Te faaohipa-maitai-raa e te faaohipa-hape-raa i te mau hohoˈa faaroo

TEI St. Petersburg tatou, i Rusia. Teie te taio mahana, 2 no atete 1914. Ua putuputu mai te mau taata horuhoru e faatoro ra i te mau hohoˈa faaroo i te aorai a te emepera rusia. Ua faatiahia te hoê fata i ropu i te piha rahi. Te tia ra te hoê hohoˈa penihia o te hoê vahine e tapea ra i te hoê tamarii i roto i to ˈna rima i nia i te fata. Ua piihia teie hohoˈa faaroo te “Metua vahine o te Atua no Vladimir.” Te faariro nei te nahoa taata i teie hohoˈa ei taoˈa faufaa moˈa roa ˈˈe i Rusia.

Inaha, te tiaturihia ra e e faatupu teie hohoˈa faaroo i te mau semeio. I te matahiti 1812, i to te mau nuu Rusia taahiraa no te aro atu ia Napoléon, ua pure te tenerara Kutuzov i mua ia ˈna. I teie nei, i muri aˈe i to ˈna faaôraa i to ˈna fenua i roto i te tamaˈi, te tia ra te Emepera rusia o Nicolas II i mua i teie hohoˈa faaroo. Ma te afai i to ˈna rima atau i nia, te horeo nei oia: “Te tǎpǔ nei au e eita vau e faatupu i te hau e tae roa ˈtu i te taime aore roa e enemi faahou i nia i te repo Rusia.”

E piti hebedoma i muri iho, ua rave te emepera rusia i te hoê tere pereninaraa i Moscou no te titau i te haamaitairaa a te Atua i nia i to ˈna mau nuu. I te Fare pure rahi no te Afai-tino-raahia o Maria Peata, ua tuturi oia e ua pure oia i mua i te hoê hohoˈa rahi tei faaunaunahia e te piru—te hoê paruru ahu tei penihia i te hohoˈa o Iesu, o Maria, o te mau melahi, e o te mau “peata.”

Aita teie mau ohipa faaroo i manuïa i te ape i te ati. Aita i naeahia e maha matahiti, hau atu i te ono mirioni taata i pohe i roto i te mau nuu rusia e ua erehia ratou i te pae rahi o to ratou fenua. Hau atu, ua taparahi-pohe-hia te emepera rusia, te emepera vahine, e ta raua e pae tamarii. Ei monoraa i te faatereraa hui arii tei mana na e pae senekele, ua haamata ihora te fenua i te faaterehia e te hoê faatereraa orure hau o tei patoi i te haapaoraa. Mea faufaa ore hoi te tiaturiraa a te Emepera Nicolas i roto i te mau hohoˈa faaroo.

Teie râ, e tae roa mai i teie mahana i Rusia e i te tahi atu mau fenua, e mau mirioni taata o te tamau noa nei i te faahanahana i te mau hohoˈa faaroo. Te faatupu nei te reira i te mau uiraa faufaa roa. Eaha te manaˈo o te Atua no nia i te mau peu haamoriraa e ravehia nei i mua i teie mau hohoˈa? E eaha ïa no te peu e faatautau i teie mau hohoˈa i nia i te mau pǎpai o te fare?

Eaha ta te Bibilia e parau ra?

I to Iesu vairaa mai i nia i te fenua, ua auraro oia i te Ture a te Atua i horoahia na roto ia Mose. Te vai ra te piti o ture o na Ture Ahuru, e na ô ra e: “Eiaha roa oe e hamani i te idolo tarai no oe, e te hohoˈa no te hoê mea i nia i te raˈi ra, e no te hoê mea i raro i te fenua nei, e no te hoê mea o te moana i raro aˈe i te fenua ra: eiaha roa oe e piˈo i raro ia ratou, eiaha hoi e tavini ia ratou; e Atua tahoo hoi au o te Atua no oe nei o Iehova.”—Exodo 20:4, 5.

Oia mau, aita o Iesu i haamori i te Atua ma te rave i te mau hohoˈa aore ra te mau tii hamanihia e te rima taata. Maoti râ, ua tuea maite ta ˈna haamoriraa e teie parau a to ˈna Metua tane: “O vau o Iehova, o to ˈu ïa iˈoa, e ore au e horoa i to ˈu ra hanahana no vetahi ê; e te haamaitai ia ˈu ra i te mau hohoˈa otiotihia ra.”—Isaia 42:8.

Hau atu, ua faataa o Iesu e no te aha e tia ˈi ia haamori i te Atua ma te ore e faaohipa i te mau taoˈa materia. “Ua fatata râ, e teie nei hoi taua hora,” o ta ˈna ïa i parau, “e haamori ai i te Metua te feia haamori mau ra, ma te varua e te parau mau: o te huru ïa o te feia haamori ta te Metua e titau nei. E Varua te Atua, e te feia e haamori ia ˈna ra, e haamori ïa ma te varua e te parau mau e tia ˈi.”—Ioane 4:23, 24.

Mai ia Iesu, ua haapii ta ˈna mau pǐpǐ mau ia vetahi ê i te ravea tano no te haamori. Ei hiˈoraa, ua paraparau atu te aposetolo Paulo i te hoê nahoa philosopho Heleni o te faaohipa na i te mau idolo no te haamori i ta ratou mau atua itea-ore-hia. Ua parau atu oia ia ratou no nia i te Poiete o te taata e ua na ô atura: “Eita e tia ia manaˈo tatou e e au te Atua i te auro, e te ario, e te ofai i taraihia i te aravihi e te ravea paari a te taata nei.” I muri iho, ua faataa taua aposetolo nei e “e haerea faaroo hoi [to te mau kerisetiano], e ere i te haerea ite mata” e e tia i te mau kerisetiano ia “maue ê atu i te haamori idolo.”—Ohipa 17:16-31; Korinetia 2, 5:7; Korinetia 1, 10:14.

Te faaite ra te hoê ohipa i tupu i roto i te oraraa o te aposetolo Petero e ua oioi noa oia i te faatitiaifaro i te ohipa o te nehenehe e aratai i te haamoriraa idolo. I to te raatiraa a te nuu ra o Korenelio toparaa i to ˈna pae avae, ua patoi atura o Petero i te reira. Ua faatia maira oia ia Korenelio i nia, i te na ôraa ˈtu e: “A tia, e taata atoa hoi au nei.”—Ohipa 10:26.

Hoê â huru no te aposetolo Ioane, no to ˈna putapû rahi i te mau orama no ǒ mai i te Atua ra, ua topa ihora oia i te pae avae o te hoê melahi. “[A haapao maitai!]” o ta te melahi ïa i aˈo atu. “Eiaha roa, e taetaeae tavini hoi au no oe, e no to mau taeae i te mau peropheta ra, e no te feia i haapao i te parau i roto i teie nei buka; o te Atua te haamori.” (Apokalupo 22:8, 9) Ua farii te aposetolo i teie aˈoraa. Ma te here, ua papai oia i teie ohipa ia faufaahia tatou.

Eaha râ te taairaa o teie mau ohipa e te faaohiparaa i te mau hohoˈa faaroo? Inaha, mai te peu e mea ino no Korenelio ia tipapa i mua i te hoê o te mau aposetolo a te Mesia, eaha ˈtu ïa no te faahanahanaraa i te mau hohoˈa ora ore o te mau “peata”? E mai te peu e mea ino no te hoê o te mau aposetolo o te Mesia ia tipapa i mua i te hoê melahi ora, eaha ˈtu ïa no te faahanahanaraa i te mau hohoˈa ora ore o te mau melahi? Papu maitai, aita teie mau peu e tuea ra e te faaararaa a Ioane: “E au mau tamarii ra, e ara ia outou i te mau idolo ra.”—Ioane 1, 5:21.

Ei faaunaunaraa tei riro ei tauturu no te haapiiraa

E ere te auraa e mai te peu e te vai ra ta tatou te hoê hohoˈa no nia i te tahi tupuraa bibilia, e ohipa haamori idolo ïa te reira. Te faaohipa maitai nei teie vea i te mau hohoˈa o te mau tupuraa bibilia ei mau tauturu no te haapiiraa. Oia atoa, e nehenehe te mau hohoˈa o te mau tupuraa bibilia e faaohipahia no te faaunauna i te mau pǎpai o te mau fare faaearaa e te mau fare rarahi. Teie râ, eita te hoê kerisetiano mau e hinaaro e faaiteite i te hoê hohoˈa e faahanahanahia ra e vetahi ê, eita atoa oia e faatautau i nia i to ˈna pǎpai i te hoê hohoˈa o te faataa hape ra i te Bibilia.—Roma 14:13.

Te faaite nei te rahiraa o te mau hohoˈa faaroo a te amuiraa faaroo kerisetiano i te hoê mori menemene e haaati ra i te upoo o Iesu, o Maria, o te mau melahi, e o te mau “peata.” Te piihia ra te reira te hei peata. Nohea mai teie hei peata? “E ere i te mea kerisetiano,” o ta Te buka parau paari katolika (beretane, neneiraa no 1987) ïa e farii ra, “inaha, ua faaohipahia oia e te feia peu aravihi e te feia tarai hohoˈa etene no te faataipe i te tura rahi e te mana o te mau atua huru rau.” Hau atu, te vai ra i roto i te buka Te mau kerisetiano (beretane), a Bamber Gascoigne, te hoê hohoˈa no ǒ mai i te Capitoline Museum i Roma o te atua-mahana e te hoê hei peata. E haamorihia na teie atua e te mau Roma etene. I muri aˈe, o ta Gascoigne ïa e faataa ra, ua “rave atoa mai te kerisetianoraa i te hei peata o te mahana.” Oia mau, ua taaihia te hei peata i te haamoriraa etene o te mahana.

Mea tano anei ia faatautauhia te mau hohoˈa o te anoi ra i te mau tupuraa bibilia e te mau taipe o te haamoriraa idolo etene i nia i te pǎpai o te fare o te hoê kerisetiano? Eita. Te aˈo ra te Bibilia e: “E eaha to te hiero o te Atua ra atiraa ˈtu i te idolo? . . . E teie nei, te na ô maira Iehova, E haere mai outou i rapaˈe au mai roto mai ia ratou ra, ia taa ê outou, e eiaha e rave noa ˈtu i te mea viivii ra; e na ˈu e farii atu ia outou.”—Korinetia 2, 6:16, 17.

A mairi ai te tau, ua haamata ihora te mau kerisetiano i te ore e haapao i teie aˈoraa. Ua tupu maira te ohipa apotata, mai ta Iesu e ta ˈna mau aposetolo i faaite atea mai. (Mataio 24:24; Ohipa 20:29, 30; Petero 2, 2:1) I te omuaraa o te senekele maha o to tatou nei tau, ua faariro aˈera te emepera Roma ra o Constantin i te kerisetianoraa apotata ei haapaoraa na te Hau. Ua haamata ihora te hoê pǔpǔ feia etene i te parau e e “kerisetiano” ratou. E peu matauhia e ratou ia haamori i te mau hohoˈa o te emepera. E matau atoa na ratou i te faatautau i te mau hohoˈa o to ratou mau tupuna e te tahi atu feia tuiroo. “Ia au maite i te haamoriraa i te emepera,” o ta John Taylor ïa e faataa ra i roto i ta ˈna buka Peniraa i te hohoˈa faaroo (beretane), “e haamori na te taata i to ˈna hohoˈa penihia i nia i te mau ahu e te raau, e mai te haamoriraa i te emepera e tae atu ai i te faahanahanaraa i te mau hohoˈa faaroo, mea iti roa ïa te taa-ê-raa.” No reira, ua monohia ˈtura te haamoriraa etene o te mau hohoˈa e te faahanahanaraa o te mau hohoˈa o Iesu, o Maria, o te mau melahi, e o te mau “peata.”

Mea nafea to te mau upoo ekalesia haapapuraa i te reira?

Ia au i Te buka parau paari a te haapaoraa (beretane), ua faaohipa te mau upoo o te ekalesia i te hoê â parau haapapuraa e ta te mau philosopho etene. Ua farii te mau taata mai ia Plutarch, Dio Chrysostom, Maxim no Tyre, Celsus, Porphyry, e o Julian e mea ora ore te mau idolo. Teie râ, ua haapapu teie mau etene i te faaohiparaa i te mau idolo na roto i te parauraa e ua riro teie mau taoˈa ei mau tauturu no te haamoriraa i ta ratou mau atua itea-ore-hia. Te farii nei te taata aravihi tuatapapa i te mau hohoˈa faaroo Rusia ra o Leonid Ouspensky i roto i te buka Te auraa o te mau hohoˈa faaroo (beretane) e: “Ua faaohipa te mau Metua o te Ekalesia i te mauhaa a te haapiiraa philosopho Heleni, ma te faatano i to ˈna ite e ta ˈna mau parau i nia i te tatararaa faaroo kerisetiano.”—A faaau e te Kolosa 2:8.

E rave rahi mau taata e mea fifi roa no ratou ia taa i te haapapuraa faaroo e turu ra i te faahanahanaraa i te mau hohoˈa. “Te taa-ê-raa i rotopu i te haamoriraa i te hoê hohoˈa faaroo no te mea o ta ˈna e faahohoˈa ra, aore ra te haamoriraa i te hohoˈa iho . . . mea haihai roa ïa ia papuhia e te taata maoti râ te feia ite teitei,” o ta John Taylor ïa e faataa ra i roto i te buka Peniraa i te hohoˈa faaroo.

I te tahi aˈe pae, mea ohie roa ia taa i te faataaraa a te Bibilia no nia i te mau hohoˈa faaroo. A hiˈo na ia Emilia, e ora ra i Johannesburg, i Afirika Apatoa. E katolika haapao oia e ua matau oia i te tuturi e i te pure i mua i te mau hohoˈa. I muri aˈe, ua patoto maira te hoê Ite no Iehova i to ˈna opani. Ua putapû roa oia i te iteraa i roto i te Bibilia reo Potiti e e iˈoa to te Atua, o Iehova. (Salamo 83:18, Almeida) I roto i ta ˈna mau haapiiraa bibilia, ua ani aˈera oia: “Eaha te tia ia ˈu ia rave ia mauruuru Iehova ia ˈu?” Ua faatoro atura te Ite i te mau hohoˈa faatautauhia i nia i to ˈna pǎpai e ua ani atura ia ˈna ia taio i te Salamo 115:4-8. I taua po ra, i to te tane a Emilia hoˈiraa mai i te fare, ua parau atura oia ia ˈna e te hinaaro ra oia e faarue i ta ˈna mau hohoˈa faaroo. Ua farii ta ˈna tane. I te poipoi aˈe, ua ani atura oia i ta ˈna e piti tamaroa, o Tony raua o Manuel, ia tuparari huˈahuˈa roa i te mau hohoˈa e ia tutui i te auahi. I teie mahana, e 25 matahiti i muri iho, te tatarahapa ra anei o Emilia i te reira? Aita. Inaha, e to ˈna utuafare atoa, ua tauturu oia e rave rahi o to ˈna mau taata tapiri ia riro mai ei feia haamori ia Iehova.

Mea pinepine teie mau huru ohipa i te tupu. Ei faahopearaa no te ohipa faariroraa i te taata ei pǐpǐ e ravehia nei e te mau Ite no Iehova, e mau mirioni taata o te haapii nei ia haamori i te Atua “ma te varua e te parau mau.” E nehenehe atoa outou e fanaˈo i te mau haamaitairaa o ta ˈna haamoriraa teitei no te mea, mai ta Iesu i parau na, “o te huru ïa o te feia haamori ta te Metua e titau nei.”—Ioane 4:23, 24.

[Hohoˈa i te api 26]

Te emepera rusia o Nicolas II e haamaitai ra i to ˈna mau nuu e te hoê hohoˈa faaroo

[Faaiteraa i te tumu]

Hohoˈa a C.N.