E faatupu hua anaˈe na i te maitai i te mǎtaˈuraa ˈtu i te Atua
“E tamâ hua tatou ia tatou iho i te mau viivii atoa o te tino e te varua [feruriraa], ma te faatupu hua i te maitai i te mǎtaˈuraa ˈtu i te Atua.” — KORINETIA 2, 7:1.
1. Nafea tatou e ite ai e te faahanahana ra te mau melahi tiaraa teitei i te moˈaraa o Iehova?
O IEHOVA te Atua moˈa. I roto i te mau raˈi, te faahanahana nei te mau melahi tiaraa teitei ma te puai mau i to ˈna moˈaraa. “E moˈa, e moˈa, e moˈa, o Iehova sabaota, ua î te fenua atoa nei i to ˈna ra hanahana.” Tera hoi te mau parau hanahana mau a te mau seraphi ta te peropheta ra o Isaia i ite i roto i te orama, i te senekele VIII hou to tatou nei tau. I te hopearaa o te senekele I o to tatou nei tau, ua ite aˈera te aposetolo Ioane i te tahi mau orama no nia i te mea e tupu i to tatou nei tau, i te “mahana o te Fatu ra”. Ua ite aˈera oia e ua faaroo aˈera i na mea ora e maha e faahanahana ra ma te tuutuu ore i pihai iho i te terono o Iehova i te na ôraa e: “E moˈa, e moˈa, e moˈa, to te Fatu ra to te Atua Mana hope ra, o tei vai na, e te vai nei, e o te tae mai.” Ia faahiti ratou e toru taime i te parau ra moˈa, te tuu ra ïa taua mau varua i poietehia e Iehova, i te tapao i nia i te moˈaraa faito ore o te Poiete. — Isaia 6:2, 3; Apokalupo 1:10; 4:6-8.
Moˈaraa e faataa-ê-raa
2. a) Eaha na huru e piti o te moˈaraa, e nafea o Iehova ia riro ei Atua moˈa i roto i taua na tuhaa e piti nei? b) Mea nafea to Mose faahanahanaraa i te moˈaraa o Iehova?
2 Mai tei faaohipahia i roto i te Bibilia, te auraa o te parau ra moˈaraa, te faataa maira ïa i te parau no te huru, eiaha noa i te mea viivii ore i te pae faaroo, i te mea atoa râ i faataa-ê-hia, aore ra i haamoˈahia. E huru viivii ore to Iehova ia au i te faito teitei roa ˈˈe; ua taa ê roa oia i te tahi atu mau atua faufau atoa o te mau nunaa. O taua huru o to ˈna moˈaraa ra ta Mose i faahanahana ia ˈna i parau i roto i te hoê himene e: “O vai to te mau atua e au ia oe, e Iehova? o vai tei au ia oe, o tei hau ê i te maitai [moˈa] ra?” — Exodo 15:11.
3. E tia i te mau Iseraela atoa ia vai moˈa noa i roto i teihea tuhaa, e mea nafea to Iehova tautururaa ia ratou?
3 E titau na te Atua moˈa ra o Iehova i te mau ati Iseraela i Tahito ra, oia hoi to ˈna nunaa i nia i te fenua nei, ia riro atoa ratou ei mau taata moˈa. Eita noa taua titauraa ra e tano no te mau tahuˈa e no te mau ati Levi, e tano atoa râ no te nunaa taatoa. Ua na ô aˈera Iehova ia Mose e: “E parau atu i te amuiraa tamarii atoa a Iseraela ra, e na ô atu ia ratou, Ia moˈa outou, no te mea, te moˈa nei au, o to outou Atua ra o Iehova.” (Levitiko 19:2). No taua tumu ra, ua horoa ˈtura Iehova i te mau ati Iseraela ra i te tahi mau ture e tauturu ia ratou ia vai viivii ore noa i te pae varua, i te pae morare, i te pae no te feruriraa, i te pae tino e i te pae atoa no te mau oroa, inaha, e tano hoi taua huru viivii ore hopea nei i ta ratou haamoriraa i te sekene ra e, i muri aˈe, i te hiero.
Te hoê nunaa i faataa-ê-hia
4, 5. a) Na te aha i faariro i te nunaa Iseraela ei nunaa haamoˈahia? b) Eaha te titauhia i te Iseraela i te pae varua, e mea nafea to te aposetolo Petero haapapuraa mai i te reira?
4 A faatura noa ˈi oia i te mau ture a te Atua, ua faataa ê aˈera o Iseraela ia ˈna i te mau nunaa faufau e haaati ra ia ˈna. Ua taa ê atoa oia mai te hoê nunaa i faataa-ê-hia, aore ra i haamoˈahia, no te taviniraa a Iehova, te Atua moˈa. Ua na ô atura Mose ia ˈna e: “E nunaa moˈa hoi oe no to Atua no Iehova; ua maitihia oe e to Atua ra e Iehova, ei pǔpǔ taata hau ê no ˈna iho, eiaha ˈtu te mau taata atoa e parahi i te ao nei.” — Deuteronomi 7:6.
5 E titau-atoa-hia ia Iseraela i te pae varua ia ore oia ia viivii e ia faataa ê atoa mai oia ia ˈna i te mau nunaa. Ua papai atura te aposetolo Petero i te mau kerisetiano i maitihia no te riro mai ei Iseraela i te pae varua e: “Mai te tamarii faaroo ra, eiaha e faaau ia outou iho i to outou mau hinaaro i mutaa iho i to outou mauaraa ra; mai ia ˈna hoi i parau mai ia outou e moˈa ra, ia moˈa atoa outou i ta outou mau parau atoa: ua oti hoi i te papaihia e, Ia maitai [moˈa] outou, te maitai [moˈa] nei hoi au.” — Petero 1, 1:1, 14-16.
6, 7. a) Eaha te taiohia i roto i te Apokalupo pene 7 no nia i te mau melo o te “feia rahi roa”, e eaha hoi te titauhia ia ratou ma te tano mau hoi? b) Eaha ta tatou e hiˈopoa i roto i te mau paratarapha i muri nei?
6 Te faataa maira te pene 7 o te Apokalupo i te parau no te mau melo o te “feia rahi roa” “i te tia-noa-raa i mua i te terono [o Iehova], e i mua i te Arenio, ma te ahu teatea i te ahuraa”. E taiohiâ e “ua horoi i to ratou ahu, e ua teatea, i te toto o te Arenio ra”. (Apokalupo 7:9, 14.) Te faahohoˈa ra to ratou ahu teatea i te mea e ua faariro Iehova ia ratou ei mau taata viivii ore e te parau-tia maoti te faaroo ta ratou e atuatu ra i roto i te toto taraehara o te Mesia. No reira, e tia i te mau kerisetiano faatavaihia e tae noa ˈtu hoi te mau “mamoe ê atu” ia vai viivii ore noa i te pae varua e i te pae morare no te haamori ia Iehova ia au i te hoê huru e farii mai ai oia ia ratou. — Ioane 10:16.
7 E tuatapapa anaˈe na i teie nei, nafea râ te mau tavini o Iehova ia haapao maitai i to ratou huru viivii ore e i to ratou huru moˈa i mutaa ihora, e no te aha hoi taua atoa mau faaueraa tumu ra e tano ai i te nunaa o te Atua i to tatou nei tau.
Te vai-viivii-ore-raa i te pae varua
8. Eaha te mau tumu te mau ati Iseraela e tia ˈi ia faataa ê ia ratou i te mau haapaoraa kanaana?
8 E tia i te mau ati Iseraela ia faaatea ê roa mai ia ratou i te mau peu faaroo viivii a te tahi atu mau nunaa. Na roto i te arai o Mose, ua na ô atura Iehova ia Iseraela e: “E ara o te faaau oe i te parau i to taua fenua ta oe e haere na; o te riro hoi ei tiaiaraa no oe na: e taihitumu râ oe i ta ratou mau fata, e vavahi i ta ratou mau tii [e faaohipahia na no te haamoriraa faufau mau ra o te melo taatiraa], e tâpû hoi i te mau ururaau: eiaha hoi oe e haamori i te tahi atua ê; e Atua tahoo hoi Iehova, e iˈoa tahoo hoi to ˈna [aore ra, “e Atua e faahepo e ia haamorihia o ˈna anaˈe ra”, Traduction du monde nouveau, neneiraa beretane e faahororaa o te matahiti 1984, nota]: o te faaau hoi oe i te faufaa i te taata no te reira fenua, o te haere hoi ratou e haapeu i to ratou mau atua, a hopoi ai i te tusia na ratou ra.” — Exodo 34:12-15.
9. Eaha te mau faaueraa papu maitai i faauehia ˈtu i te toea haapao maitai tei faarue ia Babulonia i te matahiti 537 hou to tatou nei tau?
9 Tau senekele i muri aˈe, ua faaurua maira Iehova ia Isaia ia faaite atu oia i teie mau parau tohu i te toea o te mau Iseraela haapao maitai e hoˈi mai na Babulonia mai i te fenua ra o Iuda, i te na ôraa ˈtu e: “A haere, a haere, haere outou i rapae; eiaha e rave noa ˈtu i te mea viivii ra, e haere outou i rapae mai rotopu mai ia ˈna ra, ia mâ outou, e tei hopoi i te mau farii a Iehova ra [maoti hoi te reira te haamoriraa viivii ore e faahoˈihia mai ai i te hiero no Ierusalema]!” — Isaia 52:11.
10, 11. a) Eaha te mau faaueraa mai te reira te huru i horoahia ˈtu i te mau Iseraela i te pae varua i te senekele I? b) Mea nafea taua mau faaueraa ra i te faaohipa-taa-ê-raahia mai te matahiti 1919 e te matahiti 1935, e mea nafea ˈtu â te mau kerisetiano faatavaihia e to ratou mau hoa i te tapearaa i to ratou huru viivii ore i te pae varua?
10 E tia atoa i te mau ati Iseraela i te pae varua e to ratou mau hoa ia haapao maitai ia ore ratou e viivii i te mau haapaoraa haamori idolo o teie nei ao. Ua papai atura te aposetolo Paulo i te mau kerisetiano faatavaihia o te amuiraa no Korinetia e: “E eaha to te hiero o te Atua ra atiraa ˈtu i te idolo? o tei hiero hoi outou o te Atua ora ra; ta te Atua i parau maira e, E parahi mau vau i roto ia ratou, e hahaere au i roto ia ratou; e ei Atua vau no ratou, e ei taata hoi ratou no ˈu. E teie nei, te na ô maira Iehova, E haere mai outou i rapae au mai roto mai ia ratou ra, ia taa ê outou, e eiaha e rave noa ˈtu i te mea viivii ra, e na ˈu e farii atu ia outou.” — Korinetia 2, 6:16, 17.
11 Mai te matahiti 1919 mai, ua tiamâ mai te mau melo o te toea o te mau melo faatavaihia e tei tamâhia i te mau haamoriraa viivii e te haamori idolo atoa a Babulonia Rahi (Malaki 3:1-3). Ua pahono ratou i teie titauraa a te Atua e na ô ra e: “A haere ê mai na outou i rapae, e au mau taata e, ia ore outou ia riro ei rave atoa i ta ˈna ra mau hara, ia ore outou ia pohe atoa i to ˈna ra mau pohe.” (Apokalupo 18:4). Mai te matahiti 1935 mai, ua farii atoa te hoê nahoa rahi “mamoe ê atu” e rahi noa ˈtura, i teie titauraa e ua faarue i te haapaoraa viivii no roto mai ia Babulonia. Te ara atoa nei te mau kerisetiano faatavaihia e to ratou mau hoa i nia i to ratou huru viivii ore i te pae varua ma te ore roa ˈtu e hiˈopoa noa ˈˈe i te mau huru feruriraa haavare a te mau apotata. — Ioane 10:16; Ioane 2, 9-11.
Te huru viivii ore i te pae morare
12. a) Na roto i teihea mau ture to Iehova faateiteiraa i te faito morare o te mau Iseraela i nia ˈˈe i te faito o te mau nunaa e haaati ra ia ratou? b) Eaha te mau ture taa ê mau i faataahia no te mau tahuˈa?
12 Maoti te faufaa a te Ture, ua tuu aˈera o Iehova i te faito morare o te mau ati Iseraela i nia roa ˈˈe i te faito o te mau nunaa faufau e haaati na ia ratou. E mau taatiraa paruruhia te faaipoiporaa e te utuafare i Iseraela. Te opani ra te hitu o na Ture Hoê Ahuru i te faaturi oia hoi mai te poreneia, i faautua-etaeta-roa-hia (Deuteronomi 22:22-24). E paruru atoa na te Ture i te mau paretenia (Deuteronomi 22:28, 29). E faature atoa na te tahi mau ture taa ê papu maitai i te faaipoiporaa o te mau tahuˈa. No nia i te tahuˈa rahi, e tia ia ˈna ia rave ei vahine na ˈna te hoê paretenia viivii ore. — Levitiko 21:6, 7, 10, 13.
13. Ua faaauhia te mau melo a te “vahine” a te Mesia ia vai, e no te aha?
13 E “vahine” atoa ta Iesu Mesia, te Tahuˈa Rahi ra, oia hoi na 144 000 kerisetiano faatavaihia, i faaauhia i te mau “paretenia”. (Apokalupo 14:1-5; 21:9.) Aita ratou e haaviivii ra ia ratou i te ao a Satani e te vai viivii ore nei hoi ratou i te pae no te mau haapiiraa e i te pae morare. Ua papai atura te aposetolo Paulo i te mau kerisetiano faatavaihia no Korinetia e: “Te manaˈonaˈo nei au ia outou i te manaˈonaˈo Atua; ua momoˈahia outou e au i te tane hoê, ia pûpû atu vau ia outou ei paretenia viivii ore i te Mesia ra.” (Korinetia 2, 11:2). Ua papai â oia e: “Mai te Mesia atoa i aroha i te ekalesia, e ua horoa ia ˈna iho ei taui. Ia haamaitai e ia tamâ oia ia ˈna, i te horoiraa pape, e te parau i aˈohia ra, ia tuu oia ia ˈna i mua i tana aro, ei ekalesia hinuhinu, ma te porao ore, e te miomio ore, e te mau mea atoa mai te reira te huru: ia moˈa râ e te ino ore.” — Ephesia 5:25-27.
14, 15. a) E tiâ i te pǔpǔ o te vahine ia vai viivii ore noa i roto i teihea tuhaa, e eaha te irava bibilia e haapapu maira i te reira? b) No te aha e nehenehe ai e haapapu e e tano atoa te mau faaueraa no nia i te vai-viivii-ore-raa i te pae morare no te mau mamoe ê atu?
14 E tia i te mau melo o te vahine a te Mesia ia vai viivii ore eiaha noa i te pae varua, i te pae morare atoa râ. Ua na ô aˈera Paulo e: “Eiaha e vare; e ore hoi te taiata, e te haamori idolo, e te faaturi (...) e parahi i te basileia o te Atua. Mai te reira hoi te hoê pae o outou na, ua horoihia râ outou, ua faataahia râ outou.” — Korinetia 1, 6:9-11.
15 Te papu-maitai-hia ra e e tano atoa taua mau faaueraa ra no nia i te vai-viivii-ore-raa i te pae morare, i te mau mamoe ê atu ia hiˈohia te huru taata ta Iehova e ore roa ˈtu e farii i roto i te raˈi apî e i roto i te fenua apî ta ˈna i tǎpǔ mai e e haamau oia. Teie ta tatou e taio: “Area (...) te feia faufau ra, e te taparahi taata ra, e te faaturi ra (...), e tufaa ta ratou tei te roto auahi e te gopheri e ama ra: oia te piti o te pohe ra.” — Apokalupo 21:1, 8.
Te hoê faaipoiporaa hanahana mau
16, 17. a) Eaha te mau irava bibilia e faaite maira e aita e faahepohia ra te faaea-taa-noa-raa no te vai viivii ore noa i te pae morare? b) Nafea te hoê kerisetiano e nehenehe ai e faaite e te mǎtaˈu ra o ˈna i te Atua ia maiti oia i te hoê hoa no ˈna, e no te aha e mea maamaa mau â ia ore roa ˈtu e tâuˈa i te faaueraa a te aposetolo?
16 Aita te mau melo faatavaihia o te pǔpǔ a te vahine e te mau mamoe ê atu e faahepohia ra ia ore ratou e faaipoipo no te vai viivii ore noa i te pae morare. Aita roa ˈtu te mau Papai e turu ra i te faaea-taa-noa-raa faahepohia (Timoteo 1, 4:1-3). Aita roa ˈtu e huru viivii to roto i te mau taatiraa i te pae tino i roto i te faaipoiporaa. Te na ô ra hoi te Parau a te Atua e: “Ia haamaitaihia te faaipoipo i te taata atoa ra, e te viivii ore hoi te roi; e haava hoi te Atua i te poreneia e te faaturi ra.” — Hebera 13:4.
17 Teie râ, te kerisetiano e hinaaro e ‘faatupu hua i te maitai i te mǎtaˈuraa ˈtu i te Atua’, ua ite oia e eita ta ˈna e nehenehe e faaipoipo ia ˈna i te mau huru taata atoa ta ˈna e hinaaro. Na mua iti noa ˈˈe oia e aˈo atu ai i to ˈna mau hoa kerisetiano ia ‘tamâ hua ia ratou i te mau viivii atoa o te tino e o te varua [feruriraa], ma te faatupu hua i te maitai i te mǎtaˈuraa ˈtu i te Atua’, ua papai te aposetolo Paulo e: “Eiaha outou ia amui-au-ore-hia i te feia faaroo ore ra: eaha to te parau-tia auraa i te parau-tia ore? (...) e eaha to te taata faaroo ra faufaa i te taata faaroo ore?” (Korinetia 2, 6:14, 15; 7:1). I te mea hoi e no roto oia i te nunaa i faataa-ê-hia e te viivii ore a Iehova, e faatura ïa te hoê tane kerisetiano aore ra te hoê vahine kerisetiano e hinaaro ra e faaipoipo i te faaueraa a te aposetolo e na ô ra e “ia au râ i te Fatu”. E maiti ïa oia ei hoa no ˈna te hoê taata tei pûpû ia ˈna no Iehova e te tavini ra ia ˈna ma te haapao maitai (Korinetia 1, 7:39). I to tatou nei tau mai i mutaa ihora, papu maitai e mea maamaa mau â no te mau tavini a te Atua ia ore roa ˈtu e tâuˈa i taua aˈoraa bibilia nei (hiˈo Deuteronomi 7:3, 4; Nehemia 13:23-27). Ia na reira tatou, aita roa ˈtu ïa tatou e faaite ra e te mǎtaˈu ra tatou i to tatou Fatu rahi ra o Iehova. — Malaki 1:6.
18. Nafea ˈtu â te mau kerisetiano e nehenehe ai e tapea i te huru maitai o to ratou faaipoiporaa?
18 I te tahi aˈe pae, i Iseraela, e taotia na te tahi mau ture i te mau taatiraa i te pae tino i rotopu i na hoa. Eita roa ˈtu te hoê tane e taoto i ta ˈna vahine mai te peu e ua pohehia oia i to ˈna maˈi avae (Levitiko 15:24; 18:19; 20:18). I Iseraela i Tahito ra, e tia i te mau tane ia haavî ia ratou e ia faaite i to ratou here. E iti mai anei ïa te faatura o te mau kerisetiano i ta ratou mau vahine? Te faaitoito ra te aposetolo Petero ia ratou ia parahi noa ia ratou ra “ma te ite”, oia hoi ma te tâuˈa i to ratou naturaraa i faaauhia i te hoê “farii paruparu ra”. — Petero 1, 3:7.
Ia haere na tatou na nia i “te Eˈa Moˈa”
19, 20. a) A faataa mai na i te huru o te eˈa aano e peehia nei e te rahiraa o te mau taata. b) Na te aha e faataa ê i te nunaa o Iehova i te ao a Satani? c) Te hahaere nei te nunaa o Iehova na nia i teihea eˈa rahi, e afea râ hoi te reira i te matararaa, e o vai ma anaˈe te nehenehe e haere na reira?
19 Ia au i te mau mea ta tatou i tuatapapa aˈenei, te vai noa râ te hoê patu rahi e faataa ê ra i te nunaa o Iehova i te ao a Satani. Te farii nei hoi te amuiraa o te mau mea nei i te mau huru ohipa atoa e ua riro hoi oia ei tâuˈa no te mau mea e navenave ai ra. Te na ô ra Iesu e: “E tomo na te uputa pirihao; te atea nei hoi te uputa e te aano nei te eˈa e tae atu ai i te pohe; e e rave rahi tei na reira i te tomo.” (Mataio 7:13). Te tomo nei te rahiraa o te taata na te eˈa aano ra, e ia au i te mau parau a te aposetolo Petero, i reira e itehia ˈi “te peu tiaâ ra, e te hinaaro tia ore ra, e te inu rahi, i te uaina ra, e te amuiraa hauti ra, e te faataero i te ava ra, e te mau peu atâta a te idolo ra”, e aratai i te hoê “[vahi hairiiri ra]”. (Petero 1, 4:3, 4.) E to ˈna faahopearaa, o te pohe ïa.
20 Area te mau tavini a te Atua, te haere nei ratou na nia i te hoê eˈa taa ê roa, te hoê eˈa viivii ore e ravehia nei e te mau taata viivii ore. Ua faaite atea mai te peropheta ra o Isaia e e matara taua eˈa ra i te tau hopea, i te na ôraa mai e: “Ei reira hoi te hoê eˈa rahi, e e eˈa hoi, e mairihia hoi te reira, o te eˈa moˈa: aore roa e taata viivii e na reira i te haere.” (Isaia 35:8). No nia i taua parau tohu ra, teie ta tatou e taio i roto i te buka ra Sécurité universelle sous le Règne du “Prince de paix”: “I te matahiti 1919 ra, ua matara aˈera te hoê eˈa rahi i mua i te mau tavini oaoa mau a te Atua. Te feia e hinaaro ra e riro ei mau taata moˈa i mua i te aro o Iehova, ua haere ïa ratou na te ‘eˈa rahi’, ‘te Eˈa Moˈa’. (...) E noa ˈtu â ïa e fatata roa ‘te hopea o te amuiraa o te mau mea nei’ i te hope, te matara noa râ taua ‘eˈa rahi’ ra ta te Atua i haapao. Te rave nei hoi (...) e rave rahi mau nahoa rahi taata aau mehara i te eˈa o te paradaiso i te pae varua, ‘te Eˈa Moˈa’a.”
21. Nafea e no te aha te mau tavini a Iehova e tia ˈi ia faataa ê ia ratou i te ao a Satani, e eaha ta tatou e tuatapapa i roto i te tumu parau i mua nei?
21 Oia mau, i to tatou nei tau, ua riro te toea faatavaihia o te mau Iseraela i te pae varua e tae noa ˈtu i to ratou mau hoa, te mau mamoe ê atu, ei nunaa i faataa-ê-hia i te ao a Satani, e aita roa ˈtu hoi te parau no te moˈaraa e auraa no taua ao ra. Aita roa ˈtu e mea moˈa no te nahoa rahi taata i raro aˈe i te mana a te Diabolo e pee nei i ‘te eˈa aano e te atea hoi e aratai tia i te pohe’. E mau taata viivii ratou, eiaha noa i te pae varua e i te pae morare, e pinepine atoa i te pae tino, no te mea aita ratou e haapao ra ia ratou, ma te ore hoi e faarahi roa ˈtu â i te parau. Inaha, teie te aˈoraa ta te aposetolo Paulo i horoa mai: “E tamâ hua tatou ia tatou iho i te mau viivii atoa o te tino e te varua [feruriraa], ma te faatupu hua i te maitai i te mǎtaˈuraa ˈtu i te Atua.” (Korinetia 2, 7:1). Nafea râ te mau tavini a te Atua e tia ˈi ia haapao maitai i to ratou huru viivii ore i te pae no te feruriraa e i te pae tino? O ta tatou ïa e tuatapapa i roto i te tumu parau i mua nei.
[Nota i raro i te api]
a Pene 16, api 134, 135.
Ei haapoto-noa-raa
◻ Eaha na huru e piti o te moˈaraa, e no te aha e nehenehe e parau ai e tei nia i te faito teitei roa ˈˈe te huru moˈaraa o Iehova?
◻ E tia i te mau ati Iseraela ia riro ei nunaa moˈa i roto e piti tuhaa: Teihea ïa mau tuhaa?
◻ Eaha tei titauhia i te mau Iseraela i te pae varua e i to ratou mau hoa, oia hoi te mau mamoe ê atu?
◻ Eaha te faaohiparaa a te mǎtaˈu o te Atua i nia i te maitiraa i te hoê hoa faaipoipo?
◻ Eaha na eˈa e piti e matara ra i mua i te mau taata, e no te aha e tia mau â ia tatou ia maiti i roto i na eˈa e piti?
[Hohoˈa i te api 13]
Te na ô ra te Parau a te Atua e: “Ia haamaitaihia te faaipoipo.”