Mau uiraa a te feia taio

E tano anei no te hoê kerisetiano ia apiti atu i roto i te hoê ohipa tapihooraa e te hoê taata aita to roto i te parau mau, te na ô ra hoi te Bibilia e: “Eiaha outou ia amui-au-ore-hia i te feia faaroo ore ra”?

Teie te aˈoraa e horoahia ra i roto i te Korinetia 2, 6:14-16: “Eiaha outou ia amui-au-ore-hia i te feia faaroo ore ra: eaha to te parau-tia auraa i te parau-tia ore? e eaha to te maramarama auraa i te pouri? E eaha to te Mesia auraa ia Behala? e eaha to te taata faaroo ra faufaa i te taata faaroo ore? E eaha to te hiero o te Atua ra atiraa ˈtu i te idolo?”

Aita e tumu no te manaˈo e ua horoa te aposetolo Paulo i teie aˈoraa ma te hinaaro e haamau i te mau opaniraa taa maitai, mai te opaniraa i te hoê kerisetiano ia amui atu i te pae tapihooraa e te hoê taata aita to roto i te parau mau. Teie râ, mea papu e e ohipa atoa teie aˈoraa i nia i teie huru tupuraa, e tae noa ˈtu i nia i te tahi atu tuhaa o te oraraa.

Ua papai atu o Paulo i teie aˈoraa i to ˈna mau taeae kerisetiano i Korinetia tahito ra. I te mea e te ora ra ratou i roto i te hoê oire faufau roa, ua titauhia ratou ia aro i te mau mahana atoa i te mau atâtaraa i te pae morare e i te pae varua. Ahiri e eita ratou e ara, e riro te farereiraa i te mau mana tia ore i te haaparuparu mǎrû noa i to ratou faaotiraa e riro ei nunaa taa ê, ‘ei ui maitihia, ei autahuˈa arii, ei nunaa moˈa, ei mau taata e riro ei faturaa taa ê.’—Petero 1, 2:9.

Hou oia a papai ai i te parau i roto i te Korinetia 2, 6:14-16, ua arai o Paulo i te hoê fifi rahi i rotopu i to ˈna mau taeae no Korinetia. Ua farii noa ratou i te hoê tupuraa taiata faufau i rotopu ia ratou, no reira ua faaue atu o Paulo ia tuu i rapae, aore ra ia tiavaru, i te taata rave hara tatarahapa ore. (Korinetia 1, 5:1) Te faaite ra te hara a teie taata e e nehenehe te mau amuimuiraa iino aore ra te faaôraa ˈtu ma te ore e ara i roto i te huru morare o teie nei ao, e faaino i te mau kerisetiano.

Ua titauhia te mau kerisetiano no Korinetia ia ape i te amuimui atu e teie taata i tiavaruhia, tera râ, te auraa anei e e tia ia ratou ia faataa ê roa mai ia ratou i te mau taata aita to roto i te parau mau? E tia anei ia haapae roa i te mau farereiraa atoa aore ra ta ratou mau ohipa e te mau taata e ere i te kerisetiano, ma te riro mai ei pǔpǔ faaroo mai te mau monahi ra te huru, mai te mau ati Iuda o tei haere atu e faaea i Qumran i pihai iho i te Miti Pohe? A vaiiho e na Paulo e pahono: “Te papai atu nei au i teie nei episetole ia outou na e, eiaha outou e amui atu i te taiata. Eiaha râ te mau taiata atoa . . . o teie nei ao ra; ahiri hoi te reira ra, e faarue mai outou i teie nei ao e tia ˈi.”—Korinetia 1, 5:9, 10.

Mea maramarama maitai te auraa o teie mau parau. Ua papu ia Paulo e te ora ra te mau kerisetiano i nia i teie palaneta, e te ora ra ratou ma te farerei fatata i te mau mahana atoa, i te feia aita to roto i te parau mau, e haerea morare tia ore to ratou e mea taa ê atoa te mau ture ta ratou e pee ra. I te mea e aita ˈtu e ravea, e tia i te mau kerisetiano ia ara i te mau atâtaraa o teie mau huru taairaa.

I teie nei, e hiˈopoa faahou na tatou i te piti o te rata a Paulo i to Korinetia. Ua faahiti oia e ua faatoroahia te mau kerisetiano faatavaihia ei mau tiaau na te Atua, ei mau tia e mono i te Mesia. Ua parau atu oia ia ratou ia ara i te tahi tumu faaturoriraa o te nehenehe e faaino i ta ratou taviniraa. (Korinetia 2, 4:1–6:3) Ua faaitoito tia ˈtu o Paulo i to ˈna mau taeae Korinetia, o tei riro mai ta ˈna mau tamarii i te pae varua, ia haamahora i to ratou here. (Korinetia 2, 6:13) I muri aˈe, ua faaue atu oia e: “Eiaha outou ia amui-au-ore-hia i te feia faaroo ore ra.” Ua faaohipa oia i te tahi mau hiˈoraa taa ê no te haapapu atu i teie manaˈo.

Te faaite ra te taatoaraa o te mau irava e aita o Paulo e haamatara ra i te tahi tuhaa taa maitai o te oraraa, mai te ohipa tapihooraa aore ra te ohipa, ma te haamau i te hoê ture etaeta e tia ia haapaohia i roto i teie tuhaa. Maoti râ, ua horoa mai oia i te hoê aˈoraa aano, te papu, o te tauturu i te mau taeae o ta ˈna i here.

E tano anei teie nei aˈoraa, ei hiˈoraa, no te hoê kerisetiano o te opua ra e faaipoipo? Papu maitai. I roto i ta ˈna rata matamua, ua aˈo te aposetolo i te feia no Korinetia e hinaaro ra e faaipoipo ia na reira ‘i roto i te Fatu anaˈe ra.’ (Korinetia 1, 7:39) Ua haapapu oia i te paari o teie mau parau na roto i te mea o ta ˈna i papai i muri iho, mai te faaitehia ra i roto i te Korinetia 2, 6:14-18. Mai te peu e te opua ra te hoê kerisetiano e faaipoipo e te hoê taata e ere i te tavini na Iehova e e ere i te pǐpǐ na te Mesia, e tia ïa ia ˈna ia feruri e te taai atura oia e te hoê taata aore ra te hoê vahine aita to roto i te parau mau. (A faaau e te Levitiko 19:19; Deuteronomi 22:10.) Papu maitai, e faarahi atu â teie tuea-ore-raa matamua i te mau fifi, i te pae varua iho â râ. Ei hiˈoraa, e nehenehe te taata aita to roto i te parau mau e pee i teie nei aore ra a muri aˈe i te haamoriraa i te hoê atua haavare. Ua haaferuri o Paulo e: “Eaha to te Mesia auraa ia Behala?”

Eaha ïa no te hoê tuhaa ê atu o te oraraa—te apitiraa i roto i te tapihooraa e te hoê taata aita to roto i te parau mau? I roto i te tahi mau tupuraa, e manaˈo paha te hoê kerisetiano e e titau te imiraa i te moni e te haapaoraa i to ˈna utuafare e ia faaô atu oia i roto i te hoê ohipa tapihooraa e te hoê taata e ere i te kerisetiano. (Timoteo 1, 5:8) A hiˈo na i teie mau hiˈoraa:

Peneiaˈe e hinaaro te hoê kerisetiano e haamata i te hoê ohipa hooraa i te tahi mau tauihaa, tera râ, hoê noa ravea ta ˈna, oia hoi te fariiraa i te apiti atu e te hoê taata e noaa mai ia ˈna te mau tauihaa aore ra te tino moni e titauhia ra. E hinaaro paha te tahi atu kerisetiano e rave i te tahi ohipa faaapu (aore ra te faaamuraa i te tahi huru nǎnǎ); teie râ, aita e fenua, no reira, e titauhia oia ia amui atu e te hoê taata o te farii i te horoa mai i te fenua mai te peu e e tufa raua i te mau hoonaraa. Peneiaˈe eita te tahi atu kerisetiano e nehenehe e faaô i roto i te tahi ohipa tamauraa auri pape no te mea e horoa noa o Kaisara (oia hoi te hau faatere) i te tahi noa mau parau faatia, e ua pau ê na; hoê noa ravea, oia hoi te apitiraa e te hoê fetii aita to roto i te parau mau te vai ra ta ˈna parau faatia.—Mareko 12:17.

E mau faahohoˈaraa anaˈe teie. Aita matou e tamata ra i te tatara i te mau huru tupuraa atoa, e aita atoa matou e horoa ra i te tahi parau faatia aore ra te tahi parau opaniraa. Teie râ, maoti teie mau hiˈoraa i roto i to outou feruriraa, te taa ra anei ia outou e no te aha eita e tia ia haamoehia te aˈoraa i roto i te Korinetia 2, 6:14-18?

E nehenehe te hoê kerisetiano o tei faaô i roto i te hoê ohipa tapihooraa e te hoê taata aita to roto i te parau mau, e fetii anei aore ra eita, e farerei i te mau fifi e te mau faahemaraa manaˈo-ore-hia. Peneiaˈe e faaoti te taata apiti e te ravea ia hoona ta raua ohipa, o te faaitiraa mai ïa te moni e noaa mai aore ra e faaohipa i te mau taata rave ohipa ma te ore e tapao ia ratou, noa ˈtu e te ofati ra te reira i te mau ture a te hau faatere. E ineine paha oia i te peta i te feia uta tauihaa no te mau taoˈa aita i tapaohia i nia i te tabula aufauraa mau. E tano anei no te hoê kerisetiano ia apiti atu i roto i teie mau huru raveraa tia ore? E eaha hoi ta te kerisetiano e rave ia tae anaˈe i te taime e tarima ˈi raua toopiti ra i te mau tabula tute aore ra te tahi atu mau papai titauhia e te ture no nia i ta raua ohipa tapihooraa?—Exodo 23:1; Roma 13:1, 7.

Aore ra, e hinaaro paha te apiti tapihooraa aita to roto i te parau mau, e haaputu i te mau taoˈa taaihia i te mau oroa etene, e hapono i te mau rata aroharaa na nia i te iˈoa o te taiete, e e faaunauna i te piha toroa no te mau oroa faaroo. Ua ani o Paulo e: “E eaha to te hiero o te Atua ra atiraa ˈtu i te idolo? o tei hiero hoi outou o te Atua ora ra.” Auê teie parau i te tano mau e: “E teie nei, te na ô maira Iehova, E haere mai outou i rapaˈe au mai roto mai ia ratou ra, ia taa ê outou, e eiaha e rave noa ˈtu i te mea viivii ra; e na ˈu e farii atu ia outou.” (Korinetia 2, 6:16, 17) No te faaohipa i teie aˈoraa paari, e rave rahi mau kerisetiano o tei maiti i te mau ohipa i reira mea iti te mau fifi o ta ratou e nehenehe farerei.—Hebera 13:5, 6, 18.

E ere te ohipa na te amuiraa ia hiˈopoa aore ra ia maimi eaha ta te mau kerisetiano atoa e rave ra i roto i ta ratou ohipa, noa ˈtu e e feia rave ohipa aore ra e paoti ohipa ratou. Parau mau, mai te peu e e itehia e te apiti ra te hoê kerisetiano i roto i te ohipa tia ore, mai te tururaa i te haamoriraa hape aore ra te tahi ravea haavare aore ra eiâ, e tia ïa i te amuiraa ia rave i te mau taahiraa avae titauhia no te paruru i te mau ture a Iehova.

Te manaˈo tumu râ, teie ïa, e nehenehe te aˈoraa faauruahia a Paulo, “Eaha outou ia amui-au-ore-hia i te feia faaroo ore ra,” e tauturu i te mau kerisetiano ia ape i te mau fifi e te tahi haavaraa no ǒ mai i te mau matahiapo ra. E haapao maite te mau kerisetiano paari i teie aˈoraa e eita ratou e maiti i te faaô i roto i te mau huru tupuraa i reira e rahi atu â te faaheporaa e ofati i te mau faaueraa tumu a te Bibilia. Mai te peu e te manaˈo ra te hoê taata e e tia ia ˈna ia apiti atu e te hoê taata aita to roto i te parau mau i roto i te hoê ohipa tapihooraa, eiaha vetahi pae ia oioi noa i te haava aore ra i te faahapa ia ˈna, inaha na ˈna iho e amo i te hopoia o ta ˈna maitiraa. I te tanoraa mau, aita o Paulo e haamau ra i te hoê ture etaeta, e tia ia faahepohia, e opani ra ia apiti i te pae tapihooraa e te hoê taata aita to roto i te parau mau. Tera râ, eiaha ta ˈna aˈoraa ia haamoehia. Ua faaurua te Atua i teie aˈoraa e ua haapao oia ia papaihia i roto i te Bibilia no to tatou maitai. E haerea paari ia haapao tatou i te reira.