O Iehova e te Mesia—E mau hiˈoraa faahiahia roa ˈˈe i te pae no te faatupuraa i te taairaa
“Aita a te Fatu ra a Iehova e peu i rave, maori râ ia faaite i ta ˈna parau i moe i tana ra mau tavini i te mau peropheta.”—AMOSA 3:7.
1. Eaha te mau ravea taairaa e faaohipahia nei i teie mahana?
I TEIE mahana, ua riro te mau ravea taairaa ei ohipa imiraa moni e faaohipa ra e rave rahi mirioni dala marite. Ua riro te mau buka atoa i neneihia, te mau vea atoa e pia-tamau-hia nei, te mau porotarama a te radio e te afata teata atoa e haapurorohia nei, e oia atoa te mau hohoˈa teata e te mau hautiraa teata, ei mau tutavaraa no te faatupu i te taairaa. Hoê â huru no te mau rata atoa e papaihia nei e e haponohia nei e te mau paraparauraa niuniu atoa. E mau tutavaraa anaˈe te reira no te faatupu i te taairaa.
2. Eaha te tahi mau hiˈoraa o te mau haereraa i mua ta te mau taata i rave i te pae no te mau ravea taairaa aravihi?
2 Mea faahiahia roa te mau haereraa i mua ta te taata i rave i te pae no te mau ravea taairaa aravihi. Ei hiˈoraa, e nehenehe te mau niuniu uraina, mea hau aˈe hoi i te mau niuniu veo, e faauta e rave rahi mau ahuru tausani paraparauraa niuniu i te hoê â taime. Te vai atoa ra te mau taairaa na roto i te mau taoˈa peeutari, e ohu noa ra na te hiti o te fenua i roto i te reva teitei e te vai ra i nia iho te mau tauihaa e haapuroro i te mau aru no te niuniu paraparau, te niuniu uira, te radio, e te afata teata. E nehenehe teie mau taoˈa peeutari e haaparare i te hoê â taime e 30 000 poroi niuniu!
3. Eaha te itehia ia tupu anaˈe te mau ereraa i te pae no te taairaa i rotopu i te mau taata?
3 Tera râ, noa ˈtu teie mau ravea taairaa atoa, te vai ra te ati i roto i te ao nei no te mea aita e taairaa faahou i rotopu i te mau taata. Inaha, te faarooroo nei tatou i te parau no “te tahi amahamaharaa e rahi noa ˈtura—te ‘ereraa rahi o te mau taairaa’—i rotopu i te feia faatere e te feia e faaterehia ra.” E eaha te ereraa i te paraparauraa i rotopu i te mau ui maori râ te manuïa-ore-raa te mau metua i te tauaparau e ta ratou mau tamarii? Te faataa ra te feia aˈo i te feia faaipoipo e te fifi rahi roa ˈˈe e vai ra i roto i te mau faaipoiporaa, o te hoê ïa ereraa i te tauaparauraa i rotopu i te tane e te vahine. E nehenehe atoa te ereraa i te pae no te taairaa e haapohe i te taata. I te omuaraa o te matahiti 1990, e 73 taata o tei pohe i roto i te hoê ati manureva, e te tahi tumu, o te hoê ïa hape i te pae no te taairaa i rotopu i te paileti e te pu hiˈopoaraa i nia i te fenua. Teie te upoo parau a te hoê vea: “Ua tupu teie ati na roto i te hoê fifi o te taairaa.”
4. (a) Eaha te auraa o te parau “taairaa”? (b) Eaha te tapao a te taairaa i rotopu i te mau kerisetiano?
4 Eaha te auraa o te parau no te taairaa no te mau kerisetiano? Ia au i te hoê titionare, te auraa o te parau ra “taairaa,” o “te horoaraa ˈtu ïa i te haamaramaramaraa, te manaˈo, aore ra te tahi manaˈo hohonu o te farii-maitai-hia e o te taa-maitai-hia.” Te faataa ra te tahi atu titionare i te taairaa mai “te hoê ravea no te faaite i te mau manaˈo ma te aravihi.” A tapao na i teie parau, e “faaite i te mau manaˈo ma te aravihi.” E tia mau â i te taairaa i rotopu i te mau kerisetiano ia riro ei mea aravihi no te mea ta ˈna tapao, o te haaputapûraa ïa i te mafatu o te taata maoti te parau mau a te Parau a te Atua, ia ohipa ratou ia au i te mea o ta ratou e haapii mai. Oia mau, na te manaˈo aore e haapao noa ia ˈna iho, e na te here e turai i taua taairaa ra.
Te tiaraa o Iehova no te faatupu i te taairaa
5. Eaha hoê o te mau ravea ta te Atua ra o Iehova i faaohipa no te paraparau e te taata?
5 Ma te feaa ore, o te Atua ra o Iehova te hiˈoraa faahiahia roa ˈˈe i te pae no te faatupuraa i te taairaa. I te mea e ua poiete oia ia tatou ia au i to ˈna hohoˈa e to ˈna ra huru, e nehenehe ta ˈna e faatupu i te taairaa e o tatou nei, e e nehenehe ta tatou e faaite ia vetahi ê i te parau no ˈna ra. Mai te poieteraa mai â o te taata, ua faaite o Iehova i te parau no ˈna ra i te feia o ta ˈna i poiete i nia i te fenua nei. Hoê ravea o ta ˈna i faaohipa no te na reira, o ta ˈna ïa poieteraa ite-mata-hia. No reira te papai salamo e parau ai e: “Te parau hua nei te mau raˈi i te hanahana o te Atua! e te faaite nei te reva i te ohipa a tana rima! Te haapii nei te tahi ao i te tahi i te parau, e te faaite nei te tahi rui i te tahi i te ite.” (Salamo 19:1, 2) E te faaite maira te Roma 1:20 e “te mau [huru o te Atua] e ore e tia ia hiˈo ra, te itea papuhia nei ïa i te mau mea i hamanihia nei.” Te haapapu ra te mau parau ra “te ite-papu-hia nei” i te aravihi o te ravea taairaa!
6. Eaha ta Iehova i rave no te paraparau e te feia o ta ˈna i poiete i nia i te fenua nei a parahi noa ˈi raua i roto i te ǒ i Edene ra?
6 Te tamata nei te feia aore e tiaturi nei i te Atua e i te faaiteraa no ǒ mai ia ˈna ra, i te faatiaturi ia tatou e e tia i te taata ia tuatapapa na roto i ta ˈna iho ravea ia itea mai ia ˈna i te tumu o to ˈna oraraa. Teie râ, te haapapu maira te Parau a te Atua e ua faatupu te Atua i te taairaa e te taata nei mai te omuaraa mai â. Ei hiˈoraa, ua horoa ˈtura te Atua i te faaueraa e fanau i te tamarii i te tane e te vahine matamua: “Ia fanau orua, e ia rahi roa, e faaî i te fenua nei, e e haavi iho; e ia mana orua i nia iho . . . i te mau mea [ora] atoa.” Ua faanaho atoa te Atua ia amu raua e ia mâha roa to raua poia i te mau hotu atoa o te ô—maoti râ hoê anaˈe. I muri iho, i to Adamu raua o Eva faaroo-ore-raa, ua faaite maira o Iehova i te parau tǎpǔ matamua no nia i te Mesia, ma te horoa mai i te huitaata i te tahi tiaturiraa: “E tuu hoi au i te au ore e riri ai ra ia orua [te ophi e] te vahine, e to huaai, e to ˈna ra huaai; na ˈna e haaparuparu i to afii, e na oe e haaparuparu i to ˈna poro avae.”—Genese 1:28; 2:16, 17; 3:15.
7. Eaha ta te buka Genese e faaite ra no nia i ta Iehova mau paraparauraa e ta ˈna mau tavini?
7 I to Kaina, te tamaiti a Adamu, faatupuraa i te hinaaro taparahi taata, ua parau atura te Atua ra o Iehova ia ˈna, i te na ôraa ˈtu e: ‘Haapao maitai! E roohia oe i te fifi!’ Aita râ o Kaina i haapao i teie faaararaa e ua taparahi atura o ˈna i to ˈna taeae. (Genese 4:6-8) I muri iho, i to te fenua î-roa-raa i te haavîraa uˈana e te ino, ua faaite atura o Iehova i te taata parau-tia ra o Noa i Ta ˈna opuaraa e tamâ roa i te fenua i te mau mea atoa e haaviivii ra ia ˈna. (Genese 6:13–7:5) I muri aˈe i te diluvi, i to Noa e to ˈna utuafare haereraa mai i rapae i te araka, ua faaite atura o Iehova ia ratou i ta ˈna opuaraa no nia i te huru moˈa o te ora e te toto, e na roto i te arai o te anuanua ua horoa maira o ˈna i te haapapuraa e eita o ˈna e haamou faahou i te mau mea ora na roto i te pau pape. Tau senekele i muri iho, ua faaite atura o Iehova ia Aberahama i Ta ˈna opuaraa e haamaitai i te mau fetii atoa o te fenua na roto i te arai o te Huaai a Aberahama. (Genese 9:1-17; 12:1-3; 22:11, 12, 16-18) E i to te Atua faaotiraa e e haamou oia i te feia faufau no Sodoma e o Gomora, no to ˈna aroha, ua faaite atu oia i teie ohipa ia Aberahama, i te na ôraa e: “Eiaha vau nei e faaite ia Aberahama i ta ˈu e rave nei?”—Genese 18:17.
8. I roto i teihea mau ravea e maha to Iehova paraparauraa e ta ˈna mau tavini i nia i te fenua nei?
8 Ua faaohipa o Iehova e rave rahi mau peropheta, o Mose hoi te taata matamua, no te faataa i te parau e o Iseraela. (Hebera 1:1) I te tahi mau taime, ua haapapai oia i te parau o ta ˈna i faahiti vaha roa mai, mai ta ˈna i rave e o Mose ra: “E papai oe i taua parau nei.” (Exodo 34:27) Mea pinepine aˈe râ to Iehova faaiteraa ˈtu i te parau i ta ˈna mau auvaha na roto i te ravea o te mau orama, mai ta ˈna i rave ê na e o Aberahama.a Ua faaohipa atoa Iehova i te mau moemoeâ no te paraparau i te taata, e eiaha noa e ta ˈna mau tavini, e te feia atoa râ o tei ohipa ˈtu e ta ˈna mau tavini. Ei hiˈoraa, na Iehova i rave e ia moemoeâhia na hoa mau auri o Iosepha, e na Iosepha iho i tatara ˈtu i ta raua moemoeâ. Na Iehova atoa i faatupu i te mau moemoeâ a Pharao raua o Nebukanesa, e na ta ˈna mau tavini o Iosepha raua o Daniela i tatara ˈtu i teie mau moemoeâ. (Genese 40:8–41:32; Daniela, pene 2 e 4) Hau atu, e rave rahi mau taime to Iehova faaohiparaa i te mau melahi ei mau vea na ˈna no te paraparau atu i ta ˈna mau tavini.—Exodo 3:2; Te mau tavana 6:11; Mataio 1:20; Luka 1:26.
9. Na te aha i turai ia Iehova ia paraparau e to ˈna nunaa o Iseraela, mai tei itehia na roto i teihea mau parau na ˈna ra?
9 Ua riro teie mau faaiteraa atoa a Iehova na roto i ta ˈna mau peropheta ei mau tapao no to ˈna here i to ˈna nunaa o Iseraela. Ei hiˈoraa, ua haapapu oia na roto i te arai o ta ˈna peropheta o Ezekiela e: “Aore roa o ˈu e mauruururaa i te pohe o te taata ino ra; ia fariu mairâ te taata i ta ˈna parau ino ia ora: e fariu mai outou, e fariu mai outou, i ta outou mau parau ino ra: eaha hoi outou i hinaaro ai i te pohe, e te utuafare o Iseraela e?” (Ezekiela 33:11) Ua faaite o Iehova i te hamani maitai e te faaoromai ia ˈna i faatupu i te taairaa e to ˈna nunaa orure hau no tahito ra, mai te itehia ra i roto i te Paraleipomeno 2, 36:15, 16: “Ua tono maira te Atua o to ratou mau metua o Iehova i te vea, aita i tuutuu; no te mea te aroha ra oia i to ˈna mau taata, e to ˈna ihora parahiraa. . . . Ua vahavaha [râ ratou] i ta ˈna parau, e ua hamani ino i te mau peropheta na ˈna . . . e aita roa aˈera e haapuraa.”
10. Mea nafea to Iehova paraparauraa mai e to ˈna nunaa i teie mahana, e i roto i teihea faito to ˈna riroraa ei Atua no te taairaa?
10 I teie mahana, tei ia tatou nei te Parau i faauruahia mai a te Atua, oia hoi te Bibilia Moˈa, ta Iehova e faaohipa ra no te faaite mai ia tatou i te mau haamaramaramaraa no nia ia ˈna iho, no nia i ta ˈna mau opuaraa, e to ˈna hinaaro no tatou nei. (Timoteo 2, 3:16, 17) Inaha, ei Pu no te taairaa teitei roa ˈˈe, te na ô ra o Iehova e: “Aita a te Fatu ra a Iehova e peu i rave, maori râ ia faaite i ta ˈna parau i moe i tana ra mau tavini i te mau peropheta.” (Amosa 3:7) Te faaite nei oia i ta ˈna mau tavini i te ohipa o ta ˈna e opua ra e rave.
Te tiaraa o te Tamaiti a te Atua no te faatupu i te taairaa
11. O vai te arai faahiahia roa ˈˈe ta Iehova i faaohipa no te paraparau mai i te taata, e no te aha te tiaraa “te Parau” e tano roa ˈi no ˈna?
11 I rotopu i te mau arai atoa o ta Iehova i faaohipa no te faaite i To ˈna hinaaro, te arai teitei roa ˈˈe o te Parau ïa, aore ra te Logo, o tei riro mai i muri iho o Iesu Mesia. Eaha te auraa o to ˈna piiraahia te Parau, aore ra te Logo? O ˈna ïa te Auvaha parau matamua a Iehova. Eaha mau na te hoê auvaha parau? O te hoê ïa taata o te faaite i te parau no ǒ mai i te tahi atu taata. No reira, ua riro te Logo ei arai o tei afai atu i te parau a te Atua ra o Iehova i te mau mea maramarama i nia i te fenua nei. No te faufaa o to ˈna tiaraa, ua piihia ˈtura o ˈna te Parau.—Ioane 1:1, 2, 14.
12. (a) No teihea titauraa o Iesu i haere mai ai i nia i te fenua? (b) Na te aha e haapapu ra e ua faaî mau â o ˈna i taua titauraa ra?
12 Ua faaite atu o Iesu iho ia Ponotio Pilato e te tumu matamua i haere mai ai oia i nia i te fenua nei, no te faaite ïa i te parau mau i te huitaata nei: “I fanau mai ai au, e i haere mai ai hoi au i te ao nei, e faaite i te parau mau.” (Ioane 18:37) E te faataa ra te aamu i roto i te mau Evanelia e ua amo maitai oia i taua hopoia ra. Te faarirohia ra ta ˈna Aˈoraa i nia i te Mouˈa ei aˈoraa faahiahia roa ˈˈe i porohia aˈenei e te hoê taata. Ua riro mau â teie aˈoraa ei faaiteraa parau hau aˈe i te faahiahia! “Ua maere anaˈe ihora te taata atoa [o tei faaroo i te aˈoraa] i te huru o ta ˈna parau.” (Mataio 7:28) I te tahi atu taime, te na ôhia ra e: “Te faaroo ra te taata rii ia ˈna ma te popou.” (Mareko 12:37) I to te tahi feia toroa tonoraahia no te haru ia Iesu, ua hoˈi atura ratou e aita o ˈna. No te aha? Ua pahono atura ratou i te mau Pharisea e: “Aita roa e taata e au te parau i ta tera aˈera taata.”—Ioane 7:46.
Ua faauehia te mau pǐpǐ a te Mesia ia riro ei feia o te faaite i te parau
13. Na te aha e faaite ra e aita noa te Mesia i faaea i nia i te faito auvaha parau otahi roa?
13 Aita noa o Iesu i faaea i nia i to ˈna tiaraa auvaha parau otahi roa, ua faatoroa atura o Iesu Mesia na mua roa e 12 aposetolo e e 70 poro evanelia no te haere e faaite i te parau apî maitai o te Basileia. (Luka 9:1; 10:1) Na mua iti noa ˈˈe oia e reva ˈtu ai i nia i te raˈi, ua faaue atura oia i ta ˈna mau pǐpǐ ia rave i te hoê ohipa taa ê. Eaha ïa taua ohipa ra? Mai ta tatou e nehenehe e taio i roto i te Mataio 28:19, 20, ua faaue atu oia ia ratou ia riro ei feia o te faaite i te parau; e e tia atoa ia ratou ia haapii atu ia vetahi ê ia faaite i te parau.
14. Eaha te aravihi o te mau kerisetiano matamua ei mau auvaha parau?
14 Ua riro anei te mau pǐpǐ ei mau auvaha parau aravihi? Oia mau! Na roto i ta ratou pororaa i te mahana o te Penetekose o te matahiti 33, e 3 000 taata o tei apiti mai i roto i te amuiraa kerisetiano apî. I muri iho, ua maraa te numera i nia i te faito e 5 000 tane. (Ohipa 2:41; 4:4) Eita e maerehia e ua pari to ratou mau enemi ati Iuda ia ratou i te mea e ua î roa o Ierusalema taatoa i ta ratou haapiiraa e i muri iho i to ratou amuamuraa i te mea e ua orure roa te fenua atoa nei i ta ratou pororaa!—Ohipa 5:28; 17:6.
15. Eaha te arai ta Iehova i faaohipa i teie nei tau no te paraparau i te taata?
15 Eaha ïa te huru i to tatou nei tau? Mai tei faaite-atea-hia mai i roto i te Mataio 24:3, 45-47, ua faatoroa te Fatu, o Iesu Mesia, i “te tavini haapao maitai e te paari,” oia hoi te mau kerisetiano faatavaihia, no te haapao i ta ˈna mau faufaa atoa i nia i te fenua nei i roto i te mahana o to ˈna vairaa mai. I teie mahana, te tia o teie tavini haapao maitai e te paari, o te Tino Aratai ïa a te mau Ite no Iehova, o te faaohipa ra i te Taiete Watch Tower Bible and Tract Society ei pu haaparareraa parau. Ma te tano aˈe, ua parau-atoa-hia teie tavini haapao maitai e te paari, te arai a te Atua. I to ˈna aˈe pae, te faaitoito nei teie tavini ia tatou ia riro atoa ei mau auvaha parau maitatai. Inaha, ua faaitoito te vea matamua roa o Te Pare tiairaa no Siona e te Vea no te taeraa mai o te Mesia i to ˈna mau taata taio e: “Ahiri e te vai ra to outou te tahi taata tapiri aore ra te hoê hoa o ta outou e manaˈo ra e e anaanatae mai o ˈna aore ra e fanaˈo oia i te mau haamaramaramaraa [a teie nei vea], e nehenehe outou e huti i to ˈna ara-maite-raa i nia i teie parau; no reira, a poro i te Parau e a hamani maitai atu i te mau taata atoa i te mea e e nehenehe ta outou e na reira.”
16. Na te aha e haapapu maira e eita noa te taioraa i te Bibilia e navai ia faatupu te Atua i te taairaa aravihi e ta ˈna mau tavini i nia i te fenua nei?
16 Teie râ, eita te heheu-noa-raa e te taioraa i te Parau a te Atua, e navai ia noaa mai te ite papu o te aratai i te hoê taata i nia i te eˈa o te ora. A haamanaˈo na i te taata toroa Etiopia, o tei taio i te parau tohu a Isaia, aita râ i taa ia ˈna i te mea o ta ˈna e taio ra. Ua tatara ˈtura o Philipi te poro evanelia i te parau tohu ia ˈna, e i muri iho, ua ineine atura o ˈna ia bapetizohia o ˈna ei pǐpǐ na te Mesia. (Ohipa 8:27-38) Ua haapapuhia e te titauhia ra hau atu â i te taio-noa-raa i te Bibilia i roto i te Ephesia 4:11-13, i reira o Paulo e faaite ai e aita noa te Mesia i haapao i vetahi ei mau aposetolo e ei mau peropheta i faauruahia mai, ua haapao atoa râ oia i “te tahi pae ei haapii evanelia; e te tahi pae ei tiai e ei orometua; ei faaau i te feia moˈa i te ohipa ra e orometua, ia tupu i te maitai te tino o te Mesia ra: ia riro tatou atoa nei ei taata paari, i te faaroo hoê e te ite hoê i te Tamaiti a te Atua, ia taea te faito ra i te î o te Mesia i te rahi.”
17. Maoti teihea mau tapao tatou e nehenehe ai e ite e o vai te arai ta Iehova e faaohipa ra i teie mahana no te faaite i ta ˈna mau opuaraa i te huitaata nei?
17 Nafea tatou e ite ai e o vai râ te feia o ta te Atua ra o Iehova e ta Iesu Mesia e faaohipa ra no te tauturu i te taata o te riro ei kerisetiano ia taea i te faito o te taata paari maitai? Ia au i te parau a Iesu, hoê o te mau tapao haapapuraa, o to ratou ïa here te tahi e te tahi mai ta Iesu i here i ta ˈna mau pǐpǐ. (Ioane 13:34, 35) Teie te tahi atu tapao haapapuraa: Eita ratou e faaô atu ia ratou i roto i teie nei ao, mai ia Iesu atoa i ore i faaô atu ia ˈna i roto i teie nei ao. (Ioane 15:19; 17:16) Te tahi atu tapao, oia hoi e farii ratou i te Parau a te Atua mai te parau mau, mai ta Iesu atoa i rave, ma te faahiti tamau noa i to ˈna mana. (Mataio 22:29; Ioane 17:17) E riro atoa te tuuraa i te iˈoa o te Atua i mua roa, mai ia Iesu atoa, ei tapao ê atu. (Mataio 6:9; Ioane 17:6) E te tahi atu tapao, o te peeraa ïa i te hiˈoraa o Iesu i te pae no te pororaa i te Basileia o te Atua. (Mataio 4:17; 24:14) Hoê noa pǔpǔ o te faaî ra i teie mau titauraa atoa, oia hoi te mau auvaha parau na te ao atoa nei o tei parauhia te mau Ite kerisetiano no Iehova.
18. Eaha na tuhaa e toru i te pae no te taairaa ta te mau tumu parau i muri nei e tuatapapa?
18 E titau atoa râ te faaiteraa i te parau i te hopoia i mua ia vetahi ê. E hopoia ta te mau kerisetiano i mua ia vai? Inaha, e toru tuhaa i reira te mau kerisetiano e ara ˈi ia atuatu i te mau taairaa: i roto i te utuafare fetii, te amuiraa kerisetiano, e te taviniraa kerisetiano. E tuatapapa te mau tumu parau i muri nei i teie mau tuhaa.
[Nota i raro i te api]
a Hiˈo Genese 15:1; 46:2; Numera 8:4; Samuela 2, 7:17; Paraleipomeno 2, 9:29; Isaia 1:1; Ezekiela 11:24; Daniela 2:19; Obadia 1; Nahuma 1:1; Ohipa 16:9; Apokalupo 9:17.
Nafea outou ia pahono mai?
◻ Eaha te ino e nehenehe e tupu na roto i te ereraa i te tauaparauraa?
◻ O vai ma na feia toopiti faahiahia roa ˈˈe i te pae no te faatupuraa i te mau taairaa?
◻ Eaha te mau ravea taa ê ta te Atua i faaohipa no te paraparau mai i te taata?
◻ Mea nafea to Iesu riroraa ei auvaha parau faahiahia roa?
◻ Eaha te aravihi o te mau kerisetiano matamua ei mau auvaha parau?
[Hohoˈa i te api 6]
Mai to ˈna Metua i te raˈi ra, ua riro mau â o Iesu ei taata hamani maitai o te faatupu i te taairaa e o vetahi