O te faaipoiporaa anei te ravea hoê roa e noaa mai ai te oaoa?
“Ua matara oia ia faaipoipo i ta ˈna i hinaaro ra: ia au râ i te Fatu. E maitai rahi râ to ˈna . . . ia parahi noa oia.”—KORINETIA 1, 7:39, 40.
1. Mea nafea te mau Papai ia faataa ia Iehova, e eaha ta ˈna i rave no te mau mea o ta ˈna i poiete?
O IEHOVA ‘te Atua oaoa.’ (Timoteo 1, 1:11) Ei Atua horoa noa i “te mau mea maitatai . . . e te mau mea tia roa,” ua pûpû oia na to ˈna mau mea poietehia maramarama atoa—te mau taata e te mau varua—i te mea o ta ratou e titau mau ra ia oaoa ratou i roto i ta ˈna taviniraa. (Iakobo 1:17) No reira, ua riro te hoê manu e himene ra, te hoê urî fanauˈa e faatihaehae ra, aore ra te hoê ouˈa e hahauti ra, ei mau tapao haapapuraa e ua poiete Iehova i te mau animala no te fanaˈo i te oraraa i roto i te vahi i faataahia no ratou. Ua tae roa te papai salamo i te faahiti i roto i te tahi pehe e “te mau raau a Iehova ra, ua [mauruuru] ïa; te mau arezi i Lebanona ra, ta ˈna i tanu ra.—Salamo 104:16.
2. (a) Na te aha e faaite ra e ua oaoa Iesu i te raveraa i te hinaaro o to ˈna Metua? (b) Eaha te mau tumu no te oaoa e vai na i te mau pǐpǐ a Iesu?
2 O Iesu Mesia ‘te hohoˈa mau o te huru iho o te Atua.’ (Hebera 1:3) Eita ïa e maerehia i te mea e e piihia o Iesu “tei Maitai e tei ia ˈna anaˈe te Mana ra.” (Timoteo 1, 6:15) Ua horoa mai oia i te hoê hiˈoraa faahiahia e haapapu ra e e nehenehe te raveraa i te hinaaro o Iehova e riro ei ohipa hau aˈe i te anaanatae i te maa, o te faatupu i te oaoa rahi. Te faaite atoa maira o Iesu e e nehenehe tatou e faufaahia ia ohipa tatou ma te mǎtaˈu i te Atua, oia hoi, ma te faatura hohonu e te mǎtaˈu tia i te faaroo ore Ia ˈna. (Salamo 40:8; Isaia 11:3; Ioane 4:34) I to te mau pǐpǐ e 70 hoˈiraa ˈtu “ma te oaoa” i muri aˈe i te hoê tere pororaa i te Basileia, ‘oaoa roa ˈtura o Iesu iho i te varua moˈa.’ I muri aˈe i to ˈna faaiteraa i to ˈna oaoa i to ˈna Metua na roto i te pure, ua fariu ihora oia i nia i te mau pǐpǐ, na ô atura: “E ao to te mata i hiˈo i te mau mea ta outou e hiˈo nei: e faaite atu hoi au ia outou, e rave rahi te peropheta e te hui arii i hinaaro i te hiˈo i te mau mea ta outou e hiˈo nei, e aore aˈenei i hiˈo; e i hinaaro hoi i te faaroo i te mau parau ta outou e faaroo nei, e aore aˈenei i faaroo.”—Luka 10:17-24.
Te mau tumu no te oaoa
3. Eaha vetahi mau tumu no te oaoa?
3 Eita anei to tatou mata e oaoa i te hiˈoraa ˈtu i te mau mea e faatupu ra i te Parau a Iehova e ta ˈna mau opuaraa i teie nei tau hopea? Eita anei tatou e oaoa rahi i te taaraa i te auraa o te mau parau tohu ta te mau peropheta e te mau arii haapao maitai mai ia Isaia, Daniela, e o Davida i ore i taa? Aita anei tatou e oaoa ra i te tavini i te Atua oaoa ra o Iehova, i raro aˈe i te faatereraa a to tatou Arii Mana ra o Iesu Mesia? Papu maitai!
4, 5. (a) No te oaoa noa i roto i te taviniraa a Iehova, eaha te tia ia tatou ia haapae? (b) Eaha vetahi mau mea o te faatupu i te oaoa, e eaha ïa te uiraa e uihia?
4 Mai te peu e te hinaaro ra tatou e vai oaoa noa i roto i te taviniraa a te Atua, eiaha tatou e niu i to tatou titauraa i te oaoa i nia i te mau manaˈo o teie nei ao. E nehenehe hoi teie mau manaˈo e haapoiri ohie noa i to tatou feruriraa no te mea te haafaufaahia ra te mau taoˈa materia, te hoê huru oraraa faaiteite, e te tahi atu â. Mea poto roa te “oaoa” i niuhia i nia i teie mau ohipa, no te mea te mou nei teie nei ao.—Ioane 1, 2:15-17.
5 Te taa ra i te rahiraa o te mau tavini pûpûhia a Iehova e eita te tapaparaa i te mau tapao a teie nei ao e hopoi mai i te oaoa mau. Na to tatou Metua i te raˈi anaˈe e horoa mai i te mau mea i te pae varua e i te pae materia o te faatupu i te oaoaraa mau o ta ˈna mau tavini. E mauruuru rahi to tatou no te maa pae varua o ta ˈna e horoa maira na roto i “te tavini haapao maitai e te paari”! (Mataio 24:45-47) Te mauruuru atoa nei tatou no te maa i te pae tino e te tahi atu mau taoˈa materia ta tatou e fanaˈo nei na roto i te rima here o te Atua. Te vai atoa ra te ô faahiahia o te faaipoiporaa e te mau oaoa i taaihia i te utuafare fetii. Eita e maerehia ia faaite o Naomi i to ˈna hinaaro putapû no ta ˈna mau hunoa vahine ivi na roto i teie mau parau: “E ia horoa mai hoi Iehova i te maitai no orua, i te utuafare o ta orua ra pue tane.” (Ruta 1:9) No reira, ua riro te faaipoiporaa ei taviri no te tatara i te opani e noaa mai ai te oaoa rahi. O te faaipoiporaa noa râ anei te taviri hoê roa e noaa mai ai te oraraa oaoa? E tia iho â râ i te mau taurearea ia feruri maitai i teie uiraa.
6. Ia au i te Genese, eaha te tapao matamua o te faaipoiporaa?
6 Ma te faatia i te faaipoiporaa matamua, te na ô ra te Bibilia e: “Hamani ihora hoi te Atua i te taata ma to ˈna ihora huru, i hamani oia ia ˈna ma te hohoˈa o te Atua ra; i hamani oia ia raua, o te tane e te vahine. Ua haamaitai ihora te Atua ia raua, na ô maira te Atua, Ia fanau orua e ia rahi roa, e faaî i te fenua nei, e e haavi iho.” (Genese 1:27, 28) I to Iehova haamauraa i te faaipoiporaa, ua faaohipahia o Adamu no te fanau i te tamarii, ia rahi te fetii taata nei. E ere râ te reira anaˈe te titauhia ra i roto i te faaipoiporaa.
‘I roto anaˈe i te Fatu’
7. Eaha te titauraa no te faaipoiporaa ta te hoê patereareha haapao maitai i tutava i te faatupu?
7 I te mea e o te Atua ra o Iehova te Tumu o te faaipoiporaa, na ˈna iho â ïa e haamau i te mau ture no nia i teie taairaa ia oaoa ta ˈna mau tavini. I te tau o te mau patereareha ra, ua taotia-etaeta-hia ia faaipoipo e te feia e ere i te feia haamori ia Iehova. Ua faatǎpǔ o Aberahama i ta ˈna tavini o Eliezera i mua ia Iehova e eita o ˈna e rave i te hoê vahine na te tamaiti a te patereareha o Isaaka i rotopu i te mau tamahine a te ati Kanaana. Ua rave o Eliezera i te hoê tere roa e ua pee maite oia i te mau faaueraa a Aberahama ia itea mai ia ˈna i ‘te vahine i haapaohia e Iehova na te tamaiti a to ˈna fatu.’ (Genese 24:3, 44) Ua faaipoipo atura o Isaaka ia Rebeka. I to Esau, ta raua tamaiti, maitiraa i te mau vahine no roto i te mau ati Heta etene ra, ua riro maira teie mau vahine “ei faatupu i te ino ia Isaaka raua o Rebeka.”—Genese 26:34, 35; 27:46; 28:1, 8.
8. Eaha te opaniraa ta te faufaa a te Ture i tuu i nia i te faaipoiporaa, e no te aha?
8 I raro aˈe i te faufaa a te Ture, ua opanihia ia faaipoipo atu i te hoê tane aore ra te hoê vahine no roto i te mau nunaa Kanaana taa maitai. Ua faaue atu Iehova i to ˈna nunaa: “Eiaha oe e faaipoipo ia ratou; eiaha oe e horoa i to tamahine i ta ˈna ra tamaiti, eiaha hoi oe e rave i ta ˈna ra tamahine na ta oe ra tamaiti. E riro hoi ratou i te faafariu ê i to mau tamarii ia ore ia pee mai ia ˈu, ia haamori i te mau atua ěê ra, tupu ihora te riri o Iehova ia outou, pohe ihora oe i reira ra.”—Deuteronomi 7:3, 4.
9. Eaha te aˈoraa no nia i te faaipoiporaa ta te Bibilia e horoa ra i te mau kerisetiano?
9 Eita e maerehia i te mea e e tano atoa te mau opaniraa no nia i te faaipoiporaa i te feia aore e tavini ra ia Iehova, i roto i te amuiraa kerisetiano. Ua aˈo te aposetolo Paulo i te mau kerisetiano: “Eiaha outou ia amui-au-ore-hia i te feia faaroo ore ra: eaha to te parau-tia auraa i te parau-tia ore? e eaha to te maramarama auraa i te pouri? E eaha to te Mesia auraa ia Behala? e eaha to te taata faaroo ra faufaa i te taata faaroo ore?” (Korinetia 2, 6:14, 15) E tano teie aˈoraa i roto e rave rahi mau huru tupuraa, e e tano atoa ïa i nia i te faaipoiporaa. Te faaueraa papu maitai a Paulo i te mau tavini pûpûhia atoa a Iehova oia hoi e tia ia ratou ia opua e faaipoipo i te hoê taata ‘i roto anaˈe i te Fatu.’—Korinetia 1, 7:39, nota i raro i te api.
Ia ore anaˈe e nehenehe e faaipoipo ‘i roto i te Fatu’
10. Eaha ta te mau kerisetiano faaipoipo-ore-hia e rave rahi e rave ra, e eaha te uiraa e uihia?
10 E rave rahi mau kerisetiano faaipoipo-ore-hia o tei maiti i te pee i te hiˈoraa o Iesu Mesia na roto i te faaea-taa-noa-raa. I reirâ, no te mea eita ta ratou e nehenehe e ite mai i teie taime i te hoê hoa o te mǎtaˈu ra i te Atua no te faaipoipo ‘i roto i te Fatu,’ e rave rahi mau kerisetiano taiva ore o tei tuu i to ratou tiaturi i roto ia Iehova e o tei faaea taa noa maoti i te faaipoipo atu i te hoê taata e ere oia to roto i te parau mau. Te faatupu ra te varua o te Atua i roto ia ratou i te mau hotu mai te oaoa, te hau, te faaroo, e te hitahita ore, ia nehenehe ratou e faaea taa noa ma te tura. (Galatia 5:22, 23) I rotopu i te feia o te faaoromai nei i teie tamataraa i to ratou paieti i te Atua ma te manuïa, te vai ra e rave rahi o to tatou mau tuahine kerisetiano, e e tia ia tatou ia faatura rahi ia ratou. I roto i te mau fenua huru rau, mea rahi aˈe ratou i te mau taeae e no reira, e tuhaa rahi ta ratou e rave ra i roto i te ohipa pororaa. Oia mau, ‘ua tuu mai Iehova i te parau, e e nuu rahi te mau vahine e faaite ra i te parau apî maitai.’ (Salamo 68:11) Inaha, e rave rahi mau tavini faaipoipo-ore-hia a te Atua, te tane e te vahine, o te tapea ra i to ratou haapao maitai no te mea ‘te tiaturi nei ratou ia Iehova ma to ratou mafatu atoa ra, e na ˈna e faaite ra i to ratou mau haerea.’ (Maseli 3:5, 6) Teie râ, te feia eita ta ratou e nehenehe e faaipoipo i teie nei ‘i roto i te Fatu,’ eita anei ïa ratou e oaoa?
11. Eaha ta te mau kerisetiano o te faaea taa noa ra no te faatura i te mau faaueraa a te Bibilia, e nehenehe e tiaturi?
11 E tia ia tatou ia haamanaˈo e ua riro tatou ei mau Ite no te Atua oaoa, o Iehova, e te tavini nei tatou i raro aˈe i te Arii Mana rahi oaoa, o Iesu Mesia. Mai te peu e na roto i to tatou faaturaraa i te mau opaniraa e faataa-papu-hia ra i roto i te Bibilia, e faaea taa noa tatou no te mea eita e itehia mai te tahi hoa faaipoipo ‘i roto i te Fatu,’ mea tano anei ia manaˈo e e vaiiho noa mai te Atua e te Mesia ia tatou ma te oaoa ore? Eita ïa. No reira, e tia ia tatou ia faaoti e e nehenehe tatou e oaoa ei kerisetiano noa ˈtu e aita tatou i faaipoipohia. E nehenehe Iehova e horoa mai i te oaoa noa ˈtu e ua faaipoipohia tatou aore ra te faaea taa noa ra tatou.
Te taviri e noaa mai ai te oaoa mau
12. Eaha ta te hiˈoraa o te mau melahi faaroo ore e faaite ra no nia i te faaipoiporaa?
12 E ere te faaipoiporaa i te taviri hoê roa e oaoa ai te mau tavini atoa a te Atua. A rave na i te hiˈoraa o te mau melahi. Na mua ˈˈe i te Diluvi, ua faatupu vetahi mau melahi i te mau hinaaro aore e tia i te natura o te mau taata varua, aita ratou i mauruuru faahou i te mea e eita ratou e nehenehe e faaipoipo, e ua rave maira ratou i te mau tino taata no te faaipoipo i te vahine. No te mea e ua “faarue ihora” teie mau melahi “i to ratou parahiraa,” ua ‘tapea te Atua ia ratou i te fifi matara ore i raro aˈe i te pouri, e tae noa ˈtu i te haavaraa i te mahana rahi ra.’ (Iuda 6; Genese 6:1, 2) Mea papu maitai e aita te Atua i opua e ia faaipoipo te mau melahi. E ere ïa na roto i te faaipoiporaa ratou e oaoa ˈi.
13. No te aha te mau melahi moˈa e oaoa ˈi, e eaha ta te reira e faaite ra no te mau tavini atoa a te Atua?
13 Noa ˈturâ, te oaoa nei te mau melahi taiva ore. Ua haamau o Iehova i te mau niu o te fenua “a fatu atoa ˈi te mau fetia poipoi i te himene, e ua pii noa te mau tamarii [melahi] atoa a te Atua i te oaoa.” (Ioba 38:7) No te aha te mau melahi moˈa e oaoa ˈi? No te mea te tia noa ra ratou i pihai iho i te Atua ra o Iehova, “i te faarooraa i tana reo ia parau” no te faatupu i ta ˈna mau faaueraa. Te oaoa nei ratou ‘i te raveraa i to ˈna hinaaro.’ (Salamo 103:20, 21) Oia mau, no roto mai te oaoa o te mau melahi moˈa i te taviniraa ia Iehova ma te haapao maitai. Te reira atoa te taviri o te oaoa mau no te mau taata. Inaha, te mau kerisetiano faatavaihia faaipoipohia o te tavini nei ia Iehova ma te oaoa i teie nei, eita ïa ratou e faaipoipo ia faatiahia ratou no te ora i nia i te raˈi, teie râ, e oaoa ratou ei mau taata varua o te rave ra i te hinaaro o te Atua. Noa ˈtu e ua faaipoipohia ratou aore ra te faaea taa noa ra ratou, e nehenehe te mau tavini taiva ore atoa a Iehova e oaoa no te mea te niu mau o te oaoa, o te taviniraa ïa i te Poiete ma te haapao maitai.
‘Hau ê i te tamaroa e te tamahine’
14. Eaha te parau tǎpǔ tei tohuhia mai no te mau eunuka paieti i Iseraela tahito, e no te aha e mea huru ê roa te reira?
14 Noa ˈtu e eita te hoê kerisetiano taiva ore e faaipoipo, e haapao iho â te Atua e ia oaoa oia. E nehenehe e hutihia mai i te faaitoitoraa i roto i te mau parau tohu tei faataehia ˈtu i te mau eunuka i Iseraela tahito ra: “Te na ô maira hoi Iehova i te mau eunuka, o tei haapao i to ˈu ra mau sabati, e o tei rave i tei auhia e au ra, e ua haapao maite i te faufaa na ˈu ra; o ta ˈu ïa e horoa i roto i to ˈu nei fare, e i roto i ta ˈu nei aua, i te manaˈoraa e te iˈoa, o tei hau ê i te iˈoa tamaroa e to te mau tamahine: e iˈoa vaiiho tamau ta ˈu e ho atu no ratou, e ore roa e faaorehia ra.” (Isaia 56:4, 5) E riro paha i te manaˈohia e e tǎpǔhia i taua mau taata ra i te hoê vahine e te mau tamarii no te amo i to ratou iˈoa. Tera râ, ua tǎpǔhia ratou i “tei hau ê i te iˈoa tamaroa e to te mau tamahine”—oia hoi te hoê iˈoa mure ore i roto i te fare o Iehova.
15. Eaha te nehenehe e parauhia no nia i te tupuraa o te Isaia 56:4, 5?
15 Mai te peu e e ravehia teie mau enuka ei hohoˈa parau tohu no nia i “te Iseraela a te Atua,” te faahohoˈa ra ïa ratou i te feia faatavaihia o te fanaˈo i te hoê parahiraa mure ore i roto i te fare i te pae varua o Iehova, aore ra ta ˈna hiero. (Galatia 6:16) Ma te feaa ore, e tupu teie parau tohu i roto i te auraa mau i nia i te mau eunuka paieti no Iseraela tahito o te faatiahia mai. Mai te peu e e farii ratou i te tusia taraehara o te Mesia e e tamau noa ratou i te maiti i te mea tei fariihia e Iehova, e fanaˈo ïa ratou i te hoê “iˈoa vaiiho tamau” i roto i te ao apî a te Atua. E tano atoa te reira no te feia o te mau “mamoe ê atu” i teie nei tau hopea o te haapae nei i te faaipoipo e i te fanau i te tamarii no te horoa ia ratou taatoa i roto i te taviniraa a Iehova. (Ioane 10:16) Peneiaˈe e pohe vetahi e aita hoi ratou i faaipoipohia e aita atoa ta ratou e tamarii. Teie râ, mai te peu e e tapea ratou i to ratou haapao maitai, i te tia-faahou-raa, e fanaˈo ratou i te tahi mea ‘hau ê i te tamaiti e te tamahine’—te hoê iˈoa “e ore roa e faaorehia” i roto i te faanahoraa apî o te mau mea.
E ere te faaipoiporaa i te taviri otahi roa e noaa mai ai te oaoa
16. No te aha e nehenehe ai e parau e eita te faaipoipo e hopoi noa mai i te oaoaraa?
16 Te manaˈo nei vetahi e no te oaoa, e tia ia faaipoipo. E tia râ ia farii e, i rotopu atoa i te mau tavini a Iehova i teie mahana, aita noa te faaipoiporaa e hopoi maira i te oaoaraa. E faatitiaifaro oia i te tahi mau peapea, tera râ, e faatupu pinepine atoa oia i te tahi atu, e mea fifi roa ˈtu â ia arai i te mau peapea e farereihia ra e te feia taa noa. Ua parau o Paulo e e faatupu te faaipoiporaa i ‘te ati i te tino nei.’ (Korinetia 1, 7:28) Te vai ra te mau taime i reira te hoê taata faaipoipohia e ‘tapitapi ai’ e e ‘feaa ˈi.’ Mea pinepine e mea fifi no ˈna ‘ia haapao i ta te Fatu ra ma te peapea ore.’—Korinetia 1, 7:33-35.
17, 18. (a) Eaha ta vetahi mau tiaau ratere i faataa mai? (b) Eaha te aˈoraa ta Paulo i horoa, e no te aha e mea maitai ia faaohipa i te reira?
17 Ua riro te faaipoiporaa e te faaea-taa-noa-raa ei mau ô no ǒ mai i te Atua. (Ruta 1:9; Mataio 19:10-12) No te manuïa i roto i teie na huru tupuraa e piti nei, mea faufaa roa te pure. Te faataa ra te mau tiaau ratere e e rave rahi mau Ite o te faaipoipo nei e mea apî roâ ratou, e e fanau mai ratou i te tamarii hou ratou e ineine ai no te amo i teie mau hopoia. E taa vetahi o teie mau hoa faaipoipo. Te arai nei vetahi i to ratou mau fifi, aita râ ratou e oaoa ra i roto i to ratou faaipoiporaa. Mai ta te taata papai teata beretane ra o William Congreve i papai, o tei ru noa i te faaipoipo, “e riro ïa i te tatarahapa e a muri noa ˈtu.”
18 Te faataa atoa ra te mau tiaau haaati e te tapeapea nei vetahi mau taeae apî i te titau i te taviniraa i te Betela aore ra i te haere atu i te Haapiiraa faaineineraa no te Taviniraa, no te mea te titauhia ra ia faaea taa noa tau taime. Teie râ, te horoa ra o Paulo i te faaitoitoraa ia ore e faaipoipo hou e ‘mairi ai te tau o te apîraa ra,’ oia hoi e tiai ia iti mai te mau hiaai matamua i te pae taatiraa o te tino. (Korinetia 1, 7:36-38) O te faaea taa noa ei taata paari tau matahiti, e noaa mai ïa ia ˈna te aravihi e te maramarama faufaa roa, ia naeahia ia ˈna i te paari no te maiti i te hoê hoa faaipoipo aore ra no te feruri maite i te faaotiraa e faaea taa noa.
19. Eaha to tatou huru hiˈoraa mai te peu e aita tatou e titau mau ra e faaipoipo?
19 Ua mairi vetahi i rotopu ia tatou i te taurearearaa, e to ˈna hiaai puai i te mau taatiraa o te tino nei. E nehenehe tatou e feruri i te tahi taime i te mau haamaitairaa o te faaipoiporaa, tera râ, te faaea taa noa ra tatou. Peneiaˈe te ite maira Iehova e te tavini ra tatou ia ˈna ma te au ei taata taa noa e aita tatou e titau mau ra e faaipoipo, inaha, ia faaipoipo tatou e riro paha tatou i te vaiiho i te tahi mau hopoia no te taviniraa i te hiti. Mai te peu e eita tatou e titau mau ra e faaipoipo e aita tatou e fanaˈo ra i te hoê hoa faaipoipo, peneiaˈe te faaherehere ra te Atua i te tahi mea na tatou. No reira, e tia ia tatou ia tiaturi e e horoa mai oia i te mea o ta tatou e titau ra. Te oaoa rahi roa ˈˈe, no roto mai ïa i te fariiraa ma te haehaa i te mea ta te Atua i faataa no tatou, mai te mau taeae ati Iuda ‘o tei farii e o tei haamaitai i te Atua’ i to ratou iteraa e ua horoa oia i te tatarahapa i te Etene ia ora ratou.—Ohipa 11:1-18.
20. (a) Eaha te aˈoraa no nia i te faaea-taa-noa-raa o te horoahia ra i te mau kerisetiano apî? (b) Eaha te manaˈo tumu no nia i te oaoaraa o tei riro ei parau mau?
20 No reira, e nehenehe te faaipoiporaa e riro ei taviri o te oaoa, noa ˈtu e e nehenehe atoa oia e riro ei uputa no te mau fifi. Teie te hoê mea papu maitai: E ere te faaipoiporaa te ravea hoê roa e noaa mai ai te oaoaraa. Ia hiˈopoahia te mau tuhaa atoa, mea paari aˈe, no te mau kerisetiano apî iho â râ, ia tamata i te faaea taa noa i roto i te tahi mau matahiti. E nehenehe teie mau matahiti e faaohipa-maitai-hia no te tavini ia Iehova e no te haere i mua i te pae varua. Noa ˈtu râ eaha te matahiti aore ra te haereraa i mua i te pae varua, te vai ra te hoê manaˈo faufaa roa tei riro ei parau mau no te feia atoa o tei pûpû ia ratou no te Atua ma te faaherehere ore: E noaa mai te oaoa mau na roto i te taviniraa ia Iehova ma te haapao maitai.
Nafea outou ia pahono mai?
◻ No te aha te mau tavini a Iehova e oaoa ˈi?
◻ No te aha e ere te faaipoiporaa i te taviri e noaa mai ai te oaoaraa rahi roa ˈˈe?
◻ No te maiti i te hoê hoa faaipoipo, eaha tei titauhia i te nunaa o Iehova?
◻ No te aha e mea tano ia tiaturi e e nehenehe te mau kerisetiano o te faaea taa noa e oaoa?
◻ Eaha te tia ia fariihia no nia i te faaipoiporaa e te oaoaraa?