Te faatupuraa i te hotu o te hitahita ore
“Te hotu o te varua ra, o te here ïa, te oaoa, te hau, te faaoromai, te hamani maitai, te maitai, te faaroo, te mǎrû, te hitahita ore. Aore roa e ture e patoi i te reira.”—GALATIA 5:22, 23, Tatararaa a te ao apî.
1. O vai tei horoa mai i te mau hiˈoraa maitatai roa ˈˈe i te pae no te hitahita ore, mai te itehia ra i roto i teihea mau irava?
UA HOROA mai te Atua ra o Iehova e o Iesu Mesia i te mau hiˈoraa faahiahia roa ˈˈe i te pae no te hitahita ore. Mai te tau mai â a faaroo ore ai te taata i roto i te ǒ i Edene ra, ua tamau noâ o Iehova i te faaite i teie huru maitai. (A faaau e te Isaia 42:14.) E iva taime i roto i te mau Papai Hebera e taiohia ˈi e e “faaoromai rahi” to ˈna. (Exodo 34:6) E titau te reira i te hitahita ore. Mea papu maitai e ua faaite te Tamaiti a te Atua i te hitahita ore rahi, inaha aita oia “i faaino atu, ia faainohia mai oia.” (Petero 1, 2:23) Inaha, e nehenehe hoi ta Iesu e ani atu i to ˈna Metua i te raˈi ra i te turu o te mau “melahi e ia ahuru noa ˈtu te legeona e ia piti tiahapa.”—Mataio 26:53.
2. Eaha te mau hiˈoraa faahiahia o te feia tia ore i roto i te mau Papai o tei faaite i te hitahita ore?
2 Te vai atoa ra i roto i te mau Papai te mau hiˈoraa o te feia tia ore o tei faatupu i te hitahita ore. Ei hiˈoraa, ua itehia teie huru maitai i roto i te tahi ohipa i tupu i roto i te oraraa o Iosepha, te tamaiti a te patereareha ra o Iakoba. Ua faaite mau â o Iosepha i te hitahita ore i to te vahine a Potiphara tamataraa i te faahema ia ˈna! (Genese 39:7-9) Te vai atoa ra te hiˈoraa maitai roa o na taurearea Hebera toomaha o tei faaite i te hitahita ore na roto i te patoiraa i te amu i te maa monamona a te arii no Babulonia no te auraro i te mau opaniraa a te Ture a Mose.—Daniela 1:8-17.
3. O vai tei tapaohia no to ratou haerea maitai, mai tei itehia na roto i teihea haapapuraa?
3 E nehenehe tatou e faahiti i te taatoaraa o te mau Ite no Iehova ia imi tatou i te mau hiˈoraa no te hitahita ore i teie nei tau. Ua tano te haapopouraa a te Buka parau paari katolika apî—oia hoi ua riro ratou “ei hoê o te mau pǔpǔ haerea maitai roa ˈˈe i te ao nei.” Ua parau te hoê orometua haapii no te fare haapiiraa tuatoru no Philipino e “te pee maite nei te mau Ite i te mea o ta ratou e haapii ra i roto i te mau Papai.” No nia i te tairururaa a te mau Ite i Varsovie i te matahiti 1989 ra, ua papai te hoê papai vea no Polonia e: “E 55 000 feia o tei ore i puhipuhi noa ˈˈe i te hoê avaava i roto e toru mahana! . . . Ua maere roa vau i teie faahiˈoraa no nia i te haerea titiaifaro puai mau, ma te faahiahia i anoihia i te faatura.”
Te mǎtaˈuraa i te Atua e te ririraa i te ino
4. Eaha te hoê o te mau tauturu rahi roa ˈˈe no te faatupu i te hitahita ore?
4 Hoê o te mau tauturu faahiahia roa ˈˈe no te faatupu i te hitahita ore, o te mǎtaˈuraa ïa i te Atua, te mǎtaˈu tia ia ore to tatou Metua here i te raˈi ra ia farii mai ia tatou. E tia ia tatou ia haafaufaa i te mǎtaˈu hohonu i te Atua, e te haapapuhia ra te reira no te mea e rave rahi taime to te mau Papai faahitiraa i teie manaˈo. I te taime a pûpû ai o Aberahama i ta ˈna tamaiti o Isaaka, ua parau te Atua e: “Eiaha to rima e rave noa ˈtu i te tamaiti na, eiaha roa oia e hauti-noa-hia ˈtu e oe: ua ite atura hoi au i teie nei, e e mǎtaˈu to oe i te Atua, o oe aore i pipiri i to tamaiti, i to tamaiti hoê roa ra, ia ˈu.” (Genese 22:12) Ua horuhoru mau â o Aberahama i taua taime ra, e no reira ua tia mau â ia ˈna ia faaite i te hitahita ore no te pee i te faaueraa a te Atua e tae roa ˈtu i te taime a afai ai oia i ta ˈna tipi i nia no te taparahi i ta ˈna tamaiti herehia ra o Isaaka. Oia mau, e tauturu te mǎtaˈu i te Atua ia tatou ia faatupu i te hitahita ore.
5. Eaha te tuhaa to te ririraa i te ino i roto i te faatupuraa i te hitahita ore?
5 Ua taai-piri-hia te ririraa i te ino e te mǎtaˈu ia Iehova. Te taio nei tatou i roto i te Maseli 8:13 e: “Mǎtaˈu to ˈu ia Iehova, e te riaria nei au i te ino.” I te tahi aˈe pae, e tauturu te ririraa i te ino ia tatou ia faatupu i te hitahita ore. E rave rahi taime to te mau Papai faaueraa mai ia tatou ia riri—oia mau, ia haapae roa—i te ino. (Salamo 97:10; Amosa 5:14, 15; Roma 12:9) Mea pinepine no te navenave rahi o te ino, to ˈna faahema, to ˈna mana puai, e tia ïa ia tatou ia riri i te ino ia noaa ia tatou i te puai no te patoi atu i te ino. E haapaari teie riri i te ino i to tatou hinaaro e faatupu i te hitahita ore e e riro te reira ei parururaa no tatou.
Te hitahita ore, te haerea paari
6. No te aha e mea paari mau â ia aro i to tatou mau hinaaro miimii na roto i te faaiteraa i te hitahita ore?
6 Te tahi atu tauturu rahi no te faatupu i te hitahita ore, o te taaraa ïa e mea paari mau ia faaite i teie huru maitai. Te ani maira Iehova ia tatou ia faaite i te hitahita ore no to tatou iho maitai. (A faaau e te Isaia 48:17, 18.) Te vai ra i roto i ta ˈna Parau e rave rahi mau aˈoraa e faaite maira e mea paari mau â ia aro i to tatou mau hinaaro miimii na roto i te faatupuraa i te hitahita ore. Eita tatou e nehenehe e ape i te mau ture aueue ore a te Atua. Te na ô maira ta ˈna Parau e: “O ta te taata e ueue ra, o ta ˈna â ïa e ooti mai. O te ueue i ta to ˈna ihora tino, o te pohe ta ˈna e noaa i te tino ra; e o te ueue i ta te Varua ra, o te ora mure ore ta ˈna e noaa i te Varua ra.” (Galatia 6:7, 8) Te hoê hiˈoraa papu maitai, no nia ïa i te maa e te inu. E rave rahi mau fifi o te tupu mai no te mea te tamaa rahi nei e te inu hua nei te taata. Na roto i teie toparaa i roto i te miimii, e erehia te hoê taata i te faatura ia ˈna iho. Hau atu, ia topa anaˈe te hoê taata i roto i te miimii, e faaino atoa oia i to ˈna mau taairaa e o vetahi ê. Te mea faufaa roa ˈtu â, oia hoi e faaino te ereraa i te hitahita ore i to tatou mau taairaa e to tatou Metua i te raˈi ra.
7. Eaha te tumu rahi o te buka Maseli, mai tei faaitehia na roto i teihea mau irava bibilia?
7 No reira, e tia ia tatou ia tamau noa i te parau ia tatou iho e e mea ino te miimii. Hoê parau tumu faahiahia roa o te buka a te mau Maseli e haafaufaa ra i te aˈoraa ia ˈna iho, oia hoi eita e hoonahia i te miimii e mea paari mau â ia faatupu i te hitahita ore. (Maseli 14:29; 16:32) E a tapao na e e titau te aˈoraa ia ˈna iho hau atu â i te ape-noa-raa i te ino. E titau-atoa-hia te aˈoraa ia ˈna iho, aore ra te hitahita ore, no te rave i te maitai, mea fifi roa hoi no te mea e patoi te reira i to tatou huru tia ore.
8. Eaha te hiˈoraa e haapapu ra i te paari o te faaiteraa i te hitahita ore?
8 Ei faahohoˈaraa i te paari o te faatupuraa i te hitahita ore, te vai ra te hiˈoraa o te hoê Ite no Iehova o te tiai noa ra i te fare moni a haere mai ai te hoê taata na mua mai ia ˈna. Noa ˈtu e ua haapeapea rii te reira i te Ite, ua faaite oia i te hitahita ore. I taua mahana ra, e haere atu o ˈna e farerei i te tahi taata toroa i te pae no te paturaa fare ia tarima oia i te mau hohoˈa fare no te hoê Piha o te Basileia. O vai taua taata ra? O te taata iho ïa o tei na mua mai ia ˈna i te fare moni! Mea maitai roa taua taata ra, hau atu râ, ua faaaufau oia i te Ite i te hoê tino moni hoê i nia i te ahuru iti aˈe i te moni matauhia. Ua oaoa roa taua Ite nei i to ˈna faaiteraa i te hitahita ore na mua ˈtu i taua mahana ra, ma te ore e riri vave noa!
9. Eaha te haerea paari ia farerei tatou i te faainoraa i roto i te taviniraa?
9 E rave rahi taime ia haere anaˈe tatou na te mau fare no te poro i te parau apî maitai o te Basileia o te Atua aore ra ia tia noa tatou na nia i te mau aroâ ma te tamata i te huti i te ara-maite-raa o te feia e hahaere noa ra i nia i ta tatou poroi, e farerei tatou i te feia parau ino. Eaha ïa te haerea o te paari? Teie te aˈoraa paari e horoahia ra i roto i te Maseli 15:1: “O te parau mǎrû ra tei faaore i te riri.” Oia hoi, e tia mau â ia tatou ia faatupu i te hitahita ore. E ere noa te mau Ite no Iehova o tei ite e e parau mau te reira, o te tahi atoa râ mau taata. Te ite noa ˈtura te feia no te toroa rapaauraa i te faufaa o te hitahita ore no te rapaau i te maˈi.
Te tauturu o te here miimii ore
10, 11. No te aha te aroha e riro ai ei tauturu mau no te faaite i te hitahita ore?
10 Te faaite ra te faataaraa a Paulo no nia i te aroha i roto i te Korinetia 1, 13:4-8 e e nehenehe to ˈna puai e tauturu ia tatou ia faatupu i te hitahita ore. “E faaoromairaa roa to te aroha.” E titau te faaoromai i te hitahita ore. “E ore te aroha e feii; e ore te aroha e faarahi, e ore hoi e faaahaaha.” E tauturu te huru maitai o te here ia tatou ia haavî i to tatou mau manaˈo e to tatou mau manaˈo putapû, no te aro i te mau hinaaro atoa e feii, e faarahi, aore ra e faaahaaha. E turai te aroha ia tatou ia faatupu i te haerea taa ê roa, ma te faariro ia tatou ei feia haehaa, e te mǎrû, mai ia Iesu iho.—Mataio 11:28-30.
11 Te na ô faahou ra o Paulo e “eita [te aroha] e rave i te mea au ore.” E titau-atoa-hia te hitahita ore no te ohipa ma te au maitai i te mau taime atoa. Na te here e tauturu ia tatou ia haapae i te nounou, i te ‘imi-noa-raa i te maitai no tatou iho.’ “Eita [te aroha] e riri vave.” Mea ohie roa hoi ia riri i te parau aore ra te ohipa a vetahi ê! Teie râ, e tauturu te aroha ia tatou ia faatupu i te hitahita ore e ia ore e parau aore ra e rave i te mau mea o ta tatou e tatarahapa i muri iho. “Eita [te aroha] e manaˈo ino ia vetahi ê.” E turai te natura taata ia tapea i te riri aore ra ia atuatu i te inoino. Teie râ, e tauturu te aroha ia tatou ia tatara i taua mau huru manaˈo ra i roto i to tatou feruriraa. “Eita [te aroha] e oaoa i te parau-tia ore.” E titauhia te hitahita ore no te ore e au i te mea tia ore ra, mai te mau hohoˈa faufau aore ra te mau hohoˈa teata hairiiri. “E tiai” atoa te aroha “i te mau mea atoa ra” e “e haamahu i te mau mea atoa ra.” E titauhia te hitahita ore no te faaruru i te mau ohipa, no te faaoromai i te mau fifi aore ra te mau ohipa teimaha e ia ore e vaiiho i te reira ia haaparuparu ia tatou, ia turai ia tatou ia tahoo atu, aore ra ia faahema ia tatou ia faarue i te taviniraa ia Iehova.
12. Eaha hoê o te mau ravea no te faaite i to tatou mauruuru no te mau mea atoa ta te Atua ra o Iehova e o Iesu Mesia i rave no tatou?
12 Mai te peu e e here mau tatou i to tatou Metua i te raˈi ra e ia haafaufaa tatou i to ˈna mau huru faahiahia mau e te mau mea atoa o ta ˈna i rave no tatou, e hinaaro ïa tatou e faaoaoa ia ˈna na roto i te faatupuraa i te hitahita ore i te mau taime atoa. Oia atoa, mai te peu e e here mau tatou i to tatou Fatu e to tatou Orometua o Iesu Mesia, e ia haafaufaa tatou i te mau mea atoa o ta ˈna i rave no tatou, e pee ïa tatou i ta ˈna faaueraa oia hoi ‘e rave i ta tatou pou haamauiuiraa e a pee atu ai ia ˈna ma te ore e faaea.’ (Mareko 8:34) E titau mau â te reira e ia faaite tatou i te hitahita ore. E tapea atoa te here i to tatou mau taeae e mau tuahine kerisetiano ia tatou ia haamauiui ia ratou na roto i te tahi haerea miimii.
Te tauturu o te faaroo e te haehaa
13. No te aha te faaroo e nehenehe ai e tauturu ia tatou ia faatupu i te hitahita ore?
13 Te tahi atu tauturu rahi no te faatupu i te hitahita ore, o te faaroo ïa i te Atua e i roto i ta ˈna mau parau tǎpǔ. E tauturu te faaroo ia tatou ia tiaturi ia Iehova e ia tiai i te taime o ta ˈna i faataa no te faatitiaifaro i te mau ohipa. Ua faahiti atoa te aposetolo Paulo i teie manaˈo ia ˈna i parau i roto i te Roma 12:19: “E au mau here e, eiaha outou e tahoo, . . . ua papaihia hoi e, Te parau maira Iehova, Ei ia ˈu te riri, na ˈu ïa e tahoo atu.” I roto i teie tuhaa, e nehenehe atoa te haehaa e tauturu ia tatou. Mai te peu e mea haehaa tatou, eita tatou e riri vave noa no te tahi mau faainoraa mau aore ra tei manaˈo-noa-hia. Eita tatou e rave vave noa i te ture i roto i to tatou rima, e faaite râ tatou i te hitahita ore e e farii tatou i te tiai ia Iehova.—A faaau e te Salamo 37:1, 8.
14. Eaha te hiˈoraa e faaite ra e e nehenehe te hitahita ore e noaa mai i te feia e erehia ra i te reira?
14 Te haapapuhia ra e e nehenehe tatou e haapii i te faatupu i te hitahita ore na roto i te hiˈoraa o te hoê taata riri ohie noa. No to ˈna ino, i to te mau mutoi faaararaahia no te mea ua faatupu raua to ˈna metua tane i te tahi taputôraa, ua moto oia e toru mutoi hou oia e vî ai i te tahi atu mau mutoi! Teie râ, ua farerei oia i te mau Ite no Iehova i muri iho e ua haapii oia i te faatupu i te hitahita ore, hoê o te mau hotu o te varua o te Atua. (Galatia 5:22, 23) I teie mahana, e 30 matahiti i muri iho, te tavini noa râ teie taata ia Iehova ma te haapao maitai.
Te hitahita ore i roto i te utuafare fetii
15, 16. (a) Na te aha e tauturu i te hoê tane ia faaite i te hitahita ore? (b) E titauhia te hitahita ore i roto i teihea huru tupuraa, ia au i teihea hiˈoraa? (c) No te aha te vahine e titau ai i te hitahita ore?
15 Oia mau, e titauhia te hitahita ore i roto i te utuafare fetii. Ia here te hoê tane i ta ˈna vahine mai ta ˈna e here ia ˈna iho, e tia ia ˈna ia haavî i to ˈna mau manaˈo, ta ˈna mau parau, e ta ˈna mau ohipa. (Ephesia 5:28, 29) Oia mau, e tia i te mau tane ia faaite i te hitahita ore no te pee i teie mau parau a te aposetolo Petero i roto i te Petero 1, 3:7: “Oia atoa hoi outou, e te mau tane, e parahi ia ratou ra ma te ite.” Mai te peu iho â râ e aita ta ˈna vahine i roto i te parau mau, e tia i te tane faaroo ia faaite i te hitahita ore.
16 Ei hiˈoraa: Te vai ra te hoê matahiapo aita ta ˈna vahine i roto i te parau mau e mea ino roa o ˈna. Ua faaite râ oia i te hitahita ore, e i te mea e ua haamaitai-rahi-hia o ˈna, ua parau roa ˈˈera ta ˈna taote ia ˈna e: “John, e piti huru, peneiaˈe e taata faaoromai rahi mau â oe, aore ra e mana puai mau to ta oe haapaoraa.” E haapaoraa mana puai mau â ta tatou, inaha, “e ere hoi i te aau taiâ ta te Atua i horoa mai no tatou, i te aau itoito râ, e te aroha, e te haapao maitai,” ia nehenehe tatou e faaite i te hitahita ore. (Timoteo 2, 1:7) Oia atoa, e titau atoa te vahine i te hitahita ore no te auraro, mai te peu iho â râ e aita ta ˈna tane i roto i te parau mau.—Petero 1, 3:1-4.
17. No te aha e mea faufaa roa te hitahita ore i roto i te mau taairaa i rotopu i te metua e te tamarii?
17 E titau-atoa-hia te hitahita ore i roto i te mau taairaa i rotopu i te metua e te tamarii. Ia ite te mau tamarii i te aˈo ia ratou iho, e tia na mua i te mau metua ia horoa i te hiˈoraa maitai. E ia aˈo-anaˈe-hia te tamarii na roto i te tera aore ra tera ravea, e tia ia horoa i te reira ma te hau e te here, o te titau hoi i te hitahita ore rahi. (Ephesia 6:4; Kolosa 3:21) I reira atoa, ia faaite te mau tamarii e te here mau ra ratou i to ratou mau metua, e titauhia te auraro, e no te auraro, e titauhia ïa te hitahita ore.—Ephesia 6:1-3; a faaau e te Ioane 1, 5:3.
Te faaohiparaa i te tauturu ta te Atua e horoa maira
18-20. Eaha te mau ravea e toru te tia ia tatou ia faaohipa no te faatupu i te mau huru maitatai o te tauturu ia tatou ia faaite i te hitahita ore?
18 Ia haere tatou i mua ma te mǎtaˈu i te Atua, te here miimii ore, te faaroo, te ririraa i te ino, e te hitahita ore, e tia ia tatou ia huti i te faufaa no roto mai i te tauturu atoa o ta te Atua ra o Iehova i horoa mai. E hiˈo anaˈe na e toru ravea i te pae varua o te nehenehe e tauturu ia tatou ia faatupu i te hitahita ore. A tahi, te vai ra te ravea faufaa mau o te pure. Eiaha ia moehia ia tatou i te pure no te mea mea rahi roa ta tatou ohipa. Oia mau, “eiaha e tuutuu i te pure,” e “tamau uˈana maite â i te pure.” (Tesalonia 1, 5:17; Roma 12:12) Ia faahiti anaˈe na tatou i te faahoturaa i te hitahita ore i roto i ta tatou mau pure. Teie râ, ia erehia tatou i te hitahita ore, e tia ia tatou ia ani ma te aau tatarahapa i to tatou Metua i te raˈi ra e ia faaore mai oia i ta tatou hapa.
19 Te piti o te ravea no te faaite i te hitahita ore, o te tauturu ïa e noaa mai na roto i te Parau a te Atua e te mau buka ia nehenehe tatou e taa i te auraa e e faaohipa i te mau Papai. Mea ohie roa hoi ia ore e haapao i teie tuhaa o ta tatou taviniraa moˈa! E tia ia tatou ia faatupu i te hitahita ore e ia tamau noa i te parau ia tatou iho e aita ˈtu buka maitai aˈe ia taio maoti râ te Bibilia e ta “te tavini haapao maitai e te paari” e horoa maira, e no reira, e tia ia tatou ia taio na mua roa ˈˈe i te reira. (Mataio 24:45-47) Ua tano roa te parau ra e, i roto i te oraraa, eita e nehenehe e rave i te mau ohipa atoa, e tia râ ia maiti i te mau ohipa o ta tatou e rave. E mau tane e mau vahine paari mau anei tatou i te pae varua? Mai te peu e te taa ra ia tatou i to tatou mau hinaaro i te pae varua, e haavî ïa tatou ia tatou iho no te tupohe i te afata teata e no te faaineine i ta tatou mau putuputuraa aore ra no te taio i Te Pare Tiairaa apî o tei tae mai na te fare rata mai.
20 A toru, te vai ra te haapaoraa i te mau putuputuraa a te amuiraa e te mau tairururaa rahi. Te tutava ra anei tatou ia ore roa ˈtu tatou e mairi i te hoê noa ˈˈe o teie mau haaputuputuraa? E haere anei tatou ma te ineine no te pahono e te na reira mau ra anei tatou? Ia au i ta tatou haapaoraa i te mau putuputuraa, i reira ïa tatou e haapuaihia ˈi i roto i to tatou hinaaro e faatupu i te hitahita ore i roto i te mau huru tupuraa atoa.
21. Eaha vetahi o te mau haamaitairaa o ta tatou e nehenehe e fanaˈo na roto i te faatupuraa i te hotu o te varua oia hoi te hitahita ore?
21 Eaha te mau haamaitairaa e noaa ia rohi mau â tatou i te faatupu i te hitahita ore i te mau taime atoa? A tahi, eita roa ˈtu tatou e ooti mai i te mau hotu iino o te miimii. E noaa mai te faatura ia tatou iho e te haava manaˈo mâ. E tiamâ mai tatou i te mau fifi e rave rahi e e faaea noa tatou i nia i te eˈa o te ora. Hau atu, e nehenehe tatou e hamani maitai rahi ia vetahi ê. E hau atu â, e pee tatou i te Maseli 27:11 e na ô ra e: “E tau tamaiti, ia paari hoi oe, ia oaoa tau aau, ia tia ia ˈu ia patoi atu i tei faaino mai ia ˈu nei.” Eaha ˈtu te haamaitairaa rahi roa ˈˈe e noaa mai ia tatou—maoti râ te faufaa taa ê e faaoaoa i te mafatu o to tatou Metua here ra i te raˈi, o Iehova!
Te haamanaˈo ra anei outou?
◻ Nafea te mǎtaˈu i te Atua ia tauturu ia tatou ia faaite i te hitahita ore?
◻ No te aha te here e tauturu ai ia tatou ia faaite i te hitahita ore?
◻ Nafea te hitahita ore ia tauturu i roto i te mau taairaa fetii?
◻ Eaha te mau ravea te tia ia tatou ia faaohipa maitai ia faatupu tatou i te hitahita ore?
[Hohoˈa i te api 23]
Ua faaite o Iosepha i te hitahita ore i to ˈna faahemaraahia
[Hohoˈa i te api 25]
E titau te aˈoraa i te tamarii ma te hau e te here i te hitahita ore mau