia te reira i te Atua Mana hope ra. Na roto i te faataeraa i ta tatou mau pure atoa i te Atua ra o Iehova, te haapapu nei tatou e te haafaufaa nei tatou i te faaueraa a Iesu no te pure: “E to matou Metua i te ao ra.” (Mataio 6:9)—15/12, api 25.
▫ No te aha ua horoahia te hoê haavaraa taa ê no te hara ino roa a te Arii ra o Davida ia faaauhia i te mau hara a Anania raua o Saphira? (Samuela 2, 11:2-24; 12:1-14; Ohipa 5:1-11) Ua topa o Davida i roto i te hara ino no to ˈna tino paruparu. Ia tuuhia ˈtu i mua i te ohipa o ta ˈna i rave, ua tatarahapa aˈera oia, e ua faaore maira Iehova i ta ˈna hara—noa ˈtu e ua tia ia ˈna ia ora e te mau faahopearaa o ta ˈna hara. Ua hara o Anania raua o Saphira inaha, ua haavare raua ma te aau haavarevare, ma te tamata hoi i te faainoino i te amuiraa kerisetiano e ia raua i na reira ‘ua haavare raua i te varua moˈa e i te Atua.’ (Ohipa 5:3, 4) Ua haapapu maitai te reira i te parau no te hoê mafatu ino, no reira ˈtura hoi raua i haava-papu-maitai-hia ˈi.—1/1, mau api 27, 28.
▫ Eaha te nehenehe e tauturu ia tatou ia tavini ia Iehova ma te hoê mafatu oaoa? E tia ia tatou ia faatupu i te hoê hiˈoraa maitai e te mauruuru no nia i ta tatou mau haamaitairaa e te mau hopoia o te taviniraa no ǒ mai i te Atua ra, e eiaha roa ˈtu e haamoehia ia tatou e na roto i te peeraa i te Parau a te Atua, te faaoaoa ra tatou ia ˈna.—15/1, mau api 16, 17.
▫ Eaha na mea e piti te tia ia tatou ia haamanaˈo no te horoaraa ˈtu i te faaitoitoraa tano? A tahi, a feruri i ta outou e parau, ia tuea maite te faaitoitoraa. A piti, a imi i te ravea no te haafatata ˈtu i te taata te tia ia haapopouhia aore ra te titau ia haamaitaihia o ˈna.—15/1, api 23.
▫ No te aha te “feia rahi roa” e tapea ˈi i te ‘mau amaa tamara i roto i to ratou nei rima’? (Apokalupo 7:9) Te faaite ra te tahirihiriraa i te mau amaa tamara e te arue ra te “feia rahi roa” ma te oaoa i te Basileia o Iehova e ta ˈna Arii faatavaihia, o Iesu Mesia. (A hiˈo Levitiko 23:39, 40.)—1/2, api 17.
▫ Eaha te mau haapiiraa faufaa mau e vai ra i roto i te buka a Ioba? Te faaite mai nei te buka a Ioba ia tatou nafea ia faaruru i te mau fifi. E horoa mai hoi te reira i te mau hiˈoraa itoito mau e faaite mai e nafea râ te hoê taata e faaruru ra i te mau ati ia aˈohia aore ra ia ore e aˈohia. Hau atu, e nehenehe te mau ohipa i farereihia e Ioba iho e tauturu ia tatou ia faatupu i te hoê huru hiˈoraa aifaito, ia farerei tatou iho i te mau huru tupuraa fifi mau.—15/2, api 27.
▫ Eaha ta te mau semeio a Iesu e haapii ra ia tatou? Te faahanahana ra te mau semeio a Iesu i te Atua, ma te horoa i te hoê hiˈoraa i te mau kerisetiano no te faahanahana i te Atua. (Roma 15:6) Te faaitoito nei te reira i te raveraa i te maitai, te faaiteraa i te hamani maitai, e te faatupuraa i te aroha.—1/3, api 8.
▫ No te aha te mau matahiapo e hiˈopoa faahou ai i te mau uiraa faaineinehia e te feia i pûpû-apî-hia? E haapapu te reira e te taa taatoa ra i te taata tataitahi e hinaaro ra e bapetizo i te mau haapiiraa tumu o te Bibilia e ua ineine oia i te rave i te mea e titauhia ra no te riro mai ei Ite no Iehova.—1/3, api 13.
▫ Nafea tatou e faufaahia ˈi i te mau pure i roto i te Bibilia? Na roto i te tuatapapa-hohonu-raa i te mau pure i roto i te mau Papai, e nehenehe tatou e taa i tei faahitihia i roto i te hoê â huru tupuraa e to tatou. E tauturu te iteraa, te taioraa, e te feruri-hohonu-raa i nia i taua mau pure ra ia tatou ia haamaitai atu â i to tatou iho mau taairaa e o Iehova.—15/3, mau api 3, 4.
▫ Eaha te mǎtaˈu paieti? Te mǎtaˈu paieti o te mǎtaˈu ïa ia Iehova, te hoê faatura hohonu ia ˈna, apitihia e te hoê mǎtaˈuraa tia ia haapeapea ia ˈna. (Salamo 89:7)—15/3, api 10.
▫ Eaha na ravea e toru ta te Bibilia e faaite ra e e mea faufaa roa tatou i mua i te aro o te Atua? Te haapii maira te Bibilia e e mea faufaa tatou tataitahi i mua i te aro o te Atua (Luka 12:6, 7); te haamatara maitai ra oia e eaha ta Iehova e haafaufaa ra i roto ia tatou nei (Malaki 3:16); e te faatia ra oia e eaha ta Iehova i rave no te faaite i to ˈna here no tatou. (Ioane 3:16)—1/4, mau api 11, 12, 14.
▫ No te aha ua hau atu te Hebera 10:24, 25 i te hoê noa faaueraa e ia haaputuputu amui te mau kerisetiano? Te horoa ra teie mau parau a Paulo i te hoê titauraa faauruahia mai e te Atua no te mau putuputuraa kerisetiano atoa—oia mau, no te mau taime atoa e amui paatoa ˈi te mau kerisetiano.—1/4, api 16.