Iehova—Te Atua mau e te ora
UA PARAU o Pharao no Aiphiti ma te faatiatia e te haavahavaha ia ˈna i ui e: “O vai Iehova?” (Exodo 5:2) Mai tei faaitehia i roto i te tumu parau na mua ˈtu, ua faatae mai teie haerea i te mau ati e te pohe i nia i to Aiphiti, e tae noa ˈtu te hoê menema pape no Pharao e ta ˈna mau nuu faehau.
I Aiphiti tahito, ua haapapu te Atua ra o Iehova i to ˈna tiaraa hau aˈe i nia i te mau atua haavare. Teie râ, mea rahi atu â te nehenehe e haapiihia no nia ia ˈna. Eaha vetahi o to ˈna mau huru? E eaha ta ˈna e titau maira ia tatou?
To ˈna iˈoa e to ˈna roo
Ia ˈna i faatae atu i ta ˈna mau aniraa i te Pharao no Aiphiti, aita o Mose i parau atu e: ‘Te na ô maira te Fatu i tera mea e tera mea.’ E faariro na hoi o Pharao e te tahi atu mau taata Aiphiti i ta ratou mau atua haavare e rave rahi ei mau fatu. Aita, ua faaohipa râ o Mose i te iˈoa o te Atua, o Iehova. Ua faaroo hoi oia iho i teie iˈoa i te faahitiraahia mai nia mai a tia ˈi oia i te pu aihere ura ra i te fenua no Midiana. Te na ô ra te papai faauruahia e:
“Ua parau maira te Atua ia Mose, na ô maira ia ˈna, O vau o Iehova; . . . ua faaroo atoa hoi au i te autâ a te tamarii a Iseraela, ta to Aiphiti e [faatîtî] noa na; e ua manaˈo hoi au i taua faufaa na ˈu ra: e tena na, e parau atu i te tamarii a Iseraela, O vau o Iehova ra; e na ˈu outou e aratai ê mai i tena na mau hopoia a to Aiphiti na, e e matara mai outou ia ˈu i ta ratou [faatîtîraa] mai, e e faaorahia outou e au i tau rima e faatorohia nei, e ma te tahoo rahi i nia iho ia ratou: e rave hoi au ia outou ei taata no ˈu iho, e o vau hoi to outou Atua; e ite hoi outou e, o Iehova vau to outou Atua ra, o tei aratai ê mai ia outou i te mau hopoia a to Aiphiti ra: e e aratai au ia outou i te fenua [o Kanaana] ta ˈu i tǎpǔ atu e e horoa vau no [to outou mau tupuna, no] Aberahama, e no Isaaka, e no Iakoba; o ta ˈu ïa e horoa no outou i teie nei ei parahiraa. O vau o Iehova.”—Exodo 6:1-8.
Te reira mau ta Iehova i rave. Ua faaora mai oia i te mau ati Iseraela i te faatîtîraa a Aiphiti e ua faatia oia ia ratou ia parahi i te fenua ra o Kanaana. Mai ta ˈna i tǎpǔ, ua rave te Atua e ia tupu teie mau ohipa atoa. Auê te tano e! Te auraa o to ˈna iˈoa, Iehova, oia ïa “Na ˈna e rave e ia tupu.” Te faahiti ra te Bibilia i te parau no Iehova na nia i te mau tiaraa iˈoa mai “te Atua,” “Te Fatu Mana hope,” “te Poiete,” “te Metua,” “te Puai hope,” e “Tei teitei aˈe.” Area to ˈna iˈoa ra o Iehova, te haapapu ra ïa ia ˈna mai te Atua mau o te faahaere mǎrû noa i ta ˈna mau opuaraa rarahi i mua.—Isaia 42:8.
Mai te peu e e nehenehe ta tatou e taio i te Bibilia na roto i to ˈna mau reo tumu, e ite ïa tatou i te iˈoa o te Atua e mau tausani taime. Na roto i te reo Hebera, e papaihia oia e na reta piri vauera e maha, Yod He Waw He (יהוה), tei parauhia te Tétragramme na roto i te reo farani, e taiohia na te pae atau e haere atu ai i te pae aui. Na te feia reo Hebera iho i apiti atu i te mau taˈi reta vauera, aita râ te taata i teie mahana i ite papu e eaha taua mau reta ra. Te turu nei vetahi i te papairaa ra Yahweh, mea matauhia râ te papairaa ra Iehova e e tano maitai no te haapapu i to tatou Poiete.
E faataa ê atoa te faaohiparaa i te iˈoa Iehova i te Atua i te tahi atu taata tei piihia “tau Fatu” i roto i te Salamo 110:1, i reira te na ô ra te hoê tatararaa e: “Ua parau atura te FATU [Hebera, יהוה] i ta ˈu Fatu, A parahi i to ˈu rima atau, e ia faariro au i to mau enemi ei taahiraa avae no oe.” (King James Version) Ma te farii e o te iˈoa o te Atua tei faahitihia i roto i te papai Hebera, te na ô ra te Tatararaa a te ao apî (farani) e: “Te faaiteraa a Iehova i ta ˈu Fatu: ‘A parahi i to ˈu pae atau e tae noa ˈtu i to ˈu tuuraa i to oe mau enemi ei taahiraa avae no to oe ra avae.’” E tohu teie mau parau a te Atua ra o Iehova no nia ia Iesu Mesia, ta te taata papai i pii “ta ˈu Fatu.”
Ua faatia o Iehova i te hoê iˈoa no ˈna i te tau o Pharao. Na roto i te arai o Mose, ua parau te Atua i te arii mafatu etaeta e: “Teie au a amui atoa ˈtu i ta ˈu mau pohe atoa nei i nia ia oe iho, e i nia atoa i to mau tavini, e i nia i to mau taata atoa na; ia ite hoi oe e, aore o ˈu e faito i te ao atoa nei. E teie nei, e aa ˈtu vau i tau rima ia oe, a tairi atu ai ia oe, e to mau taata atoa na, i te pohe; e ia taa ê atu oe i teie nei ao. E no reira mau â hoi au i vaiiho ai ia oe, ei faaiteraa ˈtu ia oe i to ˈu nei mana, e ia faaitehia to ˈu iˈoa e ati noa ˈˈe te ao atoa nei.”—Exodo 9:14-16.
No nia i to Iseraela tereraa mai na Aiphiti mai e te faatahuriraahia te tahi mau arii Kanaana, ua parau atu te vahine no Ieriko ra o Rahaba i na feia hiˈo fenua Hebera e piti e: “Ua ite au e, ua horoahia e Iehova te fenua na outou [te mau ati Iseraela], e ua roohia hoi matou e te mǎtaˈu ia outou, e ua tarapape anaˈe hoi to te fenua nei ia outou. Ua faaroo na hoi matou e, ua haamǎrôhia e Iehova te miti uteute no outou, ia outou i haere mai mai Aiphiti ra; e ta outou hoi ravea i na arii toopiti o te ati Amori i te hoê pae Ioridana ra, ia Sihona, e ia Oga, o tei pau roa ïa ia outou ra. Tei to matou iteraa i taua parau ra, tarapape noa ihora to matou aau, a ore roa e itoito i toe i roto i te taata atoa ra ia outou: o to outou Atua ra hoi o Iehova, o te Atua ïa no te raˈi i nia ra, e no raro atoa nei no te fenua.” (Iosua 2:9-11) Oia, ua parare te roo o Iehova.
Iehova e to ˈna mau huru maitatai
Ua faaite te papai salamo i to ˈna hinaaro hohonu: “Ia ite te taata atoa e, o Iehova to oe iˈoa, e o oe anaˈe tei Teitei i te fenua atoa nei.” (Salamo 83:18) I te mea e te mana nei Iehova i nia i te ao taatoa nei, e nehenehe te mau pǐpǐ hamani-ino-hia a Iesu e pure e: “E te Fatu, o oe te Atua i hamani i te raˈi, e te fenua, e te tai, e te mau mea atoa i roto ia ratou ra.” (Ohipa 4:24) Auê te mahanahana e ia ite e o Iehova “Tei faaroo i te pure ra”!—Salamo 65:2.
O te here te ateributi matamua o Iehova. Oia mau, “e [here] hoi te Atua”—te hiˈoraa hau aˈe o teie huru maitai. (Ioane 1, 4:8) Hau atu, “tei ia ˈna hoi te paari e te puai.” O Iehova te ite hope e te puai hope, aita roa râ oia e faaohipa i to ˈna puai ma te haavî. (Ioba 12:13; 37:23) E nehenehe atoa tatou e papu e e ohipa noa o Iehova ma te tia i nia ia tatou, inaha “o te parau-tia ra e te au, o te tumu ïa o to ˈna terono.” (Salamo 97:2) Mai te peu e e hara tatou tera râ e tatarahapa tatou, e nehenehe tatou e tamǎrûhia i te iteraa e “e Atua aroha noa [o Iehova], e te hamani maitai rahi, e te faaoromai rahi, e te maitai rahi, e te parau mau.” (Exodo 34:6) Eita e maerehia e e fanaˈo tatou i te oaoa ia tavini anaˈe tatou ia Iehova!—Salamo 100:1-5.
Te Arii faito ore i te raˈi
Ua parau te Tamaiti a Iehova, o Iesu Mesia, e: “E Varua te Atua.” (Ioane 4:24) Eita ïa o Iehova e itehia e te mata taata nei. Ua parau atu hoi Iehova ia Mose e: “E ore oe e tia ia hiˈo mai i tau mata; e ore roa hoi te hoê taata e ora ia na reira i te hiˈo mai ia ˈu.” (Exodo 33:20) No te hanahana rahi o teie Arii i te raˈi ra, eita e tia i te taata ia hiˈo atu ia ˈna.
Noa ˈtu e eita to tatou mata e ite ia Iehova, e rave rahi mau haapapuraa e te vai mau ra oia ei Atua Mana hope. Oia mau, “te mau [huru maitatai] hoi no ˈna e ore e tia ia hiˈo ra, te itea papuhia nei ïa i te mau mea i hamanihia nei, mai te hamaniraa mai â o teie nei ao; oia hoi to ˈna ra mana hope ra e te Atuaraa ra.” (Roma 1:20) Te haapapu nei te fenua—e ta ˈna aihere, ta ˈna mau tumu raau, ta ˈna mau hotu, ta ˈna mau pota, e ta ˈna mau tiare—i te tiaraa Atua o Iehova. Taa ê atu i te mau atua idolo faufaa ore, te horoa maira Iehova i te ûa e te mau anotau hotu. (Ohipa 14:16, 17) A hiˈo na i te mau fetia i nia i te raˈi i te po. Auê ïa haapapuraa rahi o te tiaraa Atua o Iehova e to ˈna aravihi i te pae no te faanahonahoraa!
Ua faanahonaho atoa Iehova i ta ˈna mau mea poietehia moˈa e te maramarama i nia i te raˈi. Ei faanahonahoraa au maite, te faatupu nei ratou i te hinaaro o te Atua, mai ta te papai salamo e parau ra: “E haamaitai ia Iehova, e to ˈna ra mau melahi e, o tei hau i te puai, e ua haapao i ta ˈna faaueraa, i te faarooraa i tana reo ia parau. E haamaitai ia Iehova, outou atoa, o to ˈna ra mau pǔpǔ; o to ˈna ra mau tavini, tei rave i to ˈna ra hinaaro.” (Salamo 103:20, 21) Ua faanahonaho atoa Iehova i to ˈna nunaa i nia i te fenua. Ua faanahonaho-maitai-hia te nunaa o Iseraela, e hoê â huru no te mau pǐpǐ matamua a te Tamaiti a te Atua. Oia atoa i teie mahana, te vai nei ta Iehova te hoê faanahonahoraa na te ao atoa nei o te mau Ite itoito, o te poro nei i te parau apî maitai e ua fatata roa mai to ˈna Basileia.—Mataio 24:14.
O Iehova te Atua mau e te ora
Ua faaite-papu-hia te tiaraa Atua o Iehova na roto e rave rahi mau ravea! Ua faahaehaa oia i te mau atua haavare no Aiphiti e ua aratai atu oia i te mau ati Iseraela ma te peapea ore i roto i te Fenua i tǎpǔhia mai. Te horoa ra te poieteraa i te mau haapapuraa e rave rahi o te tiaraa Atua o Iehova. E aita hoê aˈe faaauraa i rotopu ia ˈna e te mau atua idolo faufaa ore a te haapaoraa hape.
Ua faaite te peropheta Ieremia i te taa-ê-raa rahi i rotopu ia Iehova, te Atua ora, e te mau idolo ora ore hamanihia e te taata. Te faaite-maitai-hia ra teie taa-ê-raa i roto i te Ieremia pene 10. I rotopu i te tahi atu mau mea, ua papai o Ieremia e: “O Iehova râ, te Atua mau, te Atua ora, e te arii hau mure ore.” (Ieremia 10:10) Ua poiete te Atua mau e te ora ra o Iehova i te mau mea atoa. Ua faaora mai oia i te mau ati Iseraela e autâ noa ra i raro aˈe i te faatîtîraa a Aiphiti. Aita hoê mea e ore e tia ia ˈna ia rave.
E pahono Iehova, “te Arii hau mure ore,” i teie pure: “E to matou Metua i te [raˈi] ra, ia raa to oe iˈoa. Ia tae [mai] to oe ra [basileia]. Ia haapaohia to oe hinaaro i te fenua nei, mai tei te [raˈi] atoa na.” (Timoteo 1, 1:17; Mataio 6:9, 10) Fatata roa te Basileia Mesia i nia i te raˈi, tei roto ê na i te rima o Iesu Mesia, i te ohipa no te aro i te feia iino e no te haamou i te mau enemi atoa a Iehova. (Daniela 7:13, 14) E haamau atoa te Basileia i te hoê ao apî o te mau haamaitairaa mure ore no te huitaata auraro.—Petero 2, 3:13.
Mea rahi atu â te tia ia haapii no nia ia Iehova e ta ˈna mau opuaraa. No te aha outou e ore ai e faaoti e maimi i teie ite e e ohipa ia au i te reira? Ia na reira outou, e haamaitaihia outou no te fanaˈo i te ora mure ore i roto i te hoê paradaiso i nia i te fenua i raro aˈe i te faatereraa a te Basileia. E ora outou i te taime e ore ai te oto, te mauiui, e tae noa ˈtu te pohe e e î ai te fenua i te ite o Iehova. (Isaia 11:9; Apokalupo 21:1-4) E fanaˈo outou i te reira mai te peu e e imi outou, e itea mai ia outou, e e ohipa outou ia au i te mau pahonoraa niuhia i nia i te Bibilia i te uiraa ra, “O vai Iehova?”
[Faaiteraa i te fatu o te hohoˈa i te api 7]
Pictorial Archive (Near Eastern History) Est.