Mea ora te parau a Iehova
Manaˈo faufaa o te buka a Malaki
A 70 tiahapa ˈtura matahiti te tiaraa te hiero patu-faahou-hia i Ierusalema. A mairi ai râ te tau, ua ino roa te ea pae varua o te mau ati Iuda. Ua piˈo atoa te mau tahuˈa. Na vai e faaite ia ratou i to ratou huru tupuraa mau e e tamata i te faaoraora ia ratou i te pae varua? E horoa Iehova i taua ohipa ra na te peropheta Malaki.
Papaihia ma te huna ore e Malaki, e parau tohu faaurua e te Atua to roto i te buka hopea o te mau Papai Hebera. Maoti te haapao-maite-raa i te parau tohu a Malaki e nehenehe ai tatou e faaineine ia tatou no te “mahana rahi mǎtaˈu o Iehova,” ia mou teie nei faanahoraa ino o te mau mea.—Malaki 4:5.
“E RAVE RAHI TEI TURORI” I TE MAU TAHUˈA
E faaite Iehova i to ˈna mau huru aau no Iseraela, ma te parau e: “I aroha na vau ia outou.” Ua haavahavaha râ te mau tahuˈa i te iˈoa o te Atua. Mea nafea? Ma ‘te hopoi i te maa viivii i ta ˈna fata’ e ma te pûpû i te animara “pirioi e tei maˈihia” ei tusia.—Malaki 1:2, 6-8.
“E rave rahi tei turori i te ture nei” i te mau tahuˈa. Te “haavare” ra te nunaa “i to ˈna ihora taeae.” Ua rave vetahi i te mau vahine ěê. Ua haavare vetahi i ‘te vahine o to ratou apîraa.’—Malaki 2:8, 10, 11, 14-16.
Uiraa bibilia pahonohia:
2:2—Mea nafea to Iehova ‘faainoraa i te maitai’ a te mau tahuˈa orure hau? Ua na reira te Atua i roto i te auraa e ua tauihia te maitai i anihia e taua mau tahuˈa ra ei ino.
2:3—Eaha te auraa e “tiritiri i te repo,” aore ra tutae, i nia i te mata o te mau tahuˈa? Ia au i te Ture, e hopoihia te tutae o te animara i pûpûhia ei tusia i rapaeau i te puhapa, a tutuihia ˈtu ai i te auahi. (Levitiko 16:27) Te auraa e tiritiri i te tutae i nia i te mata o te mau tahuˈa, oia ïa ua patoi Iehova i te mau tusia e mea au ore na ˈna te feia i pûpû i te reira.
2:13—Ua moe te fata a Iehova i te roimata o vai ma? Te roimata ïa o te mau vahine faaipoipo tei haere i te hiero e tei haamahora i to ratou aau i mua ia Iehova. No te aha ratou i oto ai? Ua faataa ta ratou mau tane ati Iuda ia ratou no te mau tumu tano ore e ua faarue ia ratou, no te faaipoipo paha i te mau vahine ěê apî aˈe.
Haapiiraa no tatou:
1:10. Aita Iehova i au i te mau tusia a te mau tahuˈa nounou moni, o tei faaaufau atoa i te mau ohipa haihai mai te tapiriraa i te opani aore ra te tutuiraa i te auahi i nia i te fata. E mea faufaa mau â ia turaihia ta tatou mau ohipa haamoriraa, mai ta tatou e rave ra i roto i te taviniraa Kerisetiano, e te here miimii ore i te Atua e i te taata-tupu, eiaha roa ˈtu e te moni!—Mataio 22:37-39; Korinetia 2, 11:7.
1:14; 2:17. Eita Iehova e faatia i te huru haavarevare.
2:7-9. Ia papu i te feia tei ia ratou ra te hopoia e haapii atu i roto i te amuiraa, e te au maite ra ta ratou haapiiraa i te Parau a te Atua, te mau Papai Moˈa, e te mau papai bibilia a ‘te tiaau haapao maitai.’—Luka 12:42; Iakobo 3:11.
2:10, 11. Te hinaaro ra Iehova ia pee maite to ˈna feia haamori i te aˈoraa e faaipoipo “i roto noa i te Fatu.”—Korinetia 1, 7:39, MN.
2:15, 16. E titauhia ia faatura te feia haamori mau i te faufaa faaipoiporaa e te vahine o to ratou apîraa.
‘E TAE MAI TE FATU MAU I TO ˈNA HIERO’
‘E tae vave mai te Fatu [mau],’ te Atua ra o Iehova, ‘i to ˈNa ra hiero e te vea a te faufaa,’ o Iesu Mesia. E ‘haafatata ˈtu te Atua i to ˈna nunaa no te [haavaraa]’ e e riro oia ei ite oioi i te mau huru taata rave hara atoa. Hau atu â, e papaihia “te tahi buka manaˈoraa” no te feia e mǎtaˈu ra ia Iehova.—Malaki 3:1, 3, 5, 16; MN.
E tae mai te mahana “mai te umu ra te amaraa” e e ama pauroa te feia ino. Hou taua mahana ra e tae mai ai, e tonohia te hoê peropheta e ‘faafariu i te aau o te mau metua i te tamarii, e te aau o te tamarii i to ratou mau metua.’—Malaki 4:1, 5, 6.
Uiraa bibilia pahonohia:
3:1-3; MN—Inafea to “te Fatu [mau]” e “te vea a te faufaa” taeraa mai i te hiero, e o vai tei tonohia na mua ˈˈe ia raua? Ua tae mai Iehova i to ˈna hiero na roto i to ˈna tia e ua tamâ i te reira i te 10 no Nisana 33 T.T. I taua mahana ra to Iesu tomoraa i roto i te hiero e tiahiraa i te feia e hoo maira e e hoo atura. (Mareko 11:15) E toru ïa matahiti e te afa i muri aˈe i to Iesu faatavairaahia ei Arii maitihia. Oia atoa, e au ra e e toru matahiti e te afa i muri aˈe i to ˈna faateronoraahia ei Arii i te raˈi, ua apee Iesu ia Iehova i te hiero pae varua e ua ite raua e mea tia ia tamâ i te nunaa o te Atua. I te senekele matamua, ua tonohia Ioane Bapetizo e faaineine i te mau ati Iuda no te haereraa mai o Iesu Mesia. I teie tau, ua tonohia te hoê vea na mua ˈˈe e haamarari i te eˈa no te taeraa mai o Iehova i to ˈna hiero pae varua. I te omuaraa o te mau matahiti 1880, ua haamata te hoê pǔpǔ taata haapii Bibilia i te rave i te hoê ohipa haapiiraa bibilia no te faaite e rave rahi parau mau bibilia tumu i te mau taata haavare ore.
3:10—Te hopoiraa i “te ahuru atoa o te mau taoˈa,” aore ra tuhaa ahuru, o te horoaraa anei ïa i ta tatou mau mea atoa na Iehova? Ua faaorehia te Ture a Mose i te poheraa o Iesu, e ere ïa te tuhaa ahuru i te pae moni i te hoê titauraa. E auraa taipe râ to te tuhaa ahuru. (Ephesia 2:15) E ere i te horoaraa i ta tatou mau mea atoa. I hopoihia na te tuhaa ahuru i te mau matahiti atoa, e hopoi râ tatou i ta tatou mau mea atoa na Iehova hoê noa taime—ia pûpû tatou ia tatou iho na ˈna e ia faataipe i ta tatou pûpûraa na roto i te bapetizoraa i roto i te pape. Mai reira mai, na Iehova ta tatou mau mea atoa. Teie râ, te faatia ra oia ia tatou ia maiti i te hoê tuhaa o ta tatou mau mea—te hoê tuhaa ahuru taipe—no te faaohipa i roto i ta ˈna taviniraa. Tei to tatou ïa huru tupuraa e ta to tatou aau e turai ia tatou ia faaohipa. I roto i te mau ô ta tatou e hopoi na Iehova, te vai ra te taime, te itoito, te mau faufaa e faaohipahia i roto i te ohipa pororaa i te Basileia e te faariroraa i te taata ei pǐpǐ. Oia atoa te haereraa i te mau putuputuraa Kerisetiano, te farereiraa i te feia maˈi e te mau hoa Kerisetiano ruhiruhia, e te tururaa i te haamoriraa mau i te pae moni.
4:3—E nafea te feia haamori o Iehova e ‘taataahi ai i te taata ino’? Eita te nunaa o te Atua i te fenua nei e ‘taataahi mau i te taata ino,’ oia hoi e apiti i te tupuraa o ta ˈna haavaraa i nia ia ratou. Te auraa râ e e apiti taipe te mau tavini a Iehova i te fenua nei ma te aau atoa i te oroa o te upootiaraa i muri aˈe i te mouraa o te ao a Satani.—Salamo 145:20; Apokalupo 20:1-3.
4:4—No te aha e mea tia ˈi ia ‘haamanaˈo tatou i te ture a Mose’? Aita te mau Kerisetiano i titauhia ia pee i taua Ture ra, e ‘ata râ te reira no te mau mea maitatai a muri atu.’ (Hebera 10:1) No reira, e nehenehe te haapaoraa i te Ture a Mose e tauturu ia tatou ia ite e nafea te mau mea i papaihia i roto e tupu ai. (Luka 24:44, 45) Hau atu â, e “hohoˈa o te mau mea o te raˈi ra” to roto i te Ture. No te taa i te mau haapiiraa e te haerea Kerisetiano, e mea faufaa roa ia haapii i te reira.—Hebera 9:23.
4:5, 6; MN—Te faahohoˈa ra ‘te peropheta Elia’ ia vai? Ua tohuhia e e rave “Elia” i te hoê ohipa faatiaraa, oia hoi e faaineine i te aau o te nunaa. I te senekele matamua T.T., ua faataa Iesu Mesia ia Ioane Bapetizo mai ia “Elia.” (Mataio 11:12-14; Mareko 9:11-13) Ua tonohia to ˈna apiti no teie tau ‘[hou] a tae mai ai taua mahana rahi mǎtaˈu o Iehova ra.’ Te Elia i teie tau, aita ˈtu ïa maori râ “te tavini haapao maitai e te paari.” (Mataio 24:45) Te rave maite nei teie pǔpǔ Kerisetiano faatavaihia i te ohipa faatiaraa pae varua.
Haapiiraa no tatou:
3:10. Te oreraa e horoa na Iehova i te mea maitai roa ˈˈe, o te faaereraa ïa ia tatou iho i ta ˈna haamaitairaa.
3:14, 15. No te hiˈoraa ino o te mau tahuˈa, ua haamata te mau ati Iuda i te hiˈo i te taviniraa i te Atua ei mea faufaa ore. Ia riro te feia e hopoia ta ratou i roto i te amuiraa Kerisetiano ei hiˈoraa maitai e tia ˈi.—Petero 1, 5:1-3.
3:16. E tapao Iehova i te iˈoa o te feia e mǎtaˈu ra ia ˈna e e tapea ra i to ratou haapao maitai ia ˈna. E haamanaˈo oia ia ratou e e faaherehere ia ratou ia haamou oia i te ao ino a Satani. No reira, eiaha roa ˈtu tatou e aueue i roto i ta tatou faaotiraa papu e tapea i to tatou taiva ore i te Atua.—Ioba 27:5, MN.
4:1. I te mahana e faˈi ai te taata i ta ratou hopoia ia Iehova, hoê â faahopearaa to “te amaa” e “te tumu”—hoê â haavaraa i nia i te mau tamarii rii e to ratou mau metua. E hopoia iho â ta te mau metua i nia i ta ratou mau tamarii rii! E titauhia ia tutava rahi te mau metua tane e metua vahine Kerisetiano i te imi i te farii maitai a te Atua e ia tapea maite i te hoê roo maitai i to ˈna aro.—Korinetia 1, 7:14.
“A mǎtaˈu i te Atua mau”
O vai te faaorahia i te “mahana rahi mǎtaˈu o Iehova”? (Malaki 4:5) Te na ô ra Iehova e: ‘O outou tei mǎtaˈu mai i to ˈu nei iˈoa, e hiti mai ïa te mahana parau-tia ia outou ma te ora i raro aˈe i to ˈna pererau; e haere hoi outou i rapae, e e tupu outou mai te kafa faaamu o te fare ra.’—Malaki 4:2.
E hiti mai ‘te mahana parau-tia’ ra o Iesu Mesia i nia i te feia o te mǎtaˈu faatura ra i te iˈoa o te Atua, e e fanaˈo ratou i te farii maitai a Iehova. (Ioane 8:12) E “ora” atoa ratou “i raro aˈe i to ˈna pererau”—te faaoraraa i te pae varua i teie nei e te faaoraraa taatoa i te pae tino, feruriraa e huru aau i roto i te ao apî a te Atua. (Apokalupo 22:1, 2) No to ratou oaoa iti rahi, “mai te kafa faaamu” to ratou huru. Ma tera mau haamaitairaa i mua ia tatou, e pee anaˈe i te aˈoraa a te arii Solomona: “A mǎtaˈu i te Atua mau e a haapao i ta ˈna mau faaueraa. O te hopoia taatoa hoi te reira a te taata.”—Koheleta 12:13, MN.
[Hohoˈa i te api 28]
Te peropheta Malaki, te hoê tavini itoito rahi e te paieti a te Atua
[Hohoˈa i te api 31]
Ia au maite ta tatou haapiiraa ˈtu i te Bibilia e tia ˈi
[Hohoˈa i te api 31]
E faatura te mau tavini a Iehova i ta ratou faufaa faaipoiporaa