Te hitahita ore—No te aha e mea faufaa roa te reira?
“E ia tupu te reira, e faaitoito hua i te apiti atoa to outou faaroo i te mǎtaˈu ore; te mǎtaˈu ore hoi, i te ite; te ite hoi, i te hitahita ore.”—PETERO 2, 1:5, 6.
1. Eaha te ohipa faahiahia mau no nia i te haavîraa o tei ravehia i te senekele 19?
MA TE feaa ore, hoê o te mau hiˈoraa maere roa ˈˈe o te haavîraa i te tino, o ta Charles Blondin ïa i horoa i te afaraa hopea o te senekele 19. Ia au i te hoê faataaraa parau, ua haere oia na nia i te mau toparaa pape Niagara e rave rahi taime, te taime matamua i te matahiti 1859, na nia i te hoê taura e 340 metera te roa e e 50 metera i nia ˈˈe i te pape. I muri aˈe, ua na reira faahou oia ma te rave i te tahi ohipa aravihi apî: ma te tapohia te mata, i roto i te hoê pute, ma te turai i te hoê pereoo iti, i nia i te rore, e ma te amo i te hoê taata i nia i to ˈna tua. I te tahi atu taime, ua ouˈa oia i nia i te rore i nia i te hoê taura i hutihia e 52 metera i nia ˈˈe i te fenua. No te tapea i teie huru aifaitoraa, e titauhia te aravihi rahi no te haavî i to ˈna tino. Ei haamauruururaa, ua tui te roo o Blondin e ua monihia oia.
2. Eaha te tahi atu mau ohipa o te titau ra i te haavîraa i te tino?
2 Noa ˈtu e mea iti roa o te nehenehe e rave i teie mau huru ohipa, ua ite tatou paatoa i te faufaaraa o te haavîraa i te tino no te rave i te mau toroa aravihi aore ra te ohipa faaetaetaraa tino. Ei hiˈoraa, ia ˈna i faataa i te aravihi o te taata hauti piana o Vladimir Horowitz tei pohe i teie nei, ua parau te hoê taata hauti upaupa e: “Te mea o ta ˈu i haafaahiahia roa, o te haavîraa taatoa ïa o ta ˈna i faatupu . . . , te huru o te tahi puai manaˈo-ore-hia o tei vî ia ˈna.” Ua faahiti te tahi atu faataaraa parau no nia ia Horowitz i te parau no “e vau ahuru matahiti o te mau rima ieie mau o tei hope roa i te haavîhia.”
3. (a) Eaha te huru haavîraa fifi roa ˈˈe, e eaha to ˈna tatararaa? (b) Eaha te auraa o te parau heleni i hurihia na roto i te parau ra “hitahita ore” i roto i te Bibilia?
3 E titauhia te tutavaraa rahi no te faatupu i teie mau ohipa aravihi. Teie râ, mea faufaa e mea teimaha roa ˈtu â te hitahita ore. Ua faataahia te reira mai te “haavîraa e ravehia i nia i to ˈna iho mau manaˈo putapû, mau manaˈo horuhoru, aore ra mau hinaaro.” I roto i te mau Papai heleni kerisetiano, ua tatarahia te parau i hurihia na roto i te parau ra “hitahita ore” i roto i te Petero 2, 1:6 e i te tahi atu mau vahi, mai “te huru maitai o te taata o te haavî i to ˈna mau hinaaro e to ˈna mau manaˈo uˈana, to ˈna iho â râ mau hiaai navenave.” Ua faahitihia te hitahita ore o te taata tataitahi mai “te faito teitei roa ˈˈe i naeahia i te taata.”
No te aha e mea faufaa roa te hitahita ore
4. Eaha te mau hotu ta te ereraa i te hitahita ore i faatupu?
4 Mea atâta mau â te mau mea i noaa mai na roto i te ereraa i te hitahita ore! E rave rahi mau fifi i roto i te ao nei i teie mahana o tei faatupuhia na mua roa e te ereraa i te hitahita ore. Oia mau, tei roto tatou i “te anotau hopea,” i reira ‘e tupu te ati rahi.’ Eita te taata e faaite i te ‘hitahita ore,’ e mea pinepine no to ratou nounou, e hoê o to ˈna mau huru o te “hinaaro [ïa] i te mau mea e navenave ai ra aore hinaaro i te Atua.” (Timoteo 2, 3:1-5) Ua ite tatou i teie parau mau peapea na roto i te tiavaruraahia hau atu i te 40 000 feia hara i te auhoaraa o te amuiraa kerisetiano i roto i te matahiti taviniraa i mairi aˈenei, e te rahiraa no te haerea viivii mau. I teie mau taata, e tia ia apitihia e rave rahi o tei aˈohia, te rahiraa no te peu tia ore i te pae taatiraa, te taatoaraa râ no te mea ua erehia ratou i te hitahita ore. Mea peapea atoa ia ite e ua erehia vetahi mau taeae, mea maoro hoi to ratou riroraa ei matahiapo, i ta ratou mau hopoia tiaau no taua tumu atoa ra.
5. Nafea ia faahohoˈa i te faufaaraa o te hitahita ore?
5 E nehenehe te faufaaraa o te hitahita ore e faahohoˈahia e te hoê pereoo uira. I nia i te hoê pereoo, te vai ra e maha huira ia nehenehe oia e tere, te hoê matini puai ia ohu teie mau huira ma te vitiviti, e te mau tapearaa ia mau teie mau huira. Teie râ, e nehenehe te tahi ati e tupu mai te peu e aita e taata faahoro no te faaoti i te aveia o te mau huira, to ratou vitivitiraa, e afea râ ratou e tapea ˈi, na roto i te faatere-maitai-raa i te taoˈa faahoro, te taahiraa no te faaoioiraa i te tere, e te taahiraa no te tapea i te pereoo.
6. (a) Eaha te tatararaa no nia i te here o te tano atoa no te hitahita ore? (b) Eaha te tahi atu aˈoraa te tia ia tatou ia haamanaˈo?
6 E tia mau â ia tuu i te tapao i nia i te faufaaraa o te hitahita ore. E tano atoa te parau ta te aposetolo Paulo i faahiti i roto i te Korinetia 1, 13:1-3 no nia i te faufaaraa o te here, no te hitahita ore. Noa ˈtu eaha to tatou aravihi ia orero tatou i te parau, noa ˈtu eaha te ite e te faaroo i noaa mai ia tatou na roto i ta tatou mau haapiiraa maitatai, noa ˈtu eaha te ohipa o ta tatou e rave ra no te maitai o vetahi ê, mai te peu e eita tatou e faatupu i te hitahita ore, mea faufaa ore anaˈe ïa taua mau ohipa atoa ra. E tia ia tatou ia haamanaˈo i teie mau parau a Paulo: “Aita outou i ite e, o te feia horo i te hororaa e horo paatoa ïa, hoê roa râ e rave i te berabeio? E faaau i to outou hororaa ia noaa te berabeio. E te taata atoa e titau i te re ra, [e faatupu oia i te hitahita ore] i te mau mea atoa nei.” (Korinetia 1, 9:24, 25) No te tauturu ia tatou ia faatupu i te hitahita ore i te mau mea atoa nei, teie te faaararaa a Paulo i roto i te Korinetia 1, 10:12: “O tei manaˈo e te tia ra oia, e ara oia o te hiˈa.”
Te mau hiˈoraa tei riro ei faaararaa
7. (a) Nafea te ereraa i te hitahita ore i te aratairaa i te huitaata nei i nia i te eˈa ino? (b) Eaha te tahi atu mau hiˈoraa no te ereraa i te hitahita ore no tahito ra ta te mau Papai e horoa maira?
7 I to ˈna vaiihoraa i te mau manaˈo horuhoru maoti hoi i te feruriraa ia faatere i ta ˈna mau ohipa, ua erehia o Adamu i te hitahita ore. Ei faahopearaa, “i ô mai ai te ino i te ao nei, e no te ino hoi te pohe.” (Roma 5:12) Ua tupu atoa te taparahiraa taata matamua no te ereraa i te hitahita ore, inaha, ua faaara ˈtu te Atua ra o Iehova ia Kaina e: “Eaha oe i riri ai; e eaha hoi i tuatua ˈi to mata na? Te vai ra te taraehara i te uputa na. E auraro râ oia ia oe, e ei nia ˈˈe oe ia ˈna.” No te mea aita o Kaina i upootia i nia i te hara, ua taparahi pohe atura oia i to ˈna taeae o Abela. (Genese 4:6-12) Ua ere-atoa-hia te vahine a Lota i te hitahita ore. Aita hoi oia i patoi atu i te faahemaraa e hiˈo atu i muri. Eaha ˈtura te hopea o to ˈna ereraa i te hitahita ore? Ua pohe ïa oia!—Genese 19:17, 26.
8. Te mau ohipa i farereihia i teihea na feia tootoru no tahito ra, o te horoa maira i te mau faaararaa no nia i te faufaaraa o te hitahita ore?
8 Ua erehia o Reubena, te tamaiti matahiapo a Iakoba, i te tiaraa matahiapo no te mea aita oia i faatupu i te hitahita ore. Ua haaviivii oia i te roi o to ˈna metua tane na roto i te taotoraa e te hoê o te mau vahine a Iakoba. (Genese 35:22; 49:3, 4; Paraleipomeno 1, 5:1) No te mea ua riri o Mose i to te mau ati Iseraela tamataraa ia ˈna na roto i ta ratou ohumu, ta ratou amuamu, e to ratou orure hau, ua faaerehia oia i te haamaitairaa tiai-rahi-hia e a ˈna e tomo atu i roto i te Fenua i tǎpǔhia mai. (Numera 20:1-13; Deuteronomi 32:50-52) E tae noa ˈtu te arii haapao maitai ra o Davida, ‘te hoê taata i au i te mafatu o te Atua,’ ua roohia oia i te fifi rahi no to ˈna ereraa i te hitahita ore i te hoê taime. (Samuela 1, 13:14; Samuela 2, 12:7-14) Ua riro teie mau hiˈoraa atoa ei mau faaararaa tano roa e haapapu ra e e tia ia tatou ia faatupu i te hitahita ore.
Eaha te tia ia tatou ia haavî
9. Eaha vetahi mau irava e haamatara ra i te faufaaraa o te hitahita ore?
9 A tahi, e ohipa te hitahita ore i nia i to tatou mau manaˈo e mau manaˈo putapû. Mea pinepine te reira i te faahitihia i roto i te mau Papai na roto i te mau parau taipe mai te “mafatu” e te “tauupu.” Ia au i te mea i reira tatou e haamau ai i to tatou feruriraa, e tauturuhia aore ra e haafifihia tatou i roto i ta tatou tutavaraa no te faaoaoa ia Iehova. E titauhia te hitahita ore no te pee maite i te aˈoraa a te mau Papai i roto i te Philipi 4:8, oia hoi ia feruri maite tatou i te mau mea haavare ore, te au maitai, e te viivii ore. Ua faaite atoa te papai salamo ra o Davida i teie mau huru manaˈo i roto i te pure, i te na ôraa e: “E tiahia mai . . . te manaˈo o tau aau, i mua i te aro, e Iehova, e tau haapuraa e tau ora.” (Salamo 19:14) E titau te ahururaa o te ture—eiaha e nounou i ta vetahi ê ra taoˈa—i te haavîraa i to ˈna mau manaˈo. (Exodo 20:17) Ua haamatara o Iesu i te faufaaraa ia haavî i to tatou mau manaˈo e to tatou mau manaˈo putapû i to ˈna parauraa e: “O te hiˈo noa ˈtu i [ta] vetahi ê ra vahine ei faatupu i te hinaaro, ua faaturi ïa ia ˈna i to ˈna ihora aau.”—Mataio 5:28.
10. Eaha te mau irava bibilia o te haapapu ra i te faufaaraa o te haavîraa i ta tatou huru paraparauraa?
10 E ohipa atoa te hitahita ore i nia i ta tatou mau parau, ta tatou huru paraparauraa. Oia mau, e rave rahi mau irava o te aˈo ra ia tatou ia haavî i to tatou arero. Ei hiˈoraa: “Tei te mau raˈi hoi te Atua, tei te fenua nei hoi oe, a rii rea ˈˈe hoi ta oe parau ia parau.” (Koheleta 5:2) “Te rahi ra te parau ra, eita e ore te hara; i parauhia ˈi e paari to ˈna to tei tapea i to ˈna vaha.” (Maseli 10:19) “Eiaha ei parau faufau to roto mai i to outou vaha, ei parau maitai râ, e tupu ai te maitai au ra . . . Ia haapae-roa-hia . . . te avau e te faaino.” E te horoa faahou ra o Paulo i te aˈoraa ia haapae tatou i te paraparauraa maamaa e te parau hauti faufau.—Ephesia 4:29, 31; 5:3, 4.
11. Mea nafea to Iakobo faataaraa i te fifi o te haavîraa i te arero?
11 Ua faahapa o Iakobo, te taeae o Iesu, i te paraparauraa haapaoraa ore e ua faaite oia e mea fifi roa ia haavî i te arero. Te na ô ra oia e: “Oia atoa te arero nei, e melo iti haihai ïa, e faaahaaha rahi râ ta ˈna. A hiˈo na i te rahi o te vahie e amâ i te auahi iti haihai ra! E auahi atoa te arero nei, e pueraa no te mau ino atoa ra, e viivii te tino atoa nei i te arero, o te huru ïa o to ˈna vairaa i roto i te mau melo nei, i tuia oia iho i te auahi o te po, e te ura nei te mau haerea atoa a te taata i te oraraa nei ia ˈna. E vi anaˈe te mau puaa taehae, e te manu, e te puhi taehae, e te mau mea atoa o te tai ra, ua hope ê na ïa i te haavihia e te taata nei. Area te arero nei, aore ïa e taata e vi ai te reira, e ino morohi ore ïa, ua î i te hora pohe. Te haamaitai nei tatou i te Atua ra i to tatou Metua i te reira: e te faaino nei tatou i te taata tei hamanihia i to te Atua ra hohoˈa i te reira. No roto i taua vaha hoê nei te haamaitai, e te faaino. Eiaha roa te tia te reira, e au mau taeae e.”—Iakobo 3:5-10.
12, 13. Eaha vetahi mau irava o te faaite ra i te faufaaraa o te haavîraa i ta tatou mau ohipa e to tatou haerea?
12 Oia mau, e ohipa te hitahita ore i nia i ta tatou mau ohipa. Hoê tuhaa i reira e titauhia ˈi te hitahita ore rahi, o to tatou ïa mau auraa e te tane aore ra te vahine. Teie te faaueraa i horoahia i te mau kerisetiano: “E maue ê atu i te faaturi.” (Korinetia 1, 6:18) Te aˈohia ra te mau tane ia taotia i to ratou hinaaro i te pae taatiraa i ta ratou iho vahine, te na ôhia ra hoi e: “E inu i te pape i ta oe ihora farii, e te pape tahe ra no roto i ta oe ihora apoo.” (Maseli 5:15-20) Te parauhia ra tatou ma te maramarama maitai e “e haava hoi te Atua i te poreneia e te faaturi ra.” (Hebera 13:4) E titau-taa-ê-hia te hitahita ore e te feia e hinaaro e faaea taa noa.—Mataio 19:11, 12; Korinetia 1, 7:37.
13 Ua haapoto noa Iesu i te taatoaraa o te parau no nia i to tatou haerea i nia i to tatou taata-tupu ia ˈna i faahiti i te “Ture Auro,” e na ô ra e: “E te mau mea atoa ta outou i hinaaro ia vetahi ê ra, e na reira atoa ˈtu outou ia ratou; o ta te ture ïa e ta te mau peropheta.” (Mataio 7:12) Oia mau, e titauhia te hitahita ore ia ore tatou e vaiiho i to tatou mau hinaaro miimii aore ra te mau faaheporaa aore ra te mau faahemaraa no rapaeau ia turai ia tatou ia faaite i nia ia vetahi ê i te hoê haerea ê atu i ta tatou e hinaaro ra ia faaite mai ratou i nia ia tatou.
14. Eaha te aˈoraa ta te Parau a te Atua e horoa ra no nia i te maa e te inu?
14 Te vai atoa ra te faatupuraa i te hitahita ore i te pae no te maa e te inu. Te horoa maira te Parau a te Atua i teie aˈoraa paari: “Eiaha oe e amui atoa i te feia i taero i te uaina ra; i roto i te feia oehamu tiaâ ra.” (Maseli 23:20) No nia iho â râ i to tatou anotau, ua faaara o Iesu e: “E ara râ ia outou, o te teimaha outou i te rahi o te maa e te taero, e te peapea o teie nei ao, a roohia mai ai outou e taua mahana ra aore i manaˈohia. E roohia mai hoi to te ao atoa nei i te reira mai te marei ra.” (Luka 21:34, 35) Oia mau, e ohipa te hitahita ore i nia i to tatou mau manaˈo e to tatou mau manaˈo hohonu, e tae noa ˈtu i nia i ta tatou mau parau e ta tatou mau ohipa.
No te aha te hitahita ore e riro ai ei tamataraa fifi mau
15. Nafea te mau Papai e faaite ai e te vai mau ra te patoiraa a Satani i nia i te hitahita ore o te mau kerisetiano?
15 Eita te hitahita ore e tupu ohie no te mea, mai ta te mau kerisetiano atoa i ite, e toru mana puai mau o te haafifi ra ia tatou ia faaohipa tatou i te hitahita ore. A tahi, te vai ra o Satani e ta ˈna mau demoni. Te haapapu ra te mau Papai e te vai mau ra ratou. Inaha, te taio nei tatou e “ua tomo maira Satani i roto” ia Iuda hou oia i haere atu ai e hoo ia Iesu. (Ioane 13:27) Ua ani atu te aposetolo Petero ia Anania e: “Eaha to aau i riro roa ˈi ia Satani, i haavare ai oe i te [varua moˈa]?” (Ohipa 5:3) Ma te tano roa, ua faaara atoa o Petero e: “E haapao maitai, e faaitoito, te hahaere nei hoi to outou enemi o te diabolo, mai te liona uuru ra, i te imiraa i te taata e pau ia ˈna ra.”—Petero 1, 5:8.
16. No te aha e tia ˈi i te mau kerisetiano ia faatupu i te hitahita ore i mua i teie nei ao?
16 I roto i ta ratou mau tutavaraa no te faatupu i te hitahita ore, e tia atoa i te mau kerisetiano ia aro atu i teie nei ao o tei raro aˈe ‘i te mana o taua varua ino ra,’ te Diabolo ra o Satani. No nia i teie ohipa, ua papai te aposetolo Ioane e: “Eiaha e hinaaro i teie nei ao, e te mau mea atoa o teie nei ao. O te taata i hinaaro i teie nei ao ra, aore te hinaaro i te Metua ra i roto ia ˈna. O te mau mea atoa o teie nei ao, o te hinaaro tia ore o te tino nei, e te hinaaro tia ore o te mata nei, e te ahaaha o te oraraa nei, e ere ïa i to ǒ mai i te Metua ra, no teie nei ao anaˈe ïa. E te mou nei hoi teie nei ao, e ta to te ao atoa e hinaaro nei; o tei haapao râ i to te Atua ra hinaaro, e tia ïa i te oraraa e a muri noa ˈtu.” Mai te peu e eita tatou e faatupu i te hitahita ore e e patoi uˈana ˈtu i te mau hinaaro atoa e here i te ao nei, e topa ïa tatou i raro aˈe i to ˈna mana, mai ta Dema, te hoê hoa rave ohipa o Paulo, i rave.—Ioane 1, 2:15-17; 5:19; Timoteo 2, 4:10.
17. Ua fanauhia tatou e teihea fifi i taaihia i te hitahita ore?
17 Ei mau kerisetiano, e titau atoa tatou i te hitahita ore no te upootia i nia i te mau paruparu o to tatou tino e ta tatou mau hapa. Eita tatou e nehenehe e ape i te mea e e “ino noâ te manaˈo o to te taata aau mai to ˈna tamariiriiraa mai â.” (Genese 8:21) Mai te arii ra o Davida, ‘ua fanauhia tatou ma te hara, e i tôhia tatou e to tatou metua vahine ma te ino.’ (Salamo 51:5) Aita te hoê pepe aruaru i ite e eaha te hitahita ore. Ia hinaaro oia i te tahi mea, e taˈi noa oia e tae roa ˈtu i te taime e noaa mai ai ia ˈna. Te faataa ra te hoê tumu parau no nia i te haapiiraa i te tamarii e: ‘Mea taa ê roa te huru feruriraa o te tamarii e to te feia paari. E haapao noa te mau tamarii ia ratou iho e mea pinepine eita ratou e farii i te haaferuriraa aravihi roa ˈˈe no te mea eita ta ratou e nehenehe e “taa i te huru o te tahi atu taata.”’ Oia mau, “ua mau roa te maamaa i roto i te aau o te tamarii.” Teie râ, ia faaohipahia ‘te papai o te aˈo,’ e haapii mǎrû noa oia e te vai ra te mau ture te tia ia ˈna ia auraro e e tia ia haapae i te miimii.—Maseli 22:15.
18. (a) Ia au i te parau a Iesu, eaha te mau huru e vai ra i roto i te mafatu taipe? (b) Eaha te mau parau a Paulo e faaite ra e ua taa ia ˈna te fifi o te faatupuraa i te hitahita ore?
18 Oia mau, no to tatou mau huru miimii mai to tatou nainairaa mai â, e tia ia tatou ia rohi puai no te faatupu i te hitahita ore. Tei roto teie mau huru to tatou i te mafatu taipe, ta Iesu hoi i parau e: “No roto mai hoi i te [mafatu] te manaˈo iino, te taparahi taata, e te faaturi, te poreneia, e te eiâ, te haavare, e te faaino.” (Mataio 15:19) No reira o Paulo i papai ai e: “O te maitai hoi ta ˈu i hinaaro ra, aore ïa vau i rave: area te ino hinaaro-ore-hia e au ra, o ta ˈu ïa e rave nei. Te rave nei au i te mea hinaaro-ore-hia e au ra, e ere ïa vau tei rave ra, o te ino râ i vai i roto ia ˈu nei ra.” (Roma 7:19, 20) Teie râ, e ere teie i te aroraa faufaa ore, inaha, ua papai atoa o Paulo e: “Te moto nei râ vau i tau tino ia vi; o te riro noa ˈtu hoi au o tei aˈo ia vetahi ê ra, ei taata ite-ore-hia mai.” E titau te motoraa i to ˈna tino i te hitahita ore.—Korinetia 1, 9:27.
19. No te aha Paulo e nehenehe ai e parau e ua moto oia i to ˈna tino?
19 Ua tano mau â o Paulo i te parauraa e e moto oia i to ˈna tino, no te mea ua haafifihia te faatupuraa i te hitahita ore na roto e rave rahi mau fifi o te tino, mai te neˈiraa toto puai, te iria, te varea-ore-raa i te taoto, te mauiui upoo, te topa-ore-raa te maa, e te tahi atu â. I roto i te tumu parau i muri nei, e tuatapapa tatou i te mau huru maitatai e te mau ohipa o te tauturu ia tatou ia faatupu i te hitahita ore.
Te haamanaˈo ra anei outou?
◻ Eaha te faufaaraa o te hitahita ore?
◻ Eaha vetahi mau hiˈoraa no te feia i roohia i te fifi no te mea ua erehia ratou i te hitahita ore?
◻ E tia ia tatou ia faaite i te hitahita ore i roto i teihea mau tuhaa?
◻ Eaha na enemi e toru o te haafifi ra ia tatou ia faatupu i te hitahita ore?
[Hohoˈa o Charles Blondin i te api 16]
[Faaiteraa i te tumu]
Historical Pictures Service
[Hohoˈa i te api 18]
E tia i te mau kerisetiano ia faaite i te hitahita ore i te pae no te maa e te inu
[Hohoˈa i te api 19]
E tauturu te hitahita ore ia tatou ia haapae i te paraparauraa ino