A haamanaˈo i te mahana o Iehova

“Ua fatata hoi te mahana o Iehova i te peho e faataahia ˈi ra.”—IOELA 3:14.

1. Eaha te taa-ê-raa i rotopu i te tamaˈi moˈa e fatata maira tei faaotihia e Iehova e te mau tamaˈi “moˈa” a te taata nei?

“FAAITE outou i te mau fenua i teie nei parau; Faaineine i te tamaˈi.” (Ioela 3:9) E tamaˈi moˈa anei teie? Ia hiˈohia te mau Aroraa moˈa, te mau tamaˈi faaroo, e na tamaˈi e piti o te ao nei—i reira ua hauti te amuiraa faaroo kerisetiano i te hoê tuhaa rahi—e nehenehe tatou e mǎtaˈu i te manaˈo o te hoê tamaˈi “moˈa.” Teie râ, e ere te tamaˈi moˈa a te parau tohu a Ioela i te hoê tamaˈi i rotopu i te mau nunaa. E ere i te hoê aroraa taehae ia noaa mai te fenua aore ra te taoˈa faufaa, ma te faaohipa i te faaroo ei otoheraa. E tamaˈi tia teie. O te tamaˈi ïa a te Atua no te tumâ i te nounou, te feiiraa, te peu tia ore, e te haavîraa, i nia i te fenua nei. E faatiamâ oia i te mana parau-tia o Iehova i nia i te taatoaraa o ta ˈna poieteraa. Na teie tamaˈi e faaineine i te eˈa ia aratai te Basileia o te Mesia i te huitaata nei i roto i te Mileniuma o te hau na te ao taatoa nei, te ruperupe, e te oaoa i tohuhia mai e te mau peropheta a te Atua.—Salamo 37:9-11; Isaia 65:17, 18; Apokalupo 20:6.

2, 3. (a) Eaha “te mahana o Iehova” i tohuhia i roto i te Ioela 3:14? (b) No te aha e mea tano te ohipa e roohia i nia i te mau nunaa i taua mahana ra?

² Eaha ïa “te mahana o Iehova” i tohuhia mai i roto i te Ioela 3:14? Te pii ra o Iehova iho e, “Auê! i teie nei mahana e! te fatata maira te mahana o Iehova, ei pohe ïa no ǒ mai i te Puaihope e tae mai ai.” Nafea te reira e riro ai ei pohe? Te faataa ra te peropheta i muri iho e: “E rave rahi, e rave rahi, i te peho e faataahia ˈi ra: ua fatata hoi te mahana o Iehova i te peho e faataahia ˈi ra.” (Ioela 1:15; 3:14) Tera te mahana i reira Iehova e faatupu ai i ta ˈna haavaraa i nia i te mau nahoa taata atua ore o te patoi nei i ta ˈna faatereraa parau-tia i nia i te raˈi e te fenua. Na Iehova e faaoti e haamou i te faanahoraa o te mau mea a Satani o tei haavî i te huitaata nei no te hoê tau maoro.—Ieremia 17:5-7; 25:31-33.

³ E tia i te faanahoraa tia ore i nia i te fenua ia faaruru i taua faaotiraa nei. Teie râ, mea ino mau anei te faanahoraa o teie nei ao? E navai noa ia hiˈo atu i ta ˈna mau ohipa! Ua faahiti o Iesu i te hoê faaueraa tumu i roto i te Mataio 7:16: “E ite outou ia ratou i to ratou hoturaa.” Aita anei te mau oire rahi o te ao nei i riro ei mau vahi hoturaa no te raau taero, te taparahiraa taata, te mehameha, te taiata, e te haaviiviiraa? I roto e rave rahi mau fenua, te faainohia ra te mau tiamâraa i noaa apî mai na roto i te arepurepuraa i te pae politita, te navai ore o te maa, e te veve. Hau atu i te hoê miria taata o te pohe nei i te poia. Hau atu, te haamehameha nei te maˈi pee o te SIDA, e parare rahi ra na roto i te raau taero e te mau haerea taiata, i te pae rahi o te fenua. Mai te tau iho â râ a tupu ai te Tamaˈi rahi Matamua i te matahiti 1914 ra, ua itehia te ino-roa-raa o te mau tuhaa atoa o te oraraa i nia i te palaneta atoa.—A faaau i te Timoteo 2, 3:1-5.

4. Eaha te faatihaehaeraa ta Iehova e faatae ra i te mau nunaa?

⁴ Teie râ, ua haaputuputu Iehova mai roto mai i te mau nunaa atoa i te hoê pǔpǔ taata o te fanaˈo nei ma te oaoa i te haapiiraa no nia i to ˈna mau haerea e te haere nei ratou na nia i to ˈna mau eˈa. Ua tiapai teie nunaa na te ao atoa nei i te mau ˈoˈe ei auri arote, ma te haapae i te mau haerea hamani ino o teie nei ao. (Isaia 2:2-4) Oia mau, te mau ˈoˈe ei auri arote! Tera râ, aita anei te reira e taa ê ra i te tiaororaa ta Iehova e faaara ra i roto i te Ioela 3:9, 10? Te taio nei tatou: “Faaite outou i te mau fenua i teie nei parau; Faaineine i te tamaˈi, faatia na i te feia puai; haafatata mai i te feia tamaˈi e haere mai i nia: a tiapai na i ta outou auri arote ei ˈoˈe, e ta outou mau tipi tope raau ra ei mahae.” I ǒ nei, te faatihaehae ra Iehova i te mau faatere o te ao nei ia afai mai ratou i ta ratou mau nuu puai amui no te aro mai ia ˈna i Aramagedo. Teie râ, eita ratou e manuïa! E roohia râ ratou i te pau rahi!—Apokalupo 16:16.

5. Eaha te faahopearaa ia ootihia ‘te uaina o te fenua’?

⁵ Ei patoiraa ˈtu i te Fatu Mana hope ra o Iehova, ua haaputu te mau faatere puai i te mau haapueraa mauhaa tamaˈi riaria—aita râ e faufaa! Te horoa ra Iehova i teie faaueraa i roto i te Ioela 3:13: “A maoa na i te ooti i roto, ua para te maa auhune; haere mai, e pou i raro, ua î te neneiraa, e ua manii te mau vairaa i rapae; ua rahi ta ratou hara.” Te tuea ra teie mau parau e te Apokalupo 14:18-20, i reira te faauehia ra te hoê melahi e tipi oi ta ˈna, ia “ooti i te mau peenave vine o te ao nei; ua para roa hoi te vine.” E faaohipa te melahi i ta ˈna tipi no te huri atu i taua mau nunaa teoteo ra “i roto i te neneiraa rahi uaina ra o te riri o te Atua ra.” Ia au i te hoê auraa taipe, e tahe mai te toto na roto i te neneiraa uaina e e naea-roa-hia te tavaha o te mau puaahorofenua, i nia i te hoê tausani e ono hanere setadia—oia hoi fatata e 300 kilometera! Auê ïa hiˈoraa mehameha no te mau nunaa e haavahavaha nei ia Iehova!

E mau melo huiraatira auraro i te ture

6. Eaha te manaˈo o te mau Ite no Iehova no nia i te mau nunaa e ta ratou mau faatere?

⁶ Te auraa anei ïa e eita te mau Ite no Iehova e faatura i te mau nunaa e ta ratou mau faatere? Eita ïa! Area ra, te peapea nei ratou i mua i te ohipa tia ore ta te mau taata atoa e ite nei, e te faaara nei ratou e te fatata oioi maira te mahana o Iehova no te faatupu i ta ˈna faaotiraa. I te hoê â taime, te auraro haehaa nei ratou i te faaueraa a te aposetolo Paulo i roto i te Roma 13:1: “Ia auraro maite te taata atoa i te feia mana toroa ra.” Te horoa nei ratou na teie mau faatere taata, i te hanahana e titauhia, eita râ ratou e haamori atu ia ratou. Ei melo huiraatira auraro i te ture, te pee nei ratou i te mau ture a te Bibilia no nia i te haerea tia, te parau mau, e te mâ e te haapii nei ratou i te mau ture morare maitai i roto i to ratou mau utuafare. Te tauturu nei ratou ia vetahi ê ia haapii e nafea ratou ia rave i te reira. Te ora nei ratou ma te hau e te mau taata atoa, ma te ore e faaô atu i roto i te mau ohipa patoiraa aore ra te mau orureraa hau. Te tutava nei te mau Ite no Iehova ia riro ei feia haerea maitai i te pae no te auraroraa i te mau ture a te feia mana toroa, ma te turui atu râ i nia i te Mana Hau roa ˈˈe, oia hoi te Fatu Mana hope o Iehova, no te faatupu i te hau tia roa e te faatereraa parau-tia i nia i teie fenua.

Te faatupuraa i ta ˈna faaotiraa

7, 8. (a) I roto i teihea auraa e aueuehia ˈi te mau nunaa e e haapourihia ˈi ratou? (b) O vai ta Ioela e faahohoˈa ra i teie mahana, e taa ê atu i teie nei ao, mea nafea ratou e haamaitaihia ˈi?

⁷ Na roto i te hoê huru paraparau taipe oraora maitai, te horoa ra Iehova i te tahi atu faataaraa no nia i te faatupuraa i ta ˈna faaotiraa: “E haapourihia te mahana e te marama, e ore hoi te mau fetia e anaana mai. E uâ mai hoi Iehova i Ziona, e haapuroro mai oia i tana reo i Ierusalema; e aueue hoi te mau raˈi e te fenua: e riro râ Iehova ei haapuraa no to ˈna ra mau taata, e ei pare no te tamarii a Iseraela.” (Ioela 3:15, 16) E topa te anaana e te ruperupe haavare o te huitaata, i roto i te pouri e te mehameha, e e vavahi-roa-hia te faanahoraa o teie nei ao amahamaha, mai te mea e ua haamouhia na roto i te hoê aueueraa fenua rahi!—Hagai 2:20-22.

⁸ A tapao na i teie haapapuraa oaoa oia hoi e riro Iehova ei haapuraa e ei pare no to ˈna nunaa! No te aha? No te mea o ratou anaˈe te nunaa—no roto mai i te mau fenua atoa—o tei farii i teie mau parau a Iehova: “E ite hoi outou e, o to outou Atua ra vau, o Iehova.” (Ioela 3:17) I te mea te auraa o te iˈoa o Ioela oia ïa “O Iehova te Atua,” te faahohoˈa maitai ra oia i te mau Ite faatavaihia a Iehova no teie nei tau, o te tavini nei ma te itoito rahi no te faaite i te mana arii o Iehova. (A faaau e te Malaki 1:11.) Ia taio tatou i te mau parau omuaraa o te parau tohu a Ioela, e ite tatou i to ˈna huru oraora maitai ia tohu anaˈe oia i te ohipa a te nunaa o te Atua i teie mahana.

Te hoê nuu akaride

9, 10. (a) Eaha te ati e tohuhia ra e Ioela? (b) Mea nafea te Apokalupo e tuea ˈi i te tohu a Ioela no te hoê ati, e eaha te faahopearaa o teie ati i nia i te amuiraa faaroo kerisetiano?

⁹ A faaroo na râ i teie nei i “te parau a Iehova i tae mai ia Ioela”: “Faaroo mai i teie, e te mau taata paari ra, e fariu mai i te tariˈa, e te mau taata atoa o te fenua nei. Tei to outou ra anotau teie i te tupuraa, eiaha ˈtu â ïa i te anotau o to outou mau metua ra? E faaite i ta outou mau tamarii i te reira e na ta outou mau tamarii e faaite atu i ta ratou iho mau tamarii, e na ta ratou mau tamarii e faaite i te tahi ui atu. O tei faatoehia e te vivi ra, ua amuhia ïa e te arabe, e tei faatoehia e te arabe, ua amuhia ïa e te he; e tei faatoehia e te he ra, ua amuhia ïa e te vava.”—Ioela 1:1-4.

¹⁰ E ohipa maere mau â teie, o te haamanaˈohia e a muri noa ˈtu. Te vavahi ra te mau nahoa manumanu te tahi i muri aˈe i te tahi, e vivi [aore ra e akaride] te rahiraa, i te fenua. Eaha ïa te auraa? Te faahiti atoa ra te Apokalupo 9:1-12 i te hoê ati akaride, tei tonohia e Iehova i raro aˈe i te hoê “arii . . . o te melahi ïa o te abuso ra,” oia hoi o Iesu Mesia iho. Te auraa o to ˈna mau iˈoa o Abadona (hebera) e o Apoluona (heleni), oia ïa te “Haamouraa” e “te Taata haamou.” Te faahohoˈa ra teie mau akaride i te toea faatavaihia o te mau kerisetiano o te haere nei, i teie nei i te mahana o te Fatu, no te vavahi i te mau vahi aihere a te amuiraa faaroo kerisetiano na roto i te faaite-tahaa-raa i te haapaoraa hape e te faaararaa i te tahooraa a Iehova i nia ia ˈna.

11. Mea nafea te mau akaride o teie nei tau i te haapuairaahia, e o vai mau na te mau taata o ta ratou e aro ra?

¹¹ Mai tei faaitehia i roto i te Apokalupo 9:13-21, i muri aˈe i te ati akaride e tupu te ati rahi a te hoê nuu puaahorofenua. E parau mau roa te reira i teie mahana, inaha ua haapuaihia te toea o te tahi tau tausani kerisetiano faatavaihia, e hau atu i te maha mirioni “mamoe ê atu” o tei riro, ia amuihia ratou paatoa, ei nuu puaahorofenua o te ore e mau ia tapea! (Ioane 10:16) Te tahoê nei ratou no te poro i te mau haavaraa putaputa a Iehova i nia i te feia haamori idolo a te amuiraa faaroo kerisetiano e i nia i te feia ‘aore i tatarahapa i ta ratou taparahiraa taata, e ta ratou tahutahu, e ta ratou faaturiraa, e ta ratou eiâraa.’ Tei rotopu te mau raatira faaroo—te katolika e te porotetani—o tei turu uˈana ˈtu i te mau tamaˈi taparahi taata o teie senekele, e tae noa ˈtu te mau perepitero mâhu e te mau tia evanelia taiata e poro ra na roto i te afata teata, i te feia no ratou teie mau poroi haavaraa.

12. No te aha e mea tano ia faataehia te mau poroi haavaraa i nia i te mau raatira a te amuiraa faaroo kerisetiano, e eaha te tupu i nia ia ratou e tae noa ˈtu i nia i te mau melo o Babulonia rahi?

¹² Te taˈi etaeta ra te faautuaraa a Iehova i nia i teie mau “taata” faufau i ahuhia i te ahu a te mau tia faaroo: “E ara, e te feia taero, e oto; e auê, outou atoa i inu i te uaina ra, i te uaina momona ra; ua faaerehia hoi to outou vaha i te reira.” (Ioela 1:5) I teie senekele e 20, ua haapae te haapaoraa a te amuiraa faaroo kerisetiano i te mau ture morare mâ a te Parau a te Atua e ua mono mai i te haerea faatia noa o teie nei ao. Mea navenave roa na te haapaoraa hape e ta ˈna feia faaroo ia rave mai i te mau haerea o teie nei ao, teie râ, ua ooti ratou i te maˈi i te pae varua e i te pae tino! Fatata roa, mai te faaitehia ra i roto i te Apokalupo 17:16, 17, o te “manaˈo” ïa o te Atua ia fariu taue noa te mau mana politita i nia i te hau emepera o te ao nei a te haapaoraa hape, oia hoi o Babulonia Rahi, e ia haamou roa ia ˈna. I reira noa, ia ite oia i te tupuraa o te faaotiraa a Iehova i nia ia ˈna, oia e “ara” mai ai i to ˈna taero.

“Taua feia rahi ra, e te puai”

13. I roto i teihea auraa e au ai te nuu akaride mai te “feia rahi ra, e te puai” i te hiˈoraa o te amuiraa faaroo kerisetiano?

¹³ Te faataa faahou ra te peropheta a Iehova i te nuu akaride mai te hoê “feia rahi ra, e te puai,” e mai te reira mau ratou i te hiˈoraa o Babulonia Rahi. (Ioela 2:2) Ei hiˈoraa, te haapeapea nei to ˈna mau raatira i te mea e aita te mau haapaoraa a te amuiraa faaroo kerisetiano i manuïa i te faariro i te taata ei pǐpǐ na ratou i te fenua Tapone faaroo a te Bouddha. I teie râ mahana, hau atu i te 160 000 Ite no Iehova Tapone o te purara nei na roto i taua fenua ra e o te aratai nei i te mau haapiiraa bibilia i roto hau atu i te 200 000 utuafare. I Italia, tei muri noa mai te mau 180 000 Ite no Iehova i te mau katolika i te pae no te rahiraa taata. Mea faufaa ore hoi te parau peapea a te epikopo katolika roma no Italia o tei faaite e te rave ra te mau Ite no Iehova i roto i te ekalesia ‘fatata e 10 000 katolika faaroo’ i te mau matahiti atoa.a Te oaoa nei te mau Ite i te farii i teie mau taata.—Isaia 60:8, 22.

14, 15. Mea nafea Ioela i te faataaraa i te nuu akaride, e i roto i teihea auraa te reira i te tupuraa i teie mahana?

¹⁴ No nia i te nuu akaride o te mau Ite faatavaihia, te na ô ra te Ioela 2:7-9 e: “E horo ratou mai te taata puai ra; e paiuma ratou i te aua mai te feia tamaˈi ra; e haere hoi ratou atoa e ati noa ˈˈe na to ˈna ihora eˈa; e ore ratou e ohipa ê i to ratou mau haerea. E ore hoi te tahi e tute noa ˈtu i te tahi; e haapao â ïa i to ˈna ihora eˈa e ati noa ˈˈe; e ia hiˈa ratou i nia i te ˈoˈe ra e ore ratou e puta. E horo haere noa ratou i roto i te oire; e horo ratou na nia i te patu ra, e paiuma hoi i nia i te fare; e tomo ratou na roto i te haamaramarama mai te eiâ ra.”

¹⁵ E faahohoˈaraa puai mau teie o te nuu o te mau “akaride” faatavaihia, o tei apitihia mai i teie nei e hau atu atu i te maha mirioni hoa, oia hoi te mau mamoe ê atu! Aita hoê “aua” oia hoi te patoiraa faaroo o te nehenehe e faaotohe ia ratou. Ma te mǎtaˈu ore, “te haere [nei ratou] na taua tapao nei â ma te haapao maite â hoi i te mea hoê â” i roto i te pororaa e te tahi atu mau ohipa kerisetiano. (A faaau e te Philipi 3:16.) Maoti i te taiva i to ratou faaroo, ua ineine ratou i te faaruru i te pohe, mai ta te mau tausani Ite o tei ‘hiˈa i nia i te oˈe’ i rave no te mea ua patoi ratou i te turu i te taata katolika ra o Hitler no Helemani Nazi. Ua horoa te nuu akaride i te hoê faaiteraa hohonu i roto i “te oire” a te amuiraa faaroo kerisetiano, ma te paiuma na nia i te mau haafifiraa atoa, ma te tomo atu mai te eiâ ra, e auraa parau teie, i roto i te mau fare i reira to ratou opereraa i te mau mirioni buka bibilia na roto i ta ratou ohipa na te mau fare. O te hinaaro o Iehova ia horoahia teie faaiteraa, e aita hoê puai i nia i te raˈi aore ra i nia i te fenua o te nehenehe e tapea i te reira.—Isaia 55:11.

‘Î aˈera ratou i te varua moˈa’

16, 17. (a) Afea te mau parau a te Ioela 2:28, 29 i te tupuraa i nia i te hoê faito faahiahia? (b) Eaha te mau parau tohu a Ioela o tei ore i tupu taatoa i te senekele matamua?

¹⁶ Te na ô ra Iehova i to ˈna mau Ite e: “E ite hoi outou e, tei roto vau ia Iseraela [i te pae varua], e o to outou Atua ra vau o Iehova, aita ˈtu, e ore roa to ˈu ra mau taata e haama.” (Ioela 2:27) Ua fanaˈo to ˈna nunaa i teie tupuraa faufaa rahi i to Iehova haamataraa i te faatupu i ta ˈna mau parau i roto i te Ioela 2:28, 29: “E muri aˈe i te reira e ninii atu ai au i tau varua i nia i te taata atoa; e tohu hoi ta outou mau tamarii tamaroa e te mau tamahine.” Ua tupu te reira i te Penetekose o te matahiti 33 o to tatou nei tau, i to te mau pǐpǐ a Iesu o tei putuputu mai, faatavairaahia “e î aˈera ratou atoa i te [varua moˈa].” Na roto i te puai o te varua moˈa, ua poro aˈera ratou, e i taua mahana ra, “e amui-atoa-hia maira ia ratou, e toru atoa tausani.”—Ohipa 2:4, 16, 17, 41.

¹⁷ I taua taime oaoa ra, ua faahiti atoa o Petero i te Ioela 2:30-32: “E faaite au i te piri i nia i te mau raˈi, e i nia atoa i te fenua; i te toto, e te auahi, e te pou auahi anaˈe. E faarirohia te mahana ei pouri, e te marama ei toto, a tae ai i taua mahana rahi riaria o Iehova ra. E riro hoi e, o tei tau i te iˈoa ra ia Iehova, o te faaorahia ïa.” Ua tupu te tahi tuhaa o taua mau parau nei i te taime a haamouhia ˈi o Ierusalema i te matahiti 70 o to tatou nei tau.

18. Afea te Ioela 2:28, 29 i te haamataraa i te tupu i nia i te hoê faito rahi aˈe?

¹⁸ E tupu faahou râ te Ioela 2:28-32 i te tau a muri aˈe. Oia mau, ua tupu teie parau tohu i nia i te hoê faito faahiahia mau mai te avaˈe setepa 1919 mai â. I taua taime ra, ua faatupuhia te hoê tairururaa rahi a te nunaa o Iehova i Cedar Point, Ohio, i te Fenua Marite. Ua ite-papu-hia te puai o te varua o te Atua, e ua itoitohia ta ˈna mau tavini faatavaihia no te haamata i te hoê ohipa pororaa rahi e tae roa mai i teie nei mahana. Auê ïa maraaraa rahi o tei tupu i muri aˈe! Ua haere te mau 7 000 tiahapa taata i tae atu i taua tairururaa no Cedar Point i te rahi e ua naeahia e 10 650 158 feia o tei haere mai i te oroa Haamanaˈoraa o te poheraa o Iesu i te 30 no mati 1991. I roto ia ratou, e 8 850 anaˈe o tei tia mai ei mau kerisetiano faatavaihia. E oaoa rahi to ratou i to ratou iteraa i teie mau hotu i faatupuhia e te varua puai o Iehova!—Isaia 40:29, 31.

19. I te mea e te fatata maira te mahana o Iehova, eaha ïa to tatou haerea tataitahi?

¹⁹ I mua nei, te vai ra te “mahana rahi riaria o Iehova” o te haamou roa i te faanahoraa o te mau mea a Satani. (Ioela 2:31) Ma te oaoa, “o te tiaoro i te iˈoa o [Iehova] ra, e ora ïa.” Mea nafea ïa? Te faaite maira te aposetolo Petero e “e tae mai râ te mahana o [Iehova] mai te eiâ” e te na ô faahou ra oia e: “E teie nei, e mou anaˈe taua mau mea atoa nei, mai te aha to outou huru e tia ˈi i te haapao maitai e te paieti; i te tiairaa e te ruraa ˈtu ia tae mai taua mahana o te Atua ra.” Ia haamanaˈo tatou e te fatata maira te mahana o Iehova, e oaoa atoa tatou i te iteraa i te tupuraa o te parau tǎpǔ a Iehova no te mau “raˈi apî e te fenua apî” parau-tia.—Petero 2, 3:10-13.

[Nota i raro i te api]

E nehenehe anei outou e faataa mai?

◻ Eaha “te mahana o Iehova”?

◻ Nafea ‘te vine o te fenua’ ia ootihia, e no te aha?

◻ Ua tairi te hoê ati akaride i te amuiraa faaroo kerisetiano mai te matahiti 1919 mai â, i roto i teihea auraa?

◻ Mea nafea te varua o Iehova i te niniiraahia i nia i to ˈna nunaa i te matahiti 33 o to tatou tau, e i muri iho faahou â, i te matahiti 1919?