Mau uiraa a te feia taio

Eaha ta te hoê kerisetiano e nehenehe e rave mai te peu e eita e itehia mai ia ˈna te hoê hoa faaipoipo e tano?

Noa ˈtu e e kerisetiano itoito tatou, e nehenehe tatou e roohia i te hepohepo mai te peu e e hinaaro puai tatou i te hoê mea e ore râ e noaa mai. Te faaite-papu-hia ra to tatou mau manaˈo i roto i te Maseli 13:12, e na ô ra e: “Ia faaroaroahia te taoˈa tiaihia ra e fatimauu te aau.” Te reira te huru o te tahi mau kerisetiano i to ratou hinaaroraa e faaipoipo tera râ aita i itehia mai ia ratou te hoê hoa tano. Mai te reira iho â râ no te feia ta te aposetolo Paulo i parau e te “amâ” ra ratou i te hinaaro.—Korinetia 1, 7:9.

Ua tuu mai Iehova i roto i te taata i te hinaaro e fanaˈo i te hoê hoa tane aore ra vahine o tei riro ei apiti mau. No reira, eita e maerehia i te mea e e tupu mai teie mau huru hinaaro i roto e rave rahi mau kerisetiano taa noa. (Genese 2:18) E nehenehe teie mau manaˈo o te tupu mai iho â, e faarahihia i roto i te tahi mau nunaa o te haafaufaa nei i te faaipoiporaa (aore ra te faaipoiporaa ia naeahia te tahi faito matahiti) aore ra mai te peu e te haaatihia ra te mau kerisetiano taa noa i te feia faaipoipo oaoa i roto i te amuiraa. Teie râ, e ere i te mea maitai ia vaiiho i te taiâ ia rahi roa i roto i te hoê area taime maoro. No reira, nafea te mau kerisetiano haavare ore e nehenehe ai e faaruru i teie huru tupuraa ma te ore e hepohepo rahi roa?

E ere i te mea ohie, e eiaha te tahi atu mau taata ia faariro i teie tapitapiraa mai te mea e te faarahihia ra te fifi aore ra e e ohipa faufaa ore teie. Teie râ, i roto i te faito rahi, te neheneheraa e faaruru aore ra e faatitiaifaro i teie huru tupuraa, ua taaihia ïa i te mau taahiraa avae e ravehia e teie taata taa noa.

Te vai ra te hoê ravea i roto i teie faaueraa tumu bibilia ohie roa: “E mea maitai i te horoa ˈtu i te rave mai.” (Ohipa 20:35) O te parau ïa a te taata taa noa o Iesu Mesia, e ua tano roa ia ˈna ia faahiti i te reira. Ua riro te raveraa i te mau ohipa no vetahi ê ma te hinaaro miimii ore, ei ravea maitai roa no te tauturu ia tatou ia faatitiaifaro i te mau manaˈo no roto mai i te tahi hinaaro aore e tupu vave. Eaha ïa te auraa no te mau kerisetiano taa noa?

A tutava i te rave i te mau ohipa maitatai no to outou utuafare e no vetahi ê i roto i te amuiraa, e a faarahi i ta outou ohipa i roto i te taviniraa. E ere noa teie aˈoraa ei ravea no te parau e, ‘A rave i te ohipa, eita ïa oe e manaˈonaˈo faahou i te faaipoiporaa.’ Eita. Ia rave anaˈe outou i teie mau ohipa kerisetiano hotu mau, e ite ïa outou e ‘ua rave outou i te hoê faaotiraa papu i roto i to outou mafatu, ma te mana i nia i to outou iho hinaaro’ e e nehenehe outou e faaohipa i to outou huru oraraa ma te au maitai.—Korinetia 1, 7:37.

Ua vaiiho vetahi o tei hinaaro uˈana e faaipoipo i teie hinaaro ia riro ei manaˈonaˈoraa matamua i roto i to ratou oraraa. Ua tae roa ratou i te faito e faatae i te mau poroi no te imi i te hoê hoa faaipoipo na roto i te mau vea. Mea hau aˈe hoi ia haafaufaa i te mauruuru no te mau haamaitairaa e noaa mai i roto i te tau o te faaea-taa-noa-raa.—A hiˈo i te mau tumu parau “Mau tavini o te Atua tei ore i faaipoipohia, tei tia maitai râ” e “Te faaea-taa-noa-raa: te hoê huru oraraa taoˈa mau” i roto i Te Pare Tiairaa o te 1 no novema 1987, e “O te faaipoiporaa anei te ravea hoê roa e noaa mai ai te oaoa?” i roto i Te Pare Tiairaa o te 15 no me 1992.

A pure ia Iehova ia tauturu mai ia outou ia tamau maite i roto i to outou faaea-taa-noa-raa. (Philipi 4:6, 7, 13) E rave rahi mau kerisetiano faaipoipo-ore-hia o tei ite e na roto i te faaohiparaa i to ratou taime no te tuatapapa e no te feruri hohonu i nia i te Parau a te Atua e no te haere e no te apiti atu i roto i te mau putuputuraa kerisetiano, ua fanaˈo ratou i te ‘tamahanahanaraa no to ratou nephe,’ mai ta Iesu i tǎpǔ atu i te feia o te pee ia ˈna. (Mataio 11:28-30) Ua tauturu te reira ia ratou ia haapaari i to ratou huru pae varua, ia riro mai ratou ei mau tane aore ra ei mau vahine maitatai aˈe mai te peu e e farerei ratou i muri iho i te hoê hoa faaipoipo e tano.

Eiaha roa ia moehia ia outou e te taa ra ia Iehova i te huru tupuraa o te mau taata taa noa tataitahi e tavini ra ia ˈna. Ua ite oia e eita paha outou e au maitai ra i teie huru tupuraa to outou. Ua taa atoa râ i to outou Metua here i te raˈi e eaha te mea maitai aˈe no outou a muri aˈe, i te pae varua e i te pae no te mau manaˈo hohonu. E teie hoi ta outou i ite ma te papu maitai: Ia tiai outou ia Iehova ma te faaoromai e ia faaohipa outou i te mau faaueraa tumu o ta ˈna Parau i te mau mahana atoa, e nehenehe outou e tiaturi e e haamâha mai oia i to outou mau hinaaro faufaa roa ˈˈe ia maitaihia outou e a muri noa ˈtu.—A faaau e te Salamo 145:16.