Eiaha na tatou ia faarue i te mǎtaˈu ia Iehova
“Te na ô maira Iehova sabaota ra, Arii rahi au, e mǎtaˈuhia hoi to ˈu nei iˈoa i te mau fenua ra.” — MALAKI 1:14.
1, 2. a) Eaha te poroi faufaa mau e vai ra i roto i te buka a Malaki? b) Eaha hoi te haapiiraa e matara mai i roto i te mau parau matamua a te poroi a Iehova?
“TE TOHU ra i te parau a Iehova ia Iseraela, ia Malaki ra.” (Malaki 1:1). Mea na roto hoi i teie mau parau faufaa mau te haamataraa te buka a Malaki. I roto i te Bibilia, e pinepine te hoê parau paari i te riro ei pariraa. Eita e ore, o te parau ïa e itehia i roto i te buka a Malaki, te vai ra hoi te hoê poroi taa maitai i roto i taua buka ra e te puai atoa hoi tei faataehia ˈtu i te nunaa Iseraela. Ia tuatapapa tatou i te reira, e riro ïa tatou i te tapea mai i te mǎtaˈu e te here no Iehova.
2 E nehenehe tatou e huti mai i te hoê haapiiraa i na irava matamua o te buka a Malaki. Te haapapu maira hoi Iehova i te feia e faaroo atu ia ˈna e te hinaaro ra oia e tauturu mai ia ratou. “Te parau maira Iehova, I aroha na vau ia outou.” Auê ïa haamataraa papu maitai e e te mahanahana atoa hoi no te mau taata aau tae no roto i te nunaa orure hau o Iseraela! Te na ô ra â te poroi e: “Ua parau maira outou e, Teihea to oe aroharaa mai ia matou? te na ô maira Iehova, e ere anei Esau i te tuaana o Iakoba? I aroha râ vau ia Iakoba, e aore au i aroha ia Esau; e ua faariro vau i to ˈna ra mau mouˈa ei fenua pau, e ta ˈna ra tufaa tei te mau teni ïa o te medebara.” — Malaki 1:2, 3.
3. Na te aha hoi e faaanaanatae ra i te manaˈo o Iehova i ia Iakoba e ia Esau?
3 No te aha hoi o Iehova i aroha ˈi ia Iakoba e i muri iho, i to ˈna mau huaai, te mau ati Iseraela? No te mea, mea mǎtaˈu na Iakoba ia ˈna e mea faatura atoa hoi na ˈna i to ˈna mau metua e mǎtaˈu atoa na i te Atua. Area o Esau ra, e haapao noa na oia ia ˈna iho e aita hoi to ˈna e mǎtaˈu i te Atua. Aita oia i faatura i to ˈna mau metua, e tia mau hoi ia au i te hinaaro o te Atua ia aurarohia. No reira ˈtura ïa Iehova i aroha mai ai ia Iakoba e i riri ai ia Esau. Ia riro na te reira ei faaararaa na tatou! Ia haapao maitai na tatou ia ore tatou ia erehia i te mǎtaˈu i te Atua e ia ore atoa hoi tatou ia riro ei mau taata nounou taoˈa mai ia Esau o tei haapao noa hoi ia ˈna iho. — Genese 26:34, 35; 27:41; Hebera 12:16.
4, 5. a) Eaha te mau faahopearaa o te mau haerea o Iakoba e o Esau i nia i to raua huaai? b) Eaha hoi te haapiiraa ta te mau ati Iseraela i tia ia huti mai?
4 Mai te peu e ua riro te haerea o Iakoba ei haamaitairaa no ta ˈna mau huaai te mau ati Iseraela, e ere roa ˈtu ïa mai te reira te huru no te mau huaai a Esau, te mau ati Edoma. Aita hoi ratou i fanaˈo i te haamaitairaa a Iehova, ua ririhia râ ratou no te patoiraa rahi ta ratou i faaite atu i nia i to ˈna nunaa, te nunaa ta ˈna i faaau atu i te hoê faufaa. Ua faaatihia maira ratou i te mau nuu a Nebukanesa, e i muri iho a to Arabia. I te pae hopea, mai ta Iehova i faaite atea mai, ua ore aˈera to ratou nunaa. — Obadia 18.
5 Ua haamata te faatupuraahia te mau haavaraa a te Atua na mua ˈˈe te mau mahana o Malaki. Eaha hoi te haapiiraa ta te mau ati Iseraela e huti mai? Teie ta Iehova i parau ia ratou: “E ite hoi to outou mata i te reira, e parau hoi outou e, E faarahihia Iehova e topa noa mai te otia o Iseraela.” (Malaki 1:5). I roto i te roaraa o te mau senekele, ua “ite mata roa ˈtu” te mau ati Iseraela i to Iehova here no to ratou nunaa.
Te faaite maira to tatou haerea e te mǎtaˈu ra anei tatou i te Atua aore ra aita
6. Eaha te pariraa ta Iehova i pari atu i nia i te mau ati Iseraela?
6 Teie â ta te parau tohu e faaite ra: “E faatura te tamaiti i te metua tane, e te tavini i tana fatu: e teie nei, e metua vau ra, teihea taua tura no ˈu ra? e e fatu hoi au ra, teihea vau i te mǎtaˈuraahia? te parau nei Iehova sabaota ra ia outou, e te feia tahuˈa, o tei vahavaha i ta ˈu nei iˈoa.” (Malaki 1:6; Exodo 4:22, 23; Deuteronomi 32:6). Ua faatitiaifaro mai o Iehova e ua faaamu atoa mai hoi, ua paruru i te mau ati Iseraela mai te hoê metua tane e na reira no ta ˈna tamaiti. E tia ˈtura ïa ia ˈna ia tiai i te aha? Ia faatura ïa ratou ia ˈna e ia mǎtaˈu atoa hoi ia ˈna. Maoti râ hoi i te na reira, ua erehia te mau ati Iseraela e tae noa ˈtu hoi te mau tahuˈa, i te faatura i te iˈoa o Iehova e e faaino na hoi ratou i te reira. Ua riro maira hoi ratou ei mau “tamarii taiva”. — Ieremia 3:14, 22; Deuteronomi 32:18-20; Isaia 1:2, 3.
7. Mea nafea to te mau ati Iseraela huru hiˈoraa i taua pariraa ra, e eaha hoi ta Iehova i pahono mai ia ratou?
7 Te ani ra hoi te mau ati Iseraela e: “Teihea matou i te vahavaharaa i to oe iˈoa?” Ua pahono maira râ Iehova ia ratou i te na ôraa mai e: “Te hopoi mai nei outou i te maa viivii i ta ˈu nei fata; e te parau noa maira outou e, Teihea matou i te haaviiviiraa ia oe? outou i parau e, E mea vahavaha te amuraa a Iehova. Ia hopoi mai hoi outou i te matapo ei tusia, e ere anei i te mea ino? e ia hopoi mai outou i te pirioi e tei maˈihia ra, e ere anei i te mea ino? a hopoi atu na to tavana; e mauruuru anei oia ia oe, e itehia mai anei oe? te parau maira Iehova sabaota ra.” — Malaki 1:6-8.
8. Te faaite maira te mau ohipa a te mau ati Iseraela i te aha?
8 E ere roa ˈtu i te mea fifi ia feruri e te hiˈopoa ra te hoê ati Iseraela i to ˈna nǎnǎ e te tuu ra hoi i te hiti i te hoê animala matapo aore ra pirioi no te pûpû atu ia Iehova. Ia na reira oia, mai te huru ra ïa e te pûpû ra oia i te hoê tusia au, a tapea noa mai ai oia na ˈna i te mea maitai roa ˈˈe o ta ˈna na ˈna. Papu maitai, eita o ˈna e na reira i nia i te hoê tavana! Ua na reira râ hoi te mau ati Iseraela i nia ia Iehova — mai te huru ra ïa e aita roa ˈtu oia e ite maira i ta ratou mau peu e ta ratou mau ohipa haavare! Ua ani maira ïa Iehova ia ratou ma te tano mau hoi e: “Teihea vau i te mǎtaˈuraahia?” Papu maitai, te parau ra ratou e te mǎtaˈu ra ratou ia Iehova, area ta ratou ohipa ra, mea taa ê roa ïa. — Deuteronomi 15:21.
9. Mea nafea hoi to te mau tahuˈa fariiraa i te mau tusia a te mau ati Iseraela?
9 Eaha hoi te huru o te mau tahuˈa i mua i taua mau tusia ino mau ra? E parau na hoi ratou e: “Aita e inoraa.” E parau noa ratou e e ere te haerea o te mau ati Iseraela i te haerea ino. No reira, noa ˈtu â ïa e ua haamau ratou i te haamoriraa mau ma te itoito i te omuaraa ra, ua riro aˈera hoi te feia i hoˈi mai na Babulonia mai ei mau taata haapeapea ore e ei mau taata teoteo i te parau-noa-raa e e mau taata tia ratou. Ua faarue aˈera hoi ratou i te mǎtaˈu ia Iehova. Ua riro aˈera hoi ta ratou taviniraa i te hiero ei ravea no te faatapuni i ta ratou mau ohipa e rave na e ua haapao noa ˈtura hoi ratou i te mau oroa mai ta ratou i hinaaro. — Malaki 2:1-3; 3:8-10.
10. a) Eaha te tusia ta Iehova e hinaaro maira ia pûpû atu tatou na ˈna i to tatou nei mau mahana? b) E farii mai Iehova i ta tatou tusia ia aha tatou?
10 E riro paha ïa vetahi pae i te parau e: ‘Eita hoi te reira e tano no tatou; aita hoi tatou e pûpû faahou nei i te mau animala ei tusia i teie nei mahana.’ Parau mau, e tia râ ia tatou ia pûpû atu ia Iehova i te tahi atu â huru tusia, mai ta te aˈoraa rû mau a Paulo e faaite ra i te na ôraa e: “E teie nei, e au mau taeae ra, te aˈo atu nei au ia outou ma te aroha rahi o te Atua, e ia pûpû atu outou i to outou mau tino ei tusia ora, e te moˈa, e te au hoi i te Atua ra, o te haamori au ïa ia outou.” (Roma 12:1). Te tusia ta Iehova e hinaaro maira ia tatou nei i to tatou nei mau mahana, o tatou iho ïa! To tatou puai, ta tatou mau ǒ e to tatou mau aravihi. E farii mai o ˈna i te reira ia horoa ˈtu tatou i te tuhaa maitai roa ˈˈe o tatou nei. Ia pûpû atu tatou na ˈna i te mau toetoea, te hoê animala pirioi e te maˈi atoa hoi, eita ïa e ore to tatou mau auraa e o ˈna i te ino.
11. E tia i te tavini tataitahi a Iehova ia rave i tei hea hiˈopoaraa i nia ia ˈna iho?
11 Te vai ra hoi teie e parau nei e: “Aita e inoraa”, ua ite hoi tatou e eaha ta Iehova e manaˈo mai. E hiˈopoa maite anaˈe na i te “tusia”, oia hoi te “taviniraa moˈa”, ta tatou e pûpû atu na ˈna. E itehia ïa i roto, to tatou amuiraa ˈtu i roto i te pororaa, ta tatou haapiiraa tataitahi, te pure e te haereraa ˈtu i te mau putuputuraa. Ua papu anei ia outou e te pûpû atura outou na Iehova i te vahi maitai aˈe i roto ia outou iho? aore ra i te mau mea i na niania noa? Mea atâata mau ia rave tatou i te tahi mau taime faaanaanataeraa i te hopea hebedoma e aita ˈtura hoi ta tatou e taime faahou aore ra e puai faahou no te haere e poro i te parau apî maitai no te Basileia e no te haere atu i te mau putuputuraa. Ia au maite iho â to tatou oraraa taatoa, ta tatou mau ohipa i te mau mahana atoa, e tae noa ˈtu hoi to tatou huru feruriraa e te mau manaˈo e faaitoito ra ia tatou, i te tusia ta tatou e pûpû atu nei na Iehova. Ia horoa ˈtu na tatou na ˈna i te tuhaa maitai roa ˈˈe i roto ia tatou nei.
Ia ite na tatou e o vai mau na te feia e mǎtaˈu mau ra i te Atua
12. Eaha te aˈoraa e horoahia mai nei na tatou i teie nei?
12 “E tena na, teie ta ˈu parau ia outou, A tau i te Atua ia aroha mai oia ia tatou”, ta te peropheta ra ïa i parau (Malaki 1:9). Na roto i teie mau parau, te aˈo ra o Iehova i te mau ati Iseraela ia rave i te mea tia, ia mǎtaˈu ia ˈna mai te au mau, e ia pûpû atu na ˈna i te mau tusia te tia mau ia pûpûhia ˈtu. E tia ia tatou ia na reira atoa i to tatou nei tau. Na roto noa i te haapaoraa i te mau faaueraa a Iehova e noaa mai ai ia tatou e e nehenehe atoa ïa ia tatou e tapea mai i ta ˈna haamaitairaa.
13. a) Ia faarue tatou i te mǎtaˈu i te Atua, e riro ïa tatou i te topa i roto i tei hea marei? b) Mea nafea te nounou taoˈa i te haaviiviiraa i te mau tahuˈa iseraela?
13 Mai te peu e aita ia tatou nei mai tei au hoi, te mǎtaˈu i te Atua, e riro ïa tatou i te tavini noa ia ˈna no te mea e titauhia ra aore ra e riro atoa hoi tatou i te tavini ia ˈna na roto i te hoê hinaaro miimii ia noaa mai ia tatou i te tahi taoˈa. E tapao anaˈe na tatou i te mau uiraa ta Iehova i ui atu i te mau tahuˈa iseraela no nia i ta ratou taviniraa i te hiero: “O vai to outou e opani noa i te mau uputa? e ore hoi outou e tutui faufaa ore noa i te auahi i nia i tau fata. Aore au i au atu ia outou, te parau maira Iehova sabaota ra, e ore hoi au e farii atu i tei hopoihia mai e to outou rima.” (Malaki 1:10). Parau mau, e rave na te mau tahuˈa i ta ratou mau hopoia i te hiero, e tamau na ratou i te uputa o te hiero e e tutui atu ai i te auahi i nia i te mau fata. Aita râ hoi ratou i na reira no te tahi ohipa haapaoraa ore. Te haa ra ratou ia roaa mai ia ratou te mau ǒ e ia peta-atoa-hia hoi ratou e te mau ati Iseraela e haere mai nei i te hiero e horoa i ta ratou tusia. E ore roa Iehova e au e na reira atoa hoi i teie nei mahana, i te hoê taviniraa e ravehia no te huti noa mai i te tahi taoˈa miimii. Tera te hoê mea faufau roa i mua i to ˈna aro.
14. No te aha hoi tatou e tia ˈi ia haapao maitai i te huru nounou taoˈa?
14 I teie nei â mahana, e tia ia tatou ia haapao maitai ia ore tatou ia riro roa ˈtu i te huru miimii e i te nounou taoˈa. E rave rahi taime to te mau Papai faaararaa mai ia tatou i te nounou taoˈa. Te faaite ra hoi e eita Iehova e haamaitai mai i te feia nounou taoˈa (Korinetia 1, 6:10; Ephesia 5:5). Ia tapea to tatou here no Iehova e to tatou mǎtaˈu ia ˈna ia tatou ia faatupu i ta tatou taviniraa no te huti mai i te tahi taoˈa miimii! Ia oioi na tatou i te tatara roa mai roto mai i to tatou mafatu i taua huru nei, mai te peu e te haamata ra i te tupu. Te titau-taa-ê-hia ra te mau matahiapo e tae noa ˈtu hoi te mau tavini tauturu ia ore roa ˈtu ratou ia riro ei mau ‘taata e titau i te taoˈa tia ore ra ia noaa’. (Tito 1:7; Timoteo 1, 3:8; Petero 1, 5:2.) E nehenehe vetahi pae e atuatu i te mau auraa faufaa e to ratou mau taeae o te nehenehe hoi e horoa mai na ratou i te tahi tauturu i te pae materia. E ia na reira ratou, te paetahi ra ïa ratou e e haamarirau mai ratou i te aˈo atu i taua mau taata ra. Eita roa ˈtu tatou e hinaaro e tia i te mau tahuˈa nounou taoˈa no Iseraela e hinaaro ra ia noaa mai ia ratou i te mau ǒ e ia petahia hoi ratou na to ratou mau taeae iseraela.
15. a) Mea nafea to Malaki faaiteraa mai e te vai ra te mau taata e mǎtaˈu ia Iehova na nia i te fenua taatoa nei? b) Eaha ˈtu â vetahi mau irava bibilia e haapapu maira i taua parau tohu ra?
15 I teie mahana, mai te peu e e ani mai Iehova e: “Teihea vau i te mǎtaˈuraahia?”, e nehenehe anei te hoê nunaa e pahono atu e: ‘Teie matou! O matou teie e mǎtaˈu nei ia oe’? Mea papu maitai! O vai ïa taua feia ra? O te mau Ite ïa no Iehova tei purara ê na nia i te fenua taatoa nei. Ua faaitehia mai taua pupu nei e te ohipa atoa ta ˈna e rave ra na teie mau parau i roto i te Malaki 1:11: “E rahi hoi to ˈu nei iˈoa i te mau fenua nei, mai te hitiraa mai o te mahana, e tae noa ˈtu i to ˈna mairiraa; (...) i te mau vahi atoa ra, e te tusia maitai ra e rahi hoi to ˈu nei iˈoa i te mau fenua ra, te parau maira Iehova sabaota ra.” — Hiˈo atoa Salamo 67:7; Isaia 33:5, 6; 41:5; 59:19; Ieremia 32:39, 40.
16. Eaha te auraa te parau ra, mai te hitiraa e te tae roa ˈtu i te mairiraa te mahana, e oia hoi, te aha ra te mau tavini a Iehova?
16 Na roto i teie mau parau, te faataa maitai maira o Malaki i te ohipa rahi mau e ravehia nei i to tatou nei mau mahana, oia hoi, te pororaa i te parau apî maitai na nia i te fenua taatoa nei (Mataio 24:14; Apokalupo 14:6, 7). I te pae no te tabula fenua, te parau ra mairiraa te mahana, te auraa ra, mai te pae hitiaa o te râ ïa e tae atu i te pae tooa o te râ. Oia mau, noa ˈtu te vahi ta tatou e fariu tia ˈtu i to tatou mata i teie mahana, te ite nei tatou i te mau taata e mǎtaˈu ra ia Iehova teie hoi e rave nei i to ˈna hinaaro. Te auraa atoa o taua parau nei, oia ïa, mai te haamataraa e tae atu i te hopearaa o te mahana. Inaha hoi, te arue tamau nei te mau tavini a te Atua ia ˈna. Mai ta Iehova i tapu mai, e poro-haere-hia to ˈna iˈoa na nia i te fenua taatoa nei e te feia e mǎtaˈu mau ra ia ˈna. — Exodo 9:16; Paraleipomeno 1, 16:23, 24; Salamo 113:3.
Eiaha roa ˈtu tatou ia faarue i te mǎtaˈu e tia ia horoahia ˈtu no Iehova
17. Eaha te nehenehe e roohia mai i nia ia tatou ia erehia tatou i te faatura e te mǎtaˈu ia Iehova?
17 Mea teimaha mau na te feia e ore faahou nei e faatura ia ˈna e e mǎtaˈu ia ˈna ia haamori e ia tavini ia Iehova. Teie hoi ta Iehova i parau atu i te mau ati Iseraela: “Ua faaino râ outou, outou i parau e, Ua viivii te amuraa a Iehova; e tei hopoihia ra, te maa i nia ihora, e mea vahavaha ïa. Te na ô ra hoi outou, Inaha, e mea rohirohi teie!” (Malaki 1:12, 13). I to tatou nei tau, e riro te feia i faarue i te mǎtaˈu ia Iehova i te atuatu i taua mau huru manaˈo ra. No ratou, e nehenehe te mau putuputuraa, te ohipa pororaa e te tahi atu mau ohipa kerisetiano e riro ei hopoia teimaha mau na ratou.
18. Eaha te nehenehe e roohia i nia vetahi mau tavini a te Atua i to tatou nei tau?
18 Teie te nehenehe e taiohia i roto i Te Pare Tiairaa no te 1 no mati 1937 no nia i taua mau taata ra: “No te feia e ore e auraro, ua riro te haamaitairaa oia hoi te taviniraa i te Atua e te hopoiraa ˈtu na vetahi ê te mau hotu o te Basileia, ia au maite i ta ˈna mau faaueraa, ei ohipa rohirohi mau e ei ohipa rapae noa hoi; eita roa ˈtu te reira e pûpû mai i te tahi noa ˈˈe ravea ia hanahana ratou i mua i te Atua. Ua riro mau hoi ei ohipa haihai roa no taua mau taata faaahaaha ra, te hopoiraa i te parau no nia i te Basileia i tera uputa e tae noa ˈtu i tera uputa e te faaiteraa ˈtu i te reira i te taata. Aita hoi te reira i riro ei oaoaraa na ratou (...). No reira hoi ratou i parau ai e tae roa mai i teie mahana e: ‘E ohipa hoo buka noa teie ohipa e ravehia nei. E e ohipa rohirohi atoa hoi!’” I teie nei â mahana, te itehia nei e ua riro te ohipa pororaa na vetahi pae ei ohipa rohirohi mau e te mau putuputuraa ei mau putuputuraa haumani roa. E riro hoi tatou i te manaˈo mai te reira te huru mai te peu e eita tatou e mǎtaˈu e e here faahou ia Iehova.
19. Nafea tatou e nehenehe ai e tamau i te faaite i to tatou aau mehara no te mau faanahoraa atoa ta Iehova e rave nei no tatou?
19 Ia ore tatou ia faarue i te mǎtaˈu ia Iehova, e riro noa ïa tatou ei mau taata haehaa i mua i to ˈna aro e e riro atoa hoi tatou i te mauruuru ia ˈna no te mau mea atoa ta ˈna e rave nei no tatou. Ia haere tatou i roto i te hoê putuputuraa iti e faatupuhia i roto i te tahi maa utuafare aore ra i te hoê putuputuraa rahi i reira e rave rahi ahuru tausani taata e putuputu ai, e riro ïa tatou i te mauruuru ia Iehova no te haamaitairaa e noaa mai ia tatou i te putuputuraa ˈtu i rotopu i to tatou mau taeae kerisetiano. E faaite tatou i to tatou mauruuru ia ˈna ia tae atu tatou e ia faaitoito atoa hoi tatou i te mau taata i tae mai “ia rahi te aroha, o tei rave i te ohipa maitatai ra” na roto i ta tatou mau aparauraa e faaitoito, e oia atoa hoi na roto i te mau pahonoraa ta tatou e horoa ˈtu i roto i te mau putuputuraa (Hebera 10:24, 25). Mai te peu e e tuhaa ta tatou i roto i te porotarama, eita ïa tatou e faaineine ia tatou i te taime hopea roa, na roto noa i te haaputuputu-oioi-raa mai i te tahi mau manaˈo. Eita tatou e faariro i taua mau tuhaa ohipa ra ei mau tuhaa ohipa faufaa ore. E mau haamaitairaa moˈa hoi teie, e ia faaineine maitai tatou i te reira, e riro ïa ei haapapuraa hau atu â no nia i to tatou faatura hohonu e to tatou mǎtaˈu ia Iehova.
20. a) Eiaha roa ˈtu ia moehia ia tatou i te aha? b) Eaha ïa te faaotiraa ta tatou e nehenehe e rave?
20 Auê ïa faahopearaa ino mau e itehia ˈtu e te feia e faarue nei i te mǎtaˈu ia Iehova! E ere ïa ratou i te aau mehara no te haamaitairaa faito ore i pûpûhia mai nei ia tatou i te atuaturaa i te mau auraa fatata e te Arii o teie nei ao. “Te na ô maira Iehova sabaota ra, Arii rahi au, e mǎtaˈuhia hoi to ˈu nei iˈoa i te mau fenua ra.” (Malaki 1:14; Apokalupo 15:4). Eiaha roa ˈtu te reira e moehia ia tatou. Ia pee maite na tatou tataitahi i ta te papai salamo i parau i te na ôraa e: “E taata au hoi au i te feia atoa i mǎtaˈu ia oe ra.” (Salamo 119:63). Ia oti tatou i te tuatapapa i taua tumu parau nei, e tapae iho â ïa tatou i teie nei faaotiraa a Solomona oia hoi: “O te Atua te mǎtaˈu atu, e haapao hoi i ta ˈna parau; o ta te taata atoa ïa e ati noa ˈˈe; e hopoi atoa te Atua i te mau parau atoa i te haavaraa, e te mau mea moe atoa ra, te maitai e te ino atoa ra.” — Koheleta 12:13, 14.
Te tahi mau haapiiraa ta tatou e huti mai no roto mai i te buka a Malaki:
◻ No te aha hoi e tia i te mau Iseraela ia mǎtaˈu ia Iehova?
◻ Nafea ta tatou mau ohipa e faaite mai e te mǎtaˈu mau ra tatou ia Iehova?
◻ Eaha te haapapuraa e vai nei ia tatou nei e te vai ra te tahi mau taata teie e mǎtaˈu nei ia Iehova i nia i te fenua taatoa i teie mahana?
◻ No te aha hoi e ore roa ˈtu e tia ia tatou ia faarue i te mǎtaˈu e tia ia tatou ia horoa ˈtu no Iehova?
[Parau iti faaôhia i te api 18]
Mai te hitiraa e tae roa ˈtu te mairiraa te mahana, te tamau-noa-hia ra i te faahanahana i te iˈoa o Iehova.
[Hohoˈa i te api 17]
Aita roa ˈtu te mau ati Iseraela e tauˈa noa ˈˈe ia Iehova na roto i te pûpûraa na ˈna i te mau animala matapo, pirioi aore ra maˈimaˈi.