Te faatia ra te feia poro i te Basileia
Te haamâharaa i te feia e poia ra i te pae varua—I te fare haapiiraa
“E ao to tei ite i to ratou mau hinaaro i te pae varua,” o ta Iesu ïa i parau i roto i ta ˈna Aˈoraa i nia i te Mouˈa (Mataio 5:3) E rave rahi mau tamarii haere haapiiraa o te poiha nei i te ite o te Atua e ta ˈna mau opuaraa faahiahia mau. Te imi nei ratou i te pahonoraa i te mau uiraa no nia i te ora e te hinaaro nei ratou e ite e nafea ratou e nehenehe ai e ora ia fanaˈo ratou i te farii maitai o te Atua e ia oaoa ratou. Ua ite-papu-hia te reira i te hoê fare haapiiraa no te mau Motu Vierges Beretane. Te faatia ra te hoê Ite no Iehova i reira e:
◻ “Ua haere atu vau i te hoê putuputuraa metua-orometua haapii i te fare haapiiraa, e ua faahiti-rahi-hia te parau no te raau taero, te inuraa ava, te mau amuimuiraa tamaroa e tamahine, te mataitairaa i te afata teata, te mau nota, e te tahi atu mau tumu parau, no reira, ua opua ˈtura vau e rave i te buka Te uiui nei te mau taurearea—Mau pahonoraa ohie (farani) e ia faaite atu i te vahine faatere haapiiraa. I muri aˈe i to ˈna hiˈopoaraa i te buka, ua parau mai oia e te reira mau te mea o ta ratou e titau ra e ua ani maira oia mai te peu e e nehenehe anei te fare haapiiraa e ani i te hoê buka no te mau 120 taurearea haere haapiiraa tataitahi. Ua tuatapapahia teie aniraa e te mau matahiapo o te amuiraa, e ua faaoti atura ratou e horoa noa i te mau buka na te fare haapiiraa. I to matou faahitiraa i teie parau, ua ani maira te mau orometua haapii e na matou e faataa i te mau buka i te mau taurearea haere haapiraa. Ua haere atu e piti Ite, e ua î roa te piha i te mau taurearea e tiai ra ia raua. Ua paraparau te mau taeae hoê afa hora, e ua taiohia te mau aamu e faaite ra e mea nafea teie buka i te tautururaa i te mau taurearea e te feia paari no roto mai i te mau vea a te Taiete Watch Tower. I muri iho, ua faaitehia ˈtura te mau buka i te mau taurearea e tiai ru ra i te reira.”
Mea oaoa roa ia ite e ua faaoti te fare haapiiraa i te faaohipa i te buka ei tuhaa no te porotarama haapiiraa faito maha e te pae. E pahono mau â oia i te mau uiraa e rave rahi ta teie mau taurearea e uiui nei no nia i te oraraa e te tau i mua nei.
Te haamâharaa i te feia e poia ra i te pae varua—I Papua Niu Guinea
Na te hoê tiaau ratere i faatae mai i te faatiaraa i muri nei. Te faaite ra te reira i te poia rahi o te taata i te pae varua i roto i teie fenua e te aravihi o ta tatou mau buka niuhia i nia i te Bibilia no te haamâha i to ratou poia.
◻ “I te mea e eita ta ˈu e nehenehe e tere atu i te oire iti no Kamberatoro,” o ta te tiaau ïa e faatia ra, “ua haere atu vau e tavini e te amuiraa iti no Vanimo. Mea rahi te anaanatae i reira. Ua farii vetahi mau taata no Bewani i te mau buka. Ua ani mai te hoê taata ia ˈu ia haere i teie oire iti, e na ˈna e faanaho i te hoê vahi faaearaa no ˈu. E rave rahi mau taata o tei matau i ta tatou mau buka. I te mau taime atoa matou i haere ai i te oire no Vanimo, ua pau roa ta matou mau buka noa ˈtu e ua rave matou e toru afata buka. Te faarirohia ra te buka Ta ˈu Buka Aamu Bibilia mai te auro ra te huru. Te ani rahi nei te taata i teie buka. Mea oioi roa te mau buka o ta ˈu i afai atu i te operehia. Ia faaite atu matou i ta tatou mau buka i te taata, e ani mai ratou: ‘Teihea roa te buka rearea?’ Ua ani mai te hoê taata e ono. Ua horoa mai oia i to ˈna iˈoa e to ˈna vahi nohoraa e ua ani mai oia ia haapuroro i te hoê poroi na roto i te radio ia tae anaˈe mai teie mau buka ia ˈu ra. E faarue ïa oia i to ˈna oire no te haere mai e tii i te mau buka.” Te na ô râ te tiaau ratere e: “E rave rahi mau taata i Vanimo o tei farii i te mau buka Te huitaata i nia i te eˈa o te maimiraa i te Atua (farani) e te buka Te uiui nei te mau taurearea—Mau pahonoraa ohie (farani).”
Te faaite ra te reira i te hiaai o te mau taata mafatu maitai i te maa pae varua e vai ra i roto i te Bibilia e te mau buka ta Iehova i horoa mai na roto i te arai o “te tavini haapao maitai e te paari.” (Mataio 24:45-47) Te oaoa nei te mau Ite no Iehova i te tautururaa i teie mau taata tei poia i te parau mau!
[Hohoˈa i te api 19]
Pororaa i Papua Niu Guinea