A oaoa i te hoê fenua mâ i mua nei!

AUÊ tatou i te oaoa i te mea e e faatupu Iehova, te Atua o te nahonaho e te mâ, i ta ˈna opuaraa matamua e faariro i te fenua taatoa ei paradaiso! (Isaia 11:6-9) Ua tǎpǔ mai oia e: “Oia atoa te parau no roto i to ˈu nei vaha; e ore e hoˈi faufaa ore noa mai ia ˈu nei, . . . e noaa hoi te mea i faaue atu ai au ra.” “O tei ore e tia i te Atua ia haavare,” no reira e ere teie i te parau faufaa ore.—Isaia 55:11; Hebera 6:18.

E nehenehe tatou e oaoa i te mea e e ohipa mai Iehova ma te here hou te taata e naeahia i te faito aita e ravea faahou, te faito eita te ino-roa-raa o te natura e nehenehe e tapea-faahou-hia!—Apokalupo 11:18.

E haamou Iehova i te feia haaviivii tatarahapa ore e te aroha ore e te feia o te ofati nei ma te manaˈo orure hau, i ta ˈna mau faaueraa tumu i te pae no te nahonaho maitai e te mâ. Eita te hoê taata e faatiahia ia faaino i te Paradaiso tei haamau-faahou-hia.—Maseli 2:20-22.

I te tau o te faatereraa a te Basileia o te Atua, i raro aˈe i te aratairaa a Iesu Mesia, e haapiihia te taata nafea ia haapae i te mau tumu e toe ra o te haaviiviiraa i te pae tino. I reira—eiaha râ i teie nei—e titauhia ˈi te mau tavini atoa a te Atua ia faaô ma te itoito i roto i te mau ravea tataitahi e ta te huiraatira no te rave i te hoê ohipa tamâraa aita i tupu aˈenei.—A faaau e te Ezekiela 39:8-16.

E turu te feia e ora ˈtu i te hopea o teie faanahoraa o te mau mea ino i teie porotarama tamâraa i te pae tino ma te hoê â aau tae e te oaoa o te ratou e faaite nei i roto i te ohipa tamâraa i te pae varua i teie mahana.—Salamo 110:3.

Mea papu maitai e e haamauhia te hoê fenua tamâhia, na mua ˈˈe râ, te vai ra te hoê ohipa tamâraa rahi roa ˈˈe o te mau tau atoa, e ravehia e te Basileia o te Atua. E faaorehia te mau huru haaviiviiraa atoa. Aore roa e papairaa hairiiri faahou. Aore roa e mohina faaruehia, e punu, e puohu uraina, e chewing-gum e te mau papie monamona, te mau vea huru rau o te hue-noa-hia na te pae miti aore ra te mau vahi paradaiso.

A oaoa i te hoê fenua mâ i mua nei!

[Hohoˈa i te api 7]

E apiti anei outou i roto i te ohipa tamâraa i te fenua i mua nei?