Te tumâraa i te haaviiviiraa—Mai roto mai i te mafatu e te feruriraa

AITA Iehova i tuu i roto i te taata i te hiaai no te reporepo aore ra te huanane. Ua hamanihia to ratou palaneta ia riro oia ei paradaiso mâ, te nahonaho, e te unauna. Aita te Atua i opua e ia ino roa oia e ia riro mai oia ei faarueraa pehu hairiiri.—Genese 2:8, 9.

Tera râ, i muri aˈe i to te mau taata faarueraa i te aratairaa a te Atua, ua haamata ihora ratou i te faatia i ta ratou iho faanahoraa. I te mea e ua erehia ratou i te paari o te Atua e te aravihi, ua titauhia ˈtura ratou ia haapii na roto i te tamataraa e te hape. Te haapapu ra te aamu i te parau mau ta te Bibilia e faahiti ra e eita te taata e manuïa i te faatere ia ratou iho; i te roaraa o te mau tausani matahiti ‘ua faatere te taata i te taata no to ˈna ra ati.’ (Koheleta 8:9; Ieremia 10:23) Ua riro te fifi o te haaviiviiraa no teie nei tau, noa ˈtu eaha to ˈna huru, ei faahopearaa no te faatereraa hape a te taata.

Te peeraa i te hiˈoraa o te Atua

Te tutava puai nei te feia e hinaaro ra e faaoaoa i te Atua i te pee maite i te mau faaueraa a te Poiete i te pae no te mâraa. No reira, ua farerei te mau Ite no Iehova i te hoê fifi i te taime a faanahohia ˈi e ia tupu te tairururaa nunaa i Prague, i Tekolovakia, i ropu i te matahiti 1991.a Fatata e 75 000 o te ruru mai, te hoê nahoa taata o te ô maitai i roto i te Tahua no Strahov. Teie râ, aita teie tahua i faaohipahia e pae matahiti. Aita oia i tataˈihia e ua ino roa oia i te ahuaraˈi. Tau 1 500 Ite no Iehova o tei horoa hau atu i te 65 000 hora no te faaapî e no te peni faahou i teie tahua. I te taime a haamata ˈi te tairururaa, ua faariro teie ohipa tamâraa i te tahua ei vahi au maitai no te haamori i te Atua mau ra o Iehova.

Eaha te mea e turai ra i te mau Ite no Iehova ia faataa ê mai ia ratou, inaha, aita te pae rahi o te ao nei e tâuˈa ra i te mâ e te nahonaho maitai? Te haapaoraa ïa i te aˈoraa a te Bibilia e e tia i te mau kerisetiano ia tumâ roa i te mau huru tano ore, mai te miimii, te faatura ore, te nounou, e te ereraa i te here. ‘A haapae i te huru taata tahito e ta ˈna ra mau peu,’ o ta Bibilia ïa e parau ra. A mono mai e ‘te huru taata apî, o tei faaapîhia na roto i te ite papu ia au i te hohoˈa o Tei poiete ia ˈna.’ Eita te hoê huru taata o te here i te mâ, te nahonaho, e te nehenehe e farii i te mau hinaaro haaviivii.—Kolosa 3:9, 10; Korinetia 2, 7:1; Philipi 4:8; Tito 2:14.

E titau te huru taata apî e ia ara te mau kerisetiano i te haaviiviiraa, ma te oreraa e haaviivii haapao ore noa aore ra te ofatiraa i te mau ture arai i te haaviiviiraa ta te mau faatereraa i haamau. E tauturu te reira ia ratou ia ape i te haerea hue haere noa, te miimii e te hupehupe o te turai nei i te taata ia faarue noa i te pehu. Na roto i te faaitoitoraa i te faatura no te mau taoˈa a vetahi ê, e haapae oia i te faaohipa i te mau papaipairaa ei ravea faaiteraa i to ˈna mau manaˈo, mai te mea ra e e peu arearearaa noa teie, aore ra e peu rii aravihi. Mea titauhia e ia vai mâ te fare, te pereoo, te ahu, e te tino.—A faaau e te Iakobo 1:21.

Area te feia aore e hinaaro nei e omono i teie huru taata apî, e nehenehe anei e faahapa i te Atua ia opani oia ia ratou ia ora i roto i te Paradaiso i mua nei? Eita. Te taata te vai noa ra i roto i to ˈna mafatu aore ra to ˈna feruriraa te tahi hinaaro huna e haaviivii, e haamǎtaˈu ïa oia i te unauna o te paradaiso i haamau-faahou-hia i nia i te palaneta Fenua, e mea peapea roa hoi no te feia o te hinaaro e atuatu i te reira. Te faaotiraa a te Atua ‘e haamou i te feia e vavahi nei i te fenua,’ e faaotiraa parau-tia ïa e te here.—Apokalupo 11:18; 21:8.

E tuhaa atoa anei ta tatou?

Te auraa anei râ e e tia i te mau kerisetiano ia turu i te mau ravea aroraa i te haaviiviiraa aore ra te mau ravea tamâraa?

Mea papu e e faaino te haaviiviiraa i te oraora-maitai-raa e te maitairaa o te huiraatira. Te tapitapi mau nei Iehova no teie mau tuhaa, mai ta tatou e ite ra na roto i te mau ture o ta ˈna i horoa ˈtu na te mau ati Iseraela. (Exodo 21:28-34; Deuteronomi 22:8; 23:12-14) Aita roa ˈtu râ oia i faaue ia ratou ia faahepo atu i te mau nunaa ěê no nia i te ora-maitai-raa o te huiraatira; aita atoa te mau kerisetiano o te senekele matamua i faauehia ia na reira.

I teie mahana, e ohie noa te mau faanahoraa no te paruru i te palaneta i te riro mai ei mau ohipa politita. Inaha, ua haamauhia vetahi mau pǔpǔ politita no te imi i te mau ravea arairaa i te mau fifi o te palaneta. Ia turu noa ˈtu te hoê kerisetiano i te mau raveraa politita, te erehia ra ïa oia i to ˈna tiaraa amui ore i te pae politita. Ua faataa o Iesu i teie faaueraa tumu no nia i ta ˈna mau pǐpǐ: “E ere ratou i to teie nei ao, mai ia ˈu nei hoi e ere i to teie nei ao.” Mai te peu e e haapao ore noa ˈtu te hoê kerisetiano i teie titauraa, te vai ra ïa te atâtaraa e ia apiti atu oia i roto i “te hui tavana o teie nei ao, e tuuhia i raro.”—Ioane 17:16; Korinetia 1, 2:6.

Aita o Iesu i tamata i te faatitiaifaro i te mau fifi totiale atoa i to ˈna ra tau; aita atoa oia i faaue atu i ta ˈna mau pǐpǐ ia na reira. Teie râ ta ˈna i faaue atu ia ratou: “E teie nei, e haere outou e faariro i te mau fenua atoa ei pǐpǐ, a bapetizo atu ai ia ratou . . . , ma te haapii atu ia ratou i te haapao i te mau mea atoa ta ˈu i parau atu ia outou na.” Aita oia i faaue atu no nia i te mau ravea parururaa i te palaneta.—Mataio 28:19, 20.

Ma te faataa e eaha te tia ia haafaufaahia i roto i te oraraa kerisetiano, ua parau te Mesia e: “E mata na râ outou i te imi [na mua] i te basileia o te Atua, e te parau-tia na ˈna.” (Mataio 6:33) Ia haamau anaˈe Iehova, na roto i te arai o te Basileia Mesia, i ta ˈna mau faaueraa tumu parau-tia ati noa ˈˈe teie nei ao, e faatitiaifarohia ïa te mau fifi o te palaneta e a muri noa ˈtu ei oaoaraa no te taatoaraa.

No reira, te rave nei te mau Ite no Iehova i te hoê haerea aifaito. Ia au i te Roma 13:1-7, mea titauhia e ia auraro maite ratou i te mau ture a te hau no nia i te vai-maitai-raa o te palaneta. Hau atu, te turai nei te here i to ratou taata-tupu ia ratou ia faatura i te mea fatuhia e vetahi ê—ta te hau aore ra ta te taata taitahi—ma te ore e vavahi aore ra e faarue i te pehu ma te haapao ore. Aita râ ratou i faauehia ia rave i te upoo i roto i te mau ravea tamâraa faanahohia e teie nei ao. Te tuu nei ratou ma te tia i te pororaa i te poroi o te Basileia o te Atua i nia i te parahiraa matamua no te mea ua ite ratou e te reira te ravea no te faatupu i te maitai o te vai tamau.

Te hoê tamâraa i te pae varua

Ua faaara-pinepine-hia te mau ati Iseraela tahito i te mau faahopearaa e noaa mai ia haaviivii ratou i te fenua na roto i te haamaniiraa i te toto, te peeraa i te hoê oraraa taiata, aore ra te te faatura-ore-raa i te mau mea moˈa. (Numera 35:33; Ieremia 3:1, 2; Malaki 1:7, 8) Oia mau, ua faautuahia ratou no teie haaviiviiraa i te pae varua, eiaha no te tahi haaviiviiraa i te pae tino o ta ratou atoa paha i rave.b

No reira, o te haaviiviiraa aore ra te repo i te pae varua ta te hoê kerisetiano i teie mahana e tutava na mua i te haapae. E na reira oia na roto i te omonoraa i ‘te huru taata apî,’ o te tumâ roa i te mau hinaaro viivii mai roto mai i te mafatu e te feruriraa. Hau atu i te maha mirioni Ite no Iehova o te fanaˈo nei i teie tamâraa i te pae varua, e te atuatu nei ratou i te vai-mâ-raa i te pae faaroo e i te pae morare, e tae noa ˈtu te mâraa i te pae tino.—Ephesia 4:22-24.

I teie mahana, o te taime ïa no te raveraa i te hoê ohipa tamâraa i te pae varua. E ravehia i muri iho te hoê tamâraa o te fenua ia tae i te taime e tano e e tapea te reira ia ore to tatou nohoraa ia riro mai ei faarueraa pehu na roto i te faaoreraa i te haaviiviraa ia au i ta to tatou nei palaneta e titau ra.—Koheleta 3:1.

[Nota i raro i te api]