‘Te aˈoraa na roto i te here’

I TE area o te mau matahiti 60-61 o to tatou nei tau, ua faarue aˈera te hoê tîtî ia Roma no te tapuni e ua haamata ˈtura o ˈna i te hoê tere e 1 400 kilometera no te hoˈi atu i ǒ na i Kolosa, te hoê oire i Asia Iti apatoa tooa o te râ. Ua hopoi atoa o ˈna i te hoê poroi papai-rima-hia na to ˈna fatu, tei faataehia ˈtu e te aposetolo Paulo iho. I teie mahana, ua amuihia teie episetole i roto i te Bibilia e ua mairihia oia i te iˈoa o te taata o tei farii i teie rata, o Philemona.

Ua riro te episetole ia Philemona ei rata faahiahia roa i te pae no te haaferuriraa ma te mǎrû e te aravihi. Te mea faufaa roa ˈtu râ, te vai ra i roto e rave rahi mau haapiiraa anaanatae mau no te mau kerisetiano i teie mahana, e teie hoi te tahi, te faufaaraa ia aˈo te tahi e te tahi na roto i te here kerisetiano. E hiˈopoa anaˈe na i teie rata poto e te puai atoa râ.

Ua hoˈi atu te hoê taata tapuni

E kerisetiano o Philemona, te hoê melo herehia no te amuiraa no Kolosa. (Philemona 4, 5) Inaha, ua faaohipa te amuiraa i reira i to ˈna fare ei vahi putuputuraa! (Irava 2) Hau atu, ua matau maitai o Philemona raua te aposetolo Paulo; peneiaˈe na te aposetolo i tauturu ia ˈna ia riro mai ei kerisetiano. Parau mau, te faaite ra o Paulo e aita o ˈna i poro i Kolosa. (Kolosa 2:1) Teie râ, ua faaea oia e piti matahiti i Ephesia, e na roto i ta ˈna pororaa rahi “ite aˈera to Asia atoa [tei roto atoa hoi o Kolosa] . . . i te parau a te Fatu.” (Ohipa 19:10) Eita e ore e tei rotopu o Philemona i te feia o tei farii maitai i te parau.

Noa ˈtu râ, mai te mau taata mana rahi o taua tau ra, ua fatu o Philemona i te feia tîtî. I te tau tahito, e ere te peu faatîtîraa taata i te mea haama. I rotopu i te mau ati Iuda, ua riro te hooraa ia ˈna iho aore ra i te mau melo o to ˈna fetii ei tîtî ei ravea fariihia no te aufau i te mau tarahu. (Levitiko 25:39, 40) Te faataa ra te hoê buka parau paari (The International Standard Bible Encyclopedia) no nia i te anotau Roma e: “E rave rahi mau taata o tei hoo ia ratou iho ei tîtî no te mau tumu huru rau, no te ora iho â râ i te hoê oraraa ohie aˈe e te papu aˈe maoti i te riro ei taata tiamâ veve, no te fanaˈo i te mau ohipa taa ê, e ia noaa mai te tiaraa totiale faahiahia aˈe. . . . E rave rahi feia e ere i te Roma o tei hoo ia ratou iho i te mau melo huiraatira Roma ma te tiaturi e, ia au i te ture Roma, e riro mai ratou iho ei mau melo huiraatira Roma ia [faatiamâhia] ratou.”

Ua tupu mai râ te hoê fifi i te taime a faarue mai ai te hoê o te mau tîtî a Philemona, te hoê taata o Onesimo te iˈoa, ia ˈna e a horo ai oia i Roma, peneiaˈe e ua eiâ atoa oia i te moni a Philemona no te aufau i to ˈna tere tapuni. (Irava 18) I Roma, ua farerei atura o Onesimo i te aposetolo Paulo, o tei tapeahia i reira.

Ua riro maira te “tavini faufaa ore . . . i mutaa ihora” o tei horo i te faatîtîraa, ei kerisetiano. Ua ineine oia i te tauturu atu ia Paulo e ua rave oia i te tahi mau ohipa faufaa roa no te aposetolo i tapeahia ra. Eita e maerehia i te mea e ua fanaˈo o Onesimo i ‘te aroha’ o Paulo e ua riro maira oia “ei taeae here” no ˈna!—Irava 11, 12, 16.

Ua hinaaro paha te aposetolo Paulo e tapea mai ia Onesimo ia ˈna ra, tera râ, tei ia Philemona ra te parau mana na nia i to ˈna tiaraa fatu no Onesimo. No reira, e tia ˈtura ia Onesimo ia hoˈi atu e tavini i to ˈna fatu mau. Nafea râ o Philemona ia farii mai ia ˈna? E faaohipa anei oia ma te riri i to ˈna mana no te faautua etaeta ˈtu ia ˈna? E tiaturi anei i te haavare ore o te parau a Onesimo e ua riro mai oia ei kerisetiano?

Te faaafaroraa i te mau ohipa ma te here

Ua hinaaro o Paulo e papai atu ia Philemona no nia ia Onesimo. Na ˈna iho i papai i te rata, e aita oia i faaohipa i te hoê papai parau mai tei matauhia e a ˈna. (Irava 19) A rave na i te tahi minuti no te taio i te taatoaraa o te rata poto ia Philemona. E ite outou e i muri aˈe i to ˈna faaiteraa ia ˈna iho e to ˈna aroharaa ia Philemona e to ˈna utuafare i “te aroha mau, e te hau,” e haamaitai o Paulo ia Philemona no “to ˈna faaroo i te Fatu ra ia Iesu, e te aroha i te feia moˈa atoa ra.”—Irava 1-7.

Mea ohie roa hoi na Paulo ia faahiti i to ˈna mana aposetolo e ‘ia faaue hua ˈtu ia Philemona ia rave i te mea au ra,’ tera râ, ‘ua aˈo atu [o Paulo] na roto i te here.’ Ua haapapu atu oia e ua riro mau iho â o Onesimo ei taeae kerisetiano, o tei tauturu rahi atu ia Paulo. Te farii ra te aposetolo e: “I hinaaro hoi au i te tapea ia [Onesimo] i ǒ nei ia ˈu nei, ia onohia oe ia ˈna i te poihereraa mai ia ˈu, i to ˈu nei tapearaahia i te evanelia nei.” Te na ô faahou ra o Paulo e: “Aita râ vau e rave noa i tei ore i tia ia oe ra; ia riro to oe hamani maitai no te hinaaro mau, eiaha no te tahi mea ê.”—Irava 8-14.

Ua faaitoito atura te aposetolo ia Philemona ia farii i ta ˈna tavini tahito ei taeae no ˈna. “E farii mai oe ia ˈna mai te mea e o vau iho,” o ta Paulo ïa i papai atu. Eiaha ia faatiamâhia o Onesimo i te faatîtîraa. Aita o Paulo i faahuehue no te taui i te faanahoraa totiale e vai ra i to ˈna ra tau. (A faaau e te Ephesia 6:9; Kolosa 4:1; Timoteo 1, 6:2.) Noa ˈtu râ, e tia i te taairaa i rotopu i te fatu e te tavini ia tamǎrûhia na roto i te taairaa kerisetiano e vai ra i teie nei i rotopu ia Onesimo raua o Philemona. E faariro o Philemona ia Onesimo “hau atu râ oia i te tavini, ei taeae here ra.”—Irava 15-17.

Eaha ˈtura no te mau tarahu tei noaa ia Onesimo, peneiaˈe na roto i te eiâraa? I reirâ, te faahiti ra o Paulo i to ˈna auhoaraa e o Philemona, i te na ôraa e: “E i hamani ino na oia ia oe, e e amutarahu oia na oe, e tuu mai oe i te reira i nia ia ˈu nei.” Ua tiaturi o Paulo e e ineine o Philemona i te faaore i te hapa, ma te rave hau atu â i ta Paulo i ani. I te mea e te tiaturi ra o Paulo e fatata roa oia i te tuuhia i rapae, ua faanaho atoa oia no te fanaˈo i te farii maitai o Philemona i te tau i mua ˈtu. I muri aˈe i to ˈna aroharaa e to ˈna faataeraa i “te aroha mau o to tatou ra Fatu o Iesu Mesia,” ua faaoti o Paulo i ta ˈna rata.—Irava 18-25.

Te mau haapiiraa no te mau kerisetiano i teie mahana

I roto i te buka a Philemona, e rave rahi mau haapiiraa faufaa roa no te mau kerisetiano i teie mahana. A tahi, te faahaamanaˈo maira oia i te faufaaraa ia faaore i te hapa, noa ˈtu e ua faaino mai te hoê hoa kerisetiano ia tatou. Ua parau o Iesu e: “Ia faaore hoi outou i ta vetahi ê ra hapa, e faaore atoa mai to outou Metua i te ao ra i ta outou.”—Mataio 6:14.

E nehenehe atoa te feia i faatoroahia i roto i te amuiraa kerisetiano e faufaahia i te buka a Philemona. Mea anaanatae ia tapao e aita o Paulo i faaohipa i to ˈna mana aposetolo no te faaue atu ia Philemona ia rave i te mea tia. Hau atu, aita o Paulo i titau ia vaiihohia o Onesimo ia faaea mai i Roma no te tavini ia ˈna. Ua faatura o Paulo i te tiaraa fatu o vetahi ê. Ua taa atoa ia ˈna e noa ˈtu e e nehenehe ta ˈna e faahepo atu ia aurarohia ta ˈna parau, mea maitai aˈe ia ohipa o Philemona na roto i te hinaaro o to ˈna mafatu. Ua rave oia i te hoê aniraa tei niuhia i nia i te here ia noaa mai te hoê pahonoraa o te mafatu.

Mea maitai ia ore te mau matahiapo kerisetiano i teie mahana ia “faahepo i nia iho i te tufaa a te Atua ra” ma te faaohipa hape i to ratou mana aore ra ma te aratai i te nǎnǎ na roto i te ravea etaeta e te haavî. (Petero 1, 5:1-3) Ua parau o Iesu e: “Ua ite outou e, te faahepo nei te hui mana o te [mau nunaa] ia ratou, e te feia rarahi ra te mana ra ïa i nia iho ia ratou. Eita râ e tia ia na reira i roto ia outou.” (Mataio 20:25, 26) Ua ite te mau tiaau e mea farii maitai aˈe te mau melo o te nǎnǎ i te mau aniraa here maoti hoi i te mau faaueraa. Te oaoa nei te feia e mauiui ra i te maˈi hepohepo ia rave anaˈe te mau tiaau ma te hamani maitai i te taime no te faaroo i to ratou mau fifi e no te horoa i te aˈoraa maitai.

Te faahaamanaˈo atoa ra te rata a Paulo i te mau matahiapo i te faufaaraa o te haapopouraa e te mǎrû. Te haamata ra oia na roto i te fariiraa e ‘ua itoitohia te aroha o te feia moˈa ia’ Philemona. (Irava 7) Eita e ore e ua tuu teie manaˈo haapopou haavare ore ia Philemona i roto i te hoê huru feruriraa farii maitai aˈe. Oia atoa i teie mahana, mea pinepine atoa te tahi faaitoitoraa aore ra te hoê aˈoraa i te tamǎrûhia na roto i te hoê manaˈo haapopou tamahanahana e te haavare ore. E tia i taua aˈoraa nei ia horoahia, eiaha ma te etaeta aore ra te paari, teie râ, “ia rapaauhia i te miti” ia riro ei parau au aˈe no te taata e faaroo ra.—Kolosa 4:6.

I muri iho, ua faaite te aposetolo Paulo i to ˈna tiaturi e e rave o Philemona i te ohipa tia, ia ˈna i parau atu e: “Te tiaturi nei au i to oe faatiaraa mai i papai atu ai au i teie nei parau ia oe, ua ite hoi au e, e rahi atu â ta oe i ta ˈu e ani nei.” (Irava 21) E te mau matahiapo, te faaite atoa ra anei outou i teie huru tiaturi i roto i to outou mau hoa kerisetiano? Eita anei te reira e tauturu ia ratou ia hinaaro e rave i te mea tia ra?

Inaha hoi, mea pinepine te mau metua i te ite e ia tiaturi anaˈe ratou i ta ratou mau tamarii, e noaa mai ïa te faahopearaa maitai. Na roto i te fariiraa i te faufaaraa o te auraroraa ma te aau tae—te hoê hinaaro o te hau atu i te auraro-noa-raa i te mea e titauhia ra—e nehenehe te mau metua e horoa ˈtu na ta ratou mau tamarii i te tahi manaˈo faatura. No reira, mai te peu e e nehenehe, e tia i te mau faaueraa aore ra te mau titauraa a te mau metua, ia anihia na roto i te hoê tuuraa reo mǎrû e te here. E tia atoa ia haapao i to ratou manaˈo, ia faataa ˈtu i te mau tumu. E tia i te mau metua ia haapopou maite atu i ta ratou mau tamarii i te taime e tano e ia ore e faahapa rahi roa ia ratou, i mua iho â râ i te taata.

Ia au i teie manaˈo, e nehenehe te mau tane e faaite i te mau huru mai te aifaito e te mǎrû, ia vai ineine noa i te haapopou i ta ratou mau vahine. E riro hoi te vahine i te auraro ma te au maitai e e riro atoa hoi ei tumu tamǎrûraa e te oaoa!—Maseli 31:28; Ephesia 5:28.

Aita e haapapuhia ra e mea nafea to Philemona pahonoraa i te rata a Paulo. Eita râ tatou e manaˈo e ua hape o Paulo i te tiaturiraa ia ˈna. Ia manuïa atoa te mau matahiapo kerisetiano, te mau metua, e te mau tane i roto i ta ratou mau huru raveraa, ma te ore e faahepo, e faaue, aore ra e haavî, na roto râ i te ‘aˈoraa na roto i te here.’

[Hohoˈa i te api 23]

Maoti i te faaohipa i to ˈna mana aposetolo, ua aˈo atu o Paulo ia Philemona na roto i te here kerisetiano