A ara i te mau huru haamoriraa atoa
“E eaha to te hiero o te Atua ra atiraa ˈtu i te idolo?”—KORINETIA 2, 6:16.
1. Eaha ta te sekene e te mau hiero no Iseraela e faahohoˈa ra?
E HIERO to Iehova aita e idolo to roto. Ua faahohoˈahia oia e te sekene a Iseraela o tei faatiahia e Mose e te mau hiero i patuhia i muri iho i Ierusalema. Ua faahohoˈa teie mau paturaa i “te sekene mau,” oia hoi te hiero rahi a Iehova i te pae varua. (Hebera 8:1-5) Ua riro teie hiero ei faanahoraa no te haafatata ˈtu i te Atua i roto i te haamoriraa na nia i te niu o te tusia o te hoo a Iesu Mesia.—Hebera 9:2-10, 23.
2. O vai te riro mai ei mau pou i roto i te hiero rahi a te Atua i te pae varua, e eaha te tiaraa e fanaˈohia ra e te feia rahi roa?
2 Ua riro te kerisetiano faatavaihia tataitahi ei “pou i roto i te hiero o [te Atua],” ma te fanaˈo i te hoê parahiraa i nia i te raˈi. ‘Te haamori nei’ “te feia rahi roa” o te tahi atu feia haamori ia Iehova ‘i te rui e te ao’ i roto i te mea tei faahohoˈahia e te aua o te mau Etene i te hiero i patu-faahou-hia e Heroda. Maoti te faaroo i roto i te tusia o Iesu, e tiaraa taata parau-tia to ratou ia paruruhia ratou i roto i “te ati rahi.”—Apokalupo 3:12; 7:9-15.
3, 4. Ua faaauhia te amuiraa o te mau kerisetiano faatavaihia i nia i te fenua i te aha, e eaha te peu viivii te tia ia ˈna ia haapae roa?
3 Ua faaau-atoa-hia te amuiraa o te mau kerisetiano faatavaihia i nia i te fenua i te tahi atu hiero aita e haamoriraa idolo to roto. Ua parau atu te aposetolo Paulo i teie feia tei ‘tapaohia e te varua moˈa’ e: “I patuhia i nia iho i te niu a te mau aposetolo e te mau peropheta ra, e o Iesu Mesia iho te tihi rahi: no ˈna te fare atoa i te ati-maitai-raa ia ˈna ra, i riro ai ei hiero moˈa no [Iehova] ra. E ua patu-atoa-hia outou e ana ia riro ei parahiraa no te Atua i te [varua] ra.” (Ephesia 1:13; 2:20-22) Ua riro teie na feia tapaohia e 144 000 ei “ofai ora” o tei ‘patuhia ei fare varua, ei autahuˈa moˈa.’—Petero 1, 2:5; Apokalupo 7:4; 14:1.
4 I te mea e e “fare” teie mau tahuˈa apiti “na te Atua,” eita oia e farii e ia haaviiviihia teie hiero. (Korinetia 1, 3:9, 16, 17) “Eiaha outou ia amui-au-ore-hia i te feia faaroo ore ra,” o ta Paulo ïa i faaara. “Eaha to te parau-tia auraa i te parau-tia ore? e eaha to te maramarama auraa i te pouri? E eaha to te Mesia auraa ia Behala? e eaha to te taata faaroo ra faufaa i te taata faaroo ore? E eaha to te hiero o te Atua ra atiraa ˈtu i te idolo?” E tia i te mau kerisetiano faatavaihia, na “Iehova tei tia ia ˈna te mau mea atoa ra” ratou, ia haapae roa i te haamoriraa idolo. (Korinetia 2, 6:14-18) E tia atoa i te mau melo o te feia rahi roa ia ape i te mau huru haamoriraa idolo atoa.
5. Ma te ite e e tia ia haamori ia Iehova anaˈe ra, eaha ta te mau kerisetiano mau e rave nei?
5 Te vai ra te mau peu haamoriraa idolo ite-papu-hia e vetahi mea haavarevare roa. Aita noa te haamoriraa idolo i taotiahia i nia i te haamoriraa i te mau atua e te mau ruahine haavare. O te haamoriraa ïa i te tahi mea aore ra te tahi taata ê atu ia Iehova. Ei Arii no te ao atoa nei, mea tano roa e ia titau oia e ia horoahia ˈtu te haamoriraa taatoa. (Deuteronomi 4:24) Ma te ite i te reira, te pee nei te mau kerisetiano mau i te mau faaararaa a te mau Papai e opani ra i te mau huru haamoriraa atoa. (Korinetia 1, 10:7) E hiˈopoa anaˈe na vetahi mau huru haamoriraa idolo te tia i te mau tavini a Iehova ia haapae.
Ua faahohoˈa-atea-hia te haamoriraa idolo a te amuiraa faaroo kerisetiano
6. Eaha te mau ohipa faufau ta Ezekiela i ite orama?
6 A vai tîtî ai oia i Babulonia i te matahiti 612 hou to tatou nei tau, ua ite te peropheta Ezekiela i te hoê orama o te mau mea faufau e ravehia ra e te mau ati Iuda apotata i te hiero o Iehova i Ierusalema. Ua ite o Ezekiela i te hoê ‘taipe no te pohehae.’ Te vai ra e hitu ahuru feia paari o tei pûpû i te taoˈa noanoa i roto i te hiero. Ua itehia te mau vahine i te otoraa i nia i te hoê atua haavare. E e 25 tane o te haamori ra i te mahana. Eaha te auraa o teie mau ohipa apotata?
7, 8. Eaha paha te ‘taipe no te pohehae’, e no te aha te reira i faatupu ai i te pohehae o Iehova?
7 Ua faahohoˈa-atea-hia te haamoriraa idolo a te amuiraa faaroo kerisetiano e te mau ohipa faufau ta Ezekiela i ite i roto i te orama. Ei hiˈoraa, ua parau oia e: “E inaha, i te uputa o te fata ra, i te pae i apatoerau ra, teie nei idolo faahae ra [taipe no te pohehae] i te tomoraa ra. Ua na ô maira hoi oia [te Atua ra o Iehova] ia ˈu, E te tamaiti a te taata na, te ite ra oe i ta ratou e rave nei? e te parau faufau rahi ta te utuafare ra o Iseraela e rave i teie nei vahi, ia faarue roa vau i tau vahi moˈa nei?”—Ezekiela 8:1-6.
8 Teie ‘tapao no te pohehae’ peneiaˈe o te hoê ïa pou moˈa e faahohoˈa ra i te ruahine haavare ra ta te mau ati Kanaana i faariro ei vahine na to ratou atua o Baala. Noa ˈtu râ eaha teie taipe, ua faatupu te reira i te pohehae o Iehova no te mea ua amaha te reira i te haamoriraa a Iseraela ia ˈna anaˈe iho tei riro ei ofatiraa i ta ˈna mau faaueraa: “O vau to Atua ra o Iehova . . . Eiaha roa to oe ei Atua ê atu, ia ˈu nei. Eiaha roa oe e hamani i te idolo tarai no oe, e te hohoˈa no te hoê mea i nia i te raˈi ra, e no te hoê mea i raro i te fenua nei, e no te hoê mea o te moana i raro aˈe i te fenua ra: eiaha roa oe e piˈo i raro ia ratou, eiaha hoi e tavini ia ratou; e Atua tahoo hoi au o te Atua no oe nei o Iehova.”—Exodo 20:2-5.
9. Mea nafea te amuiraa faaroo kerisetiano i te faatupuraa i te pohehae o te Atua?
9 Ua riro te haamoriraa i te taipe no te pohehae i roto i te hiero o te Atua, ei ohipa faufau roa ˈˈe tei ravehia e te mau ati Iseraela apotata. Oia atoa, ua viivii roa te mau fare pure a te amuiraa faaroo kerisetiano i te mau taipe e te mau hohoˈa haavahavaha i te Atua o te faaamahamaha nei i te haamoriraa otahi roa o ta ratou e faahua faatae ra i te Atua o ta ratou e haamori nei. E tupu atoa te pohehae o te Atua no te mea te patoi ra te mau upoo faatere haapaoraa i to ˈna Basileia mai te tiaturiraa hoê roa o te huitaata nei e te faaidolo nei ratou i te mau Nunaa Amui—“te mea riaria . . . i te tiaraa i te vahi moˈa ra,” i te vahi eita e tia ia ˈna ia parahi.—Mataio 24:15, 16; Mareko 13:14.
10. Eaha ta Ezekiela i ite i roto i te hiero, e eaha te faaauraa e vai ra e te mea e itehia ra i roto i te amuiraa faaroo kerisetiano?
10 I to ˈna tomoraa ˈtu i roto i te hiero, teie ta Ezekiela e faatia ra: “E inaha, te mau mea rii faufau atoa e nee haere ra, e te mau manu faufau ra, e te mau idolo atoa o te utuafare o Iseraela, i te otiotiraahia i nia i te patu e ati noa ˈˈe. Ua tia noa maira na taata e hitu ahuru o te feia paari o te utuafare o Iseraela; . . . e vairaa auahi anaˈe tei te rima o taua mau taata atoa ra, pee atura te ata rahi mea noˈanoˈa meumeu ra i nia.” A feruri na! Te feia paari no Iseraela i roto i te hiero o Iehova, e pûpû ra i te taoˈa noˈanoˈa na te mau atua haavare, tei faahohoˈahia e te mau nanaˈoraa hairiiri i nia i te mau pǎpai. (Ezekiela 8:10-12) Oia atoa, te faaohipahia nei te mau manu e te mau animala oviri ei faataiperaa i te mau fenua a te amuiraa faaroo kerisetiano, ta te taata hoi e faahanahana nei. Hau atu, e rave rahi mau upoo faatere haapaoraa tei harahia na roto i to ratou aratai-hape-raa i te huiraatira i to ratou tururaa i te tatararaa hape e ua fa mai te taata na roto mai i te mau animala, maoti hoi i te turu i te faatiaraa parau mau a te Bibilia no nia i to te Atua ra o Iehova poieteraa i te mau mea.—Ohipa 17:24-28.
11. No te aha te mau vahine Iseraela apotata i oto ai i nia ia Tamuza?
11 I te tomoraa o te fare o Iehova, ua ite atu o Ezekiela i te mau vahine Iseraela apotata i te otoraa i nia ia Tamuza. (Ezekiela 8:13, 14) Ua faariro to Babulonia e to Suria ia Tamuza ei atua no te mau raau o te tupu mai i te tau ûa e o te pohe i te tau mǎrô. Ua faahohoˈa te poheraa o te raau i te poheraa o Tamuza, o te faaarahia i te mau matahiti atoa e te feia e haamori ia ˈna i te tau o te veavea rahi. Maoti te fa-faahou-raa mai o te raau tupu i te tau ûa, e parauhia na e te hoˈi maira o Tamuza mai te ao o te feia pohe ra. Ua faahohoˈahia oia e te reta matamua o to ˈna iˈoa, te reta tau tahito mai te hoê satauro to ˈna hohoˈa. Te faahaamanaˈo maira hoi te reira i te paieti faaidolo a te amuiraa faaroo kerisetiano no te satauro.
12. Ua ite Ezekiela i na ati Iseraela apotata e 25 i te raveraa i te aha, e eaha te ohipa hoê â huru e tupu nei i roto i te amuiraa faaroo kerisetiano?
12 I roto i te aua no roto o te hiero, ua ite atura o Ezekiela i muri iho e 25 ati Iseraela apotata e haamori ra i te mahana—e ofatiraa hoi te reira i te faaueraa a Iehova e opani ra i teie huru haamoriraa idolo. (Deuteronomi 4:15-19) Ua tuu atoa teie feia haamori idolo i te hoê amaa raau faufau, peneiaˈe o te faahohoˈa ra i te melo taatiraa o te tane, i mua i te ihu o te Atua. Eita e maerehia i te mea e eita te Atua e pahono i ta ratou mau pure, mai te amuiraa faaroo kerisetiano o te imi i ta ˈna tauturu i te “ati rahi,” aita râ e faufaa. (Mataio 24:21) Mai taua mau ati Iseraela apotata ra i haamori na i te mahana o te horoa mai i te maramarama ma te huri atu i to ratou tua i nia i te hiero o Iehova, te huri atoa nei te amuiraa faaroo kerisetiano i to ˈna tua i nia i te maramarama a te Atua, te haapii nei oia i te mau haapiiraa hape, te faaidolo nei oia i te paari o teie nei ao, e te tapo nei oia i to ˈna mata i mua i te peu taiata.—Ezekiela 8:15-18.
13. Mea nafea to te mau Ite no Iehova aperaa i te mau huru haamoriraa idolo i itehia i roto i te orama a Ezekiela?
13 Te ape nei te mau Ite no Iehova i te mau huru haamoriraa e ravehia nei i roto i te amuiraa faaroo kerisetiano, oia hoi te Ierusalema no teie nei tau, mai tei ite-atea-hia e Ezekiela. Eita tatou e faaidolo i te mau taipe e haavahavaha nei i te Atua. Noa ˈtu e te faatura nei tatou i te “feia mana toroa” a te hau, ua taotiahia to tatou auraroraa ia ratou. (Roma 13:1-7; Mareko 12:17; Ohipa 5:29) Te faatae atu nei tatou i to tatou paieti hohonu i te Atua e to ˈna ra Basileia. Eita tatou e mono i te tiaturiraa i te Atua e ta ˈna poieteraa e te tatararaa e ua tupu noa mai te mau mea. (Apokalupo 4:11) Eita roa tatou e haamori i te satauro aore ra e faaidolo i te ite taata nei, te haapiiraa philosopho, aore ra te tahi atu huru paari o teie nei ao. (Timoteo 1, 6:20, 21) Te ara atoa nei tatou i te tahi atu mau huru haamoriraa idolo. Eaha vetahi?
Te tahi atu mau huru haamoriraa idolo
14. Eaha te tiaraa ta te mau tavini a Iehova e rave i mua i te ‘puaa taehae’ o te Apokalupo 13:1?
14 Eita te mau kerisetiano e apiti atu e te huitaata nei i te faaidoloraa i te hoê ‘puaa taehae’ taipe. Te na ô ra te aposetolo Ioane e: “E hiˈo atura vau i te hoê puaa i te aˈeraa ˈˈe i nia mai mai raro mai i te moana ra, e hitu o ˈna afii, auahuru hoi tara; auahuru hoi korona i nia iho i taua mau tara no ˈna ra . . . E o to te ao atoa nei tei haamori ia ˈna.” (Apokalupo 13:1, 8) E nehenehe te mau puaa e faataipe i te mau “arii,” oia hoi te mau mana politita. (Daniela 7:17; 8:3-8, 20-25) No reira, te faahohoˈa ra na afii e hitu o te puaa taehae taipe i te mau nunaa puai o te ao nei—Aiphiti, Asura, Babulonia, Medai-Peresia, Heleni, Roma, e te puai amui Beretane-Marite oia hoi te hau Beretane e te mau Hau amui no Marite. Te faaite nei te mau upoo faatere a te amuiraa faaroo kerisetiano i te faatura ore rahi no te Atua e te Mesia na roto i te turairaa i te huitaata ia faaidolo i te faanahoraa politita a Satani, “te arii o teie nei ao.” (Ioane 12:31) Teie râ, ei mau kerisetiano tiaraa amui ore e ei feia turu i te Basileia, te patoi nei te mau tavini a Iehova i teie huru haamoriraa.—Iakobo 1:27.
15. Nafea te nunaa o Iehova ia faariro i te feia tuiroo o teie nei ao, e eaha ta te hoê Ite i parau no nia i teie tuhaa?
15 Eita atoa te nunaa o te Atua e faaidolo i te feia tuiroo o teie nei ao i te pae no te faaanaanataeraa manaˈo e te ohipa taaro. I muri aˈe i to ˈna riroraa mai ei Ite no Iehova, ua parau te hoê taata hauti upaupa e: “E nehenehe te upaupa tei hautihia ei faaanaanataeraa manaˈo aore ra ei oriraa, e faatupu i te mau hinaaro tia ore . . . E faahiti te taata himene i te mau parau no nia i te oaoa e te poihere o te aratai i te feia faaroo ia manaˈo e te erehia ra te reira e to ratou hoa faaipoipo. Mea pinepine te taata himene i te faahohoˈahia e te mea o ta ˈna e himene ra. No reira vetahi feia no te pae himene o ta ˈu i matau e au-rahi-hia ˈi e te mau vahine. Ia hema anaˈe te hoê taata i roto i teie ao o te moemoeâ, e riro oia i te faaidolo roa i te taata himene. E nehenehe te reira e haamata ma te ino ore na roto i to ˈna aniraa ˈtu i te tahi tarimaraa ei haamanaˈoraa. Teie râ, te faariro nei vetahi i te taata himene ei hiˈoraa no ratou, e na roto i te haafaahiahia-rahi-raa ia ˈna, te faariro nei ratou ia ˈna ei idolo. E nehenehe ratou e tapiri i te hohoˈa o teie taata tuiroo i nia i te pǎpai e e haamata i te omono i te ahu e i te faanehenehe ia ratou mai ia ˈna atoa. E tia i te mau kerisetiano ia haamanaˈo tamau e o te Atua anaˈe te tia ia haamorihia.”
16. Eaha te mea e faaite ra e te patoi ra te mau melahi parau-tia i te haamoriraa idolo?
16 Oia mau, o te Atua anaˈe te tia ia haamorihia. I to Ioane ‘tipaparaa i raro i te pae avae o te melahi [o tei faaite mai i te mau ohipa maere] no te haamori ia ˈna,’ aita teie taata varua i farii e ia faaidolohia oia, ua na ô aturâ oia e: “[A haapao maitai!] Eiaha roa, e taetaeae tavini hoi au no oe, e no to mau taeae i te mau peropheta ra, e no te feia i haapao i te parau i roto i teie nei buka; o te Atua te haamori.” (Apokalupo 22:8, 9) E turai te mǎtaˈu ia Iehova, oia hoi te faatura-hohonu-raa ia ˈna, ia tatou ia haamori ia ˈna anaˈe ra. (Apokalupo 14:7) E paruru ïa te paieti mau ia tatou i te haamoriraa idolo.—Timoteo 1, 4:8.
17. Nafea tatou e nehenehe ai e ara i te peu viivii i te pae taatiraa o tei riro ei haamoriraa?
17 Ua riro te peu viivii i te pae taatiraa ei huru haamoriraa ê atu ta te mau tavini a Iehova e haapae nei. Ua ite ratou e “aore o te faaturi, e te taata faufau ra, aore o te nounou taoˈa, e haamori idolo ïa, aore anaˈe ïa e aiˈa i te basileia o te Mesia ra, e no te Atua.” (Ephesia 5:5) E haamoriraa idolo atoa te reira no te mea e riro te hiaairaa i te navenave tia ore ei taoˈa haamorihia. E faaino te mau hinaaro tia ore i te pae taatiraa i te mau huru paieti. Na roto i te fariuraa i to ˈna mata e to ˈna tariˈa i nia i te peu faufau, e tuu te hoê taata i to ˈna mau taairaa e te Atua moˈa ra o Iehova i roto i te hoê huru tupuraa atâta. (Isaia 6:3) No te ara i teie huru haamoriraa idolo, e tia ïa i te mau tavini a te Atua ia haapae i te mau hohoˈa faufau e te upaupa hairiiri. E tia ia ratou ia tapea maite i te mau faufaa paari i te pae varua niuhia i nia i te mau Papai, e e tia ia ratou ia tapea maite atoa i ‘te huru taata apî o tei hamanihia ia au i te hinaaro o te Atua, i te parau-tia e te taiva ore mau ra.’—Ephesia 4:22-24.
A ape i te nounou e te faahinaaroraa
18, 19. (a) Eaha te nounou e te faahinaaroraa? (b) Nafea tatou e nehenehe ai e ara i te nounou e te faahinaaroraa tei riro ei haamoriraa?
18 Te ara atoa nei te mau kerisetiano i te nounou e te faahinaaroraa, o tei taaihia i te mau huru haamoriraa idolo. Te nounou, o te hoê hiaai rahi roa aore ra taehae, e te faahinaaroraa, o te nounou ïa i te hoê mea e fatuhia ra e te hoê taata. Ua faaara Iesu no nia i te faahinaaroraa e ua faahiti oia i te parau no te hoê taata moni faahinaaro o tei ore i fanaˈo i ta ˈna mau faufaa i to ˈna poheraa e o tei fifihia no te mea “aita i rahi ta ˈna taoˈa i te Atua ra.” (Luka 12:15-21) Ua aˈo o Paulo ma te tano roa i to ˈna mau hoa faaroo: “Uumi iho i to outou mau melo i te mau mea o teie nei ao, mai . . . te nounou taoˈa, e haamori idolo ïa.”—Kolosa 3:5.
19 Te faariro nei te feia o te umehia to ratou feruriraa i te hinaaroraa i te moni, i te amu-hua-raa i te maa e te inu-hua-raa, aore ra i te nounou i te mana, i teie mau hiaai ei idolo na ratou. Mai ta Paulo i faaite, ua riro te hoê taata nounou ei haamori idolo, e eita oia e noaa i te Basileia o te Atua. (Korinetia 1, 6:9, 10; Ephesia 5:5) No reira, e nehenehe te feia bapetizohia o te rave nei i te haamoriraa idolo ei feia nounou taoˈa e tiavaruhia i te amuiraa kerisetiano. Na roto i te faaohiparaa i te mau Papai e te pureraa ma te aau mehara, e nehenehe tatou e haapae i te nounou taoˈa. Te na ô ra te Maseli 30:7-9 e: “E piti a ˈu mea hinaaro ia oe, e te Atua [o Iehova] e! te ora nei au ra eiaha oe e tapea i te reira ia ˈu. E faataa ê atu oe i te parau faufaa ore e te haavare ia ˈu nei; eiaha e tuuhia mai te veve e te taoˈa rahi ia ˈu nei; e faaamu mai oe ia ˈu i te maa e au ia ˈu ra; o te î noa hoi au e ua huna ihora vau ia oe, o te parau hoi au e, O vai Iehova? e o te veve hoi au e ua eiâ ihora vau, e ua apiti noa ˈtu vau i te iˈoa o tau Atua i te parau haavare ra.” E nehenehe teie huru feruriraa e tauturu ia tatou ia ara i te nounou e te faahinaaro tei riro ei haamoriraa idolo.
A ara i te haamoriraa ia ˈna iho
20, 21. Nafea te nunaa o Iehova ia ara i te haamoriraa ia ratou iho?
20 E ara atoa te nunaa o Iehova i te haamoriraa ia ˈna iho. I roto i teie nei ao, mea matauhia ia faaidolo ia ˈna iho e i to ˈna iho hinaaro. Te turai nei te hinaaro i te roo e te hanahana i te mau taata e rave rahi ia ohipa ma te tia ore. Te hinaaro nei ratou e rave i to ratou iho hinaaro eiaha râ i to te Atua ra hinaaro. Eita râ tatou e nehenehe e faatupu i te mau taairaa e te Atua mai te peu e e topa tatou i roto i te haamoriraa ia tatou iho na roto i te imiraa i te pee i to tatou iho hinaaro, e te tamataraa i te faahepo atu ia vetahi ê. (Maseli 3:32; Mataio 20:20-28; Petero 1, 5:2, 3) Ei mau pǐpǐ na Iesu, ua haapae tatou i te mau mea rave-tapuni-hia o teie nei ao.—Korinetia 2, 4:1, 2.
21 Maoti i te imi i te roo, te auraro nei te nunaa o te Atua i teie faaueraa a Paulo: “E teie nei, te amu ra e te inu ra hoi, e te mau mea atoa ta outou e rave na, e rave ïa ma te haamaitai i te Atua.” (Korinetia 1, 10:31) I te mea e e tavini tatou na Iehova, eita tatou e faahepo i to tatou iho hinaaro mai te mea e te faaidolo ra tatou ia tatou iho, teie râ e rave tatou ma te oaoa i te hinaaro o te Atua, i te fariiraa i te aratairaa a “te tavini haapao maitai e te paari” e te tahoêraa ˈtu e te faanahonahoraa a Iehova.—Mataio 24:45-47.
A vai ara noa!
22, 23. Nafea tatou ia ara i te mau huru haamoriraa atoa?
22 Ei mau tavini na Iehova, eita tatou e tipapa i mua i te mau idolo materia. E ara atoa tatou i te mau huru haavarevare o te peu haamori idolo. Inaha, e tia ia tatou ia tamau noa i te ape i te mau huru haamoriraa atoa. E tia ïa ia tatou ia auraro i te aˈoraa a Ioane: “E ara ia outou i te mau idolo ra.”—Ioane 1, 5:21.
23 Mai te peu e e tavini outou na Iehova, a tamau noa i te haamataro i to outou haava manaˈo e to outou feruriraa tei haapiihia e te Bibilia. (Hebera 5:14) Eita ïa outou e haaviiviihia e te feruriraa haamori idolo o teie nei ao teie râ e riro tatou mai na ati Hebera haapao maitai e toru e te mau kerisetiano taiva ore matamua. E horoa ˈtu outou na Iehova i te haamoriraa otahi roa, e e tauturu oia ia outou ia vai ara noa i te mau huru haamoriraa idolo atoa.
Eaha to outou manaˈo?
◻ Nafea te mau Ite no Iehova ia ape i te mau huru haamoriraa idolo atoa i itehia i roto i te orama a Ezekiela?
◻ Eaha te ‘puaa taehae’ a te Apokalupo 13:1, e eaha te tiaraa ta te mau tavini a Iehova e rave nei i mua ia ˈna?
◻ No te aha tatou e ara ˈi i te faaidoloraa i te feia tuiroo i te pae no te faaanaanataeraa manaˈo e te ohipa taaro?
◻ Nafea tatou ia ara i te haamoriraa ia tatou iho?
◻ No te aha tatou e tamau noa ˈi i te ara i te mau huru haamoriraa atoa?
[Hohoˈa i te api 26]
Ua ite anei outou nafea te mau ohipa faufau i itehia i roto i te orama a Ezekiela i te faahohoˈaraa i te haamoriraa idolo a te amuiraa faaroo kerisetiano?
[Faaiteraa i te tumu]
Hohoˈa (pae aui i nia) ia au i te hohoˈa a Ralph Crane/Bardo Museum