Te faatia ra te feia e poro nei i te Basileia
‘Te hoê parau apî no roto mai i te hoê fenua atea’
◻ I ROTO i ta ratou pororaa i roto i te toetoe rahi no te fenua Groenland, ua farerei te tahi mau Ite i te hoê taurearea no te fenua Norevegia o tei farii i te buka ra Te oraraa: mea nafea to ˈna faraa mai? Mea tupu noa anei aore ra mea poietehia? (farani), aita râ oia i faaite i te hoê anaanataeraa taa ê. A hoˈi faahou mai ai te mau Ite i roto i te tuhaa vahi atea hoi i reira oia e ora ˈi, ua parau aˈera oia e ua taio o ˈna e hia taime i te buka e te hinaaro nei o ˈna i te tahi atu â. Ua rave atura oia e rave rahi buka e vea iti a te mau Ite, e ua peapea roa râ oia i te iteraa e e hoˈi mai ratou i teie noa matahiti i mua. Teie nei râ, ua tapao oia i to ratou vahi nohoraa. Hoê avae i muri iho, o vai tei haere mai i te uputa o taua mau Ite ra? Te taurearea no te fenua Norevegia! Ua faatia aˈera e, no te tapae mai i ǒ ratou, ua rave na mua oia i to ˈna pereoo iti no te hiona ia nehenehe oia e tapae i nia i to ˈna pahi, e no to ˈna teiaha, ua topa ˈtura te pape paari, e i muri iho, ua rave aˈera oia i te pahi e ono hora no tapae i te uahu. Ua haere mai oia no te mea ua hinaaro o ˈna te tahi â buka faahou e no te paraparau â no nia i te parau mau. Ua amui mai oia i te hoê putuputuraa kerisetiano i taua po ra, e ua rave oia i te tahi mau faanahoraa no te putuputu hoê taime i te avae. A haere mai ai te tiaau haaati e farerei i te amuiraa, ua haere roa mai oia, e ua faaitoito rahi te reira ia ˈna. I muri iho, ua tatara aˈera oia ia ˈna i roto i te Ekalesia, e i teie nei, te poro nei oia i te parau apî i roto i ta ˈna tuhaa fenua. I te tau toetoe, ia haafifi anaˈe te pape paari ia ˈna no te rave i te pahi no te haere mai i te mau putuputuraa, e rave oia i te manureva tautau na te reva; tera râ, te moni o te tereraa ua tuea noa e 3 000 tara.
E hia râ i rotopu ia tatou teie e tutava rahi nei no te haere i mua i roto i te taviniraa?
◻ I te fenua Madagascar, e rave rahi mau taata teie e farii nei i te parau apî. I te mea e te vai ra hau atu i te 3 200 feia poro i te Basileia, ua putuputu 16 205 tataa i te Oroa haamanaˈoraa i te pohe a te Mesia. Te rave nei te mau Ite no taua vahi ra i te mau mea atoa te nehenehe ia ratou ia rave no te farerei atu i te taatoaraa o te feia e noho ra i roto i to ratou motu.
Ei hiˈoraa, ua opua aˈera 17 i nia i te 30 feia poro o te amuiraa no Isaonjo ia haere e poro i roto i te hoê tuhaa fenua atea roa ia ratou. Ma te faarue i to ratou oire iti hoê afa hora i muri aˈe i te ahuru ma piti i te po, ua haere avae noa ratou e piti hora na nia i te mau eˈa teitei e ua haere tia ratou na roto i te mau vahi vari. I muri iho, ua tomo roa ratou i roto i te uru raau i te 2 h 30 i te poipoi. Tei roto hoi te uru raau i te pouri, ua topa te tahi mau taeae i nia i te mau ofai putaputa, e ua taahi vetahi i roto i te tahi mau apoo ofai. Te vai atoa ra te tahi mau toˈe ote toto i roto i te uru raau, e te tahi mau manumanu o tei amu ia ratou. O te mau patia tei haamauiui i te rahiraa o te mau vahine. I te tahi taime, e itehia i te vari tae roa i te turi avae o te feia hahaere. Ua pepe pauroa na 17 feia poro, na roto i te tahi aore ra te tahi tuhaa, e i te pae hopea, ua tapae ratou i rapae au mai i te uru raau i te 6 h 30!
I te 6 h 45raa, ua haamata aˈera ratou i te poro. I roto i te rahiraa, ua farii popou maitai te mau taata ia ratou. Ua patoi aˈera te vahine o te hoê upoo faatere haapaoraa porotetani ia ratou, i te taime matamua. Ua parau aˈera oia e: “E haapaoraa iho â ta ˈu; e navai noa vau i reira. Ua ite vau i te taatoaraa o te Bibilia.” I muri iho, ua patoi aˈera oia ma te faateitei i te hoê numera o Te Pare Tiairaa ta te taata poro i pûpû atu na ˈna. “Mea rahi roa ta ˈu mau mea no te taio”, ta ˈna ïa i parau atu. E i muri iho, ua haamata aˈera oia i te uiui i te tahi mau uiraa: “O vai outou? No hea mai outou? Na vai i afai mai ia outou?” A faataa poto ai te mau Ite ia ˈna, ma te mǎrû, i te mea atoa ta ratou i rave no te tapae mai i to ˈna oire iti, ua farii aˈera te vahine i Te Pare Tiairaa, ma te parau e: “E hoo vau i te reira. O vai i ite? Peneiaˈe e na te Atua i afai mai ia outou.”
I te 13 h 30raa, ua faarue aˈera na Ite e 17 i te tuhaa fenua, e ua hoˈi faahou ratou na nia iho i te eˈa ta ratou i haere mai, e i te reira taime, na roto noa ïa e maha hora no te mea te ao noa ra. Ua rohirohi roa ˈˈera ratou, ua ora râ ratou, e e itehia i te oaoa i nia i to ratou hohoˈa mata. Ua parau ratou e: “No matou, oia hoi no na feia poro o te amuiraa no Isaonjo e 17 o tei rave i taua tereraa ra, o te hoê ïa mahana e ore roa e moehia e ratou.”
Eita e ore e na te varua o Iehova i turai i te mau tavini o tei pûpû ia ratou no te poro i te parau apî o te Basileia “tae noa ˈtu i te hopea o te fenua ra”, e rave rahi taata teie e pahono nei i te mau tutavaraa faahiahia mau o taua mau Ite ra. — Ohipa 1:8.
[Hohoˈa i te api 31]
Tapaeraa pahi no Umanak, Groenland.