Te mau tatararaa bibilia Afirika

Ua ravehia te mau huriraa matamua o te Bibilia taatoa na roto i te hoê reo Afirika i Aiphiti. Matauhia mai te mau huriraa Copte, te manaˈohia ra e no ǒ mai ratou i te senekele toru aore ra te maha o to tatou nei tau. Tau toru senekele i muri iho, ua hurihia ˈtura te Bibilia na roto i te reo Etiopia.

Ua tiai te mau hanere rahiraa reo papai-ore-hia e paraparauhia na i te pae apatoa no Etiopia e i Sahara i te taeraa mai o te mau mitionare i te senekele 19 ra. I te matahiti 1857, ua naeahia te hoê tapao faufaa roa i to Robert Moffat faahoperaa i te hoê tatararaa o te Bibilia na roto i te reo Tswana, te hoê reo no Afirika i te pae apatoa. Ua nenei atoa oia i te mau vaehaa o teie tatararaa e te hoê matini neneiraa e te rima. Tera te Bibilia taatoa matamua i neneihia i Afirika e te reira atoa te huriraa matamua taatoa na roto i te hoê reo Afirika tei ore i papaihia na mua ˈˈe. Vahi anaanatae, ua faaohipa o Moffat i te iˈoa o te Atua o Yehova i roto i ta ˈna tatararaa. I roto i te tatararaa o te matahiti 1872, tei piahia e te Taiete Bibilia no Beretane e no te Vahi ěê, te faaohipahia ra te iˈoa Yehova i roto i te mau faahitiraa faufaa rahi a Iesu i roto i te Mataio 4:10 e te Mareko 12:29, 30.

I te matahiti 1990, ua hurihia te Bibilia taatoa na roto e 119 reo no Afirika, e vetahi mau vaehaa na roto i te tahi atu e 434 reo.