Ua riro anei outou mai ia ratou ra?

‘MEA au aˈe ia riro ei liona i te hoê mahana maoti hoi i te hoê mamoe i te hoê hanere matahiti.’ Te parauhia ra e na Benito Mussolini teie mau parau, e faatere haavî tahito oia no Italia.

Mai ia Mussolini, e rave rahi mau taata o te ore e farii e ia faarirohia ratou ei arenio e ei mamoe. Teie râ, ua faaite te arii papai salamo no Iseraela tahito ra o Davida e: “O Iehova to ˈu tiai, . . . te aratai nei oia ia ˈu na pihaiiho i te pape atatia ra.” (Salamo 23:1, 2) Oia mau, o te Atua ra o Iehova te Tiai mamoe Rahi, na ˈna e aupuru ra i to ˈna nunaa mai te mea ra e e mamoe mǎrû ratou.

Te faataipehia ra te nunaa o te Atua mai te mau mamoe i roto i te Salamo 95:7, te taio nei tatou e: “[O Iehova] hoi to tatou Atua, o tatou hoi te [mau taata] no ta ˈna ra aua; te mau mamoe i arataihia e tana rima.” Ua manaˈo paha vetahi e e tia i te papai salamo ia parau e “te mau mamoe no ta ˈna ra aua” e “te [mau taata] i arataihia e tana rima.” Teie râ, ua tauihia te mau parau i ǒ nei, e te faarirohia ra te nunaa o Iehova ei mau mamoe. Te fanaˈo nei ratou i te mau haamaitairaa o te aua o te Atua e te arataihia ra ratou e to ˈna rima here.

O Iesu Mesia, te Tamaiti a Iehova te Tiai mamoe maitai. Mea pinepine oia i te faahiti i to ˈna nunaa mai te mau mamoe. Ei hiˈoraa, ua faahiti Iesu i te parau no te “nǎnǎ iti” e ta ˈna mau “mamoe ê atu.” (Luka 12:32; Ioane 10:14-16) No nia i ta ˈna mau pǐpǐ haehaa e au i te mamoe ra, ua parau o Iesu e: “E faaroo mai ta ˈu ra mamoe i to ˈu reo, o ta ˈu i parau atu ia outou ra, ua ite au ia ratou, e e pee mai ratou ia ˈu. E e horoa ˈtu â hoi au i te ora mure ore no ratou; e ore roa ratou e pohe, e e ore roa hoi ratou i roto i tau rima nei e riro i te haru ia vetahi ê.” (Ioane 10:27, 28) I roto i te rima o te arii hamani maitai, e fanaˈo te feia auraro i to ˈna mana, to ˈna farii maitai, to ˈna aratairaa, e ta ˈna parururaa.—Apokalupo 1:16, 20; 2:1.

Eita hoê taata e nehenehe e haru i te feia e au i te mamoe mai raro aˈe mai i te rima paruru o Iesu. I teie mahana, te faataa ê nei oia i te mau taata, te mau “puaaniho” e erehia ra i to ˈna farii maitai i te hoê pae, e i te tahi pae, te mau “mamoe” o te fanaˈo i te ora mure ore i raro aˈe i te faatereraa a te Basileia o te Atua i nia i te raˈi. (Mataio 25:31-46) E riro anei outou ei mamoe tei haamaitaihia ra?

[Faaiteraa i te fatu o te hohoˈa i te api 32]

Garo Nalbandian