No te aha e here ai i to taata-tupu?

UA TAAIHIA te ora mure ore i nia i to tatou here i te Atua e i to tatou taata-tupu. Ua haapapuhia teie manaˈo i roto i te hoê aparauraa i tupu fatata e 2 000 matahiti i teie nei.

Ua ani te hoê taata ati Iuda aravihi i roto i te Ture a Mose ia Iesu Mesia e: “Eaha vau e noaa ˈi te ora mure ore?” Ua pahono atura o Iesu e: “Eaha tei papaihia i roto i te ture ra? te nahea ra ta oe taioraa?” Ma te faahiti i te Ture, ua parau aˈera taua taata ra e: “E [here] oe i to Atua ia Iehova ma to [mafatu] atoa e ma to [nephe] atoa, e ma to puai atoa, e ma to manaˈo atoa ia hope, e [here] hoi oe i to taata-tupu mai te [here] ia oe iho na.” “Ua tia ta oe i parau mai na,” o ta Iesu ïa i parau. “[A tamau noa i te na reira e] e ora oe.”—Luka 10:25-28.

I reira, ua ani maira te taata uiui ia Iesu e: “O vai hoi to ˈu taata-tupu?” Maoti i te pahono tahaa ˈtu, ua faatia ˈtura o Iesu i te hoê aamu ei faahohoˈaraa no nia i te hoê ati Iuda o tei eiâhia, tei tupaihia, e tei faaruehia e ua fatata roa i te pohe. Ua haere maira e piti ati Iuda—te hoê tahuˈa na mua e i muri iho, te hoê ati Levi. Ua hiˈo noa ˈtura raua e piti atoa ra i te huru o teie taata ati Iuda, aita râ raua i rave i te hoê mea no te tauturu ia ˈna. O te hoê ati Samaria tei haere mai i muri iho. Turaihia e te aroha, ua taamu ihora oia i te mau vahi pepe o te ati Iuda. ua hopoi ia ˈna i te hoê fare tipaeraa, e ua haapao oia e ia utuutuhia oia.

Ua ani atura o Iesu i te taata e uiui ra ia ˈna e: “O vai te taata-tupu i to oe manaˈoraa i taua na taata tootoru ra, i te taata i roohia i te nǎnǎ eiâ hara ra?” O te ati Samaria aroha iho â ïa. Ua faaite o Iesu e e na nia ˈtu te here mau i te taata-tupu i te mau otia i te pae no te nunaa.—Luka 10:29-37.

Te ereraa i te here taata-tupu

I teie mahana, te rahi noa ˈtura te au ore i rotopu i te mau taata nunaa ěê. Ei hiˈoraa, aita i maoro aˈenei, ua taue te mau taata Nazis apî i Helemani i te hoê taata i nia i te repo e ua taataahi ia ˈna e to ratou mau tiaa paari, ma te ofatifati fatata i to ˈna mau ivi aoao atoa. I muri iho, ua pîpî ratou ia ˈna i te ava puai e ua tutui atura ia ˈna i te auahi. Ua hamani-ino-hia te taata o tei vaiiho-pohe-hia no te mea ua manaˈohia e e ati Iuda oia. I roto i te tahi atu tupuraa, ua topitahia te hoê fare i pihai iho ia Hambourg i te auahi, e e toru taata Turekia tei papaa e tei pohe roa—tei roto atoa te hoê tamahine hoê ahuru matahiti.

I te mau fenua Balkans e te pae hitia o te râ roa, ua haapohe te mau tamaˈi nunaa i te mau tausani taata. Ua pohe vetahi i roto i te mau taputôraa i rotopu i te mau taata nunaa ěê i Bangladesh, i Inidia, e i Pakistan. E i Afirika, te haapohe nei te mau aroraa i rotopu i te mau opu e te mau nunaa i te tahi atu mau taata.

Te peapea nei te rahiraa o te mau taata i mua i teie mau ohipa haavî uˈana e eita roa ratou e rave i te tahi mea no te faaino i to ratou taata-tupu. Inaha, ua faahapa te mau nahoa taata rahi i Helemani i te haavîraa uˈana i nia i te taata nunaa ê i reira. Teie râ, te na ô ra Te buka parau paari Britannica apî (beretane) e: “Te faariro nei te mau melo o fatata te mau nunaa atoa o te ao nei i to ratou iho huru oraraa ei mea teitei aˈe i to te tahi atu mau nunaa tapiri.” Te haafifi nei teie mau hiˈoraa i te here taata-tupu. E nehenehe anei te reira e araihia, inaha ua parau hoi o Iesu e ua taaihia te ora i te here i te Atua e i te taata-tupu?

[Faaiteraa i te fatu o te hohoˈa i te api 2]

Api rapaeau: Jules Pelcog/Die Heilige Schrift

[Faaiteraa i te fatu o te hohoˈa i te api 3]

Te ati Samaria maitai/The Doré Bible Illustrations/Dover Publications, Inc.