Faaroo

Auraa: “Te faaroo, o te tiai-papu-raa ïa i te mau mea e tiaturihia nei, te ite-papu-raa i te mau mea mau aore hoi e itehia ra.” (Heb. 11:1, MN) E ere te faaroo mau i te tiaturi-haere-noa-raa, oia hoi te ohieraa i te tiaturi i te hoê mea aita i niu-papu-hia, peneiaˈe no te mea tera ta tatou e hinaaro ra. Ei faaroo mau to tatou, e tia ia noaa mai te hoê ite tumu, ia haamatau ia tatou i te mau ohipa papu e ia atuatu i te mauruuru hohonu no te mau mea ta tatou e haapii ra. No reira, eita e noaa te faaroo mau ahiri e aita e ite mau, te parau nei te Bibilia e “maoti te mafatu” e faaohipa tatou i te faaroo.—Roma 10:10, MN.

No te aha mea rahi te taata aita to ratou e faaroo?

E hotu te faaroo no te varua o te Atua; e te horoa nei Iehova ma te oaoa i to ˈna varua i te feia atoa e ani mai ia ˈna. (Gal. 5:22; Luka 11:13) No reira, te feia aita to ratou e faaroo, aita ïa ratou i imi ia noaa mai te varua o te Atua; peneiaˈe e mau manaˈo iino te turai ra ia ratou, aore ra te patoi ra paha ratou i te ohiparaa a teie varua i roto i to ratou oraraa. E rave rahi mau tumu:

Ua erehia ratou i te ite mau o te Bibilia: Ua faauruahia te Bibilia e te Atua; te hotu o to ˈna varua. (Tim. 2, 3:16, 17; Sam. 2, 23:2) Ia ore te hoê taata e haapii i te reira, eita e noaa ia ˈna te faaroo mau. Peneiaˈe e Bibilia ta te mau melo o te mau Ekalesia. Tera râ, mai te peu e e haapiihia ratou i te mau haapiiraa taata maoti hoi i te Bibilia, eita ïa e noaa ia ratou te faaroo mau ia Iehova e i ta ˈna opuaraa. E no te faatitiaifaro i te mau fifi o te oraraa, e tiaturi iho â ïa ratou i to ratou iho manaˈo aore ra i to te tahi atu mau taata.—Hiˈo Mataio 15:3-9.

Aita ratou i mauruuru i te mau haapaoraa: E rave rahi feia o tei ore i mauruuru i te haavare a te mau ekalesia a te Amuiraa faaroo Kerisetiano o te faahua haapii nei i te Parau a te Atua, te haapae nei râ ratou i te faaohipa ia ˈna. Te pee nei vetahi feia i te mau pǔpǔ faaroo e ere i te Kerisetiano, te ite nei râ ratou e i te mea mau, te faatupu nei ratou i te mau hotu iino. Te ite atoa ra ratou e aita ta ratou mau tiaturiraa e tauturu mau ra ia ratou ia faatitiaifaro i te mau fifi o te oraraa. I te mea e aita to ratou e ite papu no nia i te Atua mau, e faaatea ê mai ratou i te mau mea atoa i taaihia i te haapaoraa.—Hiˈo Roma 3:3, 4; Mataio 7:21-23.

Aita ratou e taa ra no te aha te Atua e faatia ˈi i te ino: Aita te rahiraa o te taata e taa ra no te aha te Atua e faatia ˈi i te ino e te faahapa nei ratou ia ˈna no te mau huru tupuraa iino. Aita ratou e ite ra e te raveraa te taata i te ino, e ere ïa o te hinaaro o te Atua te tumu, o te hara râ a Adamu. (Roma 5:12) Peneiaˈe aita ratou i ite e te vai ra o Satani e to ˈna mana i nia i te mau ohipa o te fenua nei, no reira ratou e parau ai e o te Atua te tumu o te mau ohipa hairiiri e ravehia ra e Satani. (Ioa. 1, 5:19; Apo. 12:12) E mai te peu e ua ite rii ratou i teie mau mea, peneiaˈe te manaˈo ra ratou e te haamarirau nei te Atua i te ohipa mai, no te mea aita ratou e taa papu ra i te mau mea atoa i taaihia i te tumu parau o te mana arii i nia i te ao atoa anei. Aita e matara ra ia ratou e i to ˈna faaoromairaa e tae roa mai i teie nei, te horoa ra te Atua na ratou i te ravea faito ore ia noaa ia ratou te ora. (Roma 2:4; Pet. 2, 3:9) Hau atu â, aita i papu maitai ia ratou e ua faataa te Atua i te hoê taime i reira oia e haamou roa ˈi i te feia e rave nei i te ino.—Apo. 22:10-12; 11:18; Hab. 2:3.

Te faaterehia ra to ratou oraraa e te mau hiaai e te mau manaˈo o te tino: I te rahiraa o te taime, te tutava nei te feia aita to ratou e faaroo paari i te titau i te tahi atu mea. Te parau nei vetahi i te tahi taime e te tiaturi nei ratou i te Bibilia, aita râ ratou i faahohonu atu aore ra i feruri maite i te mau irava ta ratou i taio, i to ratou auraa aore ra nafea ia faaohipa i te reira i roto i to ratou oraraa o te mau mahana atoa, inaha aita ratou e faaite ra i te mauruuru i te Atua. (Hiˈo Paraleipomeno 1, 28:9.) Aita vetahi i haapao i te atuaturaa i to ratou faaroo, a vaiiho noa ˈi ratou i te mau hiaai iino ia aratai i to ratou mafatu, e inaha, ua atea ê roa ratou ia Iehova e i to ˈna mau eˈa.—Heb. 3:12.

Nafea e noaa mai ai te faaroo?

Roma 10:17, MN: “E tupu mai te faaroo i te mea i faaroohia ra.” (Hiˈo Ohipa 17:11, 12; Ioane 4:39-42; Paraleipomeno 2, 9:5-8. E tia ia haamata na mua i te haapii i te Bibilia. No te haapaari i to ˈna faaroo, e tia ia tuatapapa maite i te mau Papai no te haapapu e e nehenehe mau e tiaturihia.)

Roma 10:10, MN: “Maoti te mafatu e faaohipa ˈi tatou i te faaroo.” (Na roto i te feruri-maite-raa i te mau mea a te Atua no te faarahi i to tatou mauruuru i te reira, te nanaˈo ra tatou i te reira i nia i to tatou mafatu taipe.)

Ia ohipa te hoê taata ia au i te mau parau tǎpǔ a te Atua e ia ite oia i muri iho e te haamaitai ra te Atua i ta ˈna mau tutavaraa, e riro to ˈna faaroo i te haapaarihia.—Hiˈo Salamo 106:9-12.

Faahohoˈaraa: Peneiaˈe e hoa to oe e te na ô ra oe e: ‘Te tiaturi nei au ia ˈna. Ua ite au e e tapea iho â o ˈna i ta ˈna parau; e ia fifi-noa-hia vau, e mea papu e e tauturu mai oia ia ˈu.’ Eita oe e na reira i te parau no te hoê taata ta oe i farerei no te taime matamua inanahi ra, e ere anei? O te hoê râ taata mea maoro to orua matauraa e ua faaite oia e rave rahi taime e e nehenehe oe e tiaturi ia ˈna. Hoê â huru no te faaroo. Mai te peu e e hinaaro oe ia noaa mai te faaroo, e tia ia oe ia rave i te taime no te haamatau ia Iehova e i ta ˈna mau huru raveraa.

Te faaroo e te vai ra te Atua

Hiˈo i te mau api 51-58, i te tumu parau “Atua.”

Te faaroo i te hoê faanahoraa apî parau-tia o te mau mea

Ia matau maitai te hoê taata i te mau irava e faaite ra nafea Iehova e ohipa ˈi i nia i ta ˈna mau tavini, e farii atoa oia i teie manaˈo i faahitihia e Iosua: “Ua ite atoa hoi outou i roto i to outou aau, e i roto i to outou mau [nephe], e aore roa te hoê o te mau mea maitatai ta to outou Atua ta Iehova i parau mai ia outou ra i ore i te tia; ua hope roa i te tupu ia outou, aore roa te hoê i toe.”—Ios. 23:14; MN.

Te turu-papu-hia ra te mau parau tǎpǔ o te Bibilia no nia i te faaoraraa i te mau maˈi o te taata, te tia-faahou-raa o te feia pohe, e te vai ra ˈtu â, ia hiˈohia te faatiaraa o te mau semeio i ravehia e Iesu. E ere te reira i te mea feruri-noa-hia. A taio i te mau Evanelia, e ite ïa outou e te vai ra te mau haapapuraa atoa o to ratou tano-mau-raa i te pae tuatapaparaa. Ua faahiti-roa-hia te iˈoa o te mau vahi o te fenua, e tae noa ˈtu te mau tia politita o taua tau ra. E rave rahi faatiaraa i papaihia e te mau taata o tei ite mata roa ˈtu, o tei faahereherehia e tae roa mai i teie nei. Ia feruri maite oe i teie mau tupuraa, e haapaari te reira i to oe faaroo i te mau parau tǎpǔ o te Bibilia.

A haere i te Piha a te Basileia a te mau Ite no Iehova e i ta ratou mau tairururaa rarahi, e e ite roa ˈtu oe e na roto i te faaohiparaa i te mau aˈoraa Bibilia e taui ai te oraraa o te taata, te tauturu nei oia ia ratou ia riro ei feia haerea tia e te piˈo ore; hau atu â, te tauturu nei oia i te mau taata no te mau iri e te mau nunaa atoa ia ora e ia rave amui i te ohipa i roto i te hoê autaeaeraa mau.

E mea titau-mau-hia anei e ia apitihia te faaroo i te ohipa?

Iak. 2:17, 18, 21, 22, 26: “Te faaroo, aore e ohipa ra, e mea pohe ïa, i te mea te vai hoê noa ra. E tia noa hoi te hoê taata ia parau mai ia ˈna e, E faaroo to oe, e ohipa hoi ta ˈu; a faaite mai na oe i to oe faaroo, aore e ohipa ra, a faaite atu ai au ia oe i to ˈu faaroo i ta ˈu nei ohipa. Aore anei to tatou metua ra o Aberahama i tiahia mai i te ohipa, a hopoi ai oia i ta ˈna tamaiti ra ia Isaaka i nia i te fata ra? Te ite ra hoi oe, e na te faaroo i faatupu i ta ˈna ohipa, e no te ohipa i tia roa ˈi te faaroo? Mai te tino nei hoi ia ore te varua ra, e mea pohe ïa, oia atoa te faaroo aore e ohipa ra, e mea pohe atoa ïa.”

Faahohoˈaraa: Ia haamatau te hoê taurearea i te hoê potii, e parau atu oia e te here nei oia ia ˈna, eita râ oia e ani atu ia ˈna ia faaipoipo, te horoa ra anei oia i te haapapuraa e te here mau ra oia ia ˈna? Oia atoa, mea na roto i ta tatou mau ohipa e haapapu ai tatou e e faaroo e e here mau to tatou. Mai te peu e eita tatou e auraro i te Atua, te faaite ra ïa tatou e aita tatou e here mau ra ia ˈna aore ra aita tatou e tiaturi mau ra i te tiaraa o to ˈna mau eˈa. (Ioa. 1, 5:3, 4) Eita râ e tia ia roaa mai te ora na roto noa i ta tatou mau ohipa. Ua riro te ora mure ore ei ô ta te Atua e pûpû maira na roto i te ravea o Iesu Mesia; e ere i te aufauraa no ta tatou mau ohipa.—Eph. 2:8, 9.