Te mau faahohoˈaraa—Te ravea no te haaputapû i te mafatu

TE HORO ra o Davida ia ore oia ia pohe. O Saula to ˈna enemi, te arii i faatahinuhia i nia ia Iseraela. Teie râ, e riri rahi to Saulo ia Davida, e pohehae uˈana to ˈna. I roto i ta ˈna aˈuaˈuraa no te taparahi ia Davida, ua aratai mai te arii e 3 000 faehau. I te mea e mea iti roa ratou, ua tapuni aˈera o Davida e ta ˈna mau taata i roto i te hoê ana i roto i te medebara.

A haapue noa ˈi o Davida e ta ˈna mau taata i roto i te poiri, ua tupu aˈera te hoê ohipa huru ê roa. Ua tomo maira te arii ra o Saula i roto i te ana no te titio. Ua haere mǎrû noa maira o Davida i pihai iho i to ˈna enemi paruru-ore-hia ra, e ta ˈna mauhaa i roto i te rima. Tera râ, i te maere rahi o te mau taata a Davida, aita o ˈna i taparahi i te arii. Ua tâpû noa mai o ˈna i te hiti ahu o Saula. Ma te tatarahapa i ta ˈna ohipa i rave, ua parau aˈera o Davida e: “Ia faaore mai hoi Iehova eiaha vau ia na reira i tau fatu, i ta Iehova ra taata i faatahinuhia ra; eiaha tau rima ia rave noa ˈtu ia ˈna, o tei faatahinuhia hoi oia e Iehova ra.”—Samuela 1, 24:1-6.

Te faataa maira teie aamu a te Bibilia i te hoê haapiiraa hohonu roa no nia i te faaturaraa i te mana no ǒ mai i te Atua ra. E haaputapû atoa te reira i te mafatu, hau atu â paha i te hoê aˈoraa papu. O te puai ïa te reira o te mau aamu i papaihia i roto i te Parau a te Atua ia noaa ia tatou i te ite.—Roma 15:4.

Oia atoa, te faaitoito nei te mau Ite no Iehova i te rave hau atu â i te faaite-noa-raa i te parau ia poro ratou i te parau apî maitai, ia aratai ratou i te mau haapiiraa bibilia, ia horoa ratou i te mau oreroraa parau niuhia i nia i te mau Papai, aore ra ia poro ratou i te taime faanaho-ore-hia e te amuiraa. Te tamata nei ratou i te haaputapû i te mafatu na roto i te faatiaraa i te mau aamu e te faaohiparaa i te mau faahohoˈaraa. Te na ô ra ta ratou Buka no te Haapiiraa o te taviniraa teotaratia e: “E faaara te mau faahohoˈaraa i te anaanatae e e haamatara atoa i te mau manaˈo faufaa roa ˈˈe. E faaitoito ratou i te feruriraa o te taata e e faaohie atoa ia ˈna ia taa i te mau manaˈo apî. E faatuati te mau faahohoˈaraa maiti-maitai-hia i te aminamina o te feruriraa e te putapûraa o te mau manaˈo hohonu. . . . I te tahi taime, e nehenehe te hoê faahohoˈaraa e faaohipahia no te ape i te manaˈo oti noa aore ra te manaˈo hape.”a—Api 168.

I roto i ta ˈna buka Te mau tuhaa faufaa roa ˈˈe o te paraparauraa i mua i te taata (beretane), teie ta Warren DuBois i papai: “Ia faaite te hoê taata papai aore ra te hoê taata orero i to ˈna mau manaˈo na roto i te mau ohipa aore ra te mau parau a te tahi mau taata, e riro ïa te tumu parau haumani roa ˈˈe ei aamu oraora maitai e te anaanatae.” No reira, ia faataa ratou i te poroi faaora o te haaputapû ê na, ma te oraora maitai e te anaanatae, e riro ïa te reira i te tauturu i te mau tavini kerisetiano ia haaputapû i te mafatu.

Te mau faahohoˈaraa o te riro ei haapiiraa

Eaha te mau faahohoˈaraa aravihi roa ˈˈe? Mea pinepine, o te faahohoˈaraa ïa i niuhia i nia i te tahi ohipa ta te feia e faaroo ra e nehenehe e taa ohie noa. Ua vaiiho mai o Iesu Mesia i te hoê hiˈoraa maitai roa. I roto i ta ˈna Aˈoraa i nia i te Mouˈa, ua faahiti Iesu i te mau mea ohie roa mai te miti, te mau lamepa, e te mau manu. (Mataio 5:1–7:29) Ei hiˈoraa, ua taa i te mau taata atoa i te mau lamepa o te ama ra i te hinu olive e o tei tuuhia i te tahi mau taime i nia i te vairaa lamepa. No reira, ua taa oioi noa ïa i te mau pǐpǐ a Iesu e e tia ia ratou ia amo i te maramarama i te pae varua i to ˈna parauraa ˈtu ia ratou e: “E ore hoi te taata nei e tutui i te lamepa a tuu ai i raro aˈe i te farii, ei nia râ i te vairaa ra; ia maramarama to te fare atoa ra. Oia atoa to outou maramarama, ia anaana ïa i mua i te aro o te taata nei, ia hiˈo ratou i ta outou parau maitai, e ia haamaitai i to outou Metua i te ao ra.” (Mataio 5:15, 16) E tauturu te mau faahohoˈaraa ohie o te tuea maitai i te hoê tumu parau, i te mau tavini kerisetiano ia haapapu i te mau manaˈo e te mau haapiiraa a te Bibilia.

Peneiaˈe paha, te mau faahohoˈaraa puai roa ˈˈe a Iesu, no nia ïa i te mau taata. A hiˈo na i te mau faahohoˈaraa i faatiahia i roto i te mau pene 15 e te 16 a Luka. Ua faahapa te mau papai parau e te mau Pharisea ia Iesu no te mea ua farii oia i te feia hara e te mau telona. Ei pahonoraa, ua faatia ˈtura oia i te mau aamu putapû mau no nia i te mau taata. Ua faahiti oia i te hoê tiai mamoe tei itea mai ta ˈna mamoe i moe, te hoê vahine o tei itea mai ta ˈna moni i moe, te hoê tamaiti o tei hoˈi atu i te fare i muri aˈe i to ˈna haamâuˈaraa i ta ˈna faufaa, e te hoê tiaau parau-tia ore.

E nehenehe te hoê tavini kerisetiano e faaohipa maite i te mau faahohoˈaraa mau e farereihia i roto i te oraraa. Ei hiˈoraa, a tapao na e mea nafea to Alexander H. Macmillan, o tei ratere haere ei taata orero parau i roto e 60 matahiti, faataaraa i te parau mau bibilia no nia i te feia pohe. Na mua iti noa ˈˈe i te poheraa o to ˈna metua tane, e tiaturi na hoi e eita te nephe e pohe, ua tauaparau raua o Macmillan:

“Ua ani mai to ˈu metua tane i teie uiraa papu: ‘E ta ˈu tamaiti, e moemoe noa ïa vau i roto i te menema a tiai noa ˈtu ai ia haamata te basileia i ta ˈna ohipa no te aratairaa i te fenua i nia i te faito tia roa?’

“E uiraa teie aore e tia i te hoê taata apî ia pahono taue noa ˈtu i te hoê taata paari o tei ore roa ˈtu i tiaturi i taua manaˈo ra.

“Ei pahonoraa, ua ani atura vau ia ˈna: ‘Papa, ua taoto maitai anei oe inapo ra?’

“Ua pahono maira o ˈna e, ‘E, e ta ˈu tamaiti, ua taoto maitai au i muri aˈe i to te taote horoaraa mai i te mau huero raau no te faataoto ia ˈu.’

“‘Ua moemoe anei oe i to oe varearaa i te taoto?’

“‘Aita. Ahani e e nehenehe ta ˈu e taoto noa, eita ïa vau e mauiui faahou.’”

Ua taio atura o A. H. Macmillan i te Ioba 14:13-15 e te 3:17-19 i to ˈna metua tane e ua na ô atura: “Te taa ra ia oe, papa, te taoto noa ra te feia pohe e aita ratou e ite ra i te ohipa e tupu ra, no reira, nafea ïa ratou e moemoe ai?”

Auê ïa haapiiraa aravihi e! Mai te peu e e Ite no Iehova outou, e nehenehe atoa outou e faaohipa i te mau irava e te mau faahohoˈaraa no te haaputapû i te ara-maite-raa e te mafatu o te taata.

Te iteraa mai i te mau faahohoˈaraa

Tera râ, ihea roa outou e ite mai ai i te mau faahohoˈaraa aravihi aore ra te mau ohipa e farerei-mau-hia? E rave rahi o ta outou e nehenehe e huti mai i roto i to outou iho oraraa. Ei hiˈoraa, te hinaaro ra anei outou e faataa i te mau haamaitairaa o te faaroo, te mana o te pure, aore ra te oaoa o te taviniraa? Mai te peu e e kerisetiano pûpûhia outou, e nehenehe paha ïa outou e faatia i te mau ohipa o ta outou iho i farerei i roto i to outou oraraa. E nehenehe outou e faaroo i te mau aamu maitatai roa i te putuputuraa a te amuiraa aore ra ia tauaparau outou e te tahi atu mau kerisetiano. Aore ra e nehenehe outou e taio i te hoê aamu faaitoito mau i roto i te Buka matahiti a te mau Ite no Iehova. Inaha, te horoa maira te Buka faahororaa no nia i te mau papai a te Taiete Watch Tower i te mau aamu i neneihia no te ara mai.

Nafea outou ia faatia i te hoê aamu ma te aravihi? A tahi, ia faataa rii outou i te ohipa e tupu i muri iho, e nehenehe ïa outou e tapea i te ara-maite-raa o te feia e faaroo maira ia outou. E nehenehe outou e haamata i ta outou aamu i te na ôraa e: “Ua tamata roa te hoê pionie e mea nafea Iehova ia haamaitai i te feia e tiaturi ia ˈna.” I reira iho, e aniani te feia e faaroo maira e eaha râ te mau haamaitairaa ta teie pionie i fanaˈo. Na outou ïa e faaite atu.

A tamata i te faatia i te aamu na roto i ta outou iho mau parau. A horoa i te mau haamaramaramaraa, no te mea e haapuai te reira i te mana o te aamu. Ia faataa outou i te hoê hohoˈa papu no nia i te mau ohipa i tupu, e nehenehe ïa outou e faaitoito ohie noa i te feia e faaroo maira ia outou. Eiaha râ ia faahiti rahi roa i te parau inaha, e riro ratou i te ore e taa faahou e no te aha râ outou i faatia ˈi i teie aamu. Eiaha atoa ia faarahi roa no te mea noa ˈtu e e hau atu te anaanatae o te aamu, eita paha outou e tiaturihia. No reira atoa, eiaha e faaite i te parau o ta outou i faarooroo noa aore ra e faatia i te mau aamu o ta outou e ore e nehenehe e haapapu.

A faaoraora maitai i te Bibilia

E itehia te mau aamu aravihi roa ˈˈe i te pae no te haapiiraa i roto i te Bibilia. Ei hiˈoraa, ahiri e te hinaaro ra outou e faaite i te hoê taata e haapii ra i te Bibilia aore ra te hoê pǔpǔ taata e faaroo maira e e nehenehe te mau tamarii e turu i te pae o te Atua ra o Iehova. E maiti paha outou i te aamu o te tamahine, aita to ˈna iˈoa i faaitehia, o tei paraparau atu i te vahine a Naamana no nia i te peropheta a te Atua ra o Elisaia. A tahi, a taio i te aamu i roto i Te mau arii 2, 5:1-5. E nehenehe outou e ani i muri iho e: “Ia manaˈo outou, e ere anei i te mea fifi no teie tamahine ia tapea i to ˈna haapao maitai i te Atua i roto i te hoê fenua e haamoriraa hape to reira? Aita anei oia i faaite i te itoito no te paraparau ma te mǎtaˈu ore no nia ia Iehova e ta ˈna peropheta?”

Ia rave na mua outou i te mau maimiraa, e nehenehe ïa outou e faataa i te aamu ma te oraora maitai. E nehenehe outou e ite i te mau haamaramaramaraa faufaa i raro aˈe i te mau parau ra NAAMANA, ARAMA, e ELISAIA i roto i te Buka faahororaa no nia i te mau Papai a te Taiete Watch Tower. I roto i te tahi mau Bibilia, ua aratai paha te mau faahororaa i ropu i te api ia outou i te aamu a Te mau arii 2, i te Salamo 148:12, 13, e na ô ra e: “Te mau taata apî, e te mau paretenia; te mau taata paari, e te mau tamarii ra: o te reira te haamaitai i te iˈoa o Iehova; to ˈna anaˈe ra hoi te iˈoa ia faateitei: tei nia ê to ˈna hanahana i te fenua nei e te mau raˈi atoa ra.” Auê ïa faaitoitoraa no te mau taurearea atoa o te faaite i te parau a te Atua ma te mǎtaˈu ore!—Ohipa 4:29-31.

Ahiri e e tiaau kerisetiano outou, ‘a ara i ta outou haapiiraa.’ (Timoteo 1, 4:16) Eiaha noa e faaite i te parau mau—a faahohoˈa atoa râ. A faataa i te mau aamu bibilia ma te oraora maitai e te papu. A faaohipa i te mau aamu e te mau faahohoˈaraa e tano maitai. E mau ravea anaˈe hoi te reira no te haaputapû i te mafatu.

[Nota i raro i te api]

[Hohoˈa i te api 19]

Mai ia Iesu, e nehenehe te mau tavini kerisetiano o teie nei tau e faaohipa i te mau faahohoˈaraa oraora maitai no te faataa i ta ratou poroi e e haaputapû i te mafatu