Te faatia ra te feia poro i te Basileia
E tahoê te parau mau a te Bibilia i te hoê utuafare
I TEIE mahana, i roto e rave rahi mau tuhaa o te ao nei, ua riro te autahoêraa i roto i te utuafare ei ohipa tahito. Te faaite maira râ te Bibilia eaha te titauhia no te tahoê i te hoê utuafare. A feruri na i te mau parau a Iesu: “O te faaroo mai i ta ˈu nei mau parau, e haapao atura, e faito vau ia ˈna i te hoê taata paari, o tei faatia i to ˈna fare i nia i te pǎpǎ.” (Mataio 7:24) E rave rahi tausani utuafare i roto i te mau Ite no Iehova tei tahoê na roto i te faaohiparaa ratou i teie mau parau e te faariroraa i te Bibilia ei niu na ratou no te patu i te hoê utuafare tahoê. Ua noaa atoa i te tahi pae i teie huru autahoêraa, mai ta te mau parau i muri nei e faaite mai.
A tavini noa ˈi o Daniel i roto i te nuu faehau i Farani, ua faaitoito maira te hoê omonie ia Daniel e haere e hoo mai i te tahi Bibilia na ˈna, o ta ˈna iho hoi ohipa i rave, e ua haamata aˈera oia i te taio tamau i te reira. E i te hoê taime, ua tonohia maira oia i Tahiti. E adevenite vetahi mau hoa faehau to Daniel, e te tahi pae e momoni. E pinepine ta ratou mau tauaparauraa i te huri i nia i te tumu parau o te haapaoraa. I te hoê mahana, ua aratai aˈera te hoê raatira taratini ia ˈna i ta ˈna vahine ra, e Ite no Iehova teie vahine. Hoê avatea taatoa to ˈna pahonoraa i te mau uiraa e rave rahi a Daniel, e ua rave aˈera oia e ia farerei o Daniel i te hoê amuiraa a te mau Ite no Iehova i Tahiti. Aita i maoro roa, ua haamata aˈera oia i te hoê haapiiraa bibilia.
E mau katolika rahi roa te mau metua o Daniel e noho na i Farani. E taata aˈo to ˈna metua tane e e horoa hoi oia i te haapiiraa faaroo i roto i te hoê fare haapiiraa katolika. No to ˈna hinaaro e ia ite atoa to ˈna nau metua i te mau haapiiraa pae varua ta ˈna e haapii ra, ua faaô rii mǎrû noa maira o Daniel i te tahi mau manaˈo bibilia i roto i ta ˈna mau rata i papai atu ia raua.
I te haamataraa, ua oaoa roa te metua vahine o Daniel, i muri iho râ ua huru ê roa oia i te iteraa oia i te iˈoa o Iehova i roto i te hoê o te mau rata a ta ˈna tamaiti. Te tahi tau mahana i muri iho, ua faaroo aˈera oia i te porotarama radio tei faataa mai i te mau Ite no Iehova mai te hoê “pǔpǔ faaroo atâta roa.” Ua papai atura oia ia Daniel e faaea roa i te farerei faahou i te mau Ite. Ua tamau noa râ o Daniel i te haere i mua i roto i ta ˈna haapiiraa bibilia e aita i maoro roa ua rave aˈera oia i te tahi mau faanahoraa no te faarue i te nuu faehau e no te hoˈi atu i Farani.
Ia tae atu oia i to ˈna fare [i Farani], i te mau po atoa—i te tahi taime e maoro te po—e aparau maoro na o Daniel raua to ˈna metua vahine no nia i te Bibilia. E i te pae hopea, ua farii aˈera oia e haere na muri ia Daniel i te hoê Piha o te Basileia. Ia haere atu oia i ta ˈna putuputuraa matamua, no to ˈna faahiahia, ua haamata aˈera oia i te hoê haapiiraa bibilia. Ua haere oioi oia i mua e aita i maoro roa ua bapetizohia aˈera hoi oia.
E taata feruriraa aano te metua tane o Daniel, tera râ mea faufaa roa na ˈna ta ˈna mau ohipa i te pae paha no to ˈna toroa e i te pae faaroo. I te hoê taime, ua faahoro aˈera oia i ta ˈna vahine raua o Daniel i te hoê tairururaa mataeinaa. O te 14 no tiurai taua mahana ra, e ua manaˈo oia e haere e mataitai i te poroteraa o te oroa o te Bastille, i roto i te oire. A tiai ˈi noa ˈi oia, ua opua aˈera oia, no to ˈna hinaaro hiˈopoa, e tomo atu i roto i te piha tairururaa. Ua faahiahia roa oia i te tereraa maitai e te hau ta ˈna i ite i roto i te nunaa o Iehova, e a haere noa ˈi oia na roto i te mau vahi e rave rahi o te piha tairururaa, e pii noa mai na te taata ia ˈna “taeae.” Ua moe-roa-hia ˈtura ia ˈna i te oroa o te Bastille e ua faaea noa maira oia e hope noa ˈtu te tairururaa. Ua ani aˈera hoi oia i te hoê haapiiraa bibilia na ˈna e ua haere oioi atura oia i mua i roto i te haapiiraa i te parau mau. Tera râ, rahi noa ˈtu â oia i te haapii, rahi noa atoa oia i te huru ê no ta ˈna ohipa, inaha e 58 matahiti to ˈna e e tia ia ˈna ia faarue i ta ˈna ohipa. I teie nei, ratou tootoru atoa i roto i te utuafare, ua pûpû ratou ia ratou e ua bapetizo ia ratou, e i teie nei te tavini amui nei ratou ia Iehova.
Na te parau mau o te Bibilia i tahoê i te utuafare o Daniel. E nehenehe atoa oia e tahoê i te tahi atu mau utuafare ia haapii e ia faaohipa atoa ratou i te reira ma to ratou mafatu taatoa.