Iesu, to ˈna oraraa e ta ˈna taviniraa

Ua riro o Iesu ei tumu no te hoê aimǎrôraa

I MURI noa ˈˈe i to ˈna fariiraahia i te fare o Simona, ua tere atura o Iesu no te piti o te taime e poro i Galilea. I to ˈna tere-matamua-raa ˈtu i taua fenua ra, ua apee mai ta ˈna mau pǐpǐ matamua, oia hoi o Petero, o Anederea, o Iakobo e o Ioane, ia ˈna. I teie nei râ, ua haere mai na aposetolo 12 e vetahi mau vahine, o Maria i Magadala, o Tutana e o Ioana, e rave ohipa hoi ta ˈna tane na te arii ra o Heroda.

A haere noa ˈtu ai te taviniraa a Iesu i mua, rahi noa atoa te aimǎrôraa no nia i ta ˈna ohipa. Ua afaihia maira te hoê taata tei uruhia e te mau demoni, e matapo atoa e te vava, ia Iesu ra. Faaora ˈtura Iesu ia ˈna, ite atura e parau ihora taua taata ra inaha, ua ora mai oia i te faatîtîraa a te mau demoni, ua maere roa ˈˈera te feia rahi roa. Ua na ô aˈera hoi ratou e: “O te Tamaiti teie a Davida?”

Ua putuputu maira te taata e rave rahi, na pihai iho i te nohoraa a Iesu e aita ˈtura i tia i ta ˈna mau pǐpǐ e o ˈna iho ia amu i te maa. Taa ê atu i te feia e aniani ra e o ˈna anei “te Tamaiti a Davida” e tiai-noa-hia ra, te vai ra te mau papai parau e te mau Pharisea tei haere mai Ierusalema mai no te faahapa ia ˈna. Hau atu, a ite ai to ˈna mau fetii i te arepurepu rahi ta Iesu i faatupu, haere maira ratou no te haru ia ˈna. Eaha hoi te tumu?

Aore â hoi te mau taeae o Iesu i tiaturi e o ˈna te Tamaiti a te Atua. Hau atu, mea fifi roa na ratou ia tiaturi e ua faatupu o Iesu, ta ratou hoi i ite i te paariraa i Nazareta, i teie huru arepurepuraa e teie aimǎrôraa rahi. No reira, manaˈo atura ratou e ua roohia o ˈna i te tahi maˈi ino mau i te pae no te feruriraa. “Ua aoaoahia oia nei”, o ta ratou ïa i parau, e ua hinaaro aˈera ratou e haru ia ˈna.

Teie râ, ua faaora mau â o Iesu i te taata tei uruhia e te mau demoni ra. Ua papu maitai i te mau papai parau e te mau Pharisea e eita ta ratou e nehenehe e faahua parau e aita te mau semeio atoa a Iesu i tupu, e oia atoa teie semeio hopea nei. No reira ratou i parau atu ai i te nunaa no te faahapa ia Iesu e: “Aita teie nei taata i tiavaru i te demoni i rapae, maori râ i te mana o te demoni rahi ra o Belezebuba.”

Ua ite râ Iesu i to ratou manaˈo, e ua pii aˈera o ˈna i te mau papai parau e te mau Pharisea e ua na ô atura: “Te basileia i amaha e rave ia ˈna ihora, e pau ïa; e te oire e te fetii i amaha e rave ia ˈna ihora, eita ïa e mau. E ia tiavaru Satani ia Satani i rapae, ua amaha oia e rave ia ˈna iho; eaha ihora to ˈna basileia e mau ai?”

Auê ïa tatararaa tano maitai e! I te mea e te parau ra te mau Pharisea e ua tiavaru vetahi o ratou i te mau demoni, ua na ô faahou atura o Iesu e: “E te tiavaru nei au i te demoni i rapae au i te mana o Belezebuba, i te mana o vai ra ta ta outou tamarii e tiavaru i rapae na?” Inaha, e nehenehe hoi ta ratou parau faahaparaa ia Iesu, e faahoˈihia ˈtu i nia ia ratou. Ua parau atura o Iesu e: “Te tiavaru nei râ vau i te demoni i rapae i te Varua o te Atua, ua roohia iho nei outou e te hau o te Atua.”

Ma te faataa mai i te tahi hohoˈa no te faaite e ua riro to ˈna mana no te tiavaru i te mau demoni ei haapapuraa e e mana to ˈna i nia ia Satani, ua na ô aˈera o Iesu e: “Eaha hoi e tia ˈi ia tomo i te fare o te taata etaeta ra a haru ai i ta ˈna taoˈa, ia ore ia mata i te tapea i taua taata etaeta ra? ia na reira râ e tia ˈi ïa ia ˈna ia haru i to ˈna fare. E ere oia i to ǒ nei ia ˈu nei, no ǒ mai ïa: e o tei ore i haaputu atoa mai, ua haaapurara ïa.” Ua patoi uˈana aˈera te mau Pharisea ia Iesu, ma te haapapu maitai mai hoi e e tavini ratou na Satani. Te haafariu ê atura hoi ratou i te mau ati Iseraela i te Mesia.

No reira, ua faaara ˈtura o Iesu i to ˈna mau enemi demoni ra e “eita râ te faaino i te Varua e faaorehia”. Ua faataa ˈtura oia e: “O te parau ino i te Tamaiti a te taata nei, e tia ïa ia faaore i ta ˈna hara; area te parau ino i te Varua Maitai ra, e ore ta ˈna e faaorehia, i teie nei ao, e e ore hoi i te ao a muri atu.” Ua rave mau â taua mau papai parau e taua mau Pharisea ra i teie huru hara te ore e tia ia faaorehia, i to ratou parauraa ma te ino mau e, o Satani te tumu o te hoê ohipa tei riro mau na hoi ei semeio no ǒ mai i te varua moˈa a te Atua ra. Mataio 12:22-32; Mareko 3:19-30: Ioane 7:5.

◆ Eaha te taa-ê-raa i rotopu i te piti o te tere o Iesu i Galilea e to ˈna tere matamua?

◆ No te aha te fetii o Iesu i tamata ˈi i te haru ia ˈna?

◆ Mea nafea to te mau Pharisea tamataraa i te haafaufaa ore i te mau semeio a Iesu, e mea nafea to Iesu pahonoraa ˈtu i ta ratou mau pariraa haavare?

◆ Eaha te hara ta taua mau Pharisea ra i rave, e no te aha?