“Eiaha e haaviivii ia ˈna”

UA AFAI-Ê-HIA Daniela mai Iuda mai. Ua haru to Babulonia i to ˈna utuafare e e rave rahi atu â utuafare, e ua hopoihia ratou i te tuhaa fenua i Babulonia, fatata paha maha avaˈe no te tapae i ǒ. I rotopu i teie feia hopoi-ê-hia, ua ravehia Daniela e te tahi atu feia apî mai to ratou utuafare e ua hopoihia i te oire pu. Ua faahoa Daniela e e toru atu â taurearea Hebera: o Hanania, Misaela e Azaria. Ua fanaˈo teie mau taurearea i te hoê faaineineraa ia riro mai ratou mai to Babulonia.

Na mua roa, ua faaue Nebukanesa te arii no Babulonia, i ta ˈna tia mana rahi Asepenaza ia taui i to ratou iˈoa. E rave rahi iˈoa Hebera o tei faahanahana i te Atua mau. Ei hiˈoraa, “Daniela” te auraa “O te Atua to ˈu Haava.” I Babulonia râ, e rave rahi taata o te horoa nei i te iˈoa no te arue i to ratou atua hape. No reira, ua tuuhia na Daniela i te hoê iˈoa Babulonia, o Beletesazara. Te auraa o teie iˈoa o “Paruru i te ora o te arii,” e pure teie no te atua hape ra o Bela. Ua hinaaro atoa te arii ia haamata teie mau taurearea ia feruri e ia haa mai to Babulonia. E ua faaue o ˈna i ta ˈna mau tavini ia haapii ia ratou, ia paraparau e ia papai i te reo o to Babulonia. E nehenehe ïa ratou e tavini ia ˈna i te aorai. E haamataraa noa te reira.

Ua faaue te arii ia Asepenaza ia haapao i te faaineineraa a teie feia apî. Ua hinaaro te arii ia amu ratou i te maa faahiahia e ia inu i te uaina maitai roa. Peneiaˈe ua au vetahi taurearea i teie faanahoraa. Ua taa râ ia Daniela mea tia ia ˈna e to ˈna e toru hoa Hebera ia vai ara. Eaha te ohipa e haapeapea ra ia Daniela?

Ua ite Daniela aita te Ture a Iehova e farii ra ia amu o ˈna i te iˈo e te toto, oia atoa te tahi o te mau maa ta to Babulonia e amu ra. Ua titauhia ia ˈna ia vai ara, no te mea ua faaohipahia te tahi o te mau maa no te haamoriraa hape. E maite peu e inu rahi o ˈna i te uaina e fifi oia no te rave i te faaotiraa tano. No reira, ua taa ia ˈna e ua tamata to Babulonia i te turai ia ratou ia faaroo ore ia Iehova, ma te horoa ˈtu i te maa e te uaina.a

Mea papu, ua pure Daniela e rave rahi taime ia Iehova e ua ani o ˈna i te manaˈo o to ˈna e toru hoa. Ua ‘faaoti o ˈna i roto i to ˈna aau’ e haa no te faaoaoa ia Iehova. I muri iho ma te faatura rahi, ua ani Daniela ia Asepenaza eiaha ratou e amu i te maa ta te arii i horoa. To pihai iho Iehova ia Daniela e ua turai o ˈna i te tia mana rahi ia farii i ta Daniela aniraa. Ua haapeapea râ Asepenaza ia maˈihia Daniela e to ˈna mau hoa, mai te peu aita ratou e amu i te maa tei horoahia na ratou. Ua ite Asepenaza e faautuahia o ˈna na Nebukanesa mai te peu e maˈihia ratou. Ua faaroo Daniela i ta Asepenaza i parau, e ua feruri o ˈna i ta ˈna e to ˈna e toru hoa e nehenehe e rave. E ma te itoito ua horoa Daniela i te hoê ravea i te tia mana rahi o Asepenaza ma te parau: “A tamata na hoê ahuru mahana: a horoa mai i te maa tupu ia amu matou e te pape ia inu. I muri iho, e hiˈo oe i to matou hohoˈa e to te tahi atu mau taurearea o te amu ra i te maa a te arii, o vai te mea oraora aˈe.” Ua farii te tiai i teie aniraa!

Ua itehia ahuru mahana i muri iho, e mea oraora maitai na maha taurearea i te tahi atu. No reira, ua manuïa teie aniraa e ua vaiiho-noa-hia ratou ia amu i te maa tupu e ia inu i te pape. Mea papu, ua haamaitai Iehova i te faaroo e te itoito o Daniela e to ˈna mau hoa. Aita roa ˈtu ratou i haamoˈe i teie tupuraa.

Mai ta te pene e faaite i muri nei, ua titauhia te itoito no te mau hoa o Daniela i roto i te tahi atu tupuraa atâta. Ua faaitoito noa Daniela i te roaraa o to ˈna oraraa tae roa ˈtu i to ˈna poheraa, fatata 100 matahiti to ˈna. Ei hiˈoraa, i to Nebukanesa moemoeâraa e piti taime, ua titauhia te itoito ia Daniela no te faataa i te arii e tupu te tahi mau ohipa ino i muri mai. E rave rahi matahiti i muri iho i to Belesazara riroraa mai ei arii, ua faataa Daniela i te auraa o te papai i nia i te pǎpai, oia hoi e haamouhia o Belesazara. I to Daniela ruhiruhiaraa, ua tuuhia o ˈna i roto i te hoê apoo mea rahi te liona. I roto i tera mau tupuraa, ua faaite noa Daniela i te itoito faahiahia mau mai ta ˈna i rave i to ˈna apîraa. No reira ua parau hoê o te mau melahi a Iehova, “e taata faufaa” o Daniela!

A taio i te aamu Bibilia:

• Daniela 1:1-21; 5:12; 10:11

A aparau:

Mea nafea to Daniela faaiteraa i te itoito?

A faahohonu atu â

1. 1. E nafea tatou e haapapu ai te taa-ê-raa i rotopu i te Daniela 1:1 e te Ieremia 25:1? (dp 18-19 par. 14-15)

   Ta oe pahonoraa

2. 2. E nafea te hoê papairaa no Babulonia e haapapu ai te vai mau ra “te vairaa taoˈa a to [Nebukanesa] atua”? (Dan. 1:2; it “Vairaa taoˈa” par. 3) A

   Ta oe pahonoraa

   

   © The Trustees of the British Museum. Licensed under CC BY-NC-SA 4.0. Source. Tauiraa: Ua tarenihia

3. 3. Eaha ta te mau tahuˈa o tei rave i te peu manamana i rave i Babulonia? (Dan. 1:20; it “Peu manamana e tahutahu” par. 2-6) B

   Ta oe pahonoraa

   

4. 4. Eaha paha tei tuuhia i roto i te maa tei horoahia na Daniela e to ˈna e toru hoa? (Dan. 1:12; dp 40 par. 25)

   Ta oe pahonoraa

A feruri i te mau haapiiraa

• E nafea te feia apî e pee ai i te hiˈoraa o Daniela, noa ˈtu aita ratou to pihai iho i to ratou utuafare?

  Ta oe pahonoraa

• Eaha hoê o te mau ohipa tei tauturu ia Daniela ia itoito i mua i te hoê fifi? (Dan. 1:8) E nafea tatou e pee ai i to ˈna hiˈoraa? C

  Ta oe pahonoraa

  

• I roto i teihea ˈtu â tuhaa e nehenehe ai oe e pee i te itoito o Daniela i roto i to oe oraraa?

  Ta oe pahonoraa

A huti mai i te haapiiraa

• Eaha ta teie aamu e haapii mai no nia ia Iehova?

  Ta oe pahonoraa

• E nafea teie aamu e tuati ai i te opuaraa a Iehova?

  Ta oe pahonoraa

• Eaha ta ˈu e hinaaro e ani ia Daniela i te tia-faahou-raa?

  Ta oe pahonoraa

A haapii hau atu â

A mataitai i te hoê video o te mau tupuraa i roto i teie aamu Bibilia.

Daniela: Hoê oraraa niuhia i nia i te faaroo (Tuhaa 1) (Tuhaa video) (13:07)

E nafea te feia apî e pee ai i te itoito e te taiva ore o Daniela?

“Eaha te haapii mai i te hiˈoraa o Daniela?” (w23.08 2-7)